Ezekɩyɛɛlɩ 36:1-38
36 «Piyele nɛ ña yɔ, ɛyʋ pɩyalʋ, yɔɔdɩ natʋ tɔm pɩlɩɩnɩ Izrayɛɛlɩ pʋŋ yɔɔ se: “Oo Izrayɛɛlɩ pʋŋ, iwelisi Yehowa tɔm.
2 Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Koyindu yɔɔdɩ mɩ-tɔm se: “Ahaaŋ! Halɩ caanaʋ taa lona kʋkʋya maɣmaɣ pɩsɩ ɖa-pʋyʋ!”’”+
3 «Pʋyɔɔ lɛ, yɔɔdɩ natʋ tɔm se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Papɩsɩ-mɩ njɛyɛ nɛ poyooni-mɩ hɔɔlɩŋ tɩŋa taa se ɩpɩsɩ ajɛɛ taa ñɩma mba pɩkazaa yɔ* pa-pʋyʋ nɛ ɛyaa wɛɛ mɩ-tɔm yɔɔdʋʋ yɔɔ nɛ palakɩ kɔlɔmɔtʋ mɩ-yɔɔ;+
4 pʋyɔɔ lɛ, Oo Izrayɛɛlɩ pʋŋ, iwelisi Kɩbaɣlʋ Kɩlɩm Yehowa tɔm! Tɔm tʋnɛ Kɩbaɣlʋ Kɩlɩm Yehowa heyiɣ pʋŋ nɛ piyisi, lemisi nɛ fɛɛŋ, njaa wena a-taa nɔɔyʋ fɛyɩ yɔ,+ nɛ tɛtʋ ndɩ ndɩ ndʋ peyebi-tʋ yɔ, ndʋ ajɛɛ wena acɔ-tʋ nɛ ata yɔ a-taa ñɩma mba pɩkazaa yɔ palazɩ tɩ-taa wondu nɛ powoŋ-tʋ yɔ;+
5 Kɩbaɣlʋ Kɩlɩm Yehowa heyiɣ-wɛ se: “Men-kpekpeka miŋ taa+ mankaɣ yɔɔdʋʋ ajɛɛ taa ñɩma mba pɩkazaa yɔ nɛ Edom kpeekpe pɔ-yɔɔ tɔm, mba pɔyɔɔdɩnɩ taa leleŋ sɔsɔŋ nɛ tɛtɛ pɛŋɩyɛ sɔsɔɖɛ+ se mɛ-ɛjaɖɛ pɩsɩ pa-pʋyʋ yɔ, se pamʋ ɖi-lona wena a-taa kpɩna tɔkɩ ñɩtʋ yɔ nɛ palazɩ mbʋ pɩwɛ ɖɩ-taa yɔ.”’”+
6 «Pʋyɔɔ lɛ, yɔɔdɩ natʋ tɔm Izrayɛɛlɩ ɛjaɖɛ yɔɔ, nɛ ŋheyi pʋŋ nɛ piyisi, lemisi nɛ fɛɛŋ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Ɩna! Mankaɣ yɔɔdʋʋ men-kpekpeka nɛ man-pana taa, mbʋ pʋyɔɔ yɔ ajɛɛ ɖʋ-mɩ fɛyɛ.’”+
7 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Ma-maɣmaɣ mankpazɩɣ me-nesi nɛ monɖuki se ajɛɛ wena acɔ-mɩ nɛ ata yɔ akaɣ sɩɣlʋʋ a-maɣmaɣ a-fɛyɛ.+
8 Ɛlɛ mɩ, Oo Izrayɛɛlɩ pʋŋ, ɩkaɣ lɩʋ pilinzi nɛ ɩlʋlɩ pee man-samaɣ Izrayɛɛlɩ,+ mbʋ pʋyɔɔ yɔ pɩkazɩ pazɩ lɛ, man-samaɣ kaɣ pɩsʋʋ.
9 Mbʋ pʋyɔɔ yɔ mɛwɛ mɩ-cɔlɔ, nɛ mankaɣ pɩsɩnʋʋ mɩ-yɔɔ, nɛ pakaɣ-mɩ hayʋʋ nɛ poɖuu ɖomaɣ.
10 Mankaɣ labʋ nɛ mɩ-samaɣ huu—Izrayɛɛlɩ ɖɩɣa kpeekpe, ka-tɩŋa payɩ—nɛ ɛyaa kaɣ wɛʋ tɛtʋ ndɩ ndɩ taa+ nɛ pakaɣ ɖaɣnʋʋ maʋ lona wena aapɩsɩ njaa yɔ.+
11 Ɛɛɛ, mankaɣ labʋ nɛ mɩ-samaɣ nɛ mɩ-kpɩna ɖɔɔ sakɩyɛ;+ pakaɣ ɖɔʋ nɛ pohuu. Nɛ mankaɣ labʋ nɛ ɛyaa wɛɛ mɩ-taa ɛzɩ ɖooo lɛ yɔ,+ nɛ mankaɣ labʋ nɛ piɖeni-mɩ nɛ pɩkɩlɩ ɖooo lɛ;+ nɛ toovenim taa lɛ ɩkaɣ tɩlʋʋ se ma lɛ Yehowa.+
12 Mankaɣ labʋ nɛ ɛyaa, ɛɛɛ man-samaɣ Izrayɛɛlɩ, ɖɔ mɩ-yɔɔ; nɛ pakaɣ-mɩ mʋʋ nɛ ɩpɩsɩ pa-pʋyʋ.+ Ɩkaɣ pɩsʋʋ pa-ñɩm, nɛ ɩɩkaɣ tasʋʋ labʋ se pataawɛɛnɩ piya kpa.”»+
13 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Pɛwɛɛ nɛ peheyiɣ-ŋ se: ‘Ŋkɛ tɛtʋ ndʋ tɩtɔkɩ ɛyaa yɔ nɛ ŋlɛɣʋ ña-ajɛɛ piya,’”
14 “pʋyɔɔ lɛ, ŋŋkaɣ tasʋʋ tɔɔʋ ɛyaa nɛ ŋŋkaɣ tasʋʋ labʋ se ña-ajɛɛ ɩtaawɛɛnɩ piya,” Kɩbaɣlʋ Kɩlɩm Yehowa yɔɔdʋʋna.
15 “Maakaɣ tasʋʋ yebu kpa se ajɛɛ ɩtʋ-ŋ yaa ɛyaa ɩca-ŋ tɔm,+ nɛ ŋŋkaɣ tasʋʋ labʋ nɛ pituuli ña-ajɛɛ,” Kɩbaɣlʋ Kɩlɩm Yehowa yɔɔdʋʋna.»
16 Nɛ Yehowa tɔm tasɩ-m talʋʋ se:
17 «Ɛyʋ pɩyalʋ, alɩwaatʋ ndʋ Izrayɛɛlɩ mba kaawɛ pɛ-ɛjaɖɛ taa yɔ, paatɩŋnɩ pɔ-ɖɔnɛ nɛ pa-lakasɩ yɔɔ nɛ pepisi-ɖɩ.+ Pɔ-ɖɔnɛ kaawɛ mɛ-ɛsɩndaa ɛzɩ halʋ weyi ɛna fenaɣ yɔ ɛ-azuluma yɔ.+
18 Pʋyɔɔ manpɩyɩ man-pana pɔ-yɔɔ, mbʋ pʋyɔɔ yɔ paakpɛdɩ calɩm ɛjaɖɛ taa+ nɛ paatɩŋnɩ pa-sɩʋ kpelisi nzɩ sɩwɛ kiniŋ yɔ* sɩ-yɔɔ nɛ pepisi ɛjaɖɛ.+
19 Pʋyɔɔ mamɩzɩ-wɛ samasɩ taa nɛ mɛyɛkɛlɩ-wɛ ajɛɛ taa.+ Mahʋnɩ-wɛ tɔm ɛzɩ pɔ-ɖɔnɛ nɛ pa-lakasɩ pɔzʋʋ yɔ.
20 Ɛlɛ patalɩ ajɛɛ ana a-taa lɛ, ɛyaa pisi ma-hɩɖɛ kiɖeɖeye,+ pɔyɔɔdaɣ pɔ-tɔm se: “Yehowa ɛyaa samaɣ lɛ, ɛlɛ pɩkɔm nɛ pɩpɔzɩ se pɛɖɛɛ nɛ peyele ɛ-ɛjaɖɛ.”
21 Pʋyɔɔ lɛ mankaɣ lʋbʋ ma-hɩɖɛ kiɖeɖeye yɔɔ, hɩɖɛ nɖɩ Izrayɛɛlɩ mba pisi-ɖɩ ajɛɛ wena a-taa powoba yɔ.»+
22 «Pʋyɔɔ lɛ, heyi Izrayɛɛlɩ ɖɩɣa se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Oo Izrayɛɛlɩ ɖɩɣa, pɩtɩkɛ mɩ-yɔɔ malʋkɩ, ɛlɛ ma-hɩɖɛ kiɖeɖeye yɔɔ malʋkɩ, hɩɖɛ nɖɩ ipisi-ɖɩ ajɛɛ wena a-taa iwoba yɔ.’”+
23 “Pɩtʋʋ fɛyɩ se mankaɣ labʋ nɛ ma-hɩɖɛ sɔsɔɖɛ yɔɔ ñalɩ,*+ ma-hɩɖɛ nɖɩ pepisi-ɖɩ ajɛɛ taa yɔ, nɖɩ ipisi-ɖɩ a-taa yɔ; nɛ toovenim taa lɛ ajɛɛ kaɣ tɩlʋʋ se ma lɛ Yehowa,+ alɩwaatʋ ndʋ manpɩsɩɣ kiɖeɖeu mɩ-hɛkʋ taa, a-ɛsɩndaa yɔ,” Kɩbaɣlʋ Kɩlɩm Yehowa yɔɔdʋʋna.
24 “Mankaɣ-mɩ kpaɣʋ ajɛɛ taa nɛ menkpeɣli-mɩ nɛ tɛtʋ tɩŋa taa nɛ manpɩsɩnɩ-mɩ mɩ-ɛjaɖɛ taa.+
25 Mankaɣ mɩzʋʋ lɩm mbʋ pɩwɛ kele kele yɔ mɩ-yɔɔ, nɛ ɩkaɣ wɛʋ kele kele;+ mankaɣ ñalʋʋ mɩ-azuluma tɩŋa,+ nɛ mankaɣ ɖɩzʋʋ mɩ-sɩʋ kpelisi nzɩ sɩwɛ kiniŋ yɔ sɩ-tɩŋa.+
26 Mankaɣ-mɩ haʋ laŋɩyɛ kɩfaɖɛ+ nɛ manɖʋ fezuu kɩfalʋʋ mɩ-taa.+ Mankaɣ lɩzʋʋ pɩyɛ laŋɩyɛ+ mi-tomnaɣ taa nɛ maha-mɩ tomnaɣ nandʋ laŋɩyɛ.*
27 Mankaɣ ɖʋʋ men-fezuu mɩ-taa, nɛ mankaɣ labʋ nɛ ɩɖɔ man-paɣtʋ yɔɔ,+ nɛ ɩkaɣ ɖɔkʋʋ mɔn-tɔm hʋʋ paɣtʋ nɛ ɩɖɔ tɩ-yɔɔ.
28 Ðɩnɛ ɛlɛ ɩkaɣ caɣʋ ɛjaɖɛ nɖɩ mɛncɛlɩ mɩ-cɔzɔnaa yɔ ɖɩ-taa, nɛ ɩkaɣ kɛʋ man-samaɣ nɛ mankaɣ kɛʋ mɩ-Ɛsɔ.”+
29 «“Mankaɣ-mɩ holuu mɩ-azuluma tɩŋa taa nɛ malɩzɩ nɛ meheyi tɔɔnaɣ pee se alʋlɩ nɛ atɔyɩ, nɛ maakaɣ kɔnʋʋ ñɔɔsɩ mɩ-yɔɔ.+
30 Mankaɣ labʋ nɛ tɩŋ pee nɛ hayɩm taa tɔɔnaɣ tɔyɩ, se pɩsa nɛ ñɔɔsɩ ɛtaatasɩ-mɩ ɖʋʋ fɛyɛ wiɖiyi kpa ajɛɛ hɛkʋ taa.+
31 Ðɩnɛ ɛlɛ ɩkaɣ tɔzʋʋ mɩ-nʋmɔŋ kɩdɛkɛdɩŋ nɛ mɩ-lakasɩ nzɩ sɩtaawɛɛ ɖeu yɔ sɩ-yɔɔ, nɛ ɩkaɣ mɩ-tɩ lɩʋ sɔŋ mɩ-wɛɛ ɖɔʋ nɛ mɩ-lakasɩ kɩdɛkɛdɩsɩ yɔɔ.+
32 Ɛlɛ ɩtɩlɩ tɔm tʋnɛ: Pɩtɩkɛ mɩ-yɔɔ malakɩ mbʋ.+ Ɛlɛ fɛyɛ ɛkpa-mɩ nɛ ɩsɩ fɛyɛ kʋɖɩɩɩ mɩ-lakasɩ yɔɔ, Oo Izrayɛɛlɩ ɖɩɣa;” Kɩbaɣlʋ Kɩlɩm Yehowa yɔɔdʋʋna.
33 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Kɩyakʋ ŋgʋ mañalɩɣ mɩ-wɛɛ ɖɔʋ tɩŋa mɩ-yɔɔ yɔ, mankaɣ labʋ nɛ ɛyaa wɛɛ tɛtʋ ndɩ ndɩ taa,+ nɛ mankaɣ labʋ ɖɔɖɔ nɛ paɖaɣnɩ maʋ lona wena aapɩsɩ njaa yɔ.+
34 Tɛtʋ ndʋ paayebi-tʋ kpɛɖɛ nɛ paa weyi ɛɖɛɣ nɛ ɛnaɣ-tʋ mbʋ yɔ, pakaɣ-tʋ hayʋʋ.
35 Nɛ ɛyaa kaɣ yɔɔdʋʋ se: ‘Ɛjaɖɛ nɖɩ paayebi-ɖɩ kpɛɖɛ yɔ, ɖɩpɩsɩ ɛzɩ Edɛɛnɩ kaɖaɣ yɔ,+ nɛ tɛtʋ ndɩ ndɩ ndʋ tɩɩpɩsɩ njaa, tɩwɛɛ kpɛɖɛ nɛ pɔyɔkɩ-tʋ yɔ, lɛɛlɛɛyɔ lɛ tɩpɩsɩ tɛtʋ ɖoŋ ñɩndʋ nɛ ɛyaa wɛ tɩ-taa.’+
36 Nɛ ajɛɛ wena pɩkazɩ mɩ-cɔlɔ kpɛɛɛ yɔ akaɣ tɩlʋʋ toovenim taa se ma Yehowa, ma-maɣmaɣ mamanɩ mbʋ paayɔkaa yɔ, nɛ manɖʋ hayɩm tɛtʋ ndʋ paayebi-tʋ kpɛɖɛ yɔ tɩ-yɔɔ. Ma Yehowa, ma-maɣmaɣ mɔyɔɔdɩna, nɛ malaba ɛzɩ mɔyɔɔdʋʋ yɔ.”+
37 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mankaɣ ɖɔɖɔ haʋ Izrayɛɛlɩ ɖɩɣa waɖɛ se pɔpɔzɩ-m nɛ malabɩ-wɛ pʋnɛ: Mankaɣ labʋ nɛ pɛ-ɛyaa huu ɛzɩ kpɩna yɔ.
38 Ɛzɩ ɛyaa kiɖeɖema samaɣ sɔsɔɔ yɔ, ɛzɩ Yeruzalɛm kpɩna* kɩ-kazandʋ kɩyakɩŋ wiye yɔ,+ mbʋ ɖɔɖɔ tɛtʋ ndɩ ndɩ ndʋ tɩɩpɩsɩ njaa yɔ, ɛyaa samaɣ kaɣ suu tɩ-taa;+ nɛ toovenim taa lɛ pakaɣ tɩlʋʋ se ma lɛ Yehowa.”»
Pɩ-tɛɛ tɔm
^ Yaa «mba pehiɣ ñʋʋ yabʋ yɔ.»
^ Ebree tɔm piye nɖɩ palabɩnɩ tʋmɩyɛ yɔ, pɩtɩla yɔ nɔɔ kʋɖʋmaɣ nakɛyɛ wɛ ɖɩ nɛ Ebree tɔm piye naɖɩyɛ, nɖɩ pɛɖɛzɩɣ se «pɩndʋ» yɔ pɛ-hɛkʋ taa, nɛ palakɩnɩ-ɖɩ tʋmɩyɛ se peni nabʋyʋ.
^ Yaa «pɩsɩ kiɖeɖeye.»
^ Pʋ-tɔbʋʋ se laŋɩyɛ nɖɩ ɖitisiɣ se Ɛsɔ eɖiyi-ɖɩ yɔ.
^ Pɩpɩzɩɣ pɩkɛ, «Ɛzɩ heŋ ewiɖe nɖɩ palaɣ kɩlaŋ Yeruzalɛm taa.»