Ezekɩyɛɛlɩ 39:1-29
39 «Nɛ ña yɔ, ɛyʋ pɩyalʋ, yɔɔdɩ mbʋ pɩkaɣ talʋʋ Gɔɔgɩ yɔ+ pɩ-natʋ tɔm nɛ ŋheyi-i se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mankʋyʋʋ ñɔ-yɔɔ, Gɔɔgɩ, Mesɛɛkɩ nɛ Tubaalɩ+ pa-ñʋʋdʋ* sɔsɔ.
2 Mankaɣ labʋ nɛ ŋpɩsɩ nɛ menɖiyi-ŋ nɛ mankpaɣ-ŋ nɛ hayo kiŋ hɔɔlɩŋ weyi ɩkɩlɩ posuu yɔ ɩ-taa+ nɛ mɔnkɔna, nɛ mowoni-ŋ Izrayɛɛlɩ pʋŋ yɔɔ.
3 Mankaɣ mabʋ ñɔ-tɔʋ ña-nɩmɩyɛ nesi taa nɛ kɩtɔlɩ nɛ mala nɛ ñɔ-tɔʋ ñɩma lɩɩnɩ ñe-nesi kɩbanzɩ taa nɛ atɔlɩ.
4 Ŋkaɣ tɔlʋʋ Izrayɛɛlɩ pʋŋ yɔɔ,+ ña nɛ ñɔ-sɔɔjanaa kpeekpe nɛ samasɩ nzɩ sɩkaɣ wɛʋ ñɔ-cɔlɔ yɔ. Mankaɣ-ŋ cɛlʋʋ nɛ ŋkɛ sumasɩ nzɩ payɩ sɩtɔkɩ nandʋ yɔ sɩ-tɔɔnaɣ nɛ ñɩtʋ taa tɛtɛgbɩna tɔɔnaɣ.’”+
5 «“Ŋkaɣ tɔlʋʋ hayɩm taa,+ mbʋ pʋyɔɔ yɔ ma-maɣmaɣ mɔyɔɔdɩna,” Kɩbaɣlʋ Kɩlɩm Yehowa yɔɔdʋʋna.
6 «“Nɛ mankaɣ tiyinuu miŋ Maagɔɔgɩ wayɩ nɛ mba pɛwɛ pɛɛyɛ taa lɩm hɛkʋ taa tɛtʋ taa yɔ pa-wayɩ,+ nɛ toovenim taa lɛ pakaɣ tɩlʋʋ se ma lɛ Yehowa.
7 Mankaɣ labʋ nɛ patɩlɩ ma-hɩɖɛ kiɖeɖeye man-samaɣ Izrayɛɛlɩ taa, nɛ maakaɣ yebu se patasɩ pisuu ma-hɩɖɛ kiɖeɖeye; nɛ toovenim taa lɛ ajɛɛ kaɣ tɩlʋʋ se ma lɛ Yehowa,+ Izrayɛɛlɩ taa Kiɖeɖeu.”+
8 «“Ɛɛɛ, piɖiɣni kɔm, nɛ pɩkaɣ labʋ mbʋ. Kɩyakʋ ŋgʋ, kɩ-tɔm maayɔɔdaa, Kɩbaɣlʋ Kɩlɩm Yehowa yɔɔdʋʋna.
9 Izrayɛɛlɩ tɛtʋ ndɩ ndɩ taa ñɩma kaɣ lɩʋ nɛ pakpaɣ you wondu nɛ paɖʋnɩ miŋ—kpayɩŋ cikpeŋ* nɛ kpayɩŋ sɔsɔŋ, tɔŋ nɛ tɔʋ ñɩma, you pɔla* nɛ kɩgbɛzɛmɩŋ. Nɛ pakaɣ-tʋ ɖʋnʋʋ miŋ pɩnzɩ lʋbɛ.+
10 Pɩɩkaɣ pɔzʋʋ se pañɩnɩ ɖasɩ hayɩm taa yaa pɩɩkaɣ pɔzʋʋ se pacaa ɖasɩ laŋ tɛɛ nɛ paɖʋnɩ miŋ, mbʋ pʋyɔɔ yɔ you wondu pakaɣ ɖʋnʋʋ miŋ.”
«“Mba paaku pa-ñɩm yɔ, pakaɣ kuu pa-ñɩm; nɛ mba palazaɣ pa-ñɩm yɔ, pakaɣ lazʋʋ pa-ñɩm,” Kɩbaɣlʋ Kɩlɩm Yehowa yɔɔdʋʋna.
11 «“Kɩyakʋ ŋgʋ ki-wiye, mankaɣ haʋ Gɔɔgɩ+ pɩlaʋ nakʋyʋ peeɖe Izrayɛɛlɩ taa, mba pɔɖɔŋ nʋmɔʋ teŋgu wɩsɩ ɖɩlɩyɛ hɔɔlʋʋ taa yɔ pɛ-fɛɛʋ taa, nɛ kɩkaɣ ɖɩɣʋ nʋmɔʋ mba patɩŋɩɣnɩ peeɖe yɔ. Peeɖe pakaɣ pim Gɔɔgɩ nɛ ɛ-samaɣ sɔsɔɔ kpeekpe, nɛ pakaɣ-kʋ yaʋ se Hamɔɔnɩ-Gɔɔgɩ Fɛɛʋ.*+
12 Izrayɛɛlɩ ɖɩɣa kaɣ kpaɣʋ fenasɩ 7 nɛ kepimni-wɛ se pɩsa nɛ ɛjaɖɛ wɛɛ kele kele.+
13 Ɛjaɖɛ taa ɛyaa kpeekpe ɛsɩyɛ kaɣ sɛnʋʋ pe-pim, nɛ pɩkaɣ yebu nɛ pa-hɩla sɛɛ kɩyakʋ ŋgʋ mansaŋ man-tɩ yɔ,”+ Kɩbaɣlʋ Kɩlɩm Yehowa yɔɔdʋʋna.
14 «“Pakaɣ ɖʋʋ ɛyaa tʋmɩyɛ se pɔcɔʋ ɛjaɖɛ taa kaahɛzaɣ nɛ pepi tomnasɩ nzɩ sɩkazɩ tataa yɔ, se pɩsa nɛ papɩsɩ-ɖɩ kele kele. Pɛwɛɣ ñɩnʋʋ yɔɔ fenasɩ lʋbɛ.
15 Mba pɔcɔʋ ɛjaɖɛ taa yɔ, panaɣ ɛyʋ mɔɔyɛ naɖɩyɛ lɛ, pesiɣ ɖɩ-cɔlɔ yʋsaɣ nakɛyɛ. Pʋwayɩ lɛ, mba paɖʋ-wɛ pimtu tʋmɩyɛ yɔ, pepim-ɖɩ Hamɔɔnɩ-Gɔɔgɩ Fɛɛʋ taa.+
16 Nɛ tɛtʋ natʋyʋ ɖɔɖɔ kaɣ wɛʋ peeɖe, tɩ-hɩɖɛ lɛ Hamona.* Nɛ pakaɣ labʋ nɛ ɛjaɖɛ wɛɛ kele kele.”+
17 «Piyele nɛ ña yɔ, ɛyʋ pɩyalʋ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Heyi sumasɩ kpeekpe nɛ ñɩtʋ taa tɛtɛgbɩna kpeekpe se: ‘Ikpeɣli ɖama nɛ ɩkɔɔ. Ikpeɣli nɛ ɩcɔɔ kɩlaʋ ŋgʋ mɛwɛɛ nɛ malakɩ-mɩ yɔ nɛ ɩta, kɩkɛ kɩlaʋ sɔsɔʋ Izrayɛɛlɩ pʋŋ yɔɔ.+ Ɩkaɣ tɔɔʋ nandʋ nɛ ɩñɔɔ calɩm.+
18 Ɩkaɣ tɔɔʋ ɖoŋ tɩnaa nandʋ nɛ ɩñɔɔ tɛtʋ yɔɔ ñʋndɩnaa calɩm—ɛyaŋ, heɣsi, pʋŋ nɛ naŋ abalɩñɩŋ—Basaanɩ kpɩna wena awɛ num yɔ a-tɩŋa.
19 Ɩkaɣ libu nandʋ num sososo nɛ ɩñɔɔ calɩm nɛ pɩkɔɔ pɩsɩɩnɩ alɩwaatʋ ndʋ kɩlaʋ ŋgʋ malakɩ-mɩ yɔ kɩkʋʋ-mɩ ɛzɩ sʋlʋm yɔ.’”
20 «“Ɩkaɣ tɔɔʋ kpaŋnaŋ nɛ kɛɛkɛɛnaa sayaa, ɖoŋ tɩnaa nɛ sɔdɩŋ tɩŋa man-taabɩlɩ yɔɔ nɛ ɩhaɣ,”+ Kɩbaɣlʋ Kɩlɩm Yehowa yɔɔdʋʋna.
21 «“Mankaɣ wɩlʋʋ man-samtʋ ajɛɛ taa, nɛ ajɛɛ tɩŋa kaɣ naʋ ɛzɩma mahʋ tɔm yɔ, nɛ ɖoŋ* weyi mawɩlɩ a-hɛkʋ taa yɔ.+
22 Kpaɣnɩ kɩyakʋ ŋgʋ ki-wiye lɛ, Izrayɛɛlɩ ɖɩɣa kaɣ tɩlʋʋ se ma lɛ pɛ-Ɛsɔ Yehowa.
23 Nɛ ajɛɛ kaɣ tɩlʋʋ se Izrayɛɛlɩ mba wobi yomiye taa pa-maɣmaɣ pa-kɩwɛɛkɩm yɔɔ na, mbʋ pʋyɔɔ yɔ pataawɛɛ siɣsiɣ mɛ-ɛsɩndaa.+ Pʋyɔɔ menkizaa se pataana* mɛ-ɛsɩndaa+ nɛ manɖʋzɩ-wɛ po-koyindinaa nesi tɛɛ,+ nɛ pakʋ pa-tɩŋa nɛ laɣɖɛ.
24 Malabɩ-wɛ ɛzɩ pa-azuluma nɛ pa-kɩwɛɛkɩm pɔzʋʋ yɔ, nɛ mɛmɛsɩ-wɛ mɛ-ɛsɩndaa.”
25 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mankaɣ ɖaɣnʋʋ pɩsɩnʋʋ Yakɔɔb ɛyaa mba powoni-wɛ yomiye taa yɔ+ nɛ mana Izrayɛɛlɩ ɖɩɣa kpeekpe pʋtɔdɩyɛ;+ nɛ mankaɣ lʋbʋ ma-hɩɖɛ kiɖeɖeye yɔɔ nɛ kpekpeka.+
26 Pɛtɛŋ-wɛ ɖʋʋ fɛyɛ pa-lakasɩ nzɩ sɩfɛyɩ siɣsiɣ mɛ-ɛsɩndaa yɔ sɩ-tɩŋa sɩ-yɔɔ lɛ,+ pakaɣ caɣʋ pɛɛyɛ taa pɛ-ɛjaɖɛ taa, nɛ nɔɔyʋ ɛɛkaɣ-wɛ ɖʋʋ sɔɔndʋ.+
27 Manpɩsɩɣnɩ-wɛ nɛ samasɩ taa nɛ menkpeɣli-wɛ nɛ po-koyindinaa ajɛɛ taa lɛ,+ mankaɣ man-tɩ pɩsʋʋ kiɖeɖeu ɖɔɖɔ pɛ-hɛkʋ taa ajɛɛ sakɩyɛ ɛsɩndaa.”+
28 «“Toovenim taa lɛ pakaɣ tɩlʋʋ se ma lɛ pɛ-Ɛsɔ Yehowa alɩwaatʋ ndʋ mowokini-wɛ yomiye taa ajɛɛ taa, nɛ pʋwayɩ manɖaɣnɩ-wɛ pɩsɩnʋʋ pɛ-ɛjaɖɛ taa nɛ maayeki pa-taa nɔɔyʋ yɔ.+
29 Maakaɣ tasʋʋ kizuu se pataana* mɛ-ɛsɩndaa,+ mbʋ pʋyɔɔ yɔ mankaɣ pɩyʋʋ men-fezuu Izrayɛɛlɩ ɖɩɣa yɔɔ,”+ Kɩbaɣlʋ Kɩlɩm Yehowa yɔɔdʋʋna.»
Pɩ-tɛɛ tɔm
^ Yaa «pa-awumbu.»
^ Ðoŋ ɖoŋ lɛ, tɔŋ tɔyaa ɖɔkaɣnɩ kpayɩŋ cikpeŋ.
^ Pɩpɩzɩɣ pɩkɛ, «ɖaŋ weyi ɩ-nɔsɩ taa wɛ cʋlʋ cʋlʋ nɛ palakɩnɩ-ɩ you yɔ.»
^ Yaa «Gɔɔgɩ Samaɣ Sɔsɔɔ Fɛɛʋ.»
^ Pʋ-tɔbʋʋ se «Samaɣ sɔsɔɔ.»
^ Piye piye, «nesi.»
^ Yaa «Pʋyɔɔ mɛmɛsɩ-wɛ.»
^ Yaa «Maakaɣ-wɛ tasʋʋ mɛsʋʋ.»
