Ezekɩyɛɛlɩ 40:1-49
40 Pɛkɛzɩ-ɖʋ tɛtʋ nɛ pɩla pɩnzɩ 25 lɛ,+ pɩnaɣ 25 ñɩŋga ŋga ka-ɖɩbazɩyɛ, fenaɣ kɩyakʋ 10 ñɩŋgʋ wiye, pʋ-tɔbʋʋ se pɔyɔkɩ tɛtʋ nɛ pɩla pɩnzɩ 14 lɛ,+ kɩyakʋ ŋgʋ ki-wiye maɣmaɣ, Yehowa nesi kaawɛ mɔ-yɔɔ, nɛ ewoni-m tɛtʋ taa.+
2 Pɩtɩŋnɩ natʋ yɔɔ lɛ, Ɛsɔ woni-m Izrayɛɛlɩ ɛjaɖɛ taa nɛ ɛsɩ-m pʋʋ sɔsɔʋ nakʋyʋ ŋgʋ kɩkʋyaa pɩdɩɩfɛyɩ yɔ kɩ-yɔɔ;+ kɩ-yɔɔ peeɖe lɛ, pama nabʋyʋ nɛ pɩwɛɛ ɛzɩ tɛtʋ yɔ hadɛ kiŋ.
3 Ewoni-m peeɖe lɛ, mana abalʋ nɔɔyʋ, ɛ-wɛtʋ kaawɛ ɛzɩ ñɩɣyʋʋ kɩsɛɛmʋʋ wɛtʋ yɔ.+ Ɛɛɖɔkɩ nimaɣ ŋga palʋnɩ pɩsatʋ yɔ* nɛ kañɩŋgbayaɣ ŋga pamaɣzɩɣna yɔ* e-nesi taa,+ nɛ ɛɛsɩŋ nɔnɔɔ taa.
4 Abalʋ ɛnʋ eheyi-m se: «Ɛyʋ pɩyalʋ, cɔnɩ camɩyɛ, welisi camɩyɛ nɛ ŋka ña-lɩmaɣza* mbʋ payɩ mawɩlɩɣ-ŋ yɔ pɩ-yɔɔ, mbʋ pʋyɔɔ yɔ pʋyɔɔ pɔkɔnɩ-ŋ cɩnɛ. Heyi Izrayɛɛlɩ ɖɩɣa mbʋ payɩ ŋnaɣ yɔ.»+
5 Mana koloŋa nakɛyɛ, kɔcɔ templo* awayɩ kadaɣ nɛ kata. Abalʋ ɛnʋ ɛɛɖɔkɩ e-nesi taa kañɩŋgbayaɣ ŋga pamaɣzɩɣna yɔ, ka-ɖaɣlɩkɩŋ kaakɛ nuŋgolonzi 6 (paa nuŋgoloŋa ŋga kɔ-yɔɔ lɛ, pɔsɔzɩ niwee 4 walanzɩ).* Nɛ ɛpaɣzɩ maɣzʋʋ koloŋa, ke-kikiŋ kaakɛ kañɩŋgbayaɣ kʋɖʋmaɣ nɛ ka-kʋkʋyɩŋ kaakɛ kañɩŋgbayaɣ kʋɖʋmaɣ ɖɔɖɔ.
6 Pʋwayɩ lɛ, ɛkɔɔ nɔnɔɔ ŋga kaha ɛsa nɛ wɩsɩ ɖɩlɩyɛ taa yɔ kɔ-cɔlɔ+ nɛ ɛkpa ke-tendemee yɔɔ. Ɛmaɣzɩ nɔnɔɔ ɖɩzʋyɛ lɛ, walanzɩ kaakɛ kañɩŋgbayaɣ kʋɖʋmaɣ, nɛ ɖɩzʋyɛ lɛɛɖɛ walanzɩ kaakɛ kañɩŋgbayaɣ kʋɖʋmaɣ ɖɔɖɔ.
7 Paa feŋuu kuduyuu ŋgʋ lɛ, kɩ-ɖaɣlɩkɩŋ kaakɛ kañɩŋgbayaɣ kʋɖʋmaɣ nɛ kɩ-walanzɩ kɛ kañɩŋgbayaɣ kʋɖʋmaɣ ɖɔɖɔ, nɛ nuŋgolonzi 5 kaawɛnɩ feŋuu kuduyuŋ hɛkʋ taa.+ Nɔnɔɔ ŋga kɛwɛ nɔnɔɔ ŋga kaha ɛsa nɛ pɩ-taa kiŋ yɔ ka-kʋjɔŋ cɔlɔ yɔ, ka-ɖɩzʋyɛ kaakɛ kañɩŋgbayaɣ kʋɖʋmaɣ.
8 Ɛmaɣzɩ nɔnɔɔ ŋga kɛwɛnɩ pɩ-taa kiŋ yɔ ka-kʋjɔŋ, nɛ kɩɩkɛ kañɩŋgbayaɣ kʋɖʋmaɣ.
9 Pʋwayɩ lɛ, ɛmaɣzɩ nɔnɔɔ kʋjɔŋ, kɩɩwɛnɩ nuŋgolonzi 8; nɛ ɛmaɣzɩ kɩ-hɔɔlɩŋ yɔɔ tilima, aawɛnɩ nuŋgolonzi 2; nɛ nɔnɔɔ kʋjɔŋ kaawɛ hɔɔlʋʋ ŋgʋ kɩha ɛsa nɛ pɩ-taa kiŋ yɔ kɩ-yɔɔ.
10 Feŋuu kuduyuŋ 3 kaawɛ wɩsɩ ɖɩlɩyɛ nɔnɔɔ hɔɔlɩŋ tɩŋa yɔɔ. Ɩ-naadozo ɩɩwɛ kɩmaŋ, nɛ hɔɔlɩŋ yɔɔ tilima wena aawɛ paa hɔɔlʋʋ ŋgʋ kɩ-yɔɔ yɔ, aawɛ kɩmaŋ.
11 Pʋwayɩ lɛ, ɛmaɣzɩ nɔnɔɔ ɖɩzʋyɛ walanzɩ, pɩɩkɛ nuŋgolonzi 10; nɛ nɔnɔɔ ɖaɣlɩkɩŋ kaakɛ nuŋgolonzi 13.
12 Hɔɔlʋʋ ŋgʋ patayaa nɛ kɩwɛɛ feŋuu kuduyuŋ ɛsɩndaa paa hɔɔlʋʋ ŋgʋ kɩ-yɔɔ yɔ, kɩɩwɛnɩ nuŋgoloŋa kʋɖʋmaɣ. Feŋuu kuduyuŋ weyi ɩɩwɛ hɔɔlɩŋ ɛnɩ ɩ-naalɛ ɩ-yɔɔ yɔ, paa ŋgʋ lɛ kɩɩwɛnɩ nuŋgolonzi 6.
13 Pʋwayɩ lɛ, ɛmaɣzɩ nɔnɔɔ kpaɣnɩ feŋuu kuduyuu kʋɖʋmʋʋ ñʋʋ taa* nɛ piwolo lɛɛkʋ ñʋʋ taa, nɛ ka-walanzɩ kaakɛ nuŋgolonzi 25; ɖɩzʋyɛ lɛɛɖɛ kaatʋʋzɩnɩ lɛɛɖɛ.+
14 Pʋwayɩ lɛ, ɛmaɣzɩ hɔɔlɩŋ yɔɔ tilima, a-kʋkʋyɩŋ kaakɛ nuŋgolonzi 60; ɛmaɣzɩ ɖɔɖɔ nɔnɔsɩ nzɩ sɩɩcɔ kadaɣ nɛ sɩta yɔ sɩ-taa hɔɔlɩŋ yɔɔ tilima.
15 Kpaɣnɩ nɔnɔɔ ɖɩzʋyɛ ɛsɩndaa nɛ piwolo kʋjɔŋ ɛsɩndaa, nɔnɔɔ hɔɔlʋʋ ŋgʋ kɩwɛnɩ pɩ-taa kiŋ yɔ kɩ-yɔɔ lɛ, pɩɩkɛ nuŋgolonzi 50.
16 Feŋuu kuduyuŋ nɛ ɩ-hɔɔlɩŋ yɔɔ tilima kaawɛnɩ mondoɖebɔŋ weyi ɩkpɩyɩsɩɣ yɔ+ nɔnɔɔ nɛ ka-taa kiŋ, paa hɔɔlʋʋ ŋgʋ lɛ kɩ-yɔɔ. Mondoɖebɔŋ kaawɛ ɖɔɖɔ kʋjɔmɩŋ taa, paa hɔɔlʋʋ ŋgʋ lɛ kɩ-yɔɔ, nɛ paalɩzɩ paŋ kɩlɛmɩŋ+ hɔɔlɩŋ yɔɔ tilima yɔɔ.
17 Pʋwayɩ lɛ, ewoni-m awayɩ kadaɣ taa, nɛ mana ɖamɩŋ weyi ɩ-tɛɛ pɔtɔkɩ tɔɔnaɣ yɔ*+ nɛ pɛɛ wena pɔpɔ-yɛ yɔ, pɩtɩŋa pɩcɔ kadaɣ nɛ pɩta. Ðamɩŋ weyi ɩ-tɛɛ pɔtɔkɩ tɔɔnaɣ yɔ ɩɩkpɛndɩ 30 ɖenɖe pɔpɔ pɛɛ yɔ.
18 Ðenɖe ɖenɖe pɔpɔ pɛɛ nɔnɔsɩ hɔɔlɩŋ yɔɔ yɔ pɩ-walanzɩ maɣnɩ nɔnɔsɩ ɖaɣlɩkɩŋ: pɛɛ wena pɔpɔ pɩ-tɛɛ yɔ lɛ.
19 Pʋwayɩ lɛ, ɛmaɣzɩ kpaɣnɩ pɩ-tɛɛ nɔnɔɔ ɛsɩndaa nɛ piwolo pɩ-taa kadaɣ tɩnaɣ yɔɔ walanzɩ. Pɩɩkɛ nuŋgolonzi 100 wɩsɩ ɖɩlɩyɛ taa nɛ hayo kiŋ taa ɖɔɖɔ.
20 Awayɩ kadaɣ kaawɛnɩ nɔnɔɔ nɛ kaaha ɛsa nɛ hayo kiŋ, nɛ ɛmaɣzɩ ka-ɖaɣlɩkɩŋ nɛ ka-walanzɩ.
21 Feŋuu kuduyuŋ 3 kaawɛ paa hɔɔlʋʋ ŋgʋ lɛ kɩ-yɔɔ. Kɔ-hɔɔlɩŋ yɔɔ tilima nɛ ka-kʋjɔŋ ɖaɣlɩkɩŋ nɛ walanzɩ kaawɛ ɖɔɖɔ ɛzɩ kajalaɣ nɔnɔɔ hɔɔlɩŋ yɔɔ tilima nɛ ka-kʋjɔŋ yɔ. Ka-ɖaɣlɩkɩŋ kaakɛ nuŋgolonzi 50 nɛ ka-walanzɩ kɛ nuŋgolonzi 25.
22 Ko-mondoɖebɔŋ, ka-kʋjɔŋ nɛ ka-paŋ kɩlɛmɩŋ+ nɛ wɩsɩ ɖɩlɩyɛ taa nɔnɔɔ ñɩŋ kaawɛ kɩmaŋ. Pʋcɔ nɛ ɛyʋ pɩzɩ nɛ ɛtalɩ nɔnɔɔ ŋga lɛ, pɩɩwɛɛ se ɛkpa tendemee 7, nɛ ka-kʋjɔŋ kaawɛ tendemee ana a-ɛsɩndaa.
23 Nɔnɔɔ nakɛyɛ kaawɛ pɩ-taa kadaɣ taa nɛ kaha ɛsa nɛ hayo kiŋ nɔnɔɔ, nɛ lɛɛka ñaha ɛsa nɛ wɩsɩ ɖɩlɩyɛ nɔnɔɔ. Ɛmaɣzɩ ɖaɣlɩkɩŋ weyi ɛwɛ kpaɣnɩ nɔnɔɔ lɛɛka nɛ ŋwolo nɔnɔɔ lɛɛka yɔ, nɛ pɩɩkɛ nuŋgolonzi 100.
24 Pʋwayɩ lɛ, ewoni-m hadɛ kiŋ, nɛ mana nɔnɔɔ nakɛyɛ nɛ hadɛ kiŋ.+ Ɛmaɣzɩ kɔ-hɔɔlɩŋ yɔɔ tilima nɛ ka-kʋjɔŋ, nɛ pa nɛ lalaa paawɛ kɩmaŋ.
25 Ka nɛ ka-kʋjɔŋ paawɛnɩ mondoɖebɔŋ paa hɔɔlʋʋ ŋgʋ lɛ kɩ-yɔɔ, ɩɩwɛ ɛzɩ mondoɖebɔŋ lɛɛŋ yɔ. Ka-ɖaɣlɩkɩŋ kaakɛ nuŋgolonzi 50 nɛ ka-walanzɩ kɛ nuŋgolonzi 25.
26 Ŋkpaɣ tendemee 7 pʋcɔ nɛ ŋtalɩ-kɛ,+ nɛ ka-kʋjɔŋ kaawɛ tendemee ana a-ɛsɩndaa. Nɛ kaawɛnɩ paŋ kɩlɛmɩŋ kɔ-hɔɔlɩŋ yɔɔ tilima yɔɔ, paʋ kɩlɛmʋʋ kʋɖʋmʋʋ kaawɛ paa hɔɔlʋʋ ŋgʋ lɛ kɩ-yɔɔ.
27 Pɩ-taa kadaɣ kaawɛnɩ nɔnɔɔ nakɛyɛ nɛ kaaha ɛsa nɛ hadɛ kiŋ; ɛmaɣzɩ pɩ-tɛɛ kiŋ, kpaɣnɩ nɔnɔɔ lɛɛka nɛ piwolo lɛɛka, pɩɩkɛ nuŋgolonzi 100.
28 Pʋwayɩ lɛ, ɛtɩŋnɩ-m hadɛ kiŋ nɔnɔɔ nɛ ɛsʋnɩ-m pɩ-taa kadaɣ taa; ɛmaɣzɩ hadɛ kiŋ nɔnɔɔ lɛ, ka nɛ lɛɛsɩ paawɛ kɩmaŋ.
29 Ke-feŋuu kuduyuŋ, kɔ-hɔɔlɩŋ yɔɔ tilima, nɛ ka-kʋjɔŋ nɛ nɔnɔsɩ lɛɛsɩ feŋuu kuduyuŋ, hɔɔlɩŋ yɔɔ tilima, nɛ kʋjɔŋ kaawɛ kɩmaŋ. Ka nɛ ka-kʋjɔŋ paawɛnɩ mondoɖebɔŋ paa hɔɔlʋʋ ŋgʋ lɛ kɩ-yɔɔ. Ka-ɖaɣlɩkɩŋ kaakɛ nuŋgolonzi 50 nɛ ka-walanzɩ kɛ nuŋgolonzi 25.+
30 Kʋjɔmɩŋ kaawɛɛ nɛ pɩcɔɔ pɩta; ɩ-ɖaɣlɩkɩŋ kaakɛ nuŋgolonzi 25 nɛ ɩ-walanzɩ kɛ nuŋgolonzi 5.
31 Ka-kʋjɔŋ kaaha ɛsa nɛ awayɩ kadaɣ, nɛ paalɩzɩ paŋ kɩlɛmɩŋ kɔ-hɔɔlɩŋ yɔɔ tilima yɔɔ,+ nɛ ŋkpaɣ tendemee 8 pʋcɔ nɛ ŋtalɩ-kɛ.+
32 Ɛtɩŋnɩ-m nɛ wɩsɩ ɖɩlɩyɛ taa nɛ ɛsʋnɩ-m pɩ-taa kadaɣ taa lɛ, ɛmaɣzɩ nɔnɔɔ; ka nɛ lɛɛsɩ paawɛ kɩmaŋ.
33 Ke-feŋuu kuduyuŋ, kɔ-hɔɔlɩŋ yɔɔ tilima, nɛ ka-kʋjɔŋ nɛ nɔnɔsɩ lɛɛsɩ feŋuu kuduyuŋ, hɔɔlɩŋ yɔɔ tilima, nɛ kʋjɔŋ kaawɛ kɩmaŋ. Ka nɛ ka-kʋjɔŋ paawɛnɩ mondoɖebɔŋ paa hɔɔlʋʋ ŋgʋ lɛ kɩ-yɔɔ. Ka-ɖaɣlɩkɩŋ kaakɛ nuŋgolonzi 50 nɛ ka-walanzɩ kɛ nuŋgolonzi 25.
34 Ka-kʋjɔŋ kaaha ɛsa nɛ awayɩ kadaɣ, nɛ paalɩzɩ paŋ kɩlɛmɩŋ kɔ-hɔɔlɩŋ yɔɔ tilima ana a-naalɛ a-yɔɔ, nɛ ŋkpaɣ tendemee 8 pʋcɔ nɛ ŋtalɩ-kɛ.
35 Pʋwayɩ lɛ, ɛsʋnɩ-m hayo kiŋ nɔnɔɔ taa+ nɛ ɛmaɣzɩ-kɛ; ka nɛ lɛɛsɩ paawɛ kɩmaŋ.
36 Ke-feŋuu kuduyuŋ, kɔ-hɔɔlɩŋ yɔɔ tilima, nɛ ka-kʋjɔŋ nɛ nɔnɔsɩ lɛɛsɩ feŋuu kuduyuŋ, hɔɔlɩŋ yɔɔ tilima, nɛ kʋjɔŋ kaawɛ kɩmaŋ. Kaawɛnɩ mondoɖebɔŋ paa hɔɔlʋʋ ŋgʋ lɛ kɩ-yɔɔ. Ka-ɖaɣlɩkɩŋ kaakɛ nuŋgolonzi 50 nɛ ka-walanzɩ kɛ nuŋgolonzi 25.
37 Kɔ-hɔɔlɩŋ yɔɔ tilima kaaha ɛsa nɛ awayɩ kadaɣ, nɛ paalɩzɩ paŋ kɩlɛmɩŋ kɔ-hɔɔlɩŋ yɔɔ tilima ana a-naalɛ a-yɔɔ, nɛ ŋkpaɣ tendemee 8 pʋcɔ nɛ ŋtalɩ-kɛ.
38 Tɔɔnaɣ ɖɩdɔɔyɛ ɖaŋ nakʋyʋ kaawɛ nɔnɔsɩ hɔɔlɩŋ yɔɔ tilima cɔlɔ, kɩ nɛ kɩ-nɔnɔɔ; nɛ peeɖe pañalaɣ kɩlaŋ kɩñaɣzɩŋ.+
39 Taabɩlɩnaa 2 kaawɛ paa nɔnɔɔ kʋjɔŋ hɔɔlʋʋ ŋgʋ lɛ kɩ-yɔɔ, nɛ pɔ-yɔɔ pakʋwaɣ kɩlaŋ kɩñaɣzɩŋ,+ kɩwɛɛkɩm yɔɔ kɩlaŋ+ nɛ wɛɛ ɖɔʋ kɩlaŋ kpɩna.+
40 Taabɩlɩnaa 2 kaawɛ hayo kiŋ nɔnɔɔ tɛɛ nɛ awayɩ kiŋ. Taabɩlɩnaa 2 ɖɔɖɔ kaawɛ nɔnɔɔ kʋjɔŋ hɔɔlʋʋ lɛɛkʋ yɔɔ.
41 Taabɩlɩnaa 4 kaawɛ paa nɔnɔɔ hɔɔlʋʋ ŋgʋ lɛ kɩ-yɔɔ, pa-tɩŋa paakpɛndɩ 8; pɔ-yɔɔ pakʋwaɣ kɩlaŋ kpɩna.
42 Pɛɛ wena pasaɣ-yɛ yɔ, ana palabɩnɩ kɩlaŋ kɩñaɣzɩŋ taabɩlɩnaa mba pa-naanza. Pa-ɖaɣlɩkɩŋ kaakɛ nuŋgoloŋa kʋɖʋmaɣ nɛ hɔɔlʋʋ, pa-walanzɩ kɛ nuŋgoloŋa kʋɖʋmaɣ nɛ hɔɔlʋʋ nɛ pa-kʋkʋyɩŋ ñɛkɛ nuŋgoloŋa kʋɖʋmaɣ. Pɔ-yɔɔ pasɩɣaɣ wondu ndʋ palakaɣnɩ tʋmɩyɛ alɩwaatʋ ndʋ pakʋʋ kɩlaŋ kɩñaɣzɩŋ nɛ kɩlaŋ lɛɛŋ kpɩna yɔ.
43 Mbʋ pɩ-yɔɔ pasɩɣ wondu yɔ, pɩɩwɛ pɩ-taa kolonzi yɔɔ kpɛɛɛ, pɩ-walanzɩ kaakɛ niwee 4 walanzɩ;* nɛ pasɩɣaɣ kɩlaŋ nandʋ taabɩlɩnaa yɔɔ.
44 Ðamɩŋ weyi ɩ-taa hendu teyaa tɔkɩ tɔɔnaɣ yɔ,+ ɩɩwɛ pɩ-taa nɔnɔɔ nɛ ka-awayɩ kiŋ; ɩɩwɛ pɩ-taa kadaɣ taa, hayo kiŋ nɔnɔɔ cɔlɔ, ɩɩha ɛsa nɛ hadɛ kiŋ. Tɔɔnaɣ ɖɩdɔɔyɛ ɖaŋ lɛɛkʋ kaawɛ wɩsɩ ɖɩlɩyɛ taa nɔnɔɔ cɔlɔ, kɩɩha ɛsa nɛ hayo kiŋ.
45 Eheyi-m se: «Tɔɔnaɣ ɖɩdɔɔyɛ ɖaŋ kʋnɛ, ŋgʋ kɩha ɛsa nɛ hadɛ kiŋ yɔ, cɔjɔnaa mba palakɩ templo taa tʋma yɔ, pa-ñɩŋgʋ lɛ.+
46 Tɔɔnaɣ ɖɩdɔɔyɛ ɖaŋ ŋgʋ kɩha ɛsa nɛ hayo kiŋ yɔ, cɔjɔnaa mba palakɩ altaaru yɔɔ tʋmɩyɛ yɔ,+ pa-ñɩŋgʋ lɛ. Sadɔɔkɩ+ pɩyalaa lɛ, Leevi ñɩma mba paɖʋ-wɛ tʋmɩyɛ se pɔñɔtɩnɩ Yehowa nɛ paɖʋ-ɩ lɩm yɔ.»+
47 Pʋwayɩ lɛ, ɛmaɣzɩ pɩ-taa kadaɣ. Ka-ɖaɣlɩkɩŋ kaakɛ nuŋgolonzi 100 nɛ ka-walanzɩ kɛ nuŋgolonzi 100, kɔ-hɔɔlɩŋ 4 ɛnɩ ɩɩwɛ kɩmaŋ. Altaaru kaawɛ templo ɛsɩndaa.
48 Pʋwayɩ lɛ, ɛsʋnɩ-m templo kʋjɔŋ tɛɛ,+ nɛ ɛmaɣzɩ kʋjɔŋ hɔɔlʋʋ yɔɔ tilimiye; ɖɩ-hɔɔlʋʋ kʋɖʋmʋʋ yɔɔ lɛ pɩɩkɛ nuŋgolonzi 5, nɛ ɖɩ-hɔɔlʋʋ lɛɛkʋ yɔɔ lɛ pɩɩkɛ nuŋgolonzi 5 ɖɔɖɔ. Nɔnɔɔ walanzɩ kaakɛ nuŋgolonzi 3 hɔɔlʋʋ kʋɖʋmʋʋ yɔɔ nɛ nuŋgolonzi 3 hɔɔlʋʋ lɛɛkʋ yɔɔ ɖɔɖɔ.
49 Kʋjɔŋ ɖaɣlɩkɩŋ kaakɛ nuŋgolonzi 20 nɛ kɩ-walanzɩ kɛ nuŋgolonzi 11.* Pakpaɣ tendemee pʋcɔ nɛ patalɩ-kʋ. Tilima kaawɛ hʋyɩŋ yɔɔ kolonzi cɔlɔ, kʋɖʋmɖɩyɛ kaawɛ paa hɔɔlʋʋ ŋgʋ lɛ kɩ-yɔɔ.+
Pɩ-tɛɛ tɔm
^ Yaa «pɩsatʋ ndʋ payaɣ se lɛɛ yɔ.» Lɛɛ kɛ ñɩtʋ ndʋ pahayaɣ-tʋ ɖooo caanaʋ taa nɛ palakɩnɩ-tʋ tʋmɩyɛ nɛ palʋʋnɩ wondu kususutu yɔ.
^ Cɔnɩ Tɔm kɩsɔzɩtʋ B14.
^ Piye piye, «nɛ ŋsɩɩ ña-laŋɩyɛ.»
^ Piye piye, «ɖɩɣa.» Ñʋŋ 40-48 taa, pɛɖɛzɩɣ «ɖɩɣa» se «templo» ye templo taa kuduyuŋ yaa templo maɣmaɣ tɔm pɔyɔɔdʋʋ yɔ.
^ Yaa «pɔsɔzɩ palɩm kʋɖʋmʋʋ.» Piye piye, «nuŋgolonzi 6 kañɩŋgbayaɣ ŋga pamaɣzɩɣna yɔ, nuŋgoloŋa kʋɖʋmaɣ nɛ niwee 4 walanzɩ.» Nuŋgolonzi kɩɖaɣlɩsɩ tɔm pɔyɔɔdʋʋ. Cɔnɩ Tɔm kɩsɔzɩtʋ B14.
^ Pʋtɔma yɔ pɩkɛɣnɩ feŋuu kuduyuu koloŋa ñʋʋ taa.
^ Yaa «mana kuduyuŋ.»
^ Yaa «kaakɛ palɩm kʋɖʋmʋʋ.»
^ Pɩpɩzɩɣ pɩkɛ, «12.»
