Ezekɩyɛɛlɩ 42:1-20
42 Pʋwayɩ lɛ, ewoni-m awayɩ kadaɣ taa hayo kiŋ hɔɔlʋʋ yɔɔ.+ Nɛ ewoni-m tɔɔnaɣ ɖɩdɔɔyɛ ɖamɩŋ kuduyuu cɔlɔ; kɩɩwɛ lone nɖɩ ɖɩɩwɛ kpɛɖɛ yɔ ɖɩ-cɔlɔ,+ kuduyuu ŋgʋ kɩɩwɛ pɩ-cɔlɔ kpaagbaa yɔ kɩ-hayo kiŋ.+
2 Kɩ-ɖaɣlɩkɩŋ kaakɛ nuŋgolonzi* 100 hayo kiŋ ɖɩzʋyɛ hɔɔlʋʋ yɔɔ, nɛ kɩ-walanzɩ kɛ nuŋgolonzi 50.
3 Kɩɩwɛ pɩ-taa kadaɣ ŋga ka-walanzɩ kaakɛ nuŋgolonzi 20 yɔ+ nɛ awayɩ kadaɣ ŋga pɔpɔ kɔ-yɔɔ pɛɛ yɔ pɛ-hɛkʋ taa. Kɩ-hɛkɩŋ taa nʋmɔŋ pam ɖama nɛ ɛsa ɛsɔdaa kuduyuŋ 3 yɔɔ.
4 Pɩ-taa nʋmɔʋ nakʋyʋ kaawɛ tɔɔnaɣ ɖɩdɔɔyɛ ɖamɩŋ* ɛsɩndaa,+ nɛ kɩ-walanzɩ kaakɛ nuŋgolonzi 10 nɛ kɩ-ɖaɣlɩkɩŋ kɛ nuŋgolonzi 100,* nɛ ɖamɩŋ ɛnɩ ɩ-ɖɩzʋyɛ kaawɛnɩnɩ hayo kiŋ.
5 Tɔɔnaɣ ɖɩdɔɔyɛ ɖamɩŋ weyi ɩwɛnɩ hayo kiŋ yɔ ɩɩwɛ kpɩyɩsɔɔ nɛ pɩkɩlɩ weyi ɩɩwɛ pɩ-tɛɛ nɛ hɛkʋ taa ɛsɔdaa kuduyuŋ taa yɔ, mbʋ pʋyɔɔ yɔ hɛkɩŋ taa nʋmɔŋ kaakpaɣ ɩ-hɔɔlɩŋ sakɩyɛ.
6 Mbʋ pʋyɔɔ yɔ ɩɩkɛ ɛsɔdaa kuduyuŋ 3, ɛlɛ ɩtaawɛɛnɩ tilima ɛzɩ kadasɩ taa tilima yɔ. Pʋyɔɔ pɩɩpasɩ ɩ-hɔɔlɩŋ nɛ pɩkɩlɩ ɛsɔdaa kuduyuŋ weyi ɩɩwɛ pɩ-tɛɛ nɛ hɛkʋ taa yɔ.
7 Awayɩ pɛɛ koloŋa ŋga kɛwɛ tɔɔnaɣ ɖɩdɔɔyɛ ɖamɩŋ cɔlɔ yɔ, ka-ɖaɣlɩkɩŋ kaakɛ nuŋgolonzi 50; kaawɛ awayɩ kadaɣ ŋga kaha ɛsa nɛ tɔɔnaɣ ɖɩdɔɔyɛ ɖamɩŋ lɛɛŋ yɔ kɔ-yɔɔ kiŋ.
8 Mbʋ pʋyɔɔ yɔ tɔɔnaɣ ɖɩdɔɔyɛ ɖamɩŋ weyi ɩɩwɛ awayɩ kadaɣ cɔlɔ yɔ, ɩ-ɖaɣlɩkɩŋ kaakɛ nuŋgolonzi 50; ɛlɛ weyi ɩɩha ɛsa nɛ kooka kiɖeɖeɣa yɔ ɩɩwɛnɩ nuŋgolonzi 100.
9 Nʋmɔʋ nakʋyʋ kaawɛnɩ wɩsɩ ɖɩlɩyɛ taa kiŋ, nɛ kɩkʋyaɣnɩ awayɩ kadaɣ taa nɛ kɩkpaɣ tɔɔnaɣ ɖɩdɔɔyɛ ɖamɩŋ taa.
10 Tɔɔnaɣ ɖɩdɔɔyɛ ɖamɩŋ nɩɩyɩ kaawɛ ɖɔɖɔ wɩsɩ ɖɩɖʋyɛ taa kiŋ. Kadaɣ pɛɛ koloŋa kaawɛ ɖamɩŋ ɛnɩ ɩ-wɩsɩ ɖɩlɩyɛ taa kiŋ. Ðamɩŋ ɛnɩ ɩɩwɛ lone nɖɩ ɖɩɩwɛ kpɛɖɛ yɔ nɛ kuduyuu pɔ-cɔlɔ.+
11 Nʋmɔʋ nakʋyʋ kaawɛ ɩ-ɛsɩndaa ɛzɩ hayo kiŋ tɔɔnaɣ ɖɩdɔɔyɛ ɖamɩŋ nʋmɔʋ yɔ.+ Ɩ-ɖaɣlɩkɩŋ nɛ ɩ-walanzɩ kaawɛ kɩmaŋ, nɛ ɩ-ɖɩlɩyɛ nɛ ɩ-wɛtʋ kaawɛ kɩmaŋ. Ɩ-ɖɩzʋyɛ
12 kaawɛ ɛzɩ tɔɔnaɣ ɖɩdɔɔyɛ ɖamɩŋ weyi ɩwɛnɩ hadɛ kiŋ yɔ ɩ-ɖɩzʋyɛ yɔ. Ðɩzʋyɛ naɖɩyɛ kaawɛ nʋmɔʋ ɖɩbazɩyɛ, pɛɛ koloŋa ŋga kɛwɛ pɩ-cɔlɔ yɔ kɛ-ɛsɩndaa, wɩsɩ ɖɩlɩyɛ taa kiŋ, ɖenɖe ɛyʋ pɩzɩɣ nɛ ɛsʋʋna yɔ.+
13 Pʋwayɩ lɛ, eheyi-m se: «Hayo kiŋ tɔɔnaɣ ɖɩdɔɔyɛ ɖamɩŋ nɛ hadɛ kiŋ tɔɔnaɣ ɖɩdɔɔyɛ ɖamɩŋ weyi ɩwɛ lone nɖɩ ɖɩwɛ kpɛɖɛ yɔ ɖɩ-cɔlɔ yɔ,+ ɩkɛ tɔɔnaɣ ɖɩdɔɔyɛ ɖamɩŋ kiɖeɖeŋ weyi ɩ-taa cɔjɔnaa mba pɔñɔtʋʋnɩ Yehowa yɔ pɔtɔkɩ kɩlaŋ weyi ɩkɛ kiɖeɖeŋ siŋŋ yɔ.+ Peeɖe pasɩɣ kɩlaŋ weyi ɩkɛ kiɖeɖeŋ siŋŋ yɔ, tɔɔnaɣ pee kɩlaŋ, kɩwɛɛkɩm yɔɔ kɩlaŋ nɛ wɛɛ ɖɔʋ kɩlaŋ, mbʋ pʋyɔɔ yɔ pɩkɛ lone kiɖeɖeye.+
14 Alɩwaatʋ ndʋ cɔjɔnaa sʋʋ lone kiɖeɖeye taa yɔ, pɩtɩpɔzɩ se palɩɩnɩ peeɖe nɛ powolo awayɩ kadaɣ taa nɛ patɩhɔzɩ wondu ndʋ posuwa nɛ palabɩnɩ tʋmɩyɛ yɔ,+ mbʋ pʋyɔɔ yɔ tɩkɛ wondu kiɖeɖetu. Pɩwɛɛ se posuu wondu lɛɛtʋ pʋcɔ nɛ pɔñɔtɩnɩ lona wena paha samaɣ waɖɛ se kowolo a-taa yɔ.»
15 Ɛtɛm maɣzʋʋ templo hɔɔlʋʋ ŋgʋ kɩwɛnɩ pɩ-taa kiŋ yɔ* lɛ, ɛtɩŋnɩ-m nɛ nɔnɔɔ ŋga kaha ɛsa nɛ wɩsɩ ɖɩlɩyɛ taa kiŋ yɔ+ ka-nʋmɔʋ nɛ ɛlɩzɩ-m, nɛ ɛmaɣzɩ lone nɖɩ ɖɩ-tɩŋa.
16 Ɛmaɣzɩ wɩsɩ ɖɩlɩyɛ hɔɔlʋʋ nɛ kañɩŋgbayaɣ ŋga pamaɣzɩɣna yɔ.* Ɛmaɣzɩnɩ kañɩŋgbayaɣ ŋga pamaɣzɩɣna yɔ lɛ, kɩ-ɖaɣlɩkɩŋ kaakɛ kañɩŋgbayɩsɩ 500 kpaɣnɩ hɔɔlʋʋ kʋɖʋmʋʋ nɛ piwolo hɔɔlʋʋ lɛɛkʋ yɔɔ.
17 Ɛmaɣzɩ hayo kiŋ hɔɔlʋʋ. Ɛmaɣzɩnɩ kañɩŋgbayaɣ ŋga pamaɣzɩɣna yɔ lɛ, kɩ-ɖaɣlɩkɩŋ kaakɛ kañɩŋgbayɩsɩ 500.
18 Ɛmaɣzɩ hadɛ kiŋ hɔɔlʋʋ. Ɛmaɣzɩnɩ kañɩŋgbayaɣ ŋga pamaɣzɩɣna yɔ lɛ, kɩ-ɖaɣlɩkɩŋ kaakɛ kañɩŋgbayɩsɩ 500.
19 Ɛcɔɔ wɩsɩ ɖɩɖʋyɛ hɔɔlʋʋ. Ɛmaɣzɩnɩ kañɩŋgbayaɣ ŋga pamaɣzɩɣna yɔ lɛ, kɩ-ɖaɣlɩkɩŋ kaakɛ kañɩŋgbayɩsɩ 500.
20 Ɛmaɣzɩ lone nɖɩ ɖɩ-hɔɔlɩŋ 4. Koloŋa nakɛyɛ kaacɔ-ɖɩ nɛ kata,+ ka-ɖaɣlɩkɩŋ kaakɛ kañɩŋgbayɩsɩ 500 nɛ ka-walanzɩ kɛ kañɩŋgbayɩsɩ 500 ɖɔɖɔ,+ katayaɣ mbʋ pɩkɛ pʋyʋ kiɖeɖeu nɛ mbʋ palakɩnɩ paa tʋmɩyɛ nɖɩ yɔ pɛ-hɛkʋ taa.+
Pɩ-tɛɛ tɔm
^ Nuŋgolonzi kɩɖaɣlɩsɩ tɔm pɔyɔɔdʋʋ. Cɔnɩ Tɔm kɩsɔzɩtʋ B14.
^ Yaa «kaawɛ kuduyuŋ.»
^ Grɛɛkɩ Bibl ŋgʋ payaɣ se Septante yɔ kɩ-taa, pɔyɔɔdaa se «kɩ-ɖaɣlɩkɩŋ kɛ nuŋgolonzi 100.» Ebree tɔm yɔɔdʋʋ se: «Nʋmɔʋ ŋgʋ kɩwɛnɩ nuŋgoloŋa kʋɖʋmaɣ yɔ.» Cɔnɩ Tɔm kɩsɔzɩtʋ B14.
^ Piye piye, «Ɛtɛm maɣzʋʋ pɩ-taa ɖɩɣa.»
^ Cɔnɩ Tɔm kɩsɔzɩtʋ B14.
