Ezekɩyɛɛlɩ 43:1-27
43 Pʋwayɩ lɛ, ewoni-m nɔnɔɔ ŋga kaha ɛsa nɛ wɩsɩ ɖɩlɩyɛ taa yɔ kɔ-cɔlɔ.+
2 Peeɖe mana Izrayɛɛlɩ tɛ Ɛsɔ samtʋ lɩnɩ wɩsɩ ɖɩlɩyɛ taa nɛ tɩkɔŋ,+ nɛ ɛ-nɔɔ taŋ kaawɛ ɛzɩ lɩm mbʋ pikpeŋ lɛɛ lɛɛ yɔ pɩ-kɔkɔɖɛ yɔ,+ nɛ ɛ-samtʋ kaañandɩ tɛtʋ yɔɔ.+
3 Mbʋ maanawa yɔ pɩɩwɛ ɛzɩ natʋ ndʋ maanawa alɩwaatʋ ndʋ mɔnkɔm se manɖɩzɩ* tɛtʋ yɔ, nɛ pɩɩwɛ ɛzɩ mbʋ maanawa alɩwaatʋ ndʋ maawɛ Kebaarɩ pɔɔ cɔlɔ+ yɔ; nɛ mɔntɔlɩ nɛ manpa mɛ-ɛsa nɛ tɛtʋ.
4 Ðɩnɛ ɛlɛ, Yehowa samtʋ tɩŋnɩ nɔnɔɔ ŋga kaha ɛsa nɛ wɩsɩ ɖɩlɩyɛ taa yɔ nɛ tɩsʋʋ templo* taa.+
5 Nɛ fezuu nakʋyʋ kʋsɩ-m ɛsɔdaa nɛ kʋsʋnɩ-m pɩ-taa kadaɣ taa, nɛ mana se Yehowa samtʋ kaasu templo taa ɖo.+
6 Nɛ manɩɩ nɔɔyʋ wɛɛ nɛ ɛyɔɔdʋʋnɩ-m nɛ templo taa, nɛ ɛyʋ ɛnʋ ɛkɔɔ nɛ ɛsɩŋ mɔn-cɔlɔ.+
7 Eheyi-m se:
«Ɛyʋ pɩyalʋ, lone ɖɩnɛ ɖɩkɛ men-kewiyaɣ kpelaɣ+ lone nɛ lone nɖɩ ɖɩ-taa manɖʋʋ ma-naataŋ yɔ;+ peeɖe mankaɣ caɣʋ Izrayɛɛlɩ samaɣ hɛkʋ taa tam.+ Izrayɛɛlɩ ɖɩɣa, pa nɛ pa-awiya paakaɣ tasʋʋ tɩŋnʋʋ pe-fezuu taa hayitu yɔɔ nɛ pa-awiya wena asɩba yɔ a-tomnasɩ yɔɔ nɛ pepisi ma-hɩɖɛ kiɖeɖeye.+
8 Paɖʋ pɔ-nɔnɔɔ mɔ-nɔnɔɔ cɔlɔ nɛ paɖʋ pɔ-nɔnɔɔ tilimiye mɔ-nɔnɔɔ tilimiye cɔlɔ, nɛ pɩkazɩ koloŋa nakɛyɛ yem na ma nɛ wɛ ɖɛ-hɛkʋ taa.+ Patɩŋnɩ lakasɩ kɩdɛkɛdɩsɩ nzɩ palaba yɔ sɩ-yɔɔ nɛ pepisi ma-hɩɖɛ kiɖeɖeye, pʋyɔɔ manɖɩzɩ-wɛ man-pana taa.+
9 Lɛɛlɛɛyɔ lɛ, pɩwɛɛ se pakpaɣ pe-fezuu taa hayitu nɛ pa-awiya wena asɩba yɔ a-tomnasɩ nɛ poposini-m ɖooo poliŋ, nɛ mankaɣ wɛʋ pɛ-hɛkʋ taa tam.+
10 «Piyele nɛ ña yɔ, ɛyʋ pɩyalʋ, kɛdɩ Izrayɛɛlɩ ɖɩɣa ɛzɩma templo wɛɛ yɔ,+ pɩsa nɛ fɛyɛ kpa-wɛ pa-kɩwɛɛkɩm yɔɔ,+ nɛ pɩwɛɛ se pɛkpɛlɩkɩ nɛ patɩlɩ ɛzɩma pama-kʋ yɔ.*
11 Ye fɛyɛ ɛkpa-wɛ mbʋ payɩ palaba yɔ pɩ-yɔɔ yɔ, pɩwɛɛ se ŋwɩlɩ-wɛ templo ŋgʋ kɩ-anjaʋ, kɩ-wɛtʋ, kɩ-tɛ ɖenɖe palɩɣna yɔ, nɛ kɩ-tɛ ɖenɖe pasʋʋna yɔ.+ Wɩlɩ-wɛ kɩ-anjaʋwaa tɩŋa nɛ kɩ-kpalɩtʋ tɩŋa, kɩ-anjaʋwaa tɩŋa nɛ kɩ-paɣtʋ tɩŋa, nɛ ŋma-tʋ pɛ-ɛsɩndaa, se pɩsa nɛ pɔcɔnɩ kɩ-anjaʋ tɩŋa camɩyɛ nɛ pɔɖɔ kɩ-kpalɩtʋ yɔɔ.+
12 Templo paɣtʋ yɔ. Egeetiye nɖɩ ɖɩcɔ pʋʋ ñʋʋ taa kpɛɛɛ nɛ ɖɩ-taa yɔ ɖɩ-tɩŋa ɖɩkɛ kiɖeɖeye nɖɩ ɖɩkpaɖaa yɔ.+ Na! Templo paɣtʋ yɔ.
13 «Pamaɣzɩ altaaru nɛ pehiɣ nuŋgolonzi nzɩ yɔ, nzɩ yɔ+ (paa nuŋgoloŋa ŋga kɔ-yɔɔ lɛ, pɔsɔzɩ niwee 4 walanzɩ).* Kɩ-tɛɛ lɛ, pɩkɛ nuŋgoloŋa kʋɖʋmaɣ, nɛ kɩ-walanzɩ kɛ nuŋgoloŋa kʋɖʋmaɣ ɖɔɖɔ. Paɖʋ kpɛŋa nakɛyɛ kɩ-nɔɔ yɔɔ kpɛɛɛ nɛ pɩcɔɔ pɩta; ka-walanzɩ kɛ nandaka kʋɖʋmaɣ.* Altaaru tɛɛ lɛ.
14 Pamaɣzɩ altaaru ŋgʋ kɩ-tɛɛ kpaɣnɩ tataa nɛ piwolo pɩ-tɛɛ nɔɔ ŋga kɔcɔ kpɛɛɛ nɛ kata yɔ lɛ, pɩkɛ nuŋgolonzi 2, nɛ walanzɩ kɛ nuŋgoloŋa kʋɖʋmaɣ. Kpaɣnɩ nɔɔ cikpelaɣ ŋga kɔcɔ kpɛɛɛ nɛ kata yɔ nɛ piwolo nɔɔ sɔsɔɔ ŋga kɔcɔ kpɛɛɛ nɛ kata yɔ lɛ, pɩkɛ nuŋgolonzi 4, nɛ nɔɔ sɔsɔɔ ŋga ka-walanzɩ kɛ nuŋgoloŋa kʋɖʋmaɣ.
15 Altaaru mɩzaɣ kʋkʋyɩŋ kɛ nuŋgolonzi 4, nɛ kɛwɛnɩ hɩŋ 4 nɛ ɩ-nɔsɩ lɩɣnɩ awayɩ.+
16 Altaaru mɩzaɣ hɔɔlɩŋ 4 tɩŋa kaawɛ kɩmaŋ, ɖaɣlɩkɩŋ kɛ nuŋgolonzi 12 nɛ walanzɩ kɛ nuŋgolonzi 12 ɖɔɖɔ.+
17 Nɔɔ ŋga kɔcɔ kpɛɛɛ nɛ kata yɔ, kɔ-hɔɔlɩŋ 4 ɖaɣlɩkɩŋ kɛ nuŋgolonzi 14 nɛ ɩ-walanzɩ kɛ nuŋgolonzi 14 ɖɔɖɔ; nɛ kpɛŋa ŋga kɔcɔ kpɛɛɛ nɛ kata yɔ kɛkɛ nuŋgoloŋa hɔɔlʋʋ, altaaru tɛɛ kɛ nuŋgoloŋa kʋɖʋmaɣ hɔɔlɩŋ tɩŋa yɔɔ.
«Nɛ ki-tendemee ha ɛsa nɛ wɩsɩ ɖɩlɩyɛ taa kiŋ.»
18 Ðɩnɛ ɛlɛ eheyi-m se: «Ɛyʋ pɩyalʋ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Paɣtʋ tʋnɛ tɩ-yɔɔ pɩwɛɛ se pɔɖɔ alɩwaatʋ ndʋ pamaɣ altaaru yɔ, se pɩsa nɛ palaa kɩlaŋ kɩñaɣzɩŋ nɛ pamɩzɩ calɩm kɩ-yɔɔ.”+
19 «“Pɩwɛɛ se ŋcɛlɩ naŋ taa nɔ* abalɩñɩnʋ cɔjɔnaa Leevi ñɩma mba palɩnɩ Sadɔɔkɩ lʋlʋʋ taa yɔ,+ mba pɔñɔtʋʋnɩ-m se pala man-tʋmɩyɛ yɔ nɛ pɩkɛnɩ kɩwɛɛkɩm yɔɔ kɩlaʋ,”+ Kɩbaɣlʋ Kɩlɩm Yehowa yɔɔdʋʋna.
20 “Pɩwɛɛ se ŋcozi ɛ-calɩm nɛ ŋɖʋ altaaru hɩŋ 4 ɛnɩ ɩ-yɔɔ, nɔɔ ŋga kɔcɔ kpɛɛɛ nɛ kata yɔ kɔ-kɔnanaa 4 yɔɔ, nɛ kpɛŋa yɔɔ nɛ pɩcɔɔ pɩta, se pɩsa nɛ pañalɩ kɩ-yɔɔ kɩwɛɛkɩm nɛ pala kɩ-yɔɔ kɩwɛɛkɩm yɔɔ huuzuu sɔnzɩ.+
21 Pʋwayɩ lɛ ŋkpaɣ nɔ* abalɩñɩnʋ ɛnʋ, pʋ-tɔbʋʋ se kɩwɛɛkɩm yɔɔ kɩlaʋ, se pɩsa nɛ pañaɣzɩ-ɩ miŋ templo lone nɖɩ ɖɩ-taa pañaɣzɩɣ miŋ yɔ ɖɩ-taa, kooka kiɖeɖeɣa wayɩ.+
22 Kɩyakʋ 2 ñɩŋgʋ wiye lɛ, ŋkaɣ laʋ tuluu ŋgʋ kɩfɛyɩnɩ ɛjandʋ natʋyʋ yɔ nɛ pɩkɛnɩ kɩwɛɛkɩm yɔɔ kɩlaʋ; nɛ pakaɣ ñalʋʋ altaaru yɔɔ kɩwɛɛkɩm ɛzɩ paakpaɣʋ nɔ abalɩñɩnʋ nɛ pañalɩnɩ kɩ-yɔɔ kɩwɛɛkɩm yɔ.”
23 «“Ŋtɛŋ ñalʋʋ kɩ-yɔɔ kɩwɛɛkɩm lɛ, ŋkaɣ laʋ naŋ taa nɔ* abalɩñɩnʋ weyi ɛfɛyɩnɩ ɛjandʋ natʋyʋ yɔ nɛ heŋ taa ɛyaʋ ŋgʋ kɩfɛyɩnɩ ɛjandʋ natʋyʋ yɔ.
24 Pɩwɛɛ se ŋwoni-wɛ Yehowa ɛsɩndaa, nɛ pɩwɛɛ se cɔjɔnaa ɩɖʋ pɔ-yɔɔ ɖɔm+ nɛ palaa-wɛ nɛ pɩkɛnɩ kɩlaʋ kɩñaɣzʋʋ Yehowa.
25 Ŋkaɣ laʋ tuluu paa evemiye nɖɩ se pɩkɛnɩ kɩwɛɛkɩm yɔɔ kɩlaʋ,+ pɩkpɛndɩnɩ naŋ taa nɔ* abalɩñɩnʋ nɛ heŋ taa ɛyaʋ, ŋkaɣ labʋ mbʋ kɩyakɩŋ 7; pɩwɛɛ se pɩkɛnɩ kpɩna wena afɛyɩnɩ ɛjandʋ natʋyʋ yɔ.*
26 Pɩwɛɛ se pala altaaru yɔɔ kɩwɛɛkɩm yɔɔ huuzuu sɔnzɩ kɩyakɩŋ 7, nɛ pɩwɛɛ se pañalɩ-kʋ nɛ pɔñɔɔzɩ-kʋ se pɩsa nɛ papaɣzɩ-kʋ labɩnʋʋ tʋmɩyɛ.
27 Kɩyakɩŋ ɛnɩ ɩtɛŋ lɛ, kpaɣnɩ kɩyakʋ 8 ñɩŋgʋ wiye+ nɛ pɩɖɛɛ, cɔjɔnaa kaɣ laʋ mɩ-kɩlaŋ kɩñaɣzɩŋ nɛ mɩ-laŋhɛzɩyɛ kɩlaŋ* altaaru yɔɔ; nɛ mɩ-tɔm kaɣ-m kɛdɩnʋʋ,”+ Kɩbaɣlʋ Kɩlɩm Yehowa yɔɔdʋʋna.»
Pɩ-tɛɛ tɔm
^ Pɩpɩzɩɣ pɩkɛ, «ɛkɔm se ɛɖɩzɩ.»
^ Piye piye, «ɖɩɣa.»
^ Piye piye, «pɩwɛɛ se pamaɣzɩ kɩ-wɛtʋ.»
^ Yaa «pɔsɔzɩ palɩm kʋɖʋmʋʋ;» nuŋgolonzi kɩɖaɣlɩsɩ tɔm pɔyɔɔdʋʋ. Cɔnɩ Tɔm kɩsɔzɩtʋ B14.
^ Yaa «kɛ ampaŋ kʋɖʋmʋʋ.» Ampaŋ kʋɖʋmʋʋ maɣnɩ ɛzɩ santimɛtawaa 22 mbʋ yɔ (santimɛtawaa 22,2). Cɔnɩ Tɔm kɩsɔzɩtʋ B14.
^ Nɔ weyi ɛ nɛ e-ɖoŋ nɛ ɛtɩkpadɩyɩ yɔ ɛ-tɔm pɔyɔɔdʋʋ.
^ Cɔnɩ kalɩtʋ 19 tɛ pɩ-tɛɛ tɔm.
^ Cɔnɩ kalɩtʋ 19 tɛ pɩ-tɛɛ tɔm.
^ Cɔnɩ kalɩtʋ 19 tɛ pɩ-tɛɛ tɔm.
^ Yaa «wena atalɩ pilim yɔ.»
^ Samaɣ kɩlaŋ tɔm pɔyɔɔdʋʋ.
