Ezekɩyɛɛlɩ 44:1-31
44 Ɛtɩŋnɩ-m kooka kiɖeɖeɣa awayɩ nɔnɔɔ ŋga kaha ɛsa nɛ wɩsɩ ɖɩlɩyɛ taa yɔ+ ka-nʋmɔʋ nɛ ɛpɩsɩnɩ-m, nɛ paaɖɩɣ-kɛ.+
2 Ðɩnɛ ɛlɛ Yehowa heyi-m se: «Nɔnɔɔ kanɛ, pakaɣ-kɛ ɖɩɣʋ mbʋ tam. Pɩtɩpɔzɩ se patʋlɩ-kɛ, nɛ ɛyʋ nɔɔyʋ ɛɛkaɣ-kɛ tɩŋnʋʋ nɛ ɛsʋʋ; mbʋ pʋyɔɔ yɔ Izrayɛɛlɩ tɛ Ɛsɔ Yehowa tɩŋnɩ-kɛ nɛ ɛsʋʋ,+ nɛ pʋyɔɔ lɛ pɩwɛɛ se paɖɩɣ-kɛ mbʋ tam.
3 Paa mbʋ yɔ, ñʋʋdʋ kaɣ caɣʋ ka-taa nɛ ɛtɔɔ tɔɔnaɣ* Yehowa ɛsɩndaa,+ mbʋ pʋyɔɔ yɔ ɛkɛ ñʋʋdʋ. Ɛkaɣ tɩŋnʋʋ nɔnɔɔ kʋjɔŋ nɛ ɛsʋʋ, nɛ peeɖe ɛkaɣ tɩŋnʋʋ nɛ ɛlɩɩ.»+
4 Pʋwayɩ lɛ, ɛtɩŋnɩ-m hayo kiŋ nɔnɔɔ nɛ ewoni-m templo ɛsɩndaa. Mɔncɔnaa lɛ, mana se Yehowa samtʋ kaasu Yehowa templo taa ɖo.+ Nɛ mɔntɔlɩ nɛ manpa mɛ-ɛsa nɛ tɛtʋ.+
5 Ðɩnɛ lɛ Yehowa heyi-m se: «Ɛyʋ pɩyalʋ, ka ña-lɩmaɣza,* cɔna nɛ ŋwelisi camɩyɛ tɔm ndʋ payɩ meheyiɣ-ŋ Yehowa templo kpalɩtʋ nɛ kɩ-paɣtʋ yɔɔ yɔ. Ka ña-lɩmaɣza camɩyɛ nʋmɔʋ ŋgʋ patɩŋɩɣna nɛ pasʋʋ templo taa yɔ kɩ-yɔɔ nɛ ɖenɖe payɩ patɩŋɩɣna nɛ palɩɣnɩ kooka kiɖeɖeɣa taa yɔ pɩ-yɔɔ.+
6 Pɩwɛɛ se ŋheyi Izrayɛɛlɩ ɖɩɣa ŋga kaañaŋ yɔ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mɩ-lakasɩ kɩdɛkɛdɩsɩ maɣ mbʋ, Oo Izrayɛɛlɩ ɖɩɣa.
7 Alɩwaatʋ ndʋ ɩkɔŋnɩ agɔma mba pɛkɛ kɩdɩbɛlɩŋ pa-laŋɩyɛ taa nɛ po-tomnaɣ yɔɔ yɔ mon-kooka kiɖeɖeɣa taa yɔ, pepisiɣ men-templo. Ɩkɔŋnɩ mɔn-tɔɔnaɣ,* pʋ-tɔbʋʋ se num nɛ calɩm, ŋgʋ mɩ-lakasɩ kɩdɛkɛdɩsɩ tɩŋa yɔɔ lɛ ɩwɛɛ nɛ ɩcɛkɩ mɛ-ɛgbɛyɛ.
8 Ɩtɩcɔnɩ mo-wondu kiɖeɖetu yɔɔ.+ Ɛlɛ ɛyaa lalaa ɩlɩzaa se pɔcɔnɩ tʋma yɔɔ mon-kooka kiɖeɖeɣa taa.’”
9 «“Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Agɔma mba pɛwɛ Izrayɛɛlɩ taa nɛ pɛkɛ kɩdɩbɛlɩŋ pa-laŋɩyɛ taa nɛ po-tomnaɣ yɔɔ yɔ, pɩtɩmʋna se pa-taa nɔɔyʋ ɛsʋʋ mon-kooka kiɖeɖeɣa taa.’”
10 «“Ɛlɛ Leevi ñɩma mba paaposini-m ɖooo poliŋ,+ alɩwaatʋ ndʋ Izrayɛɛlɩ mba posini-m se patɩŋ pa-sɩʋ kpelisi nzɩ sɩwɛ kiniŋ yɔ* sɩ-wayɩ yɔ, pakaɣ sɩɣlʋʋ mbʋ pɩlɩɣ pa-kɩwɛɛkɩm taa yɔ.
11 Nɛ pakaɣ pɩsʋʋ mon-kooka kiɖeɖeɣa taa lɩmɖʋyaa se pɔcɔnɩ templo nɔnɔsɩ yɔɔ+ nɛ pala tʋmɩyɛ templo taa. Pakaɣ kʋʋ kɩlaŋ kɩñaɣzɩŋ kpɩna nɛ kɩlaŋ weyi palaɣ samaɣ yɔɔ yɔ ɩ-kpɩna, nɛ pakaɣ sɩŋʋʋ samaɣ ɛsɩndaa nɛ paɖʋʋ-kɛ lɩm.
12 Paɖʋ-kɛ lɩm ka-sɩʋ kpelisi nzɩ sɩwɛ kiniŋ yɔ sɩ-ɛsɩndaa nɛ papɩsɩ mbʋ pituuluu nɛ piyeki se Izrayɛɛlɩ ɖɩɣa ɛla kɩwɛɛkɩm+ yɔ, pʋyɔɔ mankpazɩ me-nesi pɔ-yɔɔ nɛ monɖuu, nɛ pakaɣ sɩɣlʋʋ mbʋ pɩlɩɣ pa-kɩwɛɛkɩm taa yɔ;” Kɩbaɣlʋ Kɩlɩm Yehowa yɔɔdʋʋna.
13 “Paakaɣ-m ñɔtɩnʋʋ se palabɩ-m cɔjɔtʋ tʋmɩyɛ, yaa paakaɣ ñɔtɩnʋʋ mo-wondu kiɖeɖetu yaa mo-wondu ndʋ tɩkɛ kiɖeɖetu siŋŋ yɔ tɩ-taa natʋyʋ, nɛ lakasɩ kɩdɛkɛdɩsɩ nzɩ palaba yɔ sɩ-yɔɔ lɛ, pɛ-fɛyɛ kaɣ wɛʋ pɔ-yɔɔ.
14 Ɛlɛ mankaɣ labʋ nɛ papɩsɩ templo taa tʋma yɔɔ cɔnɩyaa, nɛ pɔcɔnɩ kɩ-tʋmɩyɛ yɔɔ nɛ tʋma wena payɩ pɩwɛɛ se pala kɩ-taa yɔ a-yɔɔ.”+
15 «“Piyele nɛ cɔjɔnaa Leevi mba, pʋ-tɔbʋʋ se Sadɔɔkɩ pɩyalaa,+ mba pɔcɔŋnaɣ mon-kooka kiɖeɖeɣa tʋma yɔɔ alɩwaatʋ ndʋ Izrayɛɛlɩ mba posini-m yɔ,+ pakaɣ-m ñɔtɩnʋʋ nɛ paɖʋ-m lɩm; nɛ pakaɣ sɩŋʋʋ mɛ-ɛsɩndaa nɛ pala-m num+ nɛ calɩm,”+ Kɩbaɣlʋ Kɩlɩm Yehowa yɔɔdʋʋna.
16 “Mba kaɣnɩ sʋʋ mon-kooka kiɖeɖeɣa taa, nɛ pakaɣ ñɔtɩnʋʋ man-taabɩlɩ se paɖʋ-m lɩm;+ nɛ pakaɣ cɔnʋʋ tʋma wena palakɩ-m yɔ a-yɔɔ.+
17 «“Alɩwaatʋ ndʋ pasʋʋ pɩ-taa kadaɣ nɔnɔsɩ taa yɔ, pɩwɛɛ se posuu wondu ndʋ palabɩnɩ pɩsatʋ yɔ.*+ Pɩfɛyɩ se posuu wondu ndʋ palabɩnɩ heŋ hʋndʋ yɔ alɩwaatʋ ndʋ palakɩ tʋmɩyɛ pɩ-taa kadaɣ nɔnɔsɩ taa yaa kadaɣ taa yɔ.
18 Pɩwɛɛ se pete ñʋʋ kitemiŋ weyi palabɩnɩ pɩsatʋ yɔ, nɛ pɩwɛɛ se cokodonaa mba palabɩnɩ pɩsatʋ yɔ pohuuzi pa-tɩnzɩ yɔɔ.+ Pɩfɛyɩ se posuu mbʋ payɩ piyeki se petii soŋaɣ yɔ.
19 Pʋcɔ nɛ palɩɩ awayɩ kadaɣ taa, ɖenɖe samaɣ wɛɛ yɔ lɛ, pɩwɛɛ se pɔhɔzɩ wondu ndʋ paasuwa nɛ pala tʋmɩyɛ yɔ+ nɛ pasɩɩ-tʋ tɔɔnaɣ ɖɩdɔɔyɛ ɖamɩŋ kiɖeɖeŋ taa.*+ Pʋwayɩ lɛ, posuu wondu lɛɛtʋ se pɩsa nɛ pataatɩŋnɩ po-wondu yɔɔ nɛ pɛɖɛzɩ ɛyaa kele kele wɛtʋ.*
20 Pɩfɛyɩ se pahʋ pa-ñʋʋ koloŋgolo+ yaa peyele nɛ pa-ñʋʋ taa ñɔsɩ ɖaɣlɩ. Pɩwɛɛ se papasɩ pa-ñʋʋ taa ñɔsɩ.
21 Pɩfɛyɩ se cɔjɔnaa ɩñɔɔ vɛɛ alɩwaatʋ ndʋ pasʋʋ pɩ-taa kadaɣ taa yɔ.+
22 Pɩfɛyɩ se pakpaɣ lelu yaa halʋ weyi pekizi-i yɔ nɛ ɛpɩsɩ pa-halʋ;+ ɛlɛ papɩzɩɣ nɛ pakpaɣ Izrayɛɛlɩ lʋlʋʋ taa pɛlɛ weyi ɛtɩtɩlɩ abalʋ yɔ, yaa cɔjɔ weyi ɛsɩba yɔ ɛ-halʋ.”+
23 «“Pɩwɛɛ se pɛkpɛlɩkɩ man-samaɣ nɛ katɩlɩ tʋkaɣ ŋga kɛwɛ mbʋ pɩkɛ pʋyʋ kiɖeɖeu nɛ mbʋ pɩkɛ pʋyʋ yem yɔ pɩ-hɛkʋ taa yɔ; nɛ pakaɣ-kɛ wɩlʋʋ tʋkaɣ ŋga kɛwɛ mbʋ pɩfɛyɩ kele kele nɛ mbʋ pɩwɛ kele kele yɔ pɩ-hɛkʋ taa yɔ.+
24 Ye tɔm natʋyʋ ɛlaba yɔ, pɩwɛɛ se pɛkɛ tɔm hʋyaa+ nɛ pɔcɔnɩ tɔm hʋʋ yɔɔ; pɩwɛɛ se pahʋʋ-tʋ nɛ pɩla nɔɔ kʋɖʋmaɣ nɛ mɔn-tɔm hʋʋ paɣtʋ.+ Pɩwɛɛ se pɔɖɔ man-paɣtʋ nɛ man-kpalɩtʋ ndʋ titukuuni man-kazandʋ kpeekpe+ yɔ tɩ-yɔɔ nɛ papɩsɩ man-sabaatɩwaa kiɖeɖema.
25 Pɩfɛyɩ se pɔñɔtɩnɩ sɩɖʋ nɔɔyʋ, ye palabɩ mbʋ yɔ pepisiɣ pa-tɩ. Ɛlɛ ye pɩkɛ pa-caa, po-ɖoo, pa-pɩyalʋ, pɛ-pɛlɛ, po-koobu abalɩñɩnʋ yaa po-koobu halɩñɩnʋ weyi ɛtɩwalɩta yɔ ɛ-yɔɔ yɔ, papɩzɩɣ nɛ pepisi pa-tɩ.+
26 Nɛ cɔjɔ nɔɔyʋ pɩsɩɣ kele kele nɛ pɩtɛ lɛ, pɩwɛɛ se ɛɖaŋ kɩyakɩŋ 7 pʋcɔ nɛ ɛɖaɣnɩ paɣzʋʋ tʋmɩyɛ.
27 Kɩyakʋ ŋgʋ ɛsʋʋ lone kiɖeɖeye taa, pɩ-taa kadaɣ taa, se ɛla tʋmɩyɛ lone kiɖeɖeye taa yɔ, pɩwɛɛ se ɛkɔnɩ ɛ-kɩwɛɛkɩm yɔɔ kɩlaʋ,”+ Kɩbaɣlʋ Kɩlɩm Yehowa yɔɔdʋʋna.
28 «“Nɛ pʋnɛ pɩkaɣnɩ kɛʋ pa-ñɩm: Mɛkɛnɩ pa-ñɩm.+ Pɩfɛyɩ se ɩha-wɛ ñɩm nabʋyʋ Izrayɛɛlɩ taa, mbʋ pʋyɔɔ yɔ mɛkɛnɩ pa-ñɩm.
29 Mba kaɣnɩ tɔɔʋ tɔɔnaɣ pee kɩlaʋ,+ kɩwɛɛkɩm yɔɔ kɩlaʋ nɛ wɛɛ ɖɔʋ kɩlaʋ;+ nɛ mbʋ payɩ pasɩ-pʋ kɩjaʋ Izrayɛɛlɩ taa se pɩkɛ Ɛsɔ pʋyʋ yɔ, pɩkaɣ pɩsʋʋ pa-pʋyʋ.+
30 Kajalaɣ pee wena apɩwa nɛ akpaɖɩ ɖeu yɔ a-tɩŋa, nɛ mɩ-haɖɛ ndɩ ndɩ kaɣ pɩsʋʋ cɔjɔnaa pʋyʋ.+ Nɛ pɩwɛɛ se ɩcɛlɩ cɔjɔ mɩ-kajalaɣ tɔɔnaɣ pee mʋlʋm.*+ Pɩkaɣ kɔnʋʋ wazaɣ mɩ-ɖɩsɩ taa ñɩma yɔɔ.+
31 Pɩfɛyɩ se cɔjɔnaa ɩtɔɔ sumaɣ yaa kpɩnɛ nɖɩ pamaɣnɩ-ɖɩ ɖɩsɩba yaa pɩcɩyɩ-ɖɩ nanʋʋ nanʋʋ yɔ.”+
Pɩ-tɛɛ tɔm
^ Piye piye, «kpɔnɔ.»
^ Piye piye, «sɩɩ ña-laŋɩyɛ.»
^ Piye piye, «mɔn-kpɔnɔ.»
^ Ebree tɔm piye nɖɩ palabɩnɩ tʋmɩyɛ yɔ, pɩtɩla yɔ nɔɔ kʋɖʋmaɣ nakɛyɛ wɛ ɖɩ nɛ Ebree tɔm piye naɖɩyɛ, nɖɩ pɛɖɛzɩɣ se «pɩndʋ» yɔ pɛ-hɛkʋ taa, nɛ palakɩnɩ-ɖɩ tʋmɩyɛ se peni nabʋyʋ.
^ Yaa «pɩsatʋ ndʋ payaɣ se lɛɛ yɔ.» Lɛɛ kɛ ñɩtʋ ndʋ pahayaɣ-tʋ ɖooo caanaʋ taa nɛ palakɩnɩ-tʋ tʋmɩyɛ nɛ palʋʋnɩ wondu kususutu yɔ.
^ Yaa «pasɩɩ-tʋ kuduyuŋ kiɖeɖeŋ taa.»
^ Piye piye, «nɛ pala nɛ ɛyaa pɩsɩ kiɖeɖema.»
^ Piye piye, «mʋlʋm mbʋ pɩtɩkpɩzɩ yɔ.»
