Ezekɩyɛɛlɩ 45:1-25
45 «“Alɩwaatʋ ndʋ ɩtayɩɣ ɛjaɖɛ se ɖɩpɩsɩ mɩ-ñɩm yɔ,+ pɩwɛɛ se ɩlɩzɩ ɛjaɖɛ hɔɔlʋʋ nakʋyʋ nɛ ɩha Yehowa.+ Hɔɔlʋʋ ŋgʋ, kɩkaɣ kɛʋ kiɖeɖeu. Pɩwɛɛ se kɩ-ɖaɣlɩkɩŋ ɛkɛ nuŋgolonzi* 25 000, nɛ kɩ-walanzɩ kɛ nuŋgolonzi 10 000.+ Ki-lone kpeekpe kaɣ kɛʋ hɔɔlʋʋ kiɖeɖeu.
2 Pakaɣ lɩzʋʋ kɩ-taa hɔɔlʋʋ nakʋyʋ nɛ kɩkɛ lone kiɖeɖeye nɖɩ ɖɩ-hɔɔlɩŋ 4 tɩŋa wɛ kɩmaŋ yɔ, paa hɔɔlʋʋ ŋgʋ lɛ kɩwɛɛnɩ nuŋgolonzi 500,+ nɛ lona wena a-taa kpɩna tɔkɩ ñɩtʋ yɔ akaɣ wɛʋ paa hɔɔlʋʋ ŋgʋ lɛ kɩ-yɔɔ, nɛ a-walanzɩ kɛ nuŋgolonzi 50.+
3 Hɔɔlʋʋ ŋgʋ pamaɣzaa yɔ kɩ-taa lɛ, pɩwɛɛ se ŋmaɣzɩ ɖaɣlɩkɩŋ taa nuŋgolonzi 25 000 nɛ walanzɩ taa nuŋgolonzi 10 000; nɛ pɩ-taa peeɖe kooka kiɖeɖeɣa kaɣ wɛʋ; kakaɣ kɛʋ pʋyʋ kiɖeɖeu siŋŋ.
4 Hɔɔlʋʋ ŋgʋ, kɩkaɣ kɛʋ ɛjaɖɛ hɔɔlʋʋ kiɖeɖeu ŋgʋ kɩkɛ cɔjɔnaa pʋyʋ yɔ;+ cɔjɔnaa mba pɛkɛ kooka kiɖeɖeɣa lɩmɖʋyaa yɔ, mba pɔñɔtʋʋnɩ Yehowa se paɖʋ-ɩ lɩm yɔ.+ Kɩkaɣ kɛʋ lone nɖɩ ɖɩ-taa pa-ɖɩsɩ wɛɣ yɔ nɛ lone kiɖeɖeye nɖɩ ɖɩ-taa kooka kiɖeɖeɣa wɛɣ yɔ.
5 «“Hɔɔlʋʋ nakʋyʋ kaɣ wɛʋ, kɩ-ɖaɣlɩkɩŋ kaɣ kɛʋ nuŋgolonzi 25 000 nɛ kɩ-walanzɩ kɛ nuŋgolonzi 10 000.+ Nɛ kɩkaɣ kɛʋ Leevi ñɩma mba pɛkɛ templo taa lɩmɖʋyaa yɔ pa-pʋyʋ, nɛ pakaɣ wɛnʋʋ tɔɔnaɣ ɖɩdɔɔyɛ ɖamɩŋ 20*+ nɛ pɩkɛ pa-pʋyʋ.
6 «“Ɩkaɣ cɛlʋʋ hɔɔlʋʋ nakʋyʋ nɛ kɩpɩsɩ tɛtʋ pʋyʋ; hɔɔlʋʋ ŋgʋ, kɩ-ɖaɣlɩkɩŋ kɛɣ nuŋgolonzi 25 000 (pɩwɛɛ se kɩmʋnɩ haɖɛ kiɖeɖeye) nɛ kɩ-walanzɩ kɛ nuŋgolonzi 5 000.+ Kɩkaɣ kɛʋ Izrayɛɛlɩ ɖɩɣa kpeekpe pʋyʋ.
7 «“Nɛ ñʋʋdʋ kaɣ tɛtʋ wɛnʋʋ haɖɛ kiɖeɖeye hɔɔlɩŋ 2 ɛnɩ ɩ-yɔɔ nɛ lone nɖɩ pɛcɛlɩ tɛtʋ yɔ ɖɩ-hɔɔlɩŋ 2 ɛnɩ ɩ-yɔɔ. Tɩkaɣ wɛʋ haɖɛ kiɖeɖeye nɛ lone nɖɩ pɛcɛlɩ tɛtʋ yɔ ɖɩ-cɔlɔ. Tɩkaɣ wɛʋ wɩsɩ ɖɩɖʋyɛ hɔɔlʋʋ taa nɛ wɩsɩ ɖɩlɩyɛ hɔɔlʋʋ taa. Kpaɣnɩ kamaɣ ŋga kɛwɛ wɩsɩ ɖɩɖʋyɛ taa yɔ nɛ piwolo kamaɣ ŋga kɛwɛ wɩsɩ ɖɩlɩyɛ taa yɔ lɛ, tɩ-ɖaɣlɩkɩŋ ɛmaɣnɩ hɔɔlɩŋ weyi patayɩ cejewe yɔ ɩ-taa nakʋyʋ ɖaɣlɩkɩŋ.+
8 Tɛtʋ ndʋ tɩkaɣ pɩsʋʋ ɛ-pʋyʋ Izrayɛɛlɩ taa. Mba malɩzaa nɛ pɛkɛ ñʋndɩnaa yɔ, paakaɣ tasʋʋ wɩlʋʋ man-samaɣ ñaŋ,+ nɛ pakaɣ cɛlʋʋ ɛjaɖɛ Izrayɛɛlɩ ɖɩɣa nɛ pɩmʋnɩ ke-cejewe.”+
9 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Izrayɛɛlɩ ñʋndɩnaa, ɩɖɛlɛsɩ niye kpem!”
«“Iyele mi-puuyaɣ lakasɩ nɛ mɩ-kañatʋ lakasɩ, nɛ ɩla mbʋ pɩtʋʋzaa nɛ pɩwɛɛ siɣsiɣ yɔ.+ Iyele mʋʋ man-samaɣ wondu,”+ Kɩbaɣlʋ Kɩlɩm Yehowa yɔɔdʋʋna.
10 “Pɩwɛɛ se ɩlabɩnɩ tʋmɩyɛ kɩmaɣzɩŋ weyi ɩtʋʋzaa yɔ, efa kɩmaɣzʋʋ* ŋgʋ kɩtʋʋzaa yɔ nɛ bat kɩmaɣzʋʋ* ŋgʋ kɩtʋʋzaa yɔ.+
11 Pɩwɛɛ se kɩmaɣzʋʋ nakʋyʋ ɛwɛɛ nɛ pamaɣzɩɣnɩ efa nɛ bat. Pɩwɛɛ se bat ɛmaɣnɩ homɛr* hɔɔlʋʋ 10 ñɩŋgʋ, nɛ pɩwɛɛ se efa ɛmaɣnɩ homɛr hɔɔlʋʋ 10 ñɩŋgʋ ɖɔɖɔ. Homɛr kaɣnɩ kɛʋ mbʋ pamaɣzɩɣna yɔ.
12 Pɩwɛɛ se sikli*+ ɛkɛ gerawaa* 20. Nɛ siklinaa 20 pɩtasɩ siklinaa 25 pɩtasɩ siklinaa 15 pɩkaɣ-mɩ kɛʋ manee* kʋɖʋmʋʋ.”
13 «“Haɖɛ ɖɩnɛ pɩwɛɛ se ɩha: paa blee homɛr ŋgʋ kɩ-yɔɔ lɛ, efa hɔɔlʋʋ 6 ñɩŋgʋ, nɛ paa orjɩ homɛr ŋgʋ kɩ-yɔɔ lɛ, efa hɔɔlʋʋ 6 ñɩŋgʋ.
14 Num mbʋ ɩhaɣ yɔ, pɩwɛɛ se ɩmaɣzɩ-pʋ nɛ bat kɩmaɣzʋʋ. Bat kɛ kɔɔr* hɔɔlʋʋ 10 ñɩŋgʋ, nɛ batwaa 10 kɛ homɛr kʋɖʋmʋʋ, mbʋ pʋyɔɔ yɔ batwaa 10 maɣnɩ homɛr kʋɖʋmʋʋ.
15 Nɛ Izrayɛɛlɩ mba kpɩna taa lɛ, pɩwɛɛ se ɩkpaɣ heu kʋɖʋm heŋ 200 yɔɔ nɛ ɩha. Pakaɣ kpaɣʋ pɩtɩŋa payɩ mbʋ yɔ nɛ palaanɩ tɔɔnaɣ pee kɩlaʋ,+ kɩlaʋ kɩñaɣzʋʋ,+ nɛ laŋhɛzɩyɛ kɩlaŋ+ se pɩsa nɛ pohuuzi samaɣ kɩwɛɛkɩm yɔɔ,”+ Kɩbaɣlʋ Kɩlɩm Yehowa yɔɔdʋʋna.
16 «“Ɛjaɖɛ taa ɛyaa kpeekpe kaɣ haʋ haɖɛ+ nɖɩ Izrayɛɛlɩ ñʋʋdʋ.
17 Ɛlɛ ñʋʋdʋ kaɣnɩ cɔnʋʋ kɩlaŋ kɩñaɣzɩŋ,+ tɔɔnaɣ pee kɩlaʋ,+ nɛ kilizaɣ yɔɔ kazandʋ alɩwaatʋ taa,+ fenasɩ kɩfasɩ alɩwaatʋ taa, Sabaatɩwaa alɩwaatʋ taa,+ nɛ Izrayɛɛlɩ ɖɩɣa kazandʋ ndʋ paɖʋ tɩ-alɩwaatʋ yɔ ti-kpeekpe tɩ-alɩwaatʋ taa.+ Ɛnʋ kaɣnɩ ñɔɔzʋʋ kɩwɛɛkɩm yɔɔ kɩlaʋ, tɔɔnaɣ pee kɩlaʋ, kɩlaʋ kɩñaɣzʋʋ, nɛ laŋhɛzɩyɛ kɩlaŋ se pɩsa nɛ pohuuzi Izrayɛɛlɩ ɖɩɣa kɩwɛɛkɩm yɔɔ.”
18 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Fenaɣ kajalaɣ ñɩŋga taa, fenaɣ ŋga ka-kajalaɣ kɩyakʋ ñɩŋgʋ wiye, pɩwɛɛ se ŋkpaɣ naŋ taa nɔ* abalɩñɩnʋ weyi ɛfɛyɩnɩ ɛjandʋ natʋyʋ yɔ nɛ ŋñalɩnɩ kooka kiɖeɖeɣa yɔɔ kɩwɛɛkɩm.+
19 Cɔjɔ kaɣ cozuu kɩwɛɛkɩm yɔɔ kɩlaʋ calɩm nɛ ɛtaa-pʋ templo nɔnɔɔ tilima yɔɔ,+ altaaru nɔɔ ŋga kɔcɔ kpɛɛɛ nɛ kata yɔ kɔ-kɔnanaa 4 yɔɔ, nɛ pɩ-taa kadaɣ nɔnɔɔ tilima yɔɔ.
20 Mbʋ ŋkaɣ labʋ fenaɣ kɩyakʋ 7 ñɩŋgʋ wiye ye piyiɣdi nɔɔyʋ nɛ ɛla kɩwɛɛkɩm, yaa ɛlabɩ kɩwɛɛkɩm nɛ ɛtɩna yɔ.+ Mbʋ ɩkaɣ labʋ templo yɔɔ kɩwɛɛkɩm yɔɔ huuzuu sɔnzɩ.+
21 «“Fenaɣ kajalaɣ ñɩŋga taa, fenaɣ ŋga ka-kɩyakʋ 14 ñɩŋgʋ wiye, ɩkaɣ tɔɔʋ Paska kazandʋ.+ Pɩwɛɛ se ɩtɔɔ kpɔnɔ ŋgʋ kɩ-taa patɩɖʋ lɔlɔm yɔ kɩyakɩŋ lʋbɛ.+
22 Kɩyakʋ ŋgʋ ki-wiye, ñʋʋdʋ kaɣ ñɔɔzʋʋ nɔ* abalɩñɩnʋ se pɩkɛ kɩwɛɛkɩm yɔɔ kɩlaʋ ɛ-maɣmaɣ ɛ-yɔɔ nɛ ɛjaɖɛ taa samaɣ kpeekpe yɔɔ.+
23 Kazandʋ kɩyakɩŋ 7 ɛnɩ ɩ-taa, ɛkaɣ ñɔɔzʋʋ naŋ* abalɩñɩŋ 7 weyi ɩfɛyɩnɩ ɛjandʋ natʋyʋ yɔ nɛ ɛyaŋ 7 weyi ɩfɛyɩnɩ ɛjandʋ natʋyʋ yɔ paa kɩyakʋ ŋgʋ, pɩkpɛndɩnɩ tuluu kʋɖʋmʋʋ paa kɩyakʋ ŋgʋ+ se pɩkɛ kɩwɛɛkɩm yɔɔ kɩlaʋ. Pakaɣ pɩtɩŋa laʋ nɛ pɩkɛ Yehowa kɩlaʋ kɩñaɣzʋʋ.
24 Pɩwɛɛ ɖɔɖɔ se paa nɔ* abalɩñɩnʋ weyi ɛ-yɔɔ lɛ, ɛñɔɔzɩ efa kʋɖʋmʋʋ, nɛ ɛñɔɔzɩ ɖɔɖɔ efa kʋɖʋmʋʋ paa ɛyaʋ ŋgʋ lɛ kɩ-yɔɔ, pɩkpɛndɩnɩ num hiini* kʋɖʋmʋʋ paa efa ŋgʋ lɛ kɩ-yɔɔ nɛ pɩkɛ tɔɔnaɣ pee kɩlaʋ.
25 «“Fenaɣ 7 ñɩŋga taa, fenaɣ ŋga ka-kɩyakʋ 15 ñɩŋgʋ wiye, pɩwɛɛ se ɛñɔɔzɩ kɩwɛɛkɩm yɔɔ kɩlaʋ kʋɖʋmʋʋ ŋgʋ, kɩlaʋ kɩñaɣzʋʋ kʋɖʋmʋʋ ŋgʋ, tɔɔnaɣ pee kɩlaʋ kʋɖʋmʋʋ ŋgʋ nɛ num kʋɖʋmʋm mbʋ kɩyakɩŋ 7 kazandʋ taa.”»+
Pɩ-tɛɛ tɔm
^ Nuŋgolonzi kɩɖaɣlɩsɩ tɔm pɔyɔɔdʋʋ. Cɔnɩ Tɔm kɩsɔzɩtʋ B14.
^ Yaa «pakaɣ wɛnʋʋ kuduyuŋ 20.»
^ Cɔnɩ Tɔm kɩsɔzɩtʋ B14.
^ Cɔnɩ Tɔm kɩsɔzɩtʋ B14.
^ Cɔnɩ Tɔm kɩsɔzɩtʋ B14.
^ Yaa «miinɩ.» Cɔnɩ Tɔm kɩsɔzɩtʋ B14.
^ Cɔnɩ Tɔm kɩsɔzɩtʋ B14.
^ Cɔnɩ Tɔm kɩsɔzɩtʋ B14.
^ Cɔnɩ Tɔm kɩsɔzɩtʋ B14.
^ Nɔ weyi ɛ nɛ e-ɖoŋ nɛ ɛtɩkpadɩyɩ yɔ ɛ-tɔm pɔyɔɔdʋʋ.
^ Cɔnɩ kalɩtʋ 18 tɛ pɩ-tɛɛ tɔm.
^ Naŋ weyi ɩ nɛ i-ɖoŋ nɛ ɩtɩkpadɩyɩ yɔ ɩ-tɔm pɔyɔɔdʋʋ.
^ Cɔnɩ kalɩtʋ 18 tɛ pɩ-tɛɛ tɔm.
^ Cɔnɩ Tɔm kɩsɔzɩtʋ B14.
