Ezekɩyɛɛlɩ 46:1-24
46 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Pɩ-taa kadaɣ nɔnɔɔ ŋga kaha ɛsa nɛ wɩsɩ ɖɩlɩyɛ taa yɔ,+ pɩwɛɛ se paɖɩɣ-kɛ+ mbʋ kɩyakɩŋ 6 weyi palakɩ tʋmɩyɛ yɔ;+ ɛlɛ pɩwɛɛ se patʋlɩ-kɛ Sabaatɩ kɩyakʋ wiye nɛ fenaɣ kɩfalaɣ kɩyakʋ wiye.
2 Ñʋʋdʋ kaɣ lɩnʋʋ awayɩ nɛ ɛtɩŋnɩ nɔnɔɔ kʋjɔŋ tɛɛ nɛ ɛsʋʋ,+ nɛ ɛkaɣ sɩŋʋʋ nɔnɔɔ tilimiye cɔlɔ. Cɔjɔnaa kaɣ laʋ ɛ-kɩlaʋ kɩñaɣzʋʋ nɛ ɛ-laŋhɛzɩyɛ kɩlaŋ, nɛ ɛkaɣ luŋuu nɔnɔɔ tɛɛ nɛ pʋwayɩ lɛ ɛlɩɩ. Ɛlɛ paakaɣ ɖɩɣʋ nɔnɔɔ nɛ pɩkɔɔ pɩtalɩ ɖanaɣ yɔɔ.
3 Ɛjaɖɛ taa samaɣ ɖɔɖɔ kaɣ luŋuu Yehowa ɛsɩndaa, nɔnɔɔ ŋga ka-ɖɩzʋyɛ taa Sabaatɩwaa nɛ fenasɩ kɩfasɩ alɩwaatʋ taa.+
4 «“Kɩlaʋ kɩñaɣzʋʋ ŋgʋ ñʋʋdʋ kaɣ wonuu Yehowa Sabaatɩ kɩyakʋ wiye yɔ, pɩwɛɛ se kɩkɛ heɣsi abalɩñɩnzɩ 6 nzɩ sɩfɛyɩnɩ ɛjandʋ natʋyʋ yɔ nɛ ɛyaʋ ŋgʋ kɩfɛyɩnɩ ɛjandʋ natʋyʋ yɔ.+
5 Tɔɔnaɣ pee kɩlaʋ kaɣ kɛʋ efa* kʋɖʋmʋʋ ɛyaʋ yɔɔ nɛ mbʋ payɩ ɛpɩzɩɣ nɛ ɛha heɣsi abalɩñɩnzɩ yɔɔ yɔ, pɩkpɛndɩnɩ num hiini* kʋɖʋmʋʋ paa efa ŋgʋ lɛ kɩ-yɔɔ.+
6 Fenaɣ kɩfalaɣ kɩyakʋ wiye, kɩlaʋ ŋgʋ ɛkaɣ laʋ yɔ kɩkaɣ kɛʋ naŋ taa nɔ* abalɩñɩnʋ weyi ɛfɛyɩnɩ ɛjandʋ natʋyʋ yɔ, heɣsi abalɩñɩnzɩ 6 nɛ ɛyaʋ; pɩwɛɛ se pataawɛɛnɩ ɛjandʋ natʋyʋ.+
7 Pɩwɛɛ se nɔ abalɩñɩnʋ yɔɔ lɛ, ɛha efa kʋɖʋmʋʋ, ɛyaʋ yɔɔ lɛ ɛha efa kʋɖʋmʋʋ, nɛ ɛha mbʋ payɩ ɛpɩzɩɣ yɔ heɣsi abalɩñɩnzɩ yɔɔ nɛ pɩkɛ tɔɔnaɣ pee kɩlaʋ. Nɛ pɩwɛɛ se ɛha num hiini kʋɖʋmʋʋ paa efa ŋgʋ lɛ kɩ-yɔɔ.
8 «“Alɩwaatʋ ndʋ ñʋʋdʋ sʋʋ yɔ, pɩwɛɛ se ɛtɩŋnɩ nɔnɔɔ kʋjɔŋ nɛ ɛsʋʋ, nɛ peeɖe ɖɔɖɔ pɩwɛɛ se ɛtɩŋna nɛ ɛlɩɩ.+
9 Nɛ alɩwaatʋ ndʋ ɛjaɖɛ taa samaɣ kɔŋ Yehowa ɛsɩndaa kazandʋ alɩwaatʋ taa yɔ,+ mba patɩŋɩɣnɩ hayo kiŋ nɔnɔɔ+ nɛ pasʋʋ se pɛsɛɛ-ɩ yɔ, pɩwɛɛ se patɩŋnɩ hadɛ kiŋ nɔnɔɔ+ nɛ palɩɩ; nɛ mba patɩŋɩɣnɩ hadɛ kiŋ nɔnɔɔ nɛ pasʋʋ yɔ, pɩwɛɛ se patɩŋnɩ hayo kiŋ nɔnɔɔ nɛ palɩɩ. Pɩfɛyɩ se nɔɔyʋ ɛlɩɩnɩ nɔnɔɔ ŋga ɛsʋnaa yɔ, mbʋ pʋyɔɔ yɔ pɩwɛɛ se patɩŋnɩ nɔnɔɔ ŋga kaha-wɛ nɛ ɛsa yɔ nɛ palɩɩ.
10 Piyele nɛ ñʋʋdʋ weyi ɛwɛ pɛ-hɛkʋ taa yɔ, pɩwɛɛ se ɛsʋʋ alɩwaatʋ ndʋ pasʋʋ yɔ, nɛ pɩwɛɛ se ɛlɩɩ alɩwaatʋ ndʋ palɩɣ yɔ.
11 Kazandʋ ndɩ ndɩ wiye nɛ kazandʋ ndɩ ndɩ alɩwaatʋ taa, tɔɔnaɣ pee kɩlaʋ kʋnɛ pɩwɛɛ se ɛlaa: Pɩwɛɛ se nɔ* abalɩñɩnʋ yɔɔ lɛ, ɛha efa kʋɖʋmʋʋ; ɛyaʋ yɔɔ lɛ, ɛha efa kʋɖʋmʋʋ; nɛ mbʋ payɩ ɛpɩzɩɣ se ɛha heɣsi abalɩñɩnzɩ yɔɔ yɔ, pɩkpɛndɩnɩ num hiini kʋɖʋmʋʋ paa efa ŋgʋ lɛ kɩ-yɔɔ.+
12 «“Ye ñʋʋdʋ ɛñɔɔzɩ kɩlaʋ kɩñaɣzʋʋ+ yaa laŋhɛzɩyɛ kɩlaŋ se pɩkɛ sɔɔlɩm haɖɛ Yehowa yɔ, pakaɣ-ɩ tʋlʋʋ nɔnɔɔ ŋga kaha ɛsa nɛ wɩsɩ ɖɩlɩyɛ taa kiŋ yɔ, nɛ ɛkaɣ ñɔɔzʋʋ ɛ-kɩlaʋ kɩñaɣzʋʋ nɛ ɛ-laŋhɛzɩyɛ kɩlaŋ ɛzɩ ɛlakʋʋ Sabaatɩ kɩyakʋ wiye yɔ.+ Ɛtɛŋ lɩʋ lɛ, pɩwɛɛ se paɖɩɣ nɔnɔɔ.+
13 «“Paa kɩyakʋ ŋgʋ lɛ, pɩwɛɛ se ŋñɔɔzɩ heɣa abalɩñɩŋga ŋga kɛfɛyɩnɩ ɛjandʋ natʋyʋ nɛ kɛwɛ ka-kajalaɣ pɩnaɣ taa yɔ nɛ pɩkɛ kɩlaʋ kɩñaɣzʋʋ Yehowa.+ Pɩwɛɛ se ŋla mbʋ paa tanaŋ ŋgʋ.
14 Pɩtasɩnɩ mbʋ lɛ, paa tanaŋ ŋgʋ, pɩwɛɛ se ŋñɔɔzɩ efa hɔɔlʋʋ 6 ñɩŋgʋ nɛ pɩkɛ tɔɔnaɣ pee kɩlaʋ, pɩkpɛndɩnɩ num hiini hɔɔlʋʋ 3 ñɩŋgʋ se pamɩzɩ mʋlʋm mbʋ pɩkpɩzɩ camɩyɛ yɔ pɩ-yɔɔ nɛ pɩkɛ tɔɔnaɣ pee kɩlaʋ Yehowa paa ɛzɩmtaa. Pɩkɛ tamtam paɣtʋ.
15 Pɩwɛɛ se pɔñɔɔzɩ heɣa abalɩñɩŋga, tɔɔnaɣ pee kɩlaʋ nɛ num paa tanaŋ ŋgʋ nɛ pɩkɛ kɩlaʋ kɩñaɣzʋʋ paa ɛzɩmtaa.”
16 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Ye ñʋʋdʋ ɛha tɛtʋ natʋyʋ paa ɛ-pɩyalʋ weyi se pɩkɛ ɛ-ñɩm yɔ, tɩkaɣ pɩsʋʋ ɛ-pɩyalaa tɛtʋ. Tɩkɛ tɛtʋ ndʋ patayɩ-wɛ nɛ tɩpɩsɩ pa-ñɩm yɔ.
17 Ɛlɛ ye ɛha ɛ-tɛtʋ hɔɔlʋʋ nakʋyʋ ɛ-lɩmɖʋyaa taa nɔɔyʋ yɔ, tɩkaɣ kɛʋ ɛlɛ pʋyʋ nɛ pɩkɔɔ pɩsɩɩnɩ tɩ-yɔɔ wɛʋ pɩnaɣ;+ nɛ pʋwayɩ lɛ, tɩɖaɣnɩɣ pɩsʋʋ ñʋʋdʋ pʋyʋ. Ɛ-pɩyalaa ñɩm ɖeke kaɣnɩ kɛʋ pa-ñɩm tam.
18 Pɩfɛyɩ se ñʋʋdʋ ɛmʋ mbʋ pɩkɛ samaɣ ñɩm yɔ pɩ-taa nabʋyʋ; pɩfɛyɩ se ɛñɩɣ kɔ-yɔɔ nɛ keyele kɛ-tɛtʋ nɛ tɩpɩsɩ ɛ-ñɩm. Ɛ-maɣmaɣ ɛ-tɛtʋ taa pɩwɛɛ se ɛlɩzɩ nɛ ɛha ɛ-pɩyalaa nɛ pɩkɛ pa-ñɩm, se pɩsa nɛ pataaɖɔɔnɩ man-samaɣ taa nɔɔyʋ ɛ-tɛtʋ yɔɔ.”»
19 Pʋwayɩ lɛ, ɛtɩŋnɩ-m nɔnɔɔ+ ŋga kowokini cɔjɔnaa tɔɔnaɣ ɖɩdɔɔyɛ ɖamɩŋ kiɖeɖeŋ* taa yɔ kɔ-cɔlɔ nɛ ɛsʋnɩ-m; ɖamɩŋ ɛnɩ ɩɩha ɛsa nɛ hayo kiŋ.+ Nɛ mana lone naɖɩyɛ peeɖe, ɖɩwɛnɩ wayɩ kiŋ, wɩsɩ ɖɩɖʋyɛ hɔɔlʋʋ taa.
20 Eheyi-m se: «Lone ɖɩnɛ, ɖɩ-taa cɔjɔnaa kaɣ tɩzʋʋ wɛɛ ɖɔʋ kɩlaʋ nɛ kɩwɛɛkɩm yɔɔ kɩlaʋ nandʋ, nɛ peeɖe pakaɣ hɔbʋ tɔɔnaɣ pee kɩlaʋ,+ se pɩsa nɛ pataakpaɣ nabʋyʋ nɛ palɩnɩ awayɩ kadaɣ taa nɛ pɛɖɛzɩ ɛyaa kele kele wɛtʋ.»*+
21 Ɛlɩnɩ-m awayɩ kadaɣ taa nɛ ɛtɩŋnɩ-m kadaɣ kɔnanaa mba pa-naanza pa-taa, nɛ mana kadaɣ nakɛyɛ paa awayɩ kadaɣ kɔna ŋgʋ lɛ kɩ-taa.
22 Kadasɩ cikpesi nasɩyɩ kaawɛ kadaɣ kɔnanaa mba pa-naanza pa-taa, sɩ-ɖaɣlɩkɩŋ kaakɛ nuŋgolonzi* 40 nɛ sɩ-walanzɩ kɛ nuŋgolonzi 30. Sɩ-naanza sɩɩwɛ kɩmaŋ.*
23 Canzɩ nasɩyɩ kaacɔ sɩ-naanza kpɛɛɛ nɛ sɩta, nɛ canzɩ nzɩ sɩ-tɛɛ lɛ, paama lona naayɛ nɛ patɩzɩɣ a-taa kɩlaŋ nandʋ.
24 Ðɩnɛ ɛlɛ eheyi-m se: «Lona anɛ, a-taa templo taa lɩmɖʋyaa tɩzɩɣ samaɣ kɩlaŋ nandʋ.»+
Pɩ-tɛɛ tɔm
^ Cɔnɩ Tɔm kɩsɔzɩtʋ B14.
^ Cɔnɩ Tɔm kɩsɔzɩtʋ B14.
^ Nɔ weyi ɛ nɛ e-ɖoŋ nɛ ɛtɩkpadɩyɩ yɔ ɛ-tɔm pɔyɔɔdʋʋ.
^ Cɔnɩ kalɩtʋ 6 tɛ pɩ-tɛɛ tɔm.
^ Yaa «cɔjɔnaa kuduyuŋ kiɖeɖeŋ.»
^ Piye piye, «nɛ pala nɛ ɛyaa pɩsɩ kiɖeɖema.»
^ Nuŋgolonzi kɩɖaɣlɩsɩ tɔm pɔyɔɔdʋʋ. Cɔnɩ Tɔm kɩsɔzɩtʋ B14.
^ Yaa «Sɩ-naanza nɛ sɩ-kɔnanaa wɛtʋ kaawɛ kɩmaŋ.»
