Ezekɩyɛɛlɩ 6:1-14
6 Yehowa tɔm tasɩ-m talʋʋ se:
2 «Ɛyʋ pɩyalʋ, kɛzɩ ñɛ-ɛsa nɛ Izrayɛɛlɩ pʋŋ yɔɔ nɛ ŋyɔɔdɩ ɩ-yɔɔ natʋ tɔm.
3 Pɩwɛɛ se ŋyɔɔdɩ se: “Oo Izrayɛɛlɩ pʋŋ, iwelisi Kɩbaɣlʋ Kɩlɩm Yehowa tɔm: Tɔm tʋnɛ Kɩbaɣlʋ Kɩlɩm Yehowa heyiɣ pʋŋ, piyisi, lemisi nɛ fɛɛŋ: ‘Ɩna! Mankaɣ kɔnʋʋ laɣɖɛ mɩ-wayɩ, nɛ mankaɣ ɖɩzʋʋ mi-lona kʋkʋya.
4 Mankaɣ yɔkʋʋ mɩ-altaarunaa, mankaɣ pɛlʋʋ wondu ndʋ tɩ-yɔɔ ɩsɩɣ mi-ŋgee tɩlaaɖɩ yɔ,+ nɛ mankaɣ lɔʋ mɩ-ɛyaa mba pakʋwa yɔ mɩ-sɩʋ kpelisi nzɩ sɩwɛ kiniŋ yɔ* sɩ-ɛsɩndaa.+
5 Mankaɣ lɔʋ Izrayɛɛlɩ ɛyaa mba pasɩba yɔ po-tomnasɩ pa-sɩʋ kpelisi nzɩ sɩwɛ kiniŋ yɔ sɩ-ɛsɩndaa, nɛ mankaɣ mɩzʋʋ mɩ-mɔɔ nɛ pɩcɔɔ mɩ-altaarunaa nɛ pɩta.+
6 Lona wena a-taa payɩ ɩwɛɛ yɔ, pakaɣ ɖɩzʋʋ a-tɛtʋ ndɩ ndɩ+ nɛ pɔyɔkɩ a-lona kʋkʋya nɛ acaɣ kpɛɖɛ.+ Pakaɣ yɔkʋʋ mɩ-altaarunaa nɛ papʋʋtɩ-wɛ, mɩ-sɩʋ kpelisi nzɩ sɩwɛ kiniŋ yɔ sɩkaɣ ɖɩm, pakaɣ pɛlʋʋ wondu ndʋ tɩ-yɔɔ ɩsɩɣ mi-ŋgee tɩlaaɖɩ yɔ, nɛ pakaɣ hɩzʋʋ mɩ-tʋma caɣ caɣ.
7 Nɛ ɛyaa mba pakʋwa yɔ pakaɣ tɔlʋʋ mɩ-hɛkʋ taa,+ nɛ toovenim taa lɛ ɩkaɣ tɩlʋʋ se ma lɛ Yehowa.+
8 «“‘Ɛlɛ mankaɣ ɛyaa nabɛyɛ kazʋʋ, mbʋ pʋyɔɔ yɔ mɩ-taa nabɛyɛ kaɣ lɩʋ laɣɖɛ nesi tɛɛ alɩwaatʋ ndʋ ɩwɛɣ ajɛɛ taa yɔ, pamɩzɩɣ-mɩ a-taa lɛ.+
9 Nɛ ɛyaa mba pehikiɣ ñʋʋ yabʋ yɔ pakaɣ tɔzʋʋ mɔ-yɔɔ ajɛɛ wena a-taa powoni-wɛ yomiye taa yɔ a-taa.+ Pakaɣ ɖiɣzinuu se ma-laŋɩyɛ wɛɛkaa, mbʋ pʋyɔɔ yɔ pa-laŋɩyɛ nɖɩ ɖɩfɛyɩ siɣsiɣ yɔ* ɖiposini-m+ nɛ pɛ-ɛsa cɔŋnɩ pa-sɩʋ kpelisi nzɩ sɩwɛ kiniŋ yɔ nɛ kɔɖɛyɩ.*+ Pa-lakasɩ kɩdɛkɛdɩsɩ nɛ pa-kʋzɔɔtʋ lakasɩ nzɩ payɩ palaba yɔ sɩkaɣ-wɛ kpaʋ fɛyɛ nɛ sɩwɛɛ-wɛ kiniŋ.+
10 Toovenim taa lɛ pakaɣ tɩlʋʋ se ma lɛ Yehowa, nɛ tɔm ndʋ mɔyɔɔdaa se mɔnkɔŋnɩ pɔ-yɔɔ asɛyʋʋ kʋnɛ yɔ tɩtɩkɛ falaa tɔm.’”+
11 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Ma ñe-nesi taa nɛ ŋma ña-nɩŋgbaŋaɣ nɛ tɛtʋ nɛ ŋwɛɛ laŋwɛɛkɩyɛ taa lakasɩ kɩdɛkɛdɩsɩ nɛ kʋzɔɔtʋ lakasɩ nzɩ payɩ Izrayɛɛlɩ ɖɩɣa laba yɔ sɩ-yɔɔ, mbʋ pʋyɔɔ yɔ laɣɖɛ, ñɔɔsɩ nɛ kɩzɩkʋ kaɣ-wɛ kʋʋ.+
12 Weyi ɛwɛ poliŋ taa yɔ kɩzɩkʋ kaɣ-ɩ kʋʋ, weyi ɛwɛ pɩ-cɔlɔ yɔ laɣɖɛ kaɣ-ɩ kʋʋ, nɛ weyi ɛtʋlaa nɛ ɛtɩsɩ yɔ ñɔɔsɩ kaɣ-ɩ kʋʋ nɛ ɛsɩ; nɛ mankaɣ pɩyʋʋ man-pana pɔ-yɔɔ nɛ atalɩ a-kamaɣ yɔɔ.+
13 Nɛ toovenim taa lɛ ɩkaɣ tɩlʋʋ se ma lɛ Yehowa;+ alɩwaatʋ ndʋ lɛ, pɛ-ɛyaa mba pakʋwa yɔ pakaɣ pɛɛtʋʋ pa-sɩʋ kpelisi nzɩ sɩwɛ kiniŋ yɔ sɩ-hɛkɩŋ taa, pa-altaarunaa cɔlɔ kpɛɛɛ,+ paa piyaɣ ŋga lɛ kɔ-yɔɔ, pʋŋ tɩŋa ñʋŋ taa, tɩŋ weyi payɩ ɩwɛ hatʋ camɩyɛ yɔ ɩ-tɛɛ, nɛ tɩŋ sɔsɔŋ pilinzi tɛɛ, ɖenɖe palaɣaɣ sɔzɩŋ kɩlaŋ se pɛhɛzɩnɩ pa-sɩʋ kpelisi nzɩ sɩwɛ kiniŋ yɔ sɩ-tɩŋa sɩ-laŋa yɔ.+
14 Mankaɣ sezuu me-nesi pɔ-yɔɔ nɛ meyele nɛ ɛjaɖɛ wɛɛ kpɛɖɛ, nɛ pa-ɖɩjaɣyɛ lona kaɣ wɛʋ kpɛɖɛ nɛ pɩkɩlɩ kañɩmbusuu ŋgʋ kɩwɛ Dibla cɔlɔ yɔ. Nɛ toovenim taa lɛ pakaɣ tɩlʋʋ se ma lɛ Yehowa.”»
Pɩ-tɛɛ tɔm
^ Ebree tɔm piye nɖɩ palabɩnɩ tʋmɩyɛ yɔ, pɩtɩla yɔ nɔɔ kʋɖʋmaɣ nakɛyɛ wɛ ɖɩ nɛ Ebree tɔm piye naɖɩyɛ, nɖɩ pɛɖɛzɩɣ se «pɩndʋ» yɔ pɛ-hɛkʋ taa, nɛ palakɩnɩ-ɖɩ tʋmɩyɛ se peni nabʋyʋ.
^ Yaa «pɛ-ɛsa tɩŋɩɣ pa-sɩʋ kpelisi nzɩ sɩwɛ kiniŋ yɔ se ala hayitu.»
^ Yaa «pa-hayitu laŋɩyɛ.»
