Keɣa 34:1-22
Daviid hendu, alɩwaatʋ ndʋ ɛɛwɛ Abimelɛɛkɩ ɛsɩndaa nɛ ɛlakɩ ɛzɩ kɩmɛlɛŋ,+ nɛ ɛlɛ ɖɔɔnɩ-ɩ nɛ ɛɖɛɛ yɔ.
א [Alɛf]
34 Mankaɣ sam Yehowa alɩwaatʋ kpeekpe;Ɛ-samtʋ kaɣ wɛʋ mo-ndomee yɔɔ paa ɛzɩmtaa.
ב [Bɛtɩ]
2 Yehowa yɔɔ lɛ, mankaɣ* kʋndʋʋ;+Hɛɛɛ tɩnaa kaɣ nɩʋ nɛ pɛwɛɛ laŋhʋlʋmɩyɛ taa.
ג [Gimɛl]
3 Ɩkpɛndɩ mɔ-yɔɔ nɛ ɖɩsa Yehowa;+Ðɩkpɛndɩ nɛ ɖɩñɔkɩ ɛ-hɩɖɛ.
ד [Dalɛtɩ]
4 Mɔnpɔzɩ Yehowa tɔm nɛ ecosi-m.+
Eholi-m mɔn-sɔɔndʋ kpeekpe taa.+
ה [He]
5 Mba pataɣ-ɩ liu yɔ pɛ-ɛsɩndaa ñɩlɩsɩɣ;Paapɩzɩɣ nɛ paɖʋ-wɛ fɛyɛ.
ז [Zayin]
6 Ɛjam ɛnɛ ɛya Yehowa, nɛ ɛlɛ welisi.
Ɛyabɩ ɛ-ñʋʋ ɛ-kʋñɔmɩŋ kpeekpe taa.+
ח [Hɛɛtɩ]
7 Mba peseɣ Yehowa sɔɔndʋ yɔ, e-tiyiyu ɖɔŋ nɛ ɛcɔʋ-wɛ kpɛɛɛ,+Nɛ eholuu-wɛ.+
ט [Tetɩ]
8 Ɩɖɩŋ nɛ ɩna se Yehowa wɛ ɖeu;+Koboyaɣ tʋ lɛ ɛyʋ weyi ɛɖʋʋ-ɩ kʋyʋʋ yɔ.
י [Yod]
9 Ise Yehowa sɔɔndʋ, mɩ e-kiɖeɖema tɩŋa,Mbʋ pʋyɔɔ yɔ mba peseɣ-i sɔɔndʋ yɔ paatɛɖɩɣ nabʋyʋ.+
כ [Kaf]
10 Halɩ ñɔɔsɩ wɩ mʋʋzɩŋ* ɖoŋ ñɩŋ,Ɛlɛ mba pañɩnɩɣ Yehowa yɔ, paakaɣ tɛɖʋʋ pʋyʋ kɩbanʋ nɔɔyʋ.+
ל [Lamɛd]
11 Man-pɩyalaa, ɩkɔɔ, iwelisini-m;Mankaɣ-mɩ kpɛlɩkʋʋ Yehowa sɔɔndʋ seu.+
מ [Mem]
12 Mɩ-taa anɩ sɔɔlɩ wezuuNɛ ɛsɔɔlɩ se ɛna kɩyakɩŋ kɩbaŋ sakɩyɛ?+
נ [Nuuni]
13 Ye mbʋ, kpa ña-nzʋlʋmɩyɛ nɛ mbʋ pɩfɛyɩ ɖeu yɔ,+Nɛ ŋkpa ño-ndomee nɛ pɔbɔtʋ tɔm yɔɔdʋʋ.+
ס [Samɛk]
14 Ha siɣye mbʋ pɩfɛyɩ ɖeu yɔ nɛ ŋla mbʋ pɩwɛ ɖeu yɔ;+Ñɩnɩ laŋhɛzɩyɛ nɛ ŋse ɖɩ-wayɩ.+
ע [Ayin]
15 Yehowa ɛsa wɛ siɣsiɣ tɩnaa yɔɔ,+Nɛ ɛ-nɩŋgbaaŋ welisiɣ kubusi nzɩ pamakɩ se pasɩnɩ-wɛ yɔ.+
פ [Pe]
16 Ɛlɛ Yehowa paŋ ɛsa nɛ mba palakɩ mbʋ pɩfɛyɩ ɖeu yɔ,Se ɛla nɛ pataatasɩ pɔ-yɔɔ tɔzʋʋ tɛtʋ yɔɔ.+
צ [Cade]
17 Pamabɩ kubusi, nɛ Yehowa nɩɩ;+Eholi-wɛ pa-kʋñɔmɩŋ kpeekpe taa.+
ק [Kof]
18 Yehowa ñɔtɩnɩ mba pa-laŋa pʋʋtaa yɔ;+Ɛyakɩ mba pɛwɛ laŋwɛɛkɩyɛ taa yɔ* pa-ñʋʋ.+
ר [Resɩ]
19 Ɛyʋ siɣsiɣ tʋ kʋñɔmɩŋ* ɖɔwa,+Ɛlɛ Yehowa holuu-i ɩ-tɩŋa ɩ-taa.+
ש [Sin]
20 Ɛcɔŋnɩ ɛ-mɔɔ tɩŋa yɔɔ;Patɩpɛlɩ a-taa naɖɩyɛ.+
ת [Tav]
21 Asɛyʋʋ kaɣ kʋʋ kañatʋ tʋ;Mba papaɖɩɣ siɣsiɣ tʋ yɔ, pakaɣ pɔ-tɔm kʋʋ.
22 Yehowa yakɩ ɛ-lɩmɖʋyaa ñʋʋ;*Mba paɖʋʋ-ɩ kʋyʋʋ yɔ, paakaɣ kʋʋ pa-taa nɔɔyʋ tɔm.+
Pɩ-tɛɛ tɔm
^ Yaa «man-kalɩzaɣ kaɣ.»
^ Yaa «mʋʋzɩŋ weyi ɩtɩkpadɩyɩ nɛ ɩwɛnɩ kpɛm i-pondona yɔɔ yɔ.»
^ Yaa «mba pitibi-wɛ yɔɔɔ yɔ.»
^ Yaa «asɛyɩŋ.»
^ Yaa «ɛ-lɩmɖʋyaa kalɩzasɩ ñʋʋ.»
