Keɣa 51:1-19
Hendu teyaa ñʋʋdʋ. Daviid hendu, alɩwaatʋ ndʋ nayʋ Naataanɩ kɔm ɛ-cɔlɔ yɔ, ɛsʋnɩ Bat-Seeba+ nɛ pɩtɛ lɛ.
51 Hayɩ Ɛsɔ, ñɔ-sɔɔlɩm siɣsiɣ ñɩmbʋ yɔɔ lɛ, na man-pʋtɔdɩyɛ.+
Ña-pʋtɔdɩyɛ naʋ sɔsɔm yɔɔ lɛ, hɩzɩ man-kɩwɛɛkɩm.+
2 Ñalɩ man-kɩwɛɛkɩm caɣ caɣ,+Nɛ ŋkelesi man-kɩdɛkɛdɩm.+
3 Mbʋ pʋyɔɔ yɔ mansɩm man-kɩwɛɛkɩm camɩyɛ,Nɛ man-kɩdɛkɛdɩm wɛ mɛ-ɛsɩndaa* paa ɛzɩmtaa.+
4 Ña mayʋsɩnaa, ña kpem* mayʋsɩnaa;+Malabɩ mbʋ pɩfɛyɩ ɖeu ñɛ-ɛsɩndaa yɔ.+
Pʋyɔɔ lɛ, ŋwɛ siɣsiɣ alɩwaatʋ ndʋ ŋyɔɔdʋʋ yɔ,Ŋwɛ siɣsiɣ ñɔ-tɔm hʋʋ taa.+
5 Na! Palʋlɩ-m lɛ mɛnkɛ kɩwɛɛkɩm laɖʋ,Kɩdɛkɛdɩm taa mon-ɖoo haɣ mo-hoɣa.*+
6 Na! Toovenim mbʋ pɩwɛ ɛyʋ laŋɩyɛ taa yɔ, pɩkɛdɩɣnɩ-ŋ;+Wɩlɩ ma-laŋɩyɛ* lɔŋsɩnɖɛ toovenim ñɩnɖɛ.
7 Kelesi man-kɩdɛkɛdɩm nɛ ñɩtʋ ndʋ payaɣ se izɔɔpʋ yɔ, nɛ pɩsa nɛ mɛwɛɛ kele kele;+Ñalɩ-m nɛ mahʋlʋmɩ nɛ pɩkɩlɩ ɖɔmbɩyɛ.+
8 Yele nɛ manɩɩ taa leleŋ nɛ laŋhʋlʋmɩyɛ taŋ,Nɛ pɩsa nɛ mɔɔ wena ŋtɔyɩtaa yɔ amɛyɩ.+
9 Kɛzɩ ñɛ-ɛsa* nɛ ŋyele cɔnʋʋ man-kɩdɛkɛdɩm,+Hɩzɩ man-kɩwɛɛkɩm tɩŋa.+
10 Hayɩ Ɛsɔ, lu man-taa laŋɩyɛ kele kele ñɩnɖɛ,+Ðʋ man-taa fezuu kɩfalʋʋ,+ ŋgʋ kɩkam camɩyɛ yɔ.
11 Taaɖɔɔnɩ-m ñɛ-ɛsɩndaa;Nɛ taalɩzɩ ñe-fezuu kiɖeɖeu mɔ-yɔɔ.
12 Ðaɣnɩ-m haʋ taa leleŋ weyi ɛwɛ ña-ñʋʋ yabʋ taa yɔ;+Seɣti man-taa sɔɔlɩm mbʋ piyeki se mañamɩ-ŋ yɔ.*
13 Mankaɣ wɩlʋʋ kɩwɛɛkɩm laɖaa ña-nʋmɔŋ,+Nɛ pɩsa nɛ kɩdɛkɛdɩm laɖaa pɩsɩ ñɔ-cɔlɔ.
14 Hayɩ Ɛsɔ, Ɛsɔ ma-ñʋʋ yaɖʋ,+ holi-m calɩm wɛɛ wena mɔnɖɔwa yɔ a-taa,*+Nɛ pɩsa nɛ ma-nzʋlʋmɩyɛ susi ñe-siɣsiɣ wɛtʋ nɛ taa leleŋ.+
15 Hayɩ Yehowa, kuli mo-ndomee,Nɛ pɩsa nɛ mɔ-nɔɔ susi ña-samtʋ.+
16 Mbʋ pʋyɔɔ yɔ ŋtɩsɔɔlɩ kɩlaʋ, pɩtaakɛ mbʋ yɔ maala nakʋyʋ;+Kɩlaʋ kɩñaɣzʋʋ ɛɛkɛdɩɣnɩ-ŋ.+
17 Kɩlaŋ weyi ɩkɛdɩɣnɩ Ɛsɔ yɔ lɛ fezuu ŋgʋ kɩ-taa nɛ wɩzasɩ yɔ;Hayɩ Ɛsɔ, ŋŋkaɣ lɔʋ* laŋɩyɛ nɖɩ ɖɩpɛlaa nɛ nɖɩ ɖɩpʋʋtaa yɔ.+
18 Ña-camɩyɛ lakasɩ taa, la Siyɔŋ mbʋ pɩwɛ ɖeu yɔ;Ma Yeruzalɛm kolonzi.
19 Ðɩnɛ ɛlɛ, ña-taa kaɣ labʋ leleŋ nɛ siɣsiɣ wɛtʋ kɩlaŋ,Kɩlaŋ kɩñaɣzɩŋ nɛ kɩlaŋ weyi palaɣ i-kpeekpe yɔ;Ðɩnɛ ɛlɛ, pakaɣ laʋ naŋ abalɩñɩŋ ña-altaaru yɔɔ.+
Pɩ-tɛɛ tɔm
^ Yaa «ma-lɩmaɣza taa.»
^ Piye piye, «ñe-ɖeke.»
^ Yaa «Mɛnkɛ kɩdɛkɛdɩm laɖʋ kpaɣnɩ alɩwaatʋ ndʋ mon-ɖoo haɣ mo-hoɣa yɔ.»
^ Yaa «ɛyʋ weyi mɛnkɛnɩ mɛsaɣ tɛɛ yɔ.»
^ Yaa «Mɛsɩ ñɛ-ɛsɩndaa.»
^ Piye piye, «Ha-m fezuu ŋgʋ kɩsɔɔlaa yɔ nɛ ŋsɩnɩnɩ-m.»
^ Yaa «holi-m calɩm wɛɛ ɖɔʋ tɔm taa.»
^ Yaa «nim.»
