Keɣa 78:1-72
Masɩkili.* Azaafʋ+ hendu.
78 Man-samaɣ, welisi man-paɣtʋ;*Kʋ nɩŋgbaŋʋʋ nɛ ŋwelisi mɔ-nɔɔ taa tɔm.
2 Mankaɣ kuluu mɔ-nɔɔ nɛ montuu eduuye.
Mankaɣ ɖʋʋ caanaʋ taa ɖimɖimɖanaa.+
3 Mbʋ ɖɩnɩ pɩ-tɔm nɛ ɖɩtɩlɩ-pʋ yɔ,Mbʋ ɖa-caanaa kɛdɩ-ɖʋ pɩ-tɔm yɔ,+
4 Ðɩɩkaɣ-pʋ mɛsʋʋ pa-pɩyalaa;Ðɩkaɣ kɛdʋʋ kpaɖʋʋ ŋgʋ kɩkɔŋ yɔ+Yehowa tʋma wena amʋnɩ samtʋ yɔ nɛ e-ɖoŋ,+Piti tʋma wena ɛlaba yɔ.+
5 Ɛsɩ Yakɔɔb taa mbʋ pɩtɔzʋʋ ɛyaa nabʋyʋ yɔɔ yɔNɛ ɛɖʋ paɣtʋ natʋyʋ Izrayɛɛlɩ taa;Ɛɖʋ ɖɔ-cɔzɔnaa paɣtʋSe pawɩlɩ tɔm ndʋ pe-piya,+
6 Se pɩsa nɛ kpaɖʋʋ ŋgʋ kɩkɔŋ yɔ,+Piya nzɩ pɔkɔŋ-sɩ lʋlʋʋ yɔ sɩtɩlɩ-tʋ.
Nɛ sɩsɩ kɛdɩ-tʋ si-piya.+
7 Ðɩnɛ ɛlɛ sɩsɩ kaɣ Ɛsɔ taʋ liu.
Sɩɩkaɣ sɔʋ Ɛsɔ tʋma yɔɔ+Ɛlɛ sɩkaɣ ɖɔm ɛ-paɣtʋ yɔɔ.+
8 Ðɩnɛ ɛlɛ, sɩɩkaɣ wɛʋ ɛzɩ sɩ-cɔzɔnaa yɔ,Cɔzɔnaa mba paakɛ kpaɖʋʋ ŋgʋ kɩ-ñʋʋ taa wɛ ɖoŋ nɛ kɩwɛ kaañamtʋ yɔ,+Kpaɖʋʋ ŋgʋ kɩ-laŋɩyɛ taaka camɩyɛ yɔ,*+Nɛ ŋgʋ ki-fezuu taawɛɛ siɣsiɣ Ɛsɔ ɛsɩndaa yɔ.
9 Efrayim mba kaapa tɔŋ,Ɛlɛ you wiye lɛ, pesewa nɛ papɩsɩ kiŋgiɖe.
10 Patɩɖɔkɩ ɛgbɛyɛ nɖɩ pa nɛ Ɛsɔ paɖʋwa yɔ+Nɛ pekizaa se paaɖɔŋ ɛ-paɣtʋ yɔɔ.+
11 Pɔsɔ ɖɔɖɔ mbʋ ɛɛlaba yɔ pɩ-yɔɔ,+E-piti tʋma wena ɛɛwɩlɩ-wɛ yɔ.+
12 Ɛɛlabɩ piti lakasɩ pɔ-cɔzɔnaa ɛsɩndaa,+Ejipiti ɛjaɖɛ taa, Zowaanɩ+ egeetiye taa.
13 Ɛfaɣ teŋgu se patɩŋ kɩ-taa nɛ pɛtɛzɩ,Nɛ ɛla nɛ lɩm sɩŋ ɛzɩ koloŋa yɔ.+
14 Wɩsɩ taa lɛ, mɩndʋ natʋyʋ eɖiyaɣni-wɛNɛ ɖoo pilim lɛ, miŋ ñalɩmɩyɛ eɖiyaɣni-wɛ.+
15 Ɛfaɣ ɛwasɩ kañɩmbusuu taa,Ɛlaba nɛ pɔñɔɔ lɩm nɛ pañɩɣzɩ ɛzɩ lɩm cukaŋ ñɩmbʋ pɔñɔwa yɔ.+
16 Ɛlaba nɛ lemisi lɩɩnɩ kaaʋ taaNɛ ɛla nɛ lɩm kpe ɛzɩ pɔsɩ yɔ.+
17 Ɛlɛ patiyebi-i yʋsɩnʋʋ,Pakaɖaɣnɩ Kɩlɩm kañɩmbusuu taa;+
18 Paakaɖɩnɩ* Ɛsɔ pa-laŋa taa,+Pɔpɔzaɣ tɔɔnaɣ ŋga pe-liu kaawɛ siŋŋ yɔ.*
19 Mbʋ pɔyɔɔdaɣ tɔm kɩdɛkɛdɩtʋ Ɛsɔ yɔɔ,Pɔtɔŋaɣ se: «Ɛsɔ pɩzɩɣ nɛ ɛsɩɩ-ɖʋ taabɩlɩ kañɩmbusuu taa?»+
20 Ɩna! Ɛmabɩ ɛwaɣ,Piyeba nɛ lɩm kpe, nɛ lemisi wadɩ.+
«Ɛzɩ ɛpɩzɩɣ ɖɔɖɔ nɛ ɛha-ɖʋ kpɔnɔ,Yaa ɛpɩzɩɣ nɛ ɛha ɛ-samaɣ nandʋ na?»+
21 Yehowa nɩ tɔm ndʋ pɔyɔɔdaa yɔ lɛ pɩwɩzɩ-ɩ siŋŋ;+Etiyini miŋ+ se ɛhɔmnɩ Yakɔɔb nɩŋgbaaŋ,Nɛ ɛkɔ pana siŋŋ nɛ Izrayɛɛlɩ+
22 Mbʋ pʋyɔɔ yɔ pataawɛɛnɩ tisuu Ɛsɔ yɔɔ;+Pataataa-ɩ liu se ɛpɩzɩɣ nɛ ɛya pa-ñʋʋ.
23 Pʋyɔɔ ɛɖʋ mɩndʋ paɣtʋ ɛsɔdaa,Nɛ ɛtʋlɩ ɛsɔdaa nɔnɔsɩ.
24 Eyekaɣ nɛ maana tikini ɛsɔdaa se pɔtɔɔ;Ɛɛha-wɛ ɛsɔdaa tɔɔnaɣ.+
25 Ɛyaa tɔɔ ɖoŋ tɩnaa*+ kpɔnɔ;Ɛha-wɛ tɔɔnaɣ nɛ pɔtɔɔ nɛ pahaɣ.+
26 Ɛlaba nɛ wɩsɩ ɖɩlɩyɛ taa helim ma ɛsɔdaaNɛ ɛtɩŋnɩ e-ɖoŋ yɔɔ nɛ ɛla nɛ hadɛ kiŋ helim ma.+
27 Ɛlaba nɛ nandʋ tii pɔ-yɔɔ ɛzɩ mʋzʋʋ yɔ,Sumasɩ tiba ɛzɩ teŋgu nɔɔ kañɩŋa yɔ.
28 Ɛlaba nɛ sɩtɔlɩ ɛ-maalika hɛkʋ taa,E-kizinzikiŋ cɔlɔ kpɛɛɛ.
29 Pelibi-sɩ sososo nɛ pahaɣ;Ɛɛha-wɛ mbʋ pe-liu kaawɛɛ yɔ.+
30 Ɛlɛ pataatɛmtɩ pɔ-kɔɖɛyɩ kʋʋ lɛ,Pɔ-tɔɔnaɣ kaakpɛndɩ kɛwɛ pɔ-nɔsɩ taa lɛ,
31 Ɛsɔ taa wɩɩnɩ-wɛ siŋŋ.+
Ɛkʋ pa-taa abalaa mba pakpaɖɩ ɖoŋ yɔ;+Ɛɖɩzɩ Izrayɛɛlɩ taa evebiya.
32 Paa mbʋ yɔ, patasɩ labʋ kɩdɛkɛdɩm nɛ pɩkpaɖɩ+Nɛ pataawɛɛnɩ tisuu e-piti tʋma yɔɔ.+
33 Pʋyɔɔ eyeba nɛ pa-kɩyakɩŋ sɩɩ tɩnaɣ ɛzɩ helim mbʋ pɩlɩɣnɩ mɔɔŋ tɛɛ yɔ,+Ɛkɔnɩ pɔ-yɔɔ asɛyʋʋ tuda nɛ pa-pɩnzɩ sɩɩ tɩnaɣ.
34 Ɛlɛ ɛpaɣzɩɣ-wɛ kʋʋ lɛ, pañɩnɩɣ-ɩ lɛ;+Papɩsaɣ nɛ pañɩnɩɣ Ɛsɔ,
35 Peeɖe pɔtɔzaɣ se Ɛsɔ kaakɛnɩ pa-Kaaʋ,+Se Ɛsɔ Kɩlɩm kaakɛnɩ pa-Ñʋʋ Yaɖʋ.*+
36 Ɛlɛ pañɩnaɣ se pepeɣzi-i nɛ pɔ-nɔsɩ,Nɛ paacɛtɩ-ɩ nɛ pa-nzʋlʋma.
37 Pa-laŋa taañɔɔnɩ-ɩ kpam;+Nɛ pataaɖɔ ɛ-ɛgbɛyɛ ɖʋʋ paɣtʋ yɔɔ.+
38 Ɛlɛ ɛnaɣaɣ pa-pʋtɔdɩyɛ;+Ekpeɣaɣ-wɛ pa-kɩdɛkɛdɩm* nɛ ɛtɩɖɩzɩ-wɛ.+
Mbʋ ɛzɩ eeyeba nɛ ɛ-pana tɩŋa kpa lɛÐoŋ ɖoŋ lɛ, ɛkpaɣaɣ ɛ-pana.+
39 Mbʋ pʋyɔɔ yɔ ɛtɔzaɣ se tomnaɣ nandʋ paakɛnaa,+Paawɛ ɛzɩ helim mbʋ pɩmakɩ nɛ pɩɖɛɣ nɛ pɩɩtasɩɣ pɩsʋʋ yɔ.*
40 Tam ɛzɩma patɩkaɖɩnɩ-ɩ kañɩmbusuu taa+Nɛ paɖʋ-ɩ ɖɩwɩzɩyɛ kañɩmbusuu taa!+
41 Patakɩ Ɛsɔ tam sakɩyɛ,+Palaba nɛ Izrayɛɛlɩ tɛ Kiɖeɖeu wɛɛ laŋwɛɛkɩyɛ taa.
42 Patɩtɔzɩ e-ɖoŋ* yɔɔ,Patɩtɔzɩ kɩyakʋ ŋgʋ eholi-wɛ* koyindu nesi tɛɛ yɔ kɩ-yɔɔ,+
43 Ɛzɩma ɛlabɩ ɛ-yʋsasɩ Ejipiti+Nɛ ɛ-maamaaci lakasɩ Zowaanɩ egeetiye taa yɔ,
44 Nɛ ɛzɩma ɛlaba nɛ Niili lɔɔŋ pɩsɩ calɩm+Nɛ pataapɩzɩɣ se pɔñɔɔ pe-lemisi taa lɩm yɔ.
45 Etiyi kɔjɔsɩ sakɩyɛ se sɩñasɩ-wɛ+Nɛ sayɛɛ se akɔnɩ asɛyʋʋ pɔ-yɔɔ.+
46 Ɛcɛlɩ pa-hayɩm taa tɔɔnaɣ nakaŋ weyi ɩtɔkɩ pɩdɩɩfɛyɩ yɔ,Nɛ ɛcɛlɩ mbʋ pɩlɩ pa-tʋmɩyɛ labʋ taa yɔ kudoloŋ.+
47 Ɛkpaɣ ɖɔmbɛɛ nɛ ɛkʋnɩ pe-viiñi tɩŋ+Nɛ ɛkpaɣ ɖɔmbɛɛ sɔsɔna nɛ ɛkʋnɩ pɛ-tɛ sikomɔɔrɩ tɩŋ.
48 Ɛɖʋzɩ pa-kpɩna wena asɩɣlɩɣ sʋʋtʋ yɔ ɖɔmbɛɛ nesi tɛɛ,+Ɛɖʋzɩ pa-kpɩna tɛʋ nazʋʋ nesi tɛɛ.*
49 Ɛkɔnɩ pɔ-yɔɔ ɛ-pana sɔsɔna,Hɔpɩsɩyɛ, pana nɛ kʋñɔŋ,Etiyi Ɛsɔ tiyiyaa tindima nɛ pɔkɔnɩ pɔ-yɔɔ asɛyʋʋ.
50 Ɛɖʋ ɛ-pana nʋmɔʋ.
Ɛtɩlɩzɩ-wɛ* sɩm taa;Ɛɖʋzɩ-wɛ* kɩzɩkʋ nesi tɛɛ.
51 Pɩtɛmnaa se ɛɖɩzɩ Ejipiti mba kajalaɣ piya kpeekpe,+Kajalaɣ piya nzɩ palʋlɩ-sɩ Kam kizinzikiŋ tɛɛ yɔ.
52 Pʋwayɩ lɛ, ɛlɩzɩ ɛ-samaɣ ɛzɩ heŋ yɔ+Nɛ eɖiyi ka-taa mba ɛzɩ heŋ ewiɖe yɔ kañɩmbusuu taa.
53 Eɖiyi-wɛ nɛ kɩdɛkɛdɩm nabʋyʋ tɩtalɩ-wɛ,Nɛ sɔɔndʋ natʋyʋ tɩkpa-wɛ;+Teŋgu huuzi po-koyindinaa yɔɔ.+
54 Ewoni-wɛ e-egeetiye kiɖeɖeye taa,+Pʋŋ egeetiye nɖɩ ɛmʋnɩ e-nesi kɩbanzɩ yɔ.+
55 Ɛɖɔɔnɩ ajɛɛ pɛ-ɛsɩndaa;+Ɛkpaɣ nimaɣ ŋga pamaɣzɩɣna yɔ nɛ ɛtayɩnɩ-wɛ tɛtʋ nɛ tɩpɩsɩ pa-ñɩm;+Ɛcaɣzɩ Izrayɛɛlɩ cejewe a-ɖɩsɩ taa.+
56 Ɛlɛ patiyele takʋʋ Ɛsɔ Kɩlɩm, nɛ patiyebi-i kaɖɩnʋʋ;+Patikemni ɛ-tɔm kɩtɔzɩtʋ.+
57 Paayebi-i tɩŋʋʋ ɖɔɖɔ nɛ paakɛ pɩ-tɛɛ nɛ pɩ-yɔɔ tɩnaa ɛzɩ pɔ-cɔzɔnaa yɔ.+
Paawɛ ɛzɩ tɔʋ ŋgʋ kɩyɔɔyaa yɔ, pataapɩzɩɣ se pataa-wɛ liu.+
58 Patiyebi-i ɖʋʋ ɖɩwɩzɩyɛ nɛ po-lona kʋkʋya,+Nɛ paakulusi ɛ-pana* nɛ pa-sɩʋ kpelisi.+
59 Ɛsɔ nɩwa nɛ ɛ-taa wɩɩ siŋŋ,+Pʋyɔɔ ɛlɔ Izrayɛɛlɩ caɣ caɣ.
60 Pɩtɛmnaa se eyebi Ɛsɔ sɛtʋ kɩɖanɖʋʋ ŋgʋ kɩwɛ Siiloo yɔ,+Kizinziku ŋgʋ kɩ-tɛɛ ɛɛcaɣ ɛyaa hɛkʋ taa yɔ.+
61 Eyeba nɛ pɛɖɛnɩ e-ɖoŋ yʋsaɣ yomiye taa;Eyeba nɛ paɖʋzɩ e-keɖeɣa koyindu nesi tɛɛ.+
62 Ɛɖʋzɩ ɛ-samaɣ laɣɖɛ nesi tɛɛ+Nɛ ɛ-taa wɩɩnɩ ɛ-ñɩm siŋŋ.
63 Miŋ kaañaɣ e-evebiya mulu mulu,Nɛ pataatee nesi ɖɔkʋʋ hendu* ɛ-pɛlaa mba paasɩŋ abalʋ yɔ.
64 Pakʋ ɛ-cɔjɔnaa nɛ laɣɖɛ,+Nɛ pa-halaa tiwii.+
65 Ðɩnɛ ɛlɛ Yehowa fe ɛzɩ pefeŋuu nɛ ɖom yɔɔ yɔ,+Ɛzɩ vɛɛ cɛkʋʋ abalʋ ɖoŋ tʋ+ ɛsa yɔɔ nɛ efeŋ yɔ.
66 Nɛ ɛɖɔɔnɩ e-koyindinaa nɛ papɩsɩnɩ wayɩ;+Ɛɖʋ-wɛ fɛyɛ tam.
67 Ɛlɔ Yosɛɛfʋ kizinziku;Ɛtɩlɩzɩ Efrayim cejewiye.
68 Ɛlɛ ɛlɩzɩ Yuuda cejewiye,+Siyɔŋ Pʋʋ, ŋgʋ ɛsɔɔlaa yɔ.+
69 Ɛlaba nɛ e-kooka kiɖeɖeɣa wɛɛ tam ɛzɩ ɛsɔdaa yɔ,+Ɛzɩ tɛtʋ ndʋ ɛcaɣzɩ-tʋ tam yɔ.+
70 Ɛlɩzɩ ɛ-lɩmɖʋyʋ Daviid+Nɛ ɛkpaɣ-ɩ nɛ heŋ kalakɩŋ taa,+
71 Ɛkpaɣ-ɩ alɩwaatʋ ndʋ ɛcɔŋnaɣ heŋ asɔŋ yɔɔ yɔ;Ɛpɩsɩ-ɩ Yakɔɔb ninɖiɣyu, ɛ-samaɣ ninɖiɣyu,+Ɛpɩsɩ-ɩ Izrayɛɛlɩ ninɖiɣyu, ɛ-ñɩm ninɖiɣyu.+
72 Eɖiyi-wɛ nɛ laŋɩyɛ nɖɩ ɖɩwɛ cɩŋgɩlɩm yɔ,+Eɖiyi-wɛ nɛ lɛɣtʋ.+
Pɩ-tɛɛ tɔm
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «tɔm ndʋ mawɩlɩɣ-ŋ yɔ.»
^ Piye piye, «kɩtɩñɔɔzɩ kɩ-laŋɩyɛ yɔ.»
^ Piye piye, «Paatakɩ.»
^ Yaa «Pɔpɔzaɣ se paha pa-kalɩzaɣ tɔɔnaɣ.»
^ Yaa «Ɛsɔ tiyiyaa.»
^ Yaa «Ɛsɔ Kɩlɩm kpaɣaɣnɩ pa-kɩmɩyɛ.»
^ Piye piye, «Ehuuzaɣ pa-kɩdɛkɛdɩm yɔɔ.»
^ Pɩpɩzɩɣ pɩkɛ, «Se fezuu lɩɣ nɛ kɩɩpɩsɩɣ.»
^ Piye piye, «e-nesi.»
^ Piye piye, «ɛyabɩ pa-ñʋʋ.»
^ Pɩpɩzɩɣ pɩkɛ, «Ɛlaba nɛ pa-kpɩna saa miŋ kaŋ kaŋ.»
^ Yaa «Ɛtɩlɩzɩ pa-kalɩzasɩ.»
^ Piye piye, «Ɛɖʋzɩ pe-wezuu.»
^ Yaa «ɛ-sʋsɩ.»
^ Piye piye, «Nɛ patɩsa.»
