Kiɖe Tɛɛ Tɔm 48:1-22
48 Pʋwayɩ lɛ, peheyi Yosɛɛfʋ se: «Na! Ña-caa ɖoŋ ɖiɣni tɛm.» Peeɖe Yosɛɛfʋ kʋyaa nɛ ɛkpaɣ ɛ-pɩyalaa Manaasee nɛ Efrayim pa-naalɛ nɛ ewolo Yakɔɔb cɔlɔ.+
2 Nɛ peheyi Yakɔɔb se: «Ña-pɩyalʋ Yosɛɛfʋ kɔm ñɔ-cɔlɔ.» Ðɩnɛ ɛlɛ Izrayɛɛlɩ ñaɣ pana siŋŋ nɛ ɛkʋyɩ nɛ ɛcaɣ ɛ-kaɖʋ yɔɔ.
3 Nɛ Yakɔɔb heyi Yosɛɛfʋ se:
«Ɛsɔ Ðoŋ Tɩŋa Tʋ lɩzɩ ɛ-tɩ nɛ ɛwɩlɩ-m Luuz, Kanaŋ ɛjaɖɛ taa nɛ ɛwazɩ-m.+
4 Nɛ eheyi-m se: “Mankaɣ labʋ nɛ ŋwɛɛnɩ piya, nɛ meyeki nɛ ŋhuu, nɛ mankaɣ-ŋ pɩsʋʋ ɛyaa samaɣ sɔsɔɔ,+ nɛ mankaɣ cɛlʋʋ ña-lʋlʋʋ taa mba* ɛjaɖɛ ɖɩnɛ se ɖɩkɛ pa-ñɩm tam.”+
5 Lɛɛlɛɛyɔ lɛ, ña-pɩyalaa 2 mba palʋlɩ-ŋ Ejipiti ɛjaɖɛ taa pʋcɔ nɛ mɔnkɔŋ ñɔ-cɔlɔ Ejipiti yɔ, men-piya pɛkɛnaa.+ Efrayim nɛ Manaasee pakaɣ pɩsʋʋ men-piya, ɛzɩ Rubɛɛnɩ nɛ Siimeyɔɔ pɛkɛʋ men-piya yɔ.+
6 Ɛlɛ piya nzɩ pakaɣ-ŋ lʋlʋʋ sɩnɛ sɩ-wayɩ yɔ, nzɩ kaɣnɩ kɛʋ ñe-piya. Tɛtʋ ndʋ sɩ-ɖalaa kaɣ mʋʋ se tɩkɛ pa-ñɩm yɔ, sɩmʋʋ tɩ-hɔɔlʋʋ.+
7 Alɩwaatʋ ndʋ malɩnɩ Padaanɩ yɔ, Rasɛɛlɩ sɩbɩ+ mɔn-cɔlɔ Kanaŋ ɛjaɖɛ taa, ŋgʋ pɩɩkazɩ nʋmɔʋ kɩɖaɣlʋʋ nɛ pʋcɔ nɛ ɖɩtalɩ Efratɩ.+ Pʋyɔɔ menpimi-i peeɖe, Efratɩ nʋmɔʋ taa, pʋ-tɔbʋʋ se Bɛtɩlɛhɛm+ nʋmɔʋ taa.»
8 Izrayɛɛlɩ na Yosɛɛfʋ pɩyalaa lɛ, ɛpɔzɩ-ɩ se: «Mba lɛ mbʋ yɔ?»
9 Nɛ Yosɛɛfʋ cosi ɛ-caa se: «Abalɩbiya nzɩ Ɛsɔ ha-m cɩnɛ yɔ, nzɩ lɛ.»+ Ðɩnɛ ɛlɛ eheyi Yosɛɛfʋ se: «Mentendi-ŋ, kɔnɩ-sɩ mɔn-cɔlɔ nɛ mawazɩ-sɩ.»+
10 Akpadɩyɩtʋ kaayeba nɛ Izrayɛɛlɩ ɛsa camɩ nɛ ɛtaanaɣ camɩyɛ. Pʋyɔɔ Yosɛɛfʋ ñɔtɩnɩ-ɩ piya, nɛ ɛmʋzɩ sɩ-lɩkpaɣzasɩ yɔɔ nɛ ekpibi-sɩ.
11 Nɛ Izrayɛɛlɩ heyi Yosɛɛfʋ se: «Mantaamaɣzɩ wiɖiyi se mantasɩɣ naʋ ñɛ-ɛsɩndaa,+ ɛlɛ Ɛsɔ yeba nɛ halɩ mana ña-lʋlʋʋ taa mba* ɖɔɖɔ.»
12 Nɛ Yosɛɛfʋ kʋsɩ-sɩ Izrayɛɛlɩ nʋmbɔla yɔɔ, nɛ eluŋ nɛ ɛpa ɛ-ɛsa nɛ tɛtʋ.
13 Pʋwayɩ lɛ, Yosɛɛfʋ ɖɔkɩ sɩ-naalɛ, ɛɖɔkɩ Efrayim+ nɛ e-nesi kɩbanzɩ nɛ ɛɖɔkɩ Manaasee+ nɛ ɛ-nɩmɩyɛ nɛ ɛñɔtɩnɩ-sɩ Izrayɛɛlɩ, nɛ Efrayim wɛɛ Izrayɛɛlɩ nɩmɩyɛ yɔɔ nɛ Manaasee ñɛwɛɛ Izrayɛɛlɩ nesi kɩbanzɩ yɔɔ.
14 Ɛlɛ Izrayɛɛlɩ sezi e-nesi kɩbanzɩ nɛ ɛtɩnɩ-sɩ Efrayim ñʋʋ taa, ŋgʋ ɛnʋ kaakɛnɩ cikpelu, nɛ ɛtɩnɩ ɛ-nɩmɩyɛ Manaasee ñʋʋ taa. Ɛnawa pʋcɔ nɛ ɛtɩnɩ e-nesi mbʋ, paa Manaasee kaakɛnɩ kajalaɣ pɩɣa yɔ.+
15 Nɛ ɛwazɩ Yosɛɛfʋ nɛ ɛyɔɔdɩ se:+
«Ɛsɔ toovenim tʋ weyi ɛ-ɛsɩndaa man-caanaa Abraham nɛ Izaakɩ pɔɖɔma yɔ,+Ɛsɔ toovenim tʋ weyi eɖiyi-m me-wezuu kpeekpe nɛ pɩkɔɔ pɩtalɩ sɔnɔ yɔ,+
16 Ɛsɔ tiyiyu weyi ɛyakaɣ ma-ñʋʋ man-kʋñɔmɩŋ kpeekpe taa yɔ,+ ɛwazɩ abalɩbiya sɩnɛ.+
Sɩɖɔkɩ ma-hɩɖɛ nɛ man-caanaa Abraham nɛ Izaakɩ pa-hɩla,Sɩlʋlɩ nɛ sɩpɩsɩ samaɣ sɔsɔɔ tɛtʋ yɔɔ.»+
17 Yosɛɛfʋ nawa se ɛ-caa tɩnɩ e-nesi kɩbanzɩ Efrayim ñʋʋ taa lɛ, pɩtɩkɛdɩnɩ-ɩ, pʋyɔɔ ɛñɩnaɣ se ɛkʋsɩ ɛ-caa nesi Efrayim ñʋʋ taa nɛ ɛtɩnɩ-sɩ Manaasee ñʋʋ taa.
18 Yosɛɛfʋ heyi ɛ-caa se: «Taala mbʋ, man-caa, mbʋ pʋyɔɔ yɔ Manaasee kɛnɩ kajalaɣ pɩɣa.+ Tɩnɩ ñe-nesi kɩbanzɩ ɛ-ñʋʋ taa.»
19 Ɛlɛ ɛ-caa kizi nɛ eheyi-i se: «Mana mbʋ, man-pɩyalʋ, mana mbʋ. Ɛnʋ ɖɔɖɔ ɛkaɣ pɩsʋʋ samaɣ, nɛ ɛnʋ ɖɔɖɔ ɛkaɣ kɛʋ sɔsɔ. Ɛlɛ e-neu kaɣ-ɩ kpaɖʋʋ,+ nɛ ɛ-lʋlʋʋ taa mba* kaɣ ɖɔʋ nɛ papɩsɩ ajɛɛ.»+
20 Nɛ ɛtasɩ-wɛ wazʋʋ puwiye+ nɛ ɛyɔɔdɩ se:
«Izrayɛɛlɩ mba kaɣ yaʋ ña-hɩɖɛ alɩwaatʋ ndʋ pawazɩɣ ɖama yɔ, nɛ pɔyɔɔdɩ se:“Tɛtɛ nɛ Ɛsɔ la nɛ ŋpɩsɩ ɛzɩ Efrayim yɔ, nɛ ɛzɩ Manaasee yɔ.”»
Mbʋ ɛɖɛzɩ Efrayim Manaasee nɔɔ.
21 Pʋwayɩ lɛ, Izrayɛɛlɩ heyi Yosɛɛfʋ se: «Na, mawɩzɩ sɩbʋ,+ ɛlɛ pɩtʋʋ fɛyɩ se Ɛsɔ kaɣ wɛʋ mɩ-cɔlɔ tam nɛ ɛpɩsɩnɩ-mɩ mɩ-cɔzɔnaa ɛjaɖɛ taa.+
22 Piyele nɛ ma lɛ, mɛncɛlɩɣ-ŋ kotoŋa* nakɛyɛ nɛ pɩkɩlɩ ña-ɖalaa, kotoŋa ŋga mamʋnɩ ma-laɣɖɛ nɛ mɔn-tɔʋ Amoori mba nesi tɛɛ yɔ.»
Pɩ-tɛɛ tɔm
^ Piye piye, «ño-ɖomaɣ.»
^ Piye piye, «ño-ɖomaɣ.»
^ Piye piye, «e-ɖomaɣ.»
^ Yaa «tɛtʋ kajalaŋa.» Piye piye, «hazaɣ.»
