Tɔm Hʋyaa 10:1-18
10 Abimelɛɛkɩ wayɩ lɛ, Isakaarɩ tʋ Tola, Puwa pɩyalʋ, Dodo pɩyalʋ, kʋyɩ nɛ ɛya Izrayɛɛlɩ ñʋʋ.+ Ɛɛcaɣ Samiiri, Efrayim pʋŋ egeetiye taa.
2 Ɛhʋ tɔm Izrayɛɛlɩ pɩnzɩ 23. Pʋwayɩ lɛ, ɛsɩ nɛ pepimi-i Samiiri.
3 Ɛ-wayɩ lɛ, Galaadɩ tʋ Yayiirɩ kʋyɩ nɛ ɛhʋʋ tɔm Izrayɛɛlɩ pɩnzɩ 22.
4 Ɛɛwɛnɩ abalɩbiya 30, sɩcakaɣ kpaŋasɩ 30 yɔɔ, nɛ sɩɩwɛnɩ tɛtʋ 30; payaɣ tɛtʋ ndʋ halɩ nɛ sɔnɔ se Havɔɔtɩ-Yayiirɩ,+ tɩwɛ Galaadɩ egeetiye taa.
5 Pʋwayɩ lɛ, Yayiirɩ sɩ nɛ pepimi-i Kamoni.
6 Izrayɛɛlɩ mba tasɩ labʋ mbʋ pɩfɛyɩ ɖeu yɔ Yehowa ɛsɩndaa,+ paɖaɣnɩ paɣzʋʋ sɛʋ Baalɩwaa,+ Astoorɛɛtɩ sɩʋ kpelisi, Aram* ɛsɔnaa, Siidɔɔ ɛsɔnaa, Mowaabʋ ɛsɔnaa,+ Amooni mba ɛsɔnaa+ nɛ Filistii mba ɛsɔnaa.+ Peyebi Yehowa nɛ pekizi-i sɛʋ.
7 Pʋyɔɔ Yehowa kɔ pana nɛ Izrayɛɛlɩ siŋŋ, nɛ ɛɖʋzɩ-wɛ* Filistii mba nɛ Amooni mba nesi taa.+
8 Nɛ ponuuti Izrayɛɛlɩ mba nɛ panazɩ-wɛ siŋŋ pɩnaɣ ŋga ka-taa—panazɩ Izrayɛɛlɩ ñɩma mba payɩ paawɛ Galaadɩ egeetiye taa Yɔɔrdaŋ hɔɔlʋʋ ŋgʋ kɩɩkɛ Amoori mba tɛtʋ yɔ kɩ-taa yɔ pɩnzɩ 18.
9 Amooni mba tɛzaɣ ɖɔɖɔ Yɔɔrdaŋ pɔɔ nɛ poyouni Yuuda nɛ Bɛnjamɛɛ nɛ Efrayim ɖɩɣa; nɛ Izrayɛɛlɩ kaawɛ kʋñɔŋ taa siŋŋ.
10 Peeɖe Izrayɛɛlɩ mba ya Yehowa se ɛsɩnɩ-wɛ,+ pɔyɔɔdaɣ se: «Ðɩyʋsɩnɩ-ŋ, mbʋ pʋyɔɔ yɔ ɖiyebi ɖɛ-Ɛsɔ nɛ ɖɩsɛɛ Baalɩwaa.»+
11 Ɛlɛ Yehowa pɔzɩ Izrayɛɛlɩ mba se: «Mantɩya mɩ-ñʋʋ Ejipiti?+ Nɛ mantɩya mɩ-ñʋʋ Amoori mba,+ Amooni mba, Filistii mba,+
12 Siidɔɔ mba, Amalɛɛkɩ mba nɛ Madiyaŋ mba nesi taa alɩwaatʋ ndʋ panazaɣ-mɩ yɔ? Ɩmabɩ kubusi nɛ mɔn-cɔlɔ kiŋ lɛ, mayabɩ mɩ-ñʋʋ pe-nesi taa.
13 Ɛlɛ iyebi-m nɛ ɩsɛɛ ɛsɔnaa lalaa.+ Pʋyɔɔ maakaɣ tasʋʋ mɩ-ñʋʋ yabʋ.+
14 Iwolo ɛsɔnaa mba ɩlɩzaa yɔ pɔ-cɔlɔ nɛ ɩpɔzɩ-wɛ se pasɩnɩ-mɩ.+ Paya mɩ-ñʋʋ mɩ-kʋñɔŋ alɩwaatʋ taa.»+
15 Ɛlɛ Izrayɛɛlɩ mba heyi Yehowa se: «Ðɩlabɩ kɩdɛkɛdɩm. Labɩ-ɖʋ mbʋ payɩ ŋsɔɔlaa yɔ. Ɛlɛ ɖitendi-ŋ, ya ɖa-ñʋʋ sɔnɔ.»
16 Nɛ palɩzɩ agbaaɣdaa ɛsɔnaa pɛ-hɛkʋ taa nɛ pɛsɛɛ Yehowa,+ piyeba nɛ ɛtaatasɩɣ pɩzʋʋ se eyele Izrayɛɛlɩ kʋñɔŋ taa.*+
17 Pʋwayɩ lɛ, Amooni mba+ kpeɣli pɔ-sɔɔjanaa, nɛ pesiɣ pe-kizinzikiŋ Galaadɩ. Pʋyɔɔ Izrayɛɛlɩ sɔɔjanaa ɖɔɖɔ kpeɣlaa nɛ pesiɣ pe-kizinzikiŋ Mizpaa.
18 Galaadɩ mba nɛ Galaadɩ awumbiya pɔpɔzɩ ɖama se: «Akaɣ-ɖʋ ɖɛʋ nɔɔ nɛ ɖiyooni Amooni mba?+ Ɛyʋ ɛnʋ ɛkaɣ pɩsʋʋ Galaadɩ mba kpeekpe wiyaʋ.»
Pɩ-tɛɛ tɔm
^ Yaa «Siirii.»
^ Piye piye, «ɛpɛdɩ-wɛ.»
^ Yaa «nɛ Izrayɛɛlɩ kʋñɔŋ yɔɔ lɛ, pɩtaalakɩ ɛ-kalɩzaɣ lɛɛ lɛɛ.»
