Tɔm Hʋyaa 11:1-40
11 Galaadɩ tʋ Yɛftee+ kaakɛ you laɖʋ sɔsɔ nɔɔyʋ; halʋ hayitu laɖʋ nɔɔyʋ kaalʋlɩnɩ-ɩ, payaɣaɣ Yɛftee caa se Galaadɩ.
2 Ɛlɛ Galaadɩ halʋ ɖɔɖɔ kaalʋlɩ-ɩ abalɩbiya. Ɛ-halʋ pɩyalaa paɣlaa lɛ, pɔɖɔɔnɩ Yɛftee nɛ peheyi-i se: «Ŋŋkaɣ mʋʋ ñɩm nabʋyʋ ɖa-caa ɖɩɣa taa, mbʋ pʋyɔɔ yɔ ŋkɛ halʋ lɛlʋ pɩyalʋ.»
3 Pʋyɔɔ Yɛftee se e-koobiya cɔlɔ nɛ ɛɖɛɛ ɛcaɣ Tob ɛjaɖɛ taa. Nɛ abalaa mba pɛfɛyɩnɩ naɖɩyɛ se pala yɔ paɖʋ taabalɩyɛ nɛ Yɛftee nɛ patɩŋɩɣ-ɩ.
4 Pʋwayɩ lɛ, Amooni mba wolo Izrayɛɛlɩ mba wayɩ.+
5 Nɛ Amooni mba wobi Izrayɛɛlɩ mba wayɩ lɛ, Galaadɩ ɛzʋtʋyaa ɖɛɛ kpaagbaa se pakpaɣ Yɛftee Tob ɛjaɖɛ taa nɛ papɩsɩna.
6 Peheyi Yɛftee se: «Kɔɔ nɛ ŋpɩsɩ ɖɔ-sɔɔjanaa ñʋʋdʋ, nɛ ɖɩpɩzɩ nɛ ɖiyooni Amooni mba.»
7 Ɛlɛ Yɛftee pɔzɩ Galaadɩ ɛzʋtʋyaa se: «Pɩtɩkɛ mɩpaɖɩnɩ-m kpem nɛ ɩɖɔɔnɩ-m man-caa ɖɩɣa taa? Ɩwɛ kʋñɔŋ taa lɛɛlɛɛyɔ lɛ, ɩkɔŋ mɔn-cɔlɔ suwe?»+
8 Peeɖe Galaadɩ ɛzʋtʋyaa cosi Yɛftee se: «Pʋyɔɔ ɖɩpɩsɩnɩ ñɔ-yɔɔ lɛɛlɛɛyɔ. Ye ɖa nɛ ŋ ɖiwoba nɛ ɖiyooni Amooni mba yɔ, ŋkaɣ pɩsʋʋ ɖa-ñʋʋdʋ nɛ Galaadɩ mba kpeekpe ñʋʋdʋ.»+
9 Nɛ Yɛftee heyi Galaadɩ ɛzʋtʋyaa se: «Ye ɩpɩsɩnɩ-m nɛ moyooni Amooni mba nɛ Yehowa yele nɛ mawabɩ-wɛ yɔ, ɖɩnɛ ɛlɛ mankaɣ pɩsʋʋ mɩ-ñʋʋdʋ toovenim taa!»
10 Galaadɩ ɛzʋtʋyaa heyi Yɛftee se: «Yehowa ɛkɛ aseɣɖe tʋ* ɖa nɛ ŋ ɖɛ-hɛkʋ taa, ye ɖɩtɩla ɛzɩ ŋyɔɔdʋʋ yɔ.»
11 Nɛ Yɛftee tɩŋ Galaadɩ ɛzʋtʋyaa, nɛ samaɣ sɩɩ-ɩ ɖiyiyu nɛ sɔɔjanaa ñʋʋdʋ. Nɛ Yɛftee ɖaɣnɩ ɛ-tɔm ndʋ tɩ-tɩŋa yɔɔdʋʋ Yehowa ɛsɩndaa Mizpaa.+
12 Pʋwayɩ lɛ, Yɛftee tiyi ɛyaa Amooni mba+ wiyaʋ cɔlɔ se pɔpɔzɩ-ɩ se: «Ma nɛ ŋ suwe* nɛ ŋkɔɔ se ŋyooni mɛ-ɛjaɖɛ?»
13 Nɛ Amooni mba wiyaʋ heyi ɛyaa mba Yɛftee tiyaa yɔ se: «Tɔm kɔyɔ se alɩwaatʋ ndʋ Izrayɛɛlɩ mba kaalɩnɩ Ejipiti yɔ, pamʋ mɛn-tɛtʋ,+ kpaɣnɩ Arɩnɔɔnɩ+ nɛ pɩtalɩ Yaabɔɔkɩ nɛ piwolo pɩtalɩ ɖooo Yɔɔrdaŋ.+ Lɛɛlɛɛyɔ pɩsɩnɩ-m tʋ laŋhɛzɩyɛ taa.»
14 Ɛlɛ Yɛftee ɖaɣnɩ ɛyaa tiyuu se papɩsɩ Amooni mba wiyaʋ cɔlɔ
15 nɛ peheyi-i se:
«Tɔm tʋnɛ Yɛftee yɔɔdʋʋ: “Izrayɛɛlɩ mba taamʋ Mowaabʋ mba tɛtʋ,+ nɛ pataamʋ ɖɔɖɔ Amooni mba tɛtʋ,+
16 mbʋ pʋyɔɔ yɔ Izrayɛɛlɩ mba kaalɩnɩ Ejipiti lɛ, paatɩŋnɩ kañɩmbusuu taa nɛ powolo patalɩ ɖooo Teŋgu Kɩsɛɛmʋʋ+ nɛ patalɩ Kadɛɛsɩ.+
17 Ðɩnɛ ɛlɛ, Izrayɛɛlɩ mba tiyi ɛyaa Edom wiyaʋ+ cɔlɔ se peheyi-i se: ‘Ðitendi-ŋ, yele nɛ ɖɩtɩŋnɩ ñɛ-ɛjaɖɛ taa,’ ɛlɛ Edom wiyaʋ tiwelisini-wɛ. Nɛ petiyini tɔm ɖɔɖɔ Mowaabʋ+ wiyaʋ, nɛ ɛlɛ titisini-wɛ ɖɔɖɔ. Pʋyɔɔ Izrayɛɛlɩ caɣ Kadɛɛsɩ.+
18 Patɩŋaɣnɩ kañɩmbusuu taa lɛ, pɔcɔlɩ Edom ɛjaɖɛ+ nɛ Mowaabʋ ɛjaɖɛ ɖɔɖɔ. Paatɩŋnɩ Mowaabʋ ɛjaɖɛ wɩsɩ ɖɩlɩyɛ taa+ nɛ pesiɣ pe-kizinzikiŋ Arɩnɔɔnɩ egeetiye taa; patɩtɛzɩ Mowaabʋ kamaɣ,+ mbʋ pʋyɔɔ yɔ Arɩnɔɔnɩ kaakɛnɩ Mowaabʋ kamaɣ.
19 «“Pʋwayɩ lɛ, Izrayɛɛlɩ mba tiyi ɛyaa Amoori mba wiyaʋ Sihɔɔnɩ, weyi ɛtɔkaɣ kewiyitu Hɛsɩbɔɔnɩ yɔ ɛ-cɔlɔ, nɛ peheyi-i se: ‘Ðitendi-ŋ, yele nɛ ɖɩtɩŋnɩ ñɛ-ɛjaɖɛ taa nɛ ɖiwolo ɖo-lone taa.’+
20 Ɛlɛ Sihɔɔnɩ taataa Izrayɛɛlɩ liu se eyebi-i nɛ ɛtɛzɩ e-egeetiye, pʋyɔɔ Sihɔɔnɩ kpeɣli ɛ-sɔɔjanaa tɩŋa nɛ pesiɣ pe-kizinzikiŋ Yahaz nɛ poyooni Izrayɛɛlɩ.+
21 Ðɩnɛ ɛlɛ, Izrayɛɛlɩ tɛ Ɛsɔ Yehowa ɖʋzɩ Sihɔɔnɩ nɛ ɛ-sɔɔjanaa kpeekpe Izrayɛɛlɩ nesi taa, nɛ Izrayɛɛlɩ mba wabɩ-wɛ nɛ pamʋ Amoori mba ɛjaɖɛ tɩŋa; mba kaawɛnɩ ɛjaɖɛ nɖɩ ɖɩ-taa.+
22 Mbʋ pamʋ Amoori mba tɛtʋ kpeekpe, kpaɣnɩ Arɩnɔɔnɩ nɛ piwolo Yaabɔɔkɩ, nɛ kpaɣnɩ kañɩmbusuu taa nɛ piwolo Yɔɔrdaŋ.+
23 «“Izrayɛɛlɩ tɛ Ɛsɔ Yehowa kaaɖɔɔnɩnɩ Amoori mba ɛ-samaɣ Izrayɛɛlɩ ɛsɩndaa,+ nɛ lɛɛlɛɛyɔ lɛ, ñacaɣ se ŋɖɔɔnɩ-kɛ?
24 Pɩtɩkɛ mbʋ payɩ ñɛ-ɛsɔ Kemɔɔsɩ+ cɛlɩɣ-ŋ yɔ, mbʋ pɩsɩɣnɩ ña-ñɩm na? Mbʋ ɖɔɖɔ, mba payɩ ɖɛ-Ɛsɔ Yehowa ɖɔɔnɩ-wɛ ɖɛ-ɛsɩndaa yɔ, mba ɖɩkaɣ ɖɔɔnʋʋ.+
25 Ñakɩlɩnɩ Mowaabʋ wiyaʋ Baalaakɩ,+ Zipɔɔrɩ pɩyalʋ yaa we? Wiɖiyi ɛtɛm kaɖɩnʋʋ Izrayɛɛlɩ mba na? Yaa eyoni-wɛ wiɖiyi?
26 Izrayɛɛlɩ mba wɛʋ Hɛsɩbɔɔnɩ nɛ tɛtʋ ndʋ tɩcɔ-kʋ nɛ tɩta yɔ tɩ-taa,+ Arowɛɛrɩ nɛ tɛtʋ ndʋ tɩcɔ-kʋ nɛ tɩta yɔ tɩ-taa, nɛ tɛtʋ ndʋ tɩwɛ Arɩnɔɔnɩ kidiilimiŋ cɔlɔ yɔ ti-kpeekpe tɩ-taa yɔ pɩlakɩ pɩnzɩ 300 yɔ. Ɛbɛ yɔɔ ŋtaañaɣ pana wiɖiyi se ŋmʋ-tʋ alɩwaatʋ ndʋ tɩ-taa?+
27 Mantɩyʋsɩnɩ-ŋ, nɛ ŋfɛyɩnɩ toovenim se ŋyooni-m. Tɔm Hʋyʋ+ Yehowa ɛkɛ tɔm hʋyʋ sɔnɔ Izrayɛɛlɩ samaɣ nɛ Amooni samaɣ pɛ-hɛkʋ taa.”»
28 Ɛlɛ Amooni mba wiyaʋ tiwelisi tɔm ndʋ Yɛftee tiyini-i yɔ.
29 Nɛ Yehowa fezuu tii Yɛftee yɔɔ,+ nɛ ɛtɩŋnɩ Galaadɩ nɛ Manaasee egeetiye taa nɛ ewolo Galaadɩ tɛ Mizpee,+ nɛ ɛkʋyɩnɩ Galaadɩ tɛ Mizpee nɛ ɛɖɛɛ Amooni mba wayɩ.
30 Nɛ Yɛftee ɖuu ɖuutu+ Yehowa nɛ ɛyɔɔdɩ se: «Ye ŋɖʋzɩ Amooni mba me-nesi tɛɛ yɔ,
31 alɩwaatʋ ndʋ malɩɣnɩ Amooni mba cɔlɔ nɛ manpɩsɩ laŋhɛzɩyɛ taa yɔ, ɛyʋ weyi ɛlɩɣnɩ man-ɖɩɣa taa nɛ ɛkatɩ-m yɔ, ɛkaɣ pɩsʋʋ Yehowa pʋyʋ,+ nɛ mankaɣ-ɩ laʋ ɛzɩ kɩlaʋ kɩñaɣzʋʋ yɔ.»+
32 Nɛ Yɛftee ɖɛɛ nɛ eyooni Amooni mba, nɛ Yehowa ɖʋzɩ-wɛ e-nesi tɛɛ.
33 Ɛkʋ-wɛ kʋgʋʋ sɔsɔʋ kpaɣnɩ Arowɛɛrɩ nɛ piwolo Miniiti—tɛtʋ 20—nɛ piwolo pɩtalɩ ɖooo Abɛl-Keramim. Mbʋ poluzi Amooni mba Izrayɛɛlɩ mba tɛɛ.
34 Pʋwayɩ lɛ, Yɛftee pɩsɩ ɛ-tɛ Mizpaa;+ ɛtalaa lɛ, ɛ-pɛlɛ lɩɩ nɛ ɛkatɩ-ɩ, eɖiɣni mabʋ nesi tɛɛ suye* nɛ ɛpaɣ. Ŋgʋ pɛlɛ ɛnʋ e-ɖeke koŋ Yɛftee kaalʋlaa. Ɛtaawɛɛnɩ abalɩbɩɣa yaa halɩbɩɣa nakɛyɛ nɛ pɩtasɩnɩ-ɩ.
35 Yɛftee na-ɩ lɛ, ɛcɩyɩ e-tokonaa nɛ ɛyɔɔdɩ se: «Hayɩ mɛn-pɛlɛ! Ŋmɩzɩ ma-laŋɩyɛ,* mbʋ pʋyɔɔ yɔ ŋpɩsɩ weyi mɔnɖɔɔnaa yɔ. Monɖuu ɖuutu* Yehowa, nɛ maapɩzɩɣ se manpɩsɩnɩ wayɩ.»+
36 Ɛlɛ ɛ-pɛlɛ heyi-i se: «Man-caa, ye ŋɖuu ɖuutu Yehowa yɔ, labɩ-m ɛzɩ ŋlabʋ tamaɣ yɔ,+ mbʋ pʋyɔɔ yɔ Yehowa yeba nɛ ŋkpa kɩmɩyɛ ño-koyindinaa, Amooni mba.»
37 Nɛ pɛlɛ tasɩ heyuu ɛ-caa se: «Mbʋ mañɩnɩɣ yɔ mbʋ yɔ: Yebi-m nɛ mɛwɛɛ men-ɖeke fenasɩ 2, nɛ mankpa pʋŋ taa, nɛ mewii mɛn-pɛlɛtʋ kele kele ñɩndʋ yɔɔ, ma nɛ man-taabalaa halɩñɩma.»*
38 Peeɖe ɛ-caa heyi-i se: «Wolo!» Mbʋ eyebi ɛ-pɛlɛ nɛ ɛlɛ ɖɛɛ fenasɩ 2, nɛ ɛ nɛ ɛ-taabalaa pɛɖɛɛ pakpa pʋŋ taa se ewii ɛ-pɛlɛtʋ kele kele ñɩndʋ yɔɔ.
39 Fenasɩ 2 wayɩ lɛ, pɛlɛ pɩsɩ ɛ-caa cɔlɔ, nɛ ɛ-caa ɖɔ ɖuutu ndʋ eeɖuu ɛ-yɔɔ yɔ tɩ-yɔɔ.+ Wiɖiyi abalʋ nɔɔyʋ tɩsʋʋnɩ-ɩ kpa. Nɛ pɩɩpɩsɩ sɔnzɩ* Izrayɛɛlɩ taa:
40 Paa pɩnaɣ ŋga lɛ, Izrayɛɛlɩ pɛlaa wokaɣ nɛ pasaŋ Galaadɩ tʋ Yɛftee pɛlɛ kɩyakɩŋ 4.
Pɩ-tɛɛ tɔm
^ Piye piye, «ɛkɛ weyi ewelisiɣ yɔ.»
^ Yaa «Ɛbɛ malabɩ-ŋ.»
^ Pɩkɛ suye cikpeɖe nɖɩ pɔɖɔkʋʋ nesi tɛɛ nɛ pamakɩ yɔ.
^ Piye piye, «Ŋtisi-m tataa kpem.»
^ Piye piye, «Monkuli mɔ-nɔɔ.»
^ Yaa «nɛ ma nɛ man-taabalaa ɖiwii, mbʋ pʋyɔɔ yɔ maakaɣ walʋʋ kpa.»
^ Yaa «paɣtʋ.»
