Tɔm Hʋyaa 14:1-20
14 Nɛ Samsɔɔ tii Timina, nɛ Timina peeɖe ɛna halʋ Filistii tʋ nɔɔyʋ.*
2 Nɛ ɛpɩsɩ nɛ eheyi ɛ-caa nɛ e-ɖoo se: «Filistii mba halʋ nɔɔyʋ tɔm labɩ-m ɖeu Timina, nɛ mɔnsɔɔlaa se ɩca-m halʋ ɛnʋ nɛ ɛpɩsɩ ma-halʋ.»
3 Ɛlɛ ɛ-caa nɛ e-ɖoo pɔpɔzɩ-ɩ se: «Ŋŋpɩzɩɣ nɛ ŋna halʋ nɔɔyʋ ñɔ-hɔʋ taa yaa ɖa-samaɣ kpeekpe taa?+ Filistii mba kɩdɩbɛlɩŋ hɛkʋ taa pɩwɛɛ se ŋwolo nɛ ŋkpaɣ halʋ na?» Ɛlɛ Samsɔɔ cosi ɛ-caa se: «Ca-m halʋ ɛnʋ, mbʋ pʋyɔɔ yɔ ɛnʋ mʋnɩnɩ-m.»*
4 Ɛ-caa nɛ e-ɖoo pataaɖiɣzina se Yehowa cɔlɔ pɩɩlɩnaa, mbʋ pʋyɔɔ yɔ ɛñɩnaɣ* nʋmɔʋ nakʋyʋ se ɛtɩŋnɩ kɩ-yɔɔ nɛ eyooni Filistii mba, mbʋ pʋyɔɔ yɔ Filistii mba tɔkaɣ kewiyitu Izrayɛɛlɩ yɔɔ alɩwaatʋ ndʋ tɩ-taa.+
5 Nɛ Samsɔɔ nɛ ɛ-caa nɛ e-ɖoo petii Timina. Ɛtalɩ Timina viiñi hayɩm nabʋyʋ taa lɛ, na! Mʋʋzʋʋ* nakʋyʋ wɛɛ nɛ kɩmʋdʋʋ nɛ kɩkɔŋnɩ ɛ-yɔɔ.
6 Ðɩnɛ ɛlɛ, Yehowa fezuu kpazɩ-ɩ ɖoŋ+ nɛ ɛcɩyɩ mʋʋzʋʋ ŋgʋ nabʋlɛ, ɛzɩ ɛyʋ cɩyʋʋ mbeɣa nabʋlɛ nɛ e-nesi kpɛɖɛ yɔ. Ɛlɛ etiheyi ɛ-caa yaa e-ɖoo mbʋ ɛlaba yɔ.
7 Pʋwayɩ lɛ, Samsɔɔ tii nɛ ɛyɔɔdɩnɩ halʋ, nɛ ɛ-taa tɛzɩ tɛm se halʋ ɛnʋ ɛkɛnɩnɩ weyi ɛmʋnɩ-ɩ yɔ.+
8 Pʋwayɩ ɛpɩsaɣ se ɛkpaɣ halʋ nɛ ewoni ɖɩɣa lɛ,+ ɛhɛyɩ se ɛna mʋʋzʋʋ ŋgʋ ɛɛkʋwa yɔ ki-tomnaɣ. Peeɖe ɛnawa se tʋŋ nɛ tʋŋ num kaawɛ mʋʋzʋʋ tomnaɣ taa.
9 Nɛ ekuyi tʋŋ num e-nesi taa nɛ eneziɣ nɛ ɛɖɔŋ. Ɛpɩsɩ ɛ-caa nɛ e-ɖoo pɔ-cɔlɔ lɛ, ɛha-wɛ se penezi. Ɛlɛ etiheyi-wɛ se mʋʋzʋʋ tomnaɣ taa ekuyi tʋŋ num mbʋ.
10 Nɛ Samsɔɔ caa tii halʋ cɔlɔ, nɛ Samsɔɔ la kazandʋ peeɖe, mbʋ pʋyɔɔ yɔ mbʋ evebiya lakaɣ alɩwaatʋ ndʋ.
11 Pana-ɩ lɛ, pɔkɔnɩ taabalaa 30 se pɛwɛɛ ɛ-cɔlɔ.
12 Nɛ Samsɔɔ heyi-wɛ se: «Mentendi-mɩ, iyele nɛ manɖʋ-mɩ ɖimɖimɖa nakʋyʋ. Ye kazandʋ kɩyakɩŋ 7 ɛnɛ ɩ-taa ɩpɩzaa nɛ ikpeɣ nɛ iheyi-m yɔ, mankaɣ-mɩ cɛlʋʋ pɩsatʋ tokonaa* 30 nɛ tokonaa kɩbama lalaa 30.
13 Ɛlɛ ye ɩtɩpɩzɩ nɛ ikpeɣ yɔ, pɩwɛɛ se ɩcɛlɩ-m pɩsatʋ tokonaa 30 nɛ tokonaa kɩbama lalaa 30.» Nɛ pocosi se: «Ðʋ-ɖʋ ñe-ɖimɖimɖa ŋgʋ; ɖɩsɔɔlaa se ɖɩnɩɩ-kʋ.»
14 Nɛ eheyi-wɛ se:
«Kʋtɔɔm lɩnɩ weyi ɛtɔkɩ yɔ ɛ-taa,Nɛ leleŋ pʋyʋ lɩɩnɩ ɖoŋ tʋ taa.»+
Pɩla kɩyakɩŋ 3, patɩpɩzɩ nɛ pekpeɣ ɖimɖimɖa ŋgʋ.
15 Kɩyakʋ 4 ñɩŋgʋ wiye lɛ, peheyi Samsɔɔ halʋ se: «Peɣzi ña-walʋ+ nɛ ɛlɩzɩ-ɖʋ ɖimɖimɖa ŋgʋ kɩ-tɔbʋʋ. Pɩtɩkɛ mbʋ yɔ, ɖɩkaɣ sɔbʋ ña nɛ ña-caa ɖɩɣa taa mba miŋ. Ɩya-ɖʋ cɩnɛ se ɩmʋ ɖa-ñɩm na?»
16 Nɛ Samsɔɔ halʋ wɛɛ nɛ ewiɣni-i* nɛ ɛtɔŋ se: «Ŋpaɖɩɣ-m; ŋtɩsɔɔlɩ-m.+ Ŋɖʋ man-samaɣ ɖimɖimɖa, ɛlɛ ŋtɩlɩzɩ-m kɩ-tɔbʋʋ.» Peeɖe ecosi-i se: «Suwe! Man-caa nɛ mon-ɖoo maɣmaɣ mantiheyi-wɛ. Nɛ ña pɩwɛɛ se meheyi?»
17 Ɛlɛ halʋ wɛɛ nɛ ewiɣni-i* mbʋ kɩyakɩŋ weyi pɩkazɩ kazandʋ kɩyakɩŋ 7 taa yɔ. Nɛ kɩyakʋ 7 ñɩŋgʋ wiye lɛ, ɛtɛzɩ halʋ heyuu, mbʋ pʋyɔɔ yɔ ɛcɛyaɣ-ɩ. Pʋwayɩ lɛ, halʋ lɩzɩ ɛ-samaɣ ɖimɖimɖa tɔbʋʋ.+
18 Nɛ kɩyakʋ 7 ñɩŋgʋ wiye, pʋcɔ nɛ wɩsɩ ɖʋʋ lɛ,* tɛtʋ taa abalaa pɔzɩ-ɩ se:
«Ɛbɛ wɛ leleŋ nɛ pɩkɩlɩ tʋŋ num?Nɛ ɛbɛ wɛ ɖoŋ nɛ pɩkɩlɩ mʋʋzʋʋ?»+
Ecosi-wɛ se:
«Ye ɩtaahayɩnɩ mɔ-nɔ halɩñɩnʋ yɔ,+Ɩtaapɩzɩ nɛ ikpeɣ men-ɖimɖimɖa.»
19 Nɛ Yehowa fezuu kpazɩ-ɩ ɖoŋ+ nɛ etii Askelɔɔnɩ+ nɛ ɛkʋ peeɖe abalaa 30 nɛ ɛkpaɣ po-tokonaa. Nɛ ɛcɛlɩ mba pekpeɣ ɖimɖimɖa yɔ tokonaa kɩbama mba.+ Nɛ ɛɖɛɛ ɛpɩsɩ ɛ-caa tɛ nɛ pana.
20 Nɛ pakpaɣ Samsɔɔ halʋ+ nɛ pɛcɛlɩ taabalaa mba paakɔnaa se pɛwɛɛ ɛ-cɔlɔ yɔ pa-taa kʋɖʋm.+
Pɩ-tɛɛ tɔm
^ Piye piye, «ɛna Filistii mba pɛlaa taa halʋ nɔɔyʋ.»
^ Piye piye, «mbʋ pʋyɔɔ yɔ ɛmʋnɩ mɛ-ɛsɩndaa.»
^ Yaa «Ɛsɔ ñɩnaɣ.»
^ Yaa «Mʋʋzʋʋ ŋgʋ kɩwɛnɩ kpɛm ki-pondone yɔɔ yɔ.»
^ Yaa «pɩsatʋ ndʋ payaɣ se lɛɛ yɔ ti-tokonaa.» Lɛɛ kɛ ñɩtʋ ndʋ pahayaɣ-tʋ ɖooo caanaʋ taa nɛ palakɩnɩ-tʋ tʋmɩyɛ nɛ palʋʋnɩ wondu kususutu yɔ.
^ Piye piye, «etisiɣ ɛ-yɔɔ ɛsɩtɛɣlɩm.»
^ Piye piye, «etisiɣ ɛ-yɔɔ ɛsɩtɛɣlɩm.»
^ Pɩpɩzɩɣ pɩkɛ, «pʋcɔ nɛ ɛsʋʋ pɩ-taa ɖaŋ taa lɛ.»
