Tɔm Hʋyaa 17:1-13
-
Mikee sɩʋ kpelisi nɛ ɛ-cɔjɔ (1-13)
17 Abalʋ nɔɔyʋ kaawɛ Efrayim pʋŋ egeetiye+ taa, ɛ-hɩɖɛ lɛ Mikee.
2 Kɩyakʋ nakʋyʋ lɛ, eheyi e-ɖoo se: «Ñe-liidiye pɔɔyɩsɩ 1 100 nzɩ paakpaɣaa, nzɩ sɩ-yɔɔ ŋlɔ nɔɔ kɩdɛkɛdaɣ nɛ manɩɩ yɔ, na, sɩwɛ mɔn-cɔlɔ. Maakpaɣnɩ-sɩ.» Ðɩnɛ ɛlɛ e-ɖoo yɔɔdɩ se: «Tɛtɛ nɛ Yehowa wazɩ man-pɩyalʋ.»
3 Nɛ ɛpɩsɩnɩ liidiye pɔɔyɩsɩ 1 100 nzɩ nɛ ɛcɛlɩ e-ɖoo, ɛlɛ e-ɖoo yɔɔdɩ se: «Paa pɩɩla ɛzɩma yɔ, mankaɣ cɛlʋʋ* liidiye nɖɩ ɖɩwɛ me-nesi taa yɔ Yehowa se pɩsa nɛ man-pɩyalʋ kpaɣ-ɖɩ nɛ ɛsaɣnɩ sɩʋ kpeliɣa, nɛ elubini ɖɔɖɔ ñɩɣtʋ sɩʋ kpeliɣa.*+ Lɛɛlɛɛyɔ manpɩsɩɣnɩ-ŋ ɖɩ.»
4 Ɛpɩsɩnɩ liidiye nɛ ɛcɛlɩ e-ɖoo lɛ, e-ɖoo lɩzɩ liidiye pɔɔyɩsɩ 200 nɛ ɛcɛlɩ ñɩɣtʋ wondu luɖu. Nɛ ɛlɛ saɣ sɩʋ kpeliɣa nakɛyɛ nɛ elu ñɩɣtʋ sɩʋ kpeliɣa* nakɛyɛ ɖɔɖɔ; nɛ pasɩɩ-sɩ Mikee ɖɩɣa taa.
5 Mikee ɛnʋ ɛɛwɛnɩ ɛsɔnaa ɖɩɣa nakɛyɛ, nɛ ɛla efoodɩ*+ nakʋyʋ nɛ terafim sɩʋ kpelisi,*+ nɛ ɛsɩɩ ɛ-pɩyalaa taa nɔɔyʋ se ɛkɛ ɛ-cɔjɔ.+
6 Alɩwaatʋ ndʋ tɩ-taa lɛ, wiyaʋ nɔɔyʋ taawɛɛ Izrayɛɛlɩ.+ Paa weyi lɛ, ɛlakaɣ mbʋ ɛsɔɔlaa yɔ.*+
7 Evebu nɔɔyʋ kaawɛ Bɛtɩlɛhɛm,+ Yuuda egeetiye taa, ɛɛlɩnɩ Yuuda hɔʋ taa. Ɛɛkɛ Leevi tʋ+ nɛ ɛcaɣ peeɖe alɩwaatʋ natʋyʋ.
8 Evebu ɛnʋ ɛkʋyɩ Bɛtɩlɛhɛm tɛtʋ taa Yuuda egeetiye taa se ɛñɩnɩ lone naɖɩyɛ nɛ ɛcaɣ. Ɛwɛ ɛ-nʋmɔʋ ɖɔm yɔɔ lɛ, ɛtalɩ Efrayim pʋŋ egeetiye taa, Mikee+ ɖɩɣa taa.
9 Peeɖe Mikee pɔzɩ-ɩ se: «Le ŋlɩnaa?» Ɛlɛ cosi-i se: «Mɛnkɛ Leevi tʋ nɛ malɩnɩ Bɛtɩlɛhɛm, Yuuda egeetiye taa, nɛ mɛwɛɛ mañɩnɩɣ lone naɖɩyɛ se mancaɣ.»
10 Nɛ Mikee heyi-i se: «Caɣ mɔn-cɔlɔ nɛ ŋpɩsɩ man-caa* nɛ mɔn-cɔjɔ. Mankaɣ-ŋ cɛlʋʋ liidiye pɔɔyɩsɩ 10 paa pɩnaɣ ŋga nɛ tokonaa mba pɩpɔzʋʋ-ŋ yɔ nɛ ñɔ-tɔɔnaɣ.» Ðɩnɛ ɛlɛ Leevi tʋ ɛnʋ ɛsʋʋ ɛ-tɛ.
11 Nɛ evebu Leevi tʋ ɛnʋ etisi se ɛcakɩ abalʋ ɛnʋ ɛ-tɛ, nɛ ɛpɩsɩ ɛzɩ ɛ-pɩyalaa taa nɔɔyʋ yɔ.
12 Pɩtasɩ lɛ, Mikee sɩ Leevi tʋ ɛnʋ se ɛkɛ ɛ-cɔjɔ,+ nɛ ɛcaɣ Mikee ɖɩɣa taa.
13 Nɛ Mikee yɔɔdɩ se: «Lɛɛlɛɛyɔ, manawa se Yehowa kaɣ-m labʋ kɩbandʋ, mbʋ pʋyɔɔ yɔ Leevi tʋ pɩsɩ mɔn-cɔjɔ.»
Pɩ-tɛɛ tɔm
^ Piye piye, «mankaɣ pɩsʋʋ kele kele.»
^ Yaa «elubini ɖɔɖɔ sɩʋ kpeliɣa ŋga poyolisuu ñɩɣtʋ nɛ polukina yɔ.»
^ Yaa «nɛ eyolisi ñɩɣtʋ nɛ elubini sɩʋ kpeliɣa.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «nɛ hɔʋ ɛsɔnaa.»
^ Yaa «mbʋ ɛmaɣzaɣ se pɩwɛ ɖeu yɔ.»
^ Yaa «mɔ-lɔŋ tasɩyʋ.»
