Tɔm Hʋyaa 18:1-31
18 Alɩwaatʋ ndʋ tɩ-taa lɛ, wiyaʋ nɔɔyʋ taawɛɛ Izrayɛɛlɩ.+ Nɛ kɩyakɩŋ ɛnɩ ɩ-taa, Daanɩ mba+ cejewiye ñɩnaɣ tɛtʋ natʋyʋ se pacaɣ tɩ-taa, mbʋ pʋyɔɔ yɔ pɩtalʋʋnɩ alɩwaatʋ ndʋ yɔ, pataatɩɩmʋtɩ pa-ñɩm Izrayɛɛlɩ cejewe hɛkʋ taa.+
2 Daanɩ mba tiyi pe-cejewiye taa abalaa 5, abalaa mba palɩnɩ Zora nɛ Ɛstawɔɔlɩ+ nɛ pɛwɛɛ abalɩtʋ yɔ, se powolo nɛ pɔcɔŋ ɛjaɖɛ nɛ pɔcɔɔ ɖɩ-taa. Peheyi-wɛ se: «Iwolo nɛ ɩcɔɔ ɛjaɖɛ taa.» Patalɩ Efrayim pʋŋ egeetiye taa, Mikee+ ɖɩɣa taa lɛ, pasʋʋ peeɖe ɖoo taa.
3 Pɔñɔtɩnɩ Mikee ɖɩɣa lɛ, panɩɩ evebu Leevi tʋ nɔɔ nɛ patɩlɩ-kɛ, pʋyɔɔ powoba nɛ pɔpɔzɩ-ɩ se: «Akɔnɩ-ŋ cɩnɛ? Ɛbɛ ŋlakɩ lone ɖɩnɛ ɖɩ-taa? Ɛbɛ kpa-ŋ nɛ pɩsɩɩ cɩnɛ?»
4 Ecosi-wɛ se: «Ɛzʋnɔ nɛ ɛzʋnɔ Mikee labɩ-m, nɛ ɛkpaɣ-m se mɛnkɛ ɛ-cɔjɔ nɛ ɛhɛyɩɣ-m.»+
5 Pʋwayɩ lɛ, peheyi-i se: «Ðitendi-ŋ, pɔzɩ Ɛsɔ nɛ ɖɩna se nʋmɔʋ ŋgʋ ɖiɖiɣni ɖɔm yɔ, pɩkaɣ-ɖʋ ɖɔmnʋʋ camɩyɛ yaa we.»
6 Cɔjɔ heyi-wɛ se: «Iwobini laŋhɛzɩyɛ. Yehowa wɛ mɩ-cɔlɔ mɩ-nʋmɔʋ ɖɔm taa.»
7 Ðɩnɛ ɛlɛ abalaa mba, pa-kagbanzɩ pakpaɣ pa-nʋmɔʋ nɛ patalɩ Layiisi.+ Nɛ pana se ɛyaa mba paawɛ peeɖe yɔ, pɛwɛ pa-tɩ yɔɔ yem ɛzɩ Siidɔɔ mba yɔ. Paawɛ yem ɖiɣ ɖiɣ nɛ sɔɔndʋ taakpaɣ-wɛ nɛ nabʋyʋ,+ nɛ nazɩyʋ nɔɔyʋ taakɔɔ ɛjaɖɛ wayɩ wiɖiyi se ɛcɛyɩ-wɛ. Paaposini Siidɔɔ mba, nɛ natʋyʋ taawɛɛ pa nɛ nɔɔyʋ pɛ-hɛkʋ taa.
8 Papɩsɩ po-koobiya cɔlɔ Zora nɛ Ɛstawɔɔlɩ+ lɛ, po-koobiya pɔzɩ-wɛ se: «Ɛzɩma pɩɖɔma?»
9 Pocosi se: «Pɩwɛɛ se ɖɩkpa pa-wayɩ, mbʋ pʋyɔɔ yɔ ɖɩnawa se ɛjaɖɛ nɖɩ ɖɩwɛ ɖeu kpem. Ɛbɛ yɔɔ ɩcɔʋ mɩ-ñʋŋ taa kiii? Ɩtaawɛɛkɩ alɩwaatʋ, ɩkpa nɛ ɩmʋ ɛjaɖɛ.
10 Ɩtalɩɣ lɛ, ɩnaɣ se peeɖe mba wɛ yem kaalɛyɩtʋ,+ nɛ tɛtʋ walɩ yem. Ɛsɔ ɖʋzɩ-tʋ mi-nesi taa; mbʋ payɩ pɩwɛ tɛtʋ yɔɔ yɔ, pɩ-taa nabʋyʋ ɛɛtɛɖɩɣ lone nɖɩ ɖɩ-taa.»+
11 Peeɖe Daanɩ mba cejewiye taa abalaa 600 kpaɣ you wondu nɛ pakʋyɩnɩ Zora nɛ Ɛstawɔɔlɩ+ nɛ pɛɖɛɛ.
12 Pakpa nɛ pesiɣ pe-kizinzikiŋ Kiriyatɩ-Yeyarim,+ Yuuda egeetiye taa. Pʋyɔɔ payaɣ lone nɖɩ se Mahane-Daanɩ*+ halɩ nɛ sɔnɔ; ɖɩwɛ Kiriyatɩ-Yeyarim wɩsɩ ɖɩɖʋyɛ taa.
13 Pakʋyɩ peeɖe nɛ powolo Efrayim pʋŋ egeetiye taa nɛ patalɩ Mikee+ ɖɩɣa.
14 Ðɩnɛ ɛlɛ, abalaa 5 mba paawoba nɛ pɔcɔŋ Layiisi+ ɛjaɖɛ yɔ, pɔpɔzɩ po-koobiya se: «Ɩnawa se efoodɩ* nakʋyʋ, terafim sɩʋ kpelisi,* sɩʋ kpeliɣa ŋga pasaɣaa yɔ, nɛ ñɩɣtʋ sɩʋ kpeliɣa*+ wɛ ɖɩsɩ sɩnɛ sɩ-taa? Ɩmaɣzɩ mbʋ pɩwɛɛ se ɩla yɔ pɩ-yɔɔ.»
15 Nɛ pasɩŋ peeɖe nɛ pɛhɛyɩ evebu Leevi tʋ+ ɖɩɣa taa, Mikee ɖɩɣa taa nɛ pɔpɔzɩ ɛ-alaafɩya yɔɔ.
16 Alɩwaatʋ ndʋ lɛ, Daanɩ abalaa 600,+ mba paaɖɔkɩ you wondu yɔ, paasɩŋ nɔnɔɔ taa.
17 Abalaa 5 mba paawoba nɛ pɔcɔŋ ɛjaɖɛ yɔ,+ pasʋʋ se pakpaɣ sɩʋ kpeliɣa ŋga pasaɣaa yɔ, efoodɩ,*+ terafim sɩʋ kpelisi*+ nɛ ñɩɣtʋ sɩʋ kpeliɣa.*+ (Cɔjɔ+ kaasɩŋ nɔnɔɔ taa, ɛ nɛ abalaa 600 mba paaɖɔkɩ you wondu yɔ.)
18 Pasʋʋ Mikee ɖɩɣa taa nɛ pakpaɣ sɩʋ kpeliɣa ŋga pasaɣaa yɔ, efoodɩ,* terafim sɩʋ kpelisi* nɛ ñɩɣtʋ sɩʋ kpeliɣa.* Cɔjɔ pɔzɩ-wɛ se: «Ɛbɛ ɩlakɩ mbʋ yɔ?»
19 Ɛlɛ pocosi-i se: «Su ɖiɣ ɖiɣ. Ðʋ ñe-niye ñɔ-nɔɔ yɔɔ, nɛ ŋtɩŋ-ɖʋ nɛ ŋkɛ ɖa-caa* nɛ ɖɔ-cɔjɔ. Ɛbɛ kɩlɩ-ŋ weewee? Se ŋkɛ ɛyʋ kʋɖʋm ɖɩɣa taa cɔjɔ+ yaa ŋpɩsɩ cejewiye naɖɩyɛ nɛ hɔŋ sakɩyɛ cɔjɔ Izrayɛɛlɩ taa?»+
20 Nɛ pɩkɛdɩnɩ cɔjɔ, nɛ ɛkpaɣ efoodɩ,* terafim sɩʋ kpelisi* nɛ sɩʋ kpeliɣa ŋga pasaɣaa yɔ+ nɛ ɛ nɛ samaɣ pɛɖɛɛ.
21 Pʋwayɩ lɛ, papɩsɩ nɛ pakpaɣ pa-nʋmɔʋ; paaɖɛzɩ piya, kpɩna nɛ wondu ndʋ tɩmʋ ñɩm yɔ nɔɔ.
22 Poposini Mikee ɖɩɣa cabɩ lɛ, abalaa mba paawɛ ɖɩsɩ nzɩ sɩñɔtɩnɩ Mikee ɖɩɣa yɔ sɩ-taa yɔ, pekpeɣli ɖama nɛ paɖʋ Daanɩ mba wayɩ nɛ pehiɣ-wɛ.
23 Alɩwaatʋ ndʋ paya Daanɩ mba nɛ nɔɔ kɩkʋyaɣ lɛ, paba kisi nɛ paha-wɛ nɛ ɛsa nɛ pɔpɔzɩ Mikee se: «Ɛbɛ laba? Ɛbɛ yɔɔ ŋkpeɣli ɛyaa samaɣ?»
24 Nɛ ecosi se: «Ɩkpaɣ mɛ-ɛsɔnaa mba malaba yɔ, nɛ ɩkpɛndɩnɩ cɔjɔ ɖɔɖɔ. Ɛbɛ ɩkazɩ-m yɔ? Ɛzɩma ɩpɩzɩɣ nɛ ɩpɔzɩ-m se: “Ɛbɛ laba?”»
25 Nɛ Daanɩ mba cosi-i se: «Taaholini-ɖʋ; pɩtɩkɛ mbʋ yɔ, abalaa mba pɔkɔ pana yɔ* poyouni-mɩ, nɛ ŋlesi ñe-wezuu* nɛ ña-ɖɩɣa taa mba ɖɔɖɔ lesi pe-weziŋ.»*
26 Nɛ Daanɩ mba kpaɣ pa-nʋmɔʋ; nɛ Mikee nawa se pakɩlɩ-ɩ ɖoŋ lɛ, ɛpɩsɩ nɛ ekpe ɛ-tɛ.
27 Pakpaɣ mbʋ Mikee kaalaba nɛ ɛsɩɩ yɔ nɛ pɛkpɛndɩnɩ ɛ-cɔjɔ nɛ pɩtɛ lɛ, powolo Layiisi,+ powobi samaɣ ŋga kaawɛ ɖiɣ ɖiɣ nɛ kɛwɛɛ yem kaalɛyɩtʋ yɔ ka-wayɩ.+ Pakʋ ɛyaa samaɣ ŋga nɛ laɣɖɛ nɛ pañaɣzɩ tɛtʋ miŋ.
28 Nɔɔyʋ taawɛɛ se ɛya tɛtʋ ndʋ tɩ-ñʋʋ, mbʋ pʋyɔɔ yɔ tiiposini Siidɔɔ, nɛ tɔm natʋyʋ taawɛɛ tɩ-taa mba nɛ nɔɔyʋ pɛ-hɛkʋ taa, nɛ tɩɩwɛ Bɛtɩ-Rehob+ fɛɛʋ taa. Nɛ paɖaɣnɩ tɛtʋ ndʋ maʋ nɛ pacaɣ tɩ-taa.
29 Pɩtasɩ lɛ, paya tɛtʋ ndʋ se Daanɩ,+ paya-tʋ pa-caa Daanɩ hɩɖɛ, weyi ɛɛkɛ Izrayɛɛlɩ pɩyalʋ yɔ.+ Ɛlɛ kiɖe tɛɛ lɛ, payaɣaɣ tɛtʋ ndʋ se Layiisi.+
30 Pʋwayɩ lɛ, Daanɩ mba siɣ pa-tɩ sɩʋ kpeliɣa ŋga,*+ nɛ Moyizi pɩyalʋ Gɛrɩsɔɔm+ lʋlʋʋ taa tʋ Yonataanɩ+ nɛ ɛlɛ lʋlʋʋ taa mba papɩsɩ Daanɩ mba cejewiye cɔjɔnaa nɛ pɩkɔɔ pɩsɩɩnɩ kɩyakʋ ŋgʋ pɛɖɛnɩ ɛjaɖɛ taa mba yomiye taa yɔ.
31 Nɛ pesiɣ sɩʋ kpeliɣa ŋga Mikee kaalaba yɔ, sɩʋ kpeliɣa ŋga pasaɣaa yɔ, nɛ kɛwɛɛ peeɖe mbʋ kɩyakɩŋ weyi payɩ Ɛsɔ toovenim tʋ ɖɩɣa kaawɛ Siiloo+ yɔ ɩ-taa.
Pɩ-tɛɛ tɔm
^ Pʋ-tɔbʋʋ se «Daanɩ pɩlʋʋ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «hɔʋ ɛsɔnaa.»
^ Yaa «nɛ sɩʋ kpeliɣa ŋga poyolisi ñɩɣtʋ nɛ polubina yɔ.»
^ Yaa «nɛ sɩʋ kpeliɣa ŋga poyolisi ñɩɣtʋ nɛ polubina yɔ.»
^ Yaa «hɔʋ ɛsɔnaa.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «hɔʋ ɛsɔnaa.»
^ Yaa «nɛ sɩʋ kpeliɣa ŋga poyolisi ñɩɣtʋ nɛ polubina yɔ.»
^ Yaa «ɖɔ-lɔŋ tasɩyʋ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «hɔʋ ɛsɔnaa.»
^ Yaa «abalaa mba pa-kalɩzasɩ wɛ ñaŋ yɔ.»
^ Yaa «pa-kalɩzasɩ.»
^ Yaa «ña-kalɩzaɣ.»
^ Pʋ-tɔbʋʋ se sɩʋ kpeliɣa ŋga pasaɣaa yɔ.
