Tɔm Hʋyaa 19:1-30
-
Bɛnjamɛɛ mba kpa halʋ nɔɔyʋ nɛ ɖoŋ nɛ pasʋʋnɩ-ɩ Gibeya (1-30)
19 Kɩyakɩŋ ɛnɩ ɩ-taa, alɩwaatʋ ndʋ wiyaʋ nɔɔyʋ taawɛɛ Izrayɛɛlɩ yɔ,+ Leevi tʋ nɔɔyʋ kaawɛnɩ ɖaŋ nɔɔyʋ Bɛtɩlɛhɛm,+ Yuuda egeetiye taa nɛ pʋwayɩ lɛ, ɛkpaɣ-ɩ nɛ ɛpɩsɩ ɛ-halʋ. Leevi tʋ ɛnʋ ɛɛwɛ Efrayim pʋŋ egeetiye taa+ lone poliŋ ñɩnɖɛ naɖɩyɛ taa.
2 Ɛlɛ ɛ-ɖaŋ cɛtaɣ-ɩ,* nɛ ɛ-ɖaŋ ɛnʋ ɛɖɛɛ ɛ-cɔlɔ nɛ ewolo ɛ-caa ɖɩɣa taa Bɛtɩlɛhɛm, Yuuda egeetiye taa. Ɛcaɣ peeɖe fenasɩ naanza.
3 Pʋwayɩ lɛ, ɛ-walʋ tɩŋ ɛ-wayɩ se ewolo nɛ ɛyɔɔdɩnɩ-ɩ nɛ ɛpɩsɩ ɖɩɣa; ɛ-walʋ ɖɛɣaɣ lɛ, ɛɛkpɛndɩnɩ ɛ-lɩmɖʋyʋ abalɩñɩnʋ nɛ kpaŋasɩ 2. Abalʋ talaa lɛ, halʋ mʋ-ɩ nɛ ɛsʋnɩ-ɩ ɛ-caa ɖɩɣa taa. Halʋ caa na abalʋ lɛ, ɛmʋ-ɩ nɛ taa leleŋ.
4 Pʋyɔɔ ɛ-ɛtɩ, pʋ-tɔbʋʋ se pɛlɛ caa, yɔɔdɩnɩ-ɩ se ɛcaɣ ɛ-cɔlɔ kɩyakɩŋ 3, nɛ ɛlɛ tisi; nɛ pɔtɔkɩ nɛ pɔñɔʋ, nɛ abalʋ ɖou peeɖe.
5 Kɩyakʋ 4 ñɩŋgʋ wiye, pakʋyɩ tanaŋ tɛɛ pala se pɛɖɛɣ lɛ, pɛlɛ caa heyi ɛ-ɛtɩ se: «Tɔɔ nabʋyʋ nɛ pɩkpazɩ-ŋ ɖoŋ,* pʋwayɩ lɛ ɩpɩzɩɣ nɛ ɩɖɛɛ.»
6 Nɛ pacaɣ, nɛ pa-naalɛ pɔtɔɔ nɛ pɔñɔɔ; pʋwayɩ lɛ, pɛlɛ caa heyi abalʋ se: «Mentendi-ŋ, sʋʋ cɩnɛ ɖoo anɛ nɛ ŋnɩɩ leleŋ.»*
7 Abalʋ kʋyaa se ɛɖɛɣ lɛ, ɛ-ɛtɩ wɛɛ-ɩ tenduu yɔɔ, pʋyɔɔ abalʋ ɖaɣnɩ sʋʋ peeɖe.
8 Kɩyakʋ 5 ñɩŋgʋ wiye, ɛkʋyɩ tanaŋ tɛɛ pala se ɛɖɛɣ lɛ, pɛlɛ caa heyi-i se: «Mentendi-ŋ, tɔɔ nabʋyʋ nɛ pɩkpazɩ-ŋ ɖoŋ.»* Nɛ pacaɣ mbʋ nɛ ɖanaɣ paɣzɩ ɖanʋʋ, pa-naalɛ paawɛ tɔɔʋ yɔɔ.
9 Abalʋ kʋyaa se ɛ nɛ ɛ-ɖaŋ nɛ ɛ-lɩmɖʋyʋ pɛɖɛɛ lɛ, ɛ-ɛtɩ, pʋ-tɔbʋʋ se pɛlɛ caa, heyi-i se: «Cɔna, lɛɛlɛɛyɔ ɖanaɣ caɣ ɖanʋʋ. Mentendi-mɩ, ɩsʋʋ cɩnɛ. Evemiye tɛm kɩtɛm ɛzʋnɔ. Sʋʋ ɖoo anɛ cɩnɛ nɛ ŋnɩɩ leleŋ. Cee lɛ, ɩpɩzɩɣ nɛ ɩkʋyɩ lɔŋ nɛ ɩkpaɣ mɩ-nʋmɔʋ nɛ ŋpɩsɩ ñɛ-tɛ.»*
10 Paa mbʋ yɔ, abalʋ tɩtasɩ sɔɔlʋʋ se ɛsʋʋ peeɖe ɖoo naayɛ, pʋyɔɔ ɛkʋyaa nɛ ɛkpaɣ nʋmɔʋ nɛ ɛtalɩ ɖooo Yebuusi, pʋ-tɔbʋʋ se Yeruzalɛm.+ Ɛ nɛ ɛ-kpaŋasɩ 2 nɛ sɩ-sʋʋtʋ, ɛ-ɖaŋ nɛ ɛ-lɩmɖʋyʋ.
11 Pɔñɔtɩnɩ Yebuusi lɛ, wɩsɩ paɣzɩ kpem. Pʋyɔɔ lɩmɖʋyʋ pɔzɩ ɛ-caa se: «Ðɩtaasɩŋ Yebuusi mba tɛtʋ tʋnɛ tɩ-taa nɛ ɖiɖoo yaa we?»
12 Ɛlɛ ɛ-caa heyi-i se: «Ðɩɩkaɣ sɩŋʋʋ agɔma mba patɩkɛ Izrayɛɛlɩ mba yɔ pɛ-tɛtʋ taa. Ðɩkaɣ ɖɛʋ nɛ ɖɩtalɩ ɖooo Gibeyaa.»+
13 Ðɩnɛ ɛlɛ, eheyi ɛ-lɩmɖʋyʋ se: «Kɔɔ nɛ ɖɩñaɣ pana nɛ ɖɩtalɩ Gibeyaa yaa Ramaa;+ lona ana a-taa naɖɩyɛ taa ɖɩkaɣ sʋʋ.»
14 Ðɩnɛ ɛlɛ pakpaɣ pa-nʋmɔʋ; pɔñɔtɩnɩ Gibeyaa, Bɛnjamɛɛ egeetiye taa lɛ, ɖoo paɣzɩ yuu.
15 Pʋyɔɔ pasɩŋ peeɖe nɛ pasʋʋ Gibeyaa tɛtʋ taa se poɖoo peeɖe. Pasʋwa lɛ, pacaɣ samaɣ kadaɣ taa, ɛlɛ nɔɔyʋ tɩmʋ-wɛ ɛ-ɖɩɣa taa se poɖoo ɛ-tɛ.+
16 Pɩkɛdaa lɛ, abalʋ akpadɩyʋ nɔɔyʋ lɩɩnɩ hayɩm taa nɛ ɛtalɩ ɖanaɣ ŋga. Ɛɛkɛ Efrayim pʋŋ egeetiye taa tʋ,+ ɛwɛʋ Gibeyaa yɔ, pɩlakɩ alɩwaatʋ natʋyʋ yɔ; ɛlɛ Bɛnjamɛɛ mba+ kaawɛnɩ tɛtʋ taa.
17 Abalʋ akpadɩyʋ ɛnʋ, ɛkpazɩ ɛ-ɛsa nɛ ɛna nʋmɔɖɔnʋ ɛnʋ samaɣ kadaɣ taa lɛ, ɛpɔzɩ-ɩ se: «Le ŋwoki, nɛ le ŋlɩnaa?»
18 Ecosi se: «Ðɩkʋyɩnɩ Bɛtɩlɛhɛm, Yuuda egeetiye taa nɛ ɖiwoki Efrayim pʋŋ egeetiye taa lone poliŋ ñɩnɖɛ naɖɩyɛ taa, mɛn-tɛ lɛ peeɖe. Maawobi Bɛtɩlɛhɛm, Yuuda egeetiye taa,+ nɛ menɖiɣni wobu Yehowa ɖɩɣa taa,* ɛlɛ nɔɔyʋ tɩmʋ-m ɛ-tɛ.
19 Ðɩwɛnɩ lɔtʋ nɛ ñɩtʋ sakɩyɛ se ɖa-kpaŋasɩ ɩtɔɔ,+ nɛ ma nɛ halʋ nɛ ma-lɩmɖʋyʋ ɖɩwɛnɩ kpɔnɔ+ nɛ vɛɛ. Nabʋyʋ ɛɛtɛɖɩɣ-ɖʋ.»
20 Ɛlɛ abalʋ akpadɩyʋ ɛnʋ ɛyɔɔdɩ se: «Wɛɛ laŋhɛzɩyɛ taa! Mɔncɔŋnɩ ña-kɩcɛyɩm tɩŋa ɖeɖe. Ɛlɛ taasʋʋ samaɣ kadaɣ taa.»
21 Ðɩnɛ ɛlɛ, ɛsʋnɩ-ɩ ɛ-ɖɩɣa taa nɛ ɛha kpaŋasɩ tɔɔnaɣ.* Pʋwayɩ lɛ, pɔkɔ pa-nɩŋgbanzɩ lɩm nɛ pɔtɔɔ nɛ pɔñɔɔ.
22 Paawɛɛ nɛ panɩɣ leleŋ lɛ, tɛtʋ taa abalaa maawazɩɣ pʋyʋwaa nabɛyɛ cɔɔ ɖɩɣa nɛ pata nɛ pɔkɔtʋʋ nɔnɔɔ ɖoŋ, nɛ peheyiɣ abalʋ akpadɩyʋ weyi ɛtɩnɩ ɖɩɣa yɔ se: «Lɩnɩ abalʋ weyi ɛkɔm ñɛ-tɛ yɔ nɛ ɖɩsʋʋnɩ-ɩ.»+
23 Peeɖe ɖɩɣa tʋ lɩwa nɛ eheyi-wɛ se: «Aayɩ, mon-koobiya, ɩtaala kɩdɛkɛdɩm. Mentendi-mɩ, abalʋ ɛnʋ mamʋnɩ-ɩ ɛgɔndʋ mɛn-tɛ. Ɩtaala fɛyɛ lakasɩ sɩnɛ.
24 Mɛn-pɛlɛ wɛɛ, ɛɛsɩŋ abalʋ, nɛ abalʋ ɛnʋ ɛ-ɖaŋ ɖɔɖɔ wɛɛ. Iyele nɛ malɩnɩ-wɛ, nɛ ye ɩtɛm mɩ-taa kɔyɔ, ɩpɩzɩɣ nɛ ɩɖʋ-wɛ fɛyɛ.*+ Ɛlɛ pɩfɛyɩ se ɩla abalʋ ɛnʋ fɛyɛ lakasɩ sɩnɛ.»
25 Ɛlɛ abalaa kizi-i welisinuu; ɖɩnɛ ɛlɛ abalʋ kpa ɛ-ɖaŋ+ nɛ ɛlɩnɩ-ɩ pɔ-cɔlɔ. Nɛ pakpa-ɩ nɛ ɖoŋ nɛ pasʋʋnɩ-ɩ nɛ palabɩ-ɩ kañatʋ lakasɩ ɖoo tɩŋa nɛ tɛʋ kɔɔ kife. Pɩñandaɣ lɛ, peyebi-i nɛ ɛɖɛɛ.
26 Nɛ halʋ talɩ tanaŋ tɛɛ pala nɛ ɛtɔlɩ abalʋ ɛnʋ ɛ-ɖɩɣa nɔnɔɔ taa, ɖɩɣa taa ɖenɖe ɛ-walʋ* kaawɛɛ yɔ, nɛ ɛhɩnɩ peeɖe nɛ pɩkɔɔ pɩñandɩ.
27 Ɛ-walʋ* kʋyɩ tanaŋ tɛɛ nɛ ɛtʋlɩ ɖɩɣa nɔnɔsɩ se ɛlɩɩ nɛ ewolo ɛ-nʋmɔʋ ɖɔm yɔɔ lɛ, ɛnaɣ halʋ, pʋ-tɔbʋʋ se ɛ-ɖaŋ, ɖɩɣa nɔnɔɔ taa; ɛhɩnaa nɛ e-nesi wɛɛ pɔɔyʋʋ tɛɛ.
28 Nɛ eheyi halʋ se: «Kʋyɩ nɛ ɖɩɖɛɛ.» Ɛlɛ halʋ ticosi-i. Ðɩnɛ ɛlɛ abalʋ kpaɣ-ɩ nɛ ɛkpazɩ kpaŋaɣ yɔɔ nɛ ɛkpaɣ ɛ-ɖɩɣa nʋmɔʋ.
29 Ɛtalɩ ɛ-tɛ lɛ, ɛkpaɣ sɩɣa* nɛ ɛsɛtɩ ɛ-ɖaŋ piliŋa piliŋa hɔɔlɩŋ 12 taa nɛ etiyini paa Izrayɛɛlɩ egeetiye nɖɩ lɛ hɔɔlʋʋ kʋɖʋmʋʋ.
30 Mba payɩ panaɣaɣ-kʋ yɔ pɔtɔŋaɣ se: «Wiɖiyi nabʋyʋ tɩla mbʋ, nɛ patɩna nabʋyʋ mbʋ kpaɣnɩ kɩyakʋ ŋgʋ Izrayɛɛlɩ mba lɩnɩ Ejipiti yɔ nɛ pɩkɔɔ pɩtalɩ sɔnɔ. Ɩmaɣzɩ pɩ-yɔɔ,* ɩpɔzɩ ɖama,+ nɛ iheyi-ɖʋ mbʋ pɩwɛɛ se ɖɩla yɔ.»
Pɩ-tɛɛ tɔm
^ Yaa «Ɛlɛ ɛ-ɖaŋ lakaɣ acɛyɛ.»
^ Yaa «nɛ pɩkpazɩ ña-laŋɩyɛ ɖoŋ.»
^ Yaa «nɛ ŋyele nɛ ña-laŋɩyɛ nɩɩ leleŋ.»
^ Yaa «nɛ pɩkpazɩ ña-laŋɩyɛ ɖoŋ.»
^ Piye piye, «ñe-kizinziku tɛɛ.»
^ Pɩpɩzɩɣ pɩkɛ, «nɛ malakɩ tʋmɩyɛ Yehowa ɖɩɣa taa.»
^ Yaa «nɛ esidi ñɩtʋ nɛ ɛha kpaŋasɩ.»
^ Yaa «nɛ ɩsʋʋnɩ-wɛ nɛ ɩlabɩ-wɛ mbʋ ɩmaɣzɩɣ se pɩwɛ ɖeu yɔ.»
^ Piye piye, «ɛ-caa.»
^ Piye piye, «Ɛ-caa.»
^ Yaa «sɩɣa ŋga pɛcɛkɩnɩ liu tɛɛ yɔ.»
^ Yaa «Ɩka mɩ-laŋa pɩ-yɔɔ.»
