Tɔm Hʋyaa 2:1-23
2 Nɛ Yehowa tiyiyu+ kʋyɩnɩ Gilgaalɩ+ nɛ ɛkpa Bokiim nɛ ɛyɔɔdɩ se: «Malɩzɩ-mɩ Ejipiti ɛjaɖɛ taa nɛ mowoni-mɩ ɛjaɖɛ nɖɩ maaɖuwaa se mɛncɛlɩɣ mɩ-cɔzɔnaa yɔ ɖɩ-taa.+ Pɩtasɩ lɛ, mɔyɔɔdaa se: “Maakaɣ cɛbʋ mɛ-ɛgbɛyɛ nɖɩ ɖɩwɛ ma nɛ mɩ ɖɛ-hɛkʋ taa yɔ kpa.+
2 Piyele nɛ mɩ lɛ, pɩfɛyɩ se mɩ nɛ ɛjaɖɛ ɖɩnɛ ɖɩ-taa mba ɩɖʋ ɛgbɛyɛ,+ nɛ pɩwɛɛ se ɩyɔkɩ pa-altaarunaa.”+ Ɛlɛ itiwelisi mɔ-nɔɔ taa tɔm.+ Ɛbɛ yɔɔ ɩlabɩ mbʋ?
3 Pʋyɔɔ ma ɖɔɖɔ mɔyɔɔdaa se: “Maakaɣ-wɛ ɖɔɔnʋʋ mɩ-ɛsɩndaa,+ nɛ pakaɣ-mɩ pɩsʋʋ kpaca,+ nɛ pɛ-ɛsɔnaa kaɣ-mɩ peɣzuu nɛ ile.”»+
4 Yehowa tiyiyu heyi tɔm ndʋ Izrayɛɛlɩ mba kpeekpe lɛ, samaɣ paɣzɩ wiu wooo.
5 Pʋyɔɔ paya lone nɖɩ se Bokiim,* nɛ palaa kɩlaŋ Yehowa peeɖe.
6 Yozuwee yebi samaɣ se kɛɖɛɛ lɛ, Izrayɛɛlɩ mba taa paa weyi wolo tɛtʋ ndʋ tɩkɛ ɛ-ñɩm yɔ tɩ-taa se ɛmʋ-tʋ.+
7 Samaɣ kaasɛ Yehowa Yozuwee alɩwaatʋ kpeekpe taa nɛ ɛzʋtʋyaa mba paacaɣ wezuu Yozuwee sɩm wayɩ nɛ paana tʋma sɔsɔna wena payɩ Yehowa kaalabɩ Izrayɛɛlɩ yɔ, pa-alɩwaatʋ kpeekpe taa.+
8 Pʋwayɩ lɛ, Nuuni pɩyalʋ Yozuwee, Yehowa lɩmɖʋyʋ sɩ, ɛɛwɛnɩ pɩnzɩ 110.+
9 Nɛ pepimi-i Timina-Herɛsɩ,+ tɛtʋ ndʋ tɩɩpɩsɩ ɛ-ñɩm yɔ tɩ-taa, Efrayim pʋŋ egeetiye taa, Gaasɩ Pʋʋ hayo kiŋ.+
10 Kpaɖʋʋ ŋgʋ kɩ-taa mba tɩŋa sɩ, nɛ kɩ-wayɩ lɛ, kpaɖʋʋ lɛɛkʋ lɩɩ, nɛ kɩɩsɩŋ Yehowa nɛ kɩɩsɩŋ ɖɔɖɔ mbʋ ɛɛlabɩ Izrayɛɛlɩ yɔ.
11 Mbʋ Izrayɛɛlɩ mba labɩ mbʋ pɩfɛyɩ ɖeu yɔ Yehowa ɛsɩndaa nɛ pɛsɛɛ Baalɩwaa.+
12 Mbʋ peyebi Yehowa, pa-caanaa tɛ Ɛsɔ, weyi ɛlɩzɩ-wɛ Ejipiti ɛjaɖɛ taa yɔ,+ nɛ patɩŋ ɛsɔnaa lalaa, ajɛɛ wena aacɔ-wɛ kpɛɛɛ nɛ ata yɔ a-ɛsɔnaa,+ nɛ poluŋ pɛ-tɛɛ nɛ paɖʋ Yehowa ɖɩwɩzɩyɛ.+
13 Peyebi Yehowa nɛ pɛsɛɛ Baalɩ nɛ Astoorɛɛtɩ sɩʋ kpelisi.+
14 Pʋyɔɔ Yehowa kɔ pana siŋŋ nɛ Izrayɛɛlɩ, nɛ ɛɖʋzɩ-wɛ lazɩyaa nesi taa nɛ paba lazɩ-wɛ.+ Ɛpɛdɩ-wɛ nɛ koyindinaa mba paacɔ-wɛ nɛ pata yɔ,+ nɛ pataatasɩɣ pɩzʋʋ se pakaɖɩnɩ po-koyindinaa.+
15 Lona wena a-taa payɩ powokaɣ yɔ, Yehowa nesi kaɖaɣnɩ-wɛ nɛ ɛkɔŋnɩ asɛyʋʋ pɔ-yɔɔ,+ ɛzɩ Yehowa kaayɔɔdʋʋ yɔ nɛ ɛzɩ Yehowa kaaɖuunuu-wɛ ɖɔɖɔ yɔ,+ nɛ paawɛ kʋñɔŋ sɔsɔʋ taa.+
16 Nɛ Yehowa kʋsaɣ tɔm hʋyaa nɛ poholuu-wɛ mba palazaɣ-wɛ yɔ pe-nesi taa.+
17 Ɛlɛ halɩ tɔm hʋyaa maɣmaɣ, Izrayɛɛlɩ mba kizaa se paawelisiɣni-wɛ, nɛ pa nɛ ɛsɔnaa lalaa pala acɛyɛ nɛ poluŋ pɛ-tɛɛ. Poposini nʋmɔʋ ŋgʋ kɩ-taa pɔ-cɔzɔnaa mba paañam Yehowa paɣtʋ yɔ paaɖɔma yɔ lɛɛ lɛɛ.+ Pataala ɛzɩ pɔ-cɔzɔnaa yɔ.
18 Paa ɛzɩmtaa, Yehowa haɣ-wɛ tɔm hʋyaa lɛ,+ Yehowa wɛɣ paa tɔm hʋyʋ weyi lɛ ɛ-cɔlɔ nɛ ɛyakɩ pa-ñʋʋ po-koyindinaa nesi taa tɔm hʋyʋ alɩwaatʋ kpeekpe taa; mbʋ pʋyɔɔ yɔ Yehowa naɣaɣ pa-pʋtɔdɩyɛ*+ alɩwaatʋ ndʋ pɔmɔlaɣ mba paawɛɛ nɛ panazɩɣ-wɛ+ nɛ mba pawɩlaɣ-wɛ ñaŋ yɔ pe-nesi taa yɔ.
19 Ɛlɛ alɩwaatʋ ndʋ tɔm hʋyʋ sɩkɩ lɛ, paɖaɣnɩ labʋ kɩdɛkɛdɩm nɛ pɩkpaɖɩ pa-caanaa nɛ patɩŋ ɛsɔnaa lalaa wayɩ, nɛ pɛsɛɛ-wɛ nɛ poluŋ pɛ-tɛɛ.+ Pataayeki pa-lakasɩ nɛ pa-ñʋʋ taa ɖoŋ wɛtʋ.
20 Nɛ pɩtɛmna se Yehowa kɔ pana siŋŋ nɛ Izrayɛɛlɩ,+ nɛ ɛyɔɔdɩ se: «Samaɣ kanɛ, kamanɩ mɛ-ɛgbɛyɛ paɣtʋ ndʋ manɖʋ kɔ-cɔzɔnaa yɔ tɩ-yɔɔ+ nɛ katɩñamɩ-m;+ pʋyɔɔ lɛ,
21 ma ɖɔɖɔ maakaɣ ɖɔɔnʋʋ pɛ-ɛsɩndaa ajɛɛ wena Yozuwee taamʋ pʋcɔ nɛ ɛsɩkɩ yɔ a-taa naɖɩyɛ.+
22 Malakɩ mbʋ nɛ mantakɩnɩ Izrayɛɛlɩ mba nɛ mana se pakaɣ ɖɔkʋʋ Yehowa nʋmɔʋ+ nɛ pɔɖɔ kɩ-taa ɛzɩ pa-caanaa kaalabʋ yɔ yaa we.»
23 Pʋyɔɔ Yehowa ha nʋmɔʋ se ajɛɛ ana akazɩ. Ɛtɩɖɔɔnɩ-yɛ lɔŋ, nɛ ɛtɩɖʋzɩ-yɛ ɖɔɖɔ Yozuwee nesi taa.