Tɔm Hʋyaa 20:1-48
-
Poyoni Bɛnjamɛɛ mba (1-48)
20 Pʋyɔɔ Izrayɛɛlɩ mba kpeekpe lɩnɩ kpaɣnɩ Daanɩ+ nɛ pitii Beyɛɛrɩ-Seeba, palɩnɩ ɖɔɖɔ Galaadɩ egeetiye taa,+ nɛ samaɣ kpeekpe kpeɣli nɔɔ kʋɖʋmaɣ taa* Mizpaa,+ Yehowa ɛsɩndaa.
2 Nɛ samaɣ ñʋndɩnaa nɛ Izrayɛɛlɩ cejewe kpeekpe kɔɔ Ɛsɔ samaɣ kediɣzaɣ* taa—sɔɔjanaa nɩŋgbanzɩ ɖɔnaa kaakpɛndɩ 400 000, mba pɔɖɔkʋʋ laɣla yɔ.+
3 Bɛnjamɛɛ mba nɩɩ se Izrayɛɛlɩ abalaa kpa Mizpaa.
Nɛ Izrayɛɛlɩ abalaa pɔzɩ se: «Iheyi-ɖʋ nɛ ɖɩnɩɩ; ɛzɩma pɩɖɔma nɛ pala ɛzaɣtʋ lakasɩ nzɩ?»+
4 Peeɖe abalʋ Leevi tʋ,+ pʋ-tɔbʋʋ se halʋ weyi pakʋwa yɔ ɛ-walʋ cosaa se: «Ma nɛ man-ɖaŋ ɖɩtalɩ Gibeyaa,+ Bɛnjamɛɛ egeetiye taa se ɖɩsʋʋ peeɖe ɖoo taa.
5 Nɛ Gibeyaa mba* kʋyɩ mɔ-yɔɔ nɛ ɖoo nɛ pɔcɔɔ ɖɩɣa nɛ pata. Pañɩnaɣ se pakʋ-m, ɛlɛ peyele pakpa man-ɖaŋ nɛ ɖoŋ nɛ pasʋʋnɩ-ɩ nɛ ɛsɩ.+
6 Pʋyɔɔ mankpaɣ man-ɖaŋ tomnaɣ nɛ mɛnsɛtɩ-kɛ nɛ mentiyini kɔ-hɔɔlɩŋ paa Izrayɛɛlɩ egeetiye nɖɩ lɛ ɖɩ-taa,+ mbʋ pʋyɔɔ yɔ palabɩ fɛyɛ lakasɩ nɛ kʋzɔɔtʋ lakasɩ Izrayɛɛlɩ taa.
7 Lɛɛlɛɛyɔ, mɩ Izrayɛɛlɩ mba kpeekpe, ɩyɔɔdɩ cɩnɛ ndʋ ɩmaɣzɩɣ yɔ, nɛ lɩmaɣzɩyɛ nɖɩ ɩkpaɣaa yɔ.»+
8 Ðɩnɛ ɛlɛ samaɣ kpeekpe kʋyɩ nɔɔ kʋɖʋmaɣ taa* nɛ kɔyɔɔdɩ se: «Ða-taa nɔɔyʋ ɛɛkaɣ wobu e-kizinziku tɛɛ, nɛ nɔɔyʋ ɛɛkaɣ pɩsʋʋ ɛ-ɖɩɣa taa.
9 Lɛɛlɛɛyɔ lɛ, mbʋ ɖɩkaɣ labʋ Gibeyaa yɔ mbʋ yɔ: Ðɩkaɣ tɔʋ piye nɛ ɖɩkpa nɛ ɖiyooni-kʋ.+
10 Izrayɛɛlɩ cejewe kpeekpe taa, abalaa 100 taa lɛ, ɖɩkaɣ lɩzʋʋ abalaa 10; 1 000 taa lɛ, ɖɩkaɣ lɩzʋʋ abalaa 100; nɛ 10 000 taa lɛ, ɖɩkaɣ lɩzʋʋ abalaa 1 000 nɛ pañɩnɩ tɔɔnasɩ sɔɔjanaa, se pɩsa nɛ poyooni Gibeyaa, Bɛnjamɛɛ egeetiye taa, kʋzɔɔtʋ lakasɩ nzɩ palabɩ Izrayɛɛlɩ ɛjaɖɛ taa yɔ sɩ-yɔɔ.»
11 Mbʋ Izrayɛɛlɩ abalaa kpeekpe kpeɣlaa se poyooni tɛtʋ ndʋ nɔɔ kʋɖʋmaɣ taa.*
12 Ðɩnɛ ɛlɛ, Izrayɛɛlɩ cejewe tiyi ɛyaa Bɛnjamɛɛ cejewiye taa abalaa kpeekpe cɔlɔ se pɔpɔzɩ-wɛ se: «Ɛzaɣtʋ lakasɩ nzɩ palabɩ mɩ-hɛkʋ taa mbʋ yɔ?
13 Lɛɛlɛɛyɔ, ɩɖʋzɩ ɖe-nesi taa abalaa maawazɩɣ pʋyʋwaa mba pɛwɛ Gibeyaa yɔ,+ nɛ ɖɩkʋ-wɛ nɛ ɖɩlɩzɩ mbʋ pɩfɛyɩ ɖeu yɔ Izrayɛɛlɩ taa.»+ Ɛlɛ Bɛnjamɛɛ mba kizi se paawelisiɣni po-koobiya Izrayɛɛlɩ mba.
14 Nɛ Bɛnjamɛɛ mba lɩɩnɩ tɛtʋ ndɩ ndɩ taa nɛ pekpeɣli Gibeyaa se poyooni Izrayɛɛlɩ abalaa.
15 Bɛnjamɛɛ mba kpeɣli abalaa 26 000, mba palɩnɩ pɛ-tɛtʋ ndɩ ndɩ taa yɔ, mba pɔɖɔkʋʋ laɣla yɔ evemiye nɖɩ, nɛ pɩtasɩnɩ abalaa 700 mba paapalɩnɩ Gibeyaa yɔ.
16 Sɔɔjanaa mba pa-taa lɛ, paapalɩ 700, paakɛ nɩmɩyɛ tɩnaa. Pa-taa paa weyi pɩzaɣ se ɛtɔ pʋtɔɖɛ nɛ halɩ pɩyaɣ ñʋʋ taa ñɔyaɣ kʋɖʋmaɣ nɛ piicoɖuu-i.
17 Izrayɛɛlɩ abalaa kaakpeɣli abalaa 400 000 mba pɔɖɔkʋʋ laɣla yɔ,+ nɛ pa-taa paa weyi kaawɛ niye you labʋ taa, ɛlɛ Bɛnjamɛɛ mba taawɛɛ pɩ-taa.
18 Pakʋyɩ nɛ pakpa Betɛɛlɩ se pɔpɔzɩ Ɛsɔ ɛ-lɩmaɣzɩyɛ.+ Nɛ Izrayɛɛlɩ samaɣ pɔzɩ se: «Ða-taa anɩ pɩwɛɛ se ɛɖɛɛ nɔɔ nɛ ɖiyooni Bɛnjamɛɛ mba?» Yehowa cosi se: «Yuuda kaɣnɩ ɖɛʋ nɔɔ.»
19 Pʋwayɩ lɛ, Izrayɛɛlɩ mba kʋyɩ tanaŋ tɛɛ nɛ powolo pesiɣ pe-kizinzikiŋ Gibeyaa cɔlɔ se poyooni-kʋ.
20 Nɛ Izrayɛɛlɩ abalaa lɩɩ se poyooni Bɛnjamɛɛ; papɩlaa se poyooni-wɛ Gibeyaa.
21 Nɛ Bɛnjamɛɛ mba lɩɩnɩ Gibeyaa nɛ pakʋ Izrayɛɛlɩ abalaa 22 000 evemiye nɖɩ.
22 Ɛlɛ Izrayɛɛlɩ mba sɔɔjanaa la abalɩtʋ nɛ paɖaɣnɩ lɩʋ ɖenɖe paalabɩ you kajalaɣ kɩyakʋ wiye yɔ nɛ papɩlɩ se pala you.
23 Nɛ Izrayɛɛlɩ mba wolo nɛ pewii Yehowa ɛsɩndaa nɛ pɩkɔɔ pɩtalɩ ɖanaɣ, nɛ pɔpɔzɩ Yehowa se: «Pɩwɛɛ se ɖɩtasɩ wobu nɛ ɖiyooni ɖo-koobiya Bɛnjamɛɛ mba na?»+ Ðɩnɛ ɛlɛ Yehowa cosi se: «Ɩkpa nɛ iyooni-wɛ.»
24 Pʋyɔɔ Izrayɛɛlɩ mba ñɔtɩnɩ Bɛnjamɛɛ mba evemiye 2 ñɩnɖɛ wiye.
25 Bɛnjamɛɛ mba ɖɔɖɔ lɩɩnɩ Gibeyaa nɛ pakatɩ-wɛ evemiye 2 ñɩnɖɛ nɖɩ ɖi-wiye nɛ patasɩ kʋʋ Izrayɛɛlɩ mba 18 000,+ paba kaaɖɔkɩ laɣla pa-tɩŋa.
26 Peeɖe Izrayɛɛlɩ abalaa kpeekpe kʋyaa nɛ pakpa Betɛɛlɩ. Pewii nɛ pacaɣ peeɖe Yehowa ɛsɩndaa,+ nɛ pɔhɔkɩ nɔɔ+ evemiye nɖɩ nɛ ɖanaɣ kɔɔ kaɖanɩ nɛ palaa kɩlaŋ kɩñaɣzɩŋ+ nɛ laŋhɛzɩyɛ kɩlaŋ+ Yehowa ɛsɩndaa.
27 Pʋwayɩ lɛ, Izrayɛɛlɩ abalaa pɔzɩ Yehowa ɛ-lɩmaɣzɩyɛ,+ mbʋ pʋyɔɔ yɔ Ɛsɔ toovenim tʋ ɛgbɛyɛ ɖʋʋ aɖakaɣ kaawɛ peeɖe kɩyakɩŋ ɛnɩ ɩ-taa.
28 Aarɔɔnɩ pɩyalʋ Eleyaazaarɩ pɩyalʋ Fineyaasɩ+ lakaɣnɩ tʋmɩyɛ* aɖakaɣ ɛsɩndaa kɩyakɩŋ ɛnɩ ɩ-taa. Nɛ Izrayɛɛlɩ mba pɔzɩ se: «Pɩwɛɛ se ɖɩtasɩ wobu nɛ ɖiyooni ɖo-koobiya Bɛnjamɛɛ mba yaa ɖitaawolo?»+ Yehowa cosi se: «Ɩkpa, mbʋ pʋyɔɔ yɔ cee mankaɣ-wɛ ɖʋzʋʋ mi-nesi taa.»
29 Nɛ Izrayɛɛlɩ mba sɩɩ ɛyaa nɛ papabɩ+ nɛ pɔcɔɔ Gibeyaa nɛ pata.
30 Izrayɛɛlɩ mba kpa se poyooni Bɛnjamɛɛ mba evemiye tozo ñɩnɖɛ wiye, nɛ palɩɩ nɛ papɩlɩ Gibeyaa cɔlɔ se poyooni-kʋ, ɛzɩ paalabʋ nɛ pɩɖɛɛ yɔ.+
31 Bɛnjamɛɛ mba lɩwa se pakatɩ sɔɔjanaa lɛ, paba posi-wɛ nɛ pɛ-tɛtʋ.+ Peeɖe lɛ, ɛzɩ pɩɩtɛm labʋ yɔ, papaɣzɩ-wɛ yonuu nɛ pakʋ pa-taa nabɛyɛ habɛɛ sɔsɔna yɔɔ, a-taa kʋɖʋmɖɩyɛ kpaɣaɣ Betɛɛlɩ nɛ lɛɛɖɛ ñowokini Gibeyaa, pakʋ Izrayɛɛlɩ abalaa ɛzɩ 30 mbʋ yɔ peeɖe.+
32 Nɛ Bɛnjamɛɛ mba yɔɔdɩ se: «Ðɩkaɣ-wɛ wabʋ ɛzɩ ɖɩɩwabʋ-wɛ nɛ pɩɖɛɛ yɔ.»+ Ɛlɛ Izrayɛɛlɩ mba yɔɔdɩ se: «Ðise nɛ ɖiposi-wɛ nɛ tɛtʋ nɛ ɖiwoni-wɛ habɛɛ sɔsɔna yɔɔ.»
33 Ðɩnɛ ɛlɛ, Izrayɛɛlɩ abalaa kpeekpe kʋyɩnɩ po-lona taa nɛ palɩɩ papɩlɩ Baalɩ-Tamaarɩ; alɩwaatʋ ndʋ tɩ-taa lɛ, Izrayɛɛlɩ ñɩma mba paapabaa yɔ, pakʋyɩnɩ po-lona taa Gibeyaa cɔlɔ kpɛɛɛ.
34 Nɛ abalaa 10 000 mba paapalɩnɩ Izrayɛɛlɩ kpeekpe taa yɔ pɔkɔɔ Gibeyaa ɛsɩndaa, nɛ you saa miŋ siŋŋ. Ɛlɛ Bɛnjamɛɛ mba taana se asɛyʋʋ wɩzɩ-wɛ talʋʋ.
35 Yehowa yele nɛ Izrayɛɛlɩ mba wa Bɛnjamɛɛ mba,+ nɛ Izrayɛɛlɩ mba kʋ Bɛnjamɛɛ abalaa 25 100 evemiye nɖɩ, pa-tɩŋa paaɖɔkɩ laɣla.+
36 Ɛlɛ alɩwaatʋ ndʋ Izrayɛɛlɩ abalaa seɣaɣ Bɛnjamɛɛ mba ɛsɩndaa yɔ, Bɛnjamɛɛ mba kaamaɣzaa se pakaɣ-wɛ wabʋ,+ ŋgʋ paba seɣaɣ, mbʋ pʋyɔɔ yɔ pataɣaɣ liu abalaa mba paapabɩ Gibeyaa cɔlɔ yɔ.+
37 Mba paapabaa yɔ, pala lɛɛ lɛɛ nɛ pɛkpɛzɩ nɛ pɛɖɛɛnɩ Gibeyaa. Nɛ pamɩzɩ ɖama tɛtʋ taa nɛ paɖɩzɩ ti-kpeekpe nɛ laɣɖɛ.
38 Izrayɛɛlɩ abalaa kaanɩnɩ ɖama se mba papabɩ tɛtʋ cɔlɔ yɔ, pakaɣ labʋ nɛ ñɔsɩ nasɩyɩ lɩɩnɩ tɛtʋ taa nɛ sɩkpa nɛ pɩkɛnɩ-wɛ yʋsaɣ.
39 Izrayɛɛlɩ mba pɩsaɣnɩ pa-wayɩ you taa lɛ, Bɛnjamɛɛ mba paɣzɩ-wɛ yonuu nɛ pakʋ Izrayɛɛlɩ abalaa ɛzɩ 30 mbʋ yɔ,+ nɛ pɔyɔɔdɩ se: «Pɩnaɣ kpayɩ kpayɩ se ɖɩtasɩɣ-wɛ wabʋ ɛzɩ ɖɩɩwabʋ-wɛ you ŋgʋ kɩɩɖɛwa yɔ kɩ-taa yɔ.»+
40 Ɛlɛ ñɔsɩ sɔsɔsɩ nasɩyɩ paɣzɩ lɩnʋʋ tɛtʋ taa nɛ sɩkpaɣ; yʋsaɣ kɛlɛ. Bɛnjamɛɛ abalaa kisaa nɛ pɔcɔna lɛ, panaɣ miŋ ɖiɣni ñaɣʋ tɛtʋ kpeekpe nɛ miŋ nzʋlʋma kpaɣ ɛsɔdaa.
41 Peeɖe Izrayɛɛlɩ abalaa pam Bɛnjamɛɛ abalaa nɛ ɛsa nɛ sɔɔndʋ kpa paba, mbʋ pʋyɔɔ yɔ panawa se asɛyʋʋ talɩ-wɛ.
42 Pʋyɔɔ pese Izrayɛɛlɩ abalaa ɛsɩndaa nɛ pɛɖɛɛnɩ kañɩmbusuu taa kiŋ, ɛlɛ peseɣaɣ mbʋ lɛ, paba ɖʋ pa-wayɩ nɛ poyouni-wɛ; abalaa lɩɩnɩ tɛtʋ ndɩ ndɩ taa nɛ poyooni-wɛ ɖɔɖɔ nɛ pakʋ-wɛ.
43 Pɔcɔɔ Bɛnjamɛɛ mba nɛ pata nɛ paɖʋ pa-wayɩ kaahɛzaɣ. Nɛ pawabɩ-wɛ caɣ caɣ* Gibeyaa ɛsɩndaa ɖeyi ɖeyi, wɩsɩ ɖɩlɩyɛ taa kiŋ.
44 Pɩtɛmnaa se pakʋ Bɛnjamɛɛ abalaa 18 000, pe-kpeekpe paakɛ you laɖaa ɖoŋ tɩnaa.+
45 Bɛnjamɛɛ abalaa pɩsɩ nɛ pese nɛ pɛɖɛɛ kañɩmbusuu taa, Rimɔɔnɩ kaaʋ cɔlɔ,+ nɛ Izrayɛɛlɩ mba kʋ* pa-taa ɛyaa 5 000 habɛɛ sɔsɔna yɔɔ; nɛ pɛwɛɛ-wɛ ɖɔɔnʋʋ yɔɔ nɛ patalɩ ɖooo Gidɔm; nɛ patasɩ kʋʋ abalaa 2 000.
46 Bɛnjamɛɛ abalaa mba payɩ paasɩbɩ puwiye yɔ, paakpɛndɩ 25 000, paakɛ mba pɔɖɔkʋʋ laɣla yɔ,+ nɛ pe-kpeekpe paakɛ you laɖaa ɖoŋ tɩnaa.
47 Ɛlɛ abalaa 600 kaasewa nɛ powolo kañɩmbusuu taa, Rimɔɔnɩ kaaʋ cɔlɔ, nɛ pacaɣ Rimɔɔnɩ kaaʋ yɔɔ fenasɩ 4.
48 Nɛ Izrayɛɛlɩ abalaa pɩsɩ Bɛnjamɛɛ mba wayɩ nɛ pakʋ tɛtʋ taa mba nɛ laɣɖɛ, ɛyaa nɛ kpɩna, mbʋ payɩ pɩɩkazaa yɔ. Nɛ pañaɣzɩ ɖɔɖɔ miŋ tɛtʋ ndɩ ndɩ ndʋ tɩɩwɛ pa-nʋmɔʋ taa yɔ tɩ-tɩŋa.
Pɩ-tɛɛ tɔm
^ Piye piye, «kpeɣli ɛzɩ ɛyʋ kʋɖʋm yɔ.»
^ Piye piye, «ɛgbɛyɛ.»
^ Pɩpɩzɩɣ pɩkɛ, «tɛtʋ tɩnaa.»
^ Piye piye, «kʋyɩ ɛzɩ ɛyʋ kʋɖʋm yɔ.»
^ Piye piye, «tɛtʋ ndʋ ɛzɩ ɛyʋ kʋɖʋm yɔ.»
^ Piye piye, «Fineyaasɩ sɩŋaɣnɩ.»
^ Yaa «Nɛ pɛfɛyɩ-wɛ.»
^ Piye piye, «cazɩ.»
