Wayɩ Wayɩ Paɣtʋ 11:1-32
11 «Pɩwɛɛ se ŋsɔɔlɩ ñɛ-Ɛsɔ Yehowa+ nɛ paa ɛzɩmtaa lɛ, ŋla mbʋ ɛpɔzʋʋ-ŋ yɔ, nɛ ŋɖɔkɩ ɛ-ɖʋtʋ, ɛ-tɔm hʋʋ paɣtʋ nɛ ɛ-paɣtʋ.
2 Ɩsɩm mbʋ se mɩ mɔyɔɔdʋʋnɩ sɔnɔ, pɩtɩkɛ mɩ-pɩyalaa mba paasɩŋ nɛ patɩna ɖɔɖɔ mɩ-Ɛsɔ Yehowa nɩŋgbaŋʋʋ hɔm,+ ɛ-sɔsɔtʋ,+ e-nesi ɖoŋ ñɩnzɩ+ nɛ e-nesi nzɩ esezaa yɔ.
3 Patɩna yʋsasɩ nɛ lakasɩ nzɩ ɛlabɩ Ejipiti ɛjaɖɛ taa Ejipiti wiyaʋ Farawɔɔ nɛ ɛ-ɛjaɖɛ kpeekpe yɔ;+
4 patɩna ɖɔɖɔ mbʋ ɛlabɩ Ejipiti sɔɔjanaa yɔ, mbʋ ɛlabɩ Farawɔɔ kpaŋnaŋ nɛ e-you kɛɛkɛɛnaa yɔ, mba Teŋgu Kɩsɛɛmʋʋ taa lɩm wadɩ pɔ-yɔɔ alɩwaatʋ ndʋ paɖʋwaɣ mɩ-wayɩ yɔ, nɛ Yehowa ɖɩzɩ-wɛ kpaagbaa ɖɩzʋʋ.*+
5 Patɩna mbʋ ɛlabɩ-mɩ kañɩmbusuu taa nɛ ɩkɔɔ nɛ ɩtalɩ cɩnɛ yɔ,
6 patɩna ɖɔɖɔ mbʋ ɛlabɩ Dataanɩ nɛ Abiram, Rubɛɛnɩ pɩyalʋ Eliyaabɩ pɩyalaa yɔ, alɩwaatʋ ndʋ tɛtʋ ha nɔɔ nɛ tilibi-wɛ, pɩkpɛndɩnɩ pa-ɖɩsɩ taa mba, pe-kizinzikiŋ nɛ mbʋ payɩ pɩɩwɛ wezuu nɛ pɩtɩŋɩɣ-wɛ yɔ, Izrayɛɛlɩ mba kpeekpe ɛsɩndaa yɔ.+
7 Mɩnanɩnɩ mɩ-ɛsa lakasɩ sɔsɔsɩ nzɩ payɩ Yehowa laba yɔ.
8 «Paɣtʋ ndʋ manɖʋʋ-mɩ sɔnɔ yɔ, pɩwɛɛ se ɩɖɔkɩ tɩ-tɩŋa, ɖɩnɛ ɛlɛ ɩkpaɣ ɖoŋ nɛ ɩtɛzɩ nɛ ɩsʋʋ ɛjaɖɛ taa nɛ ɩmʋ-ɖɩ,
9 nɛ ɩcaɣ wezuu nɛ pileɖi+ ɛjaɖɛ nɖɩ Yehowa ɖuwaa se ɛcɛlɩɣ mɩ-cɔzɔnaa nɛ pa-lʋlʋʋ taa mba*+ yɔ ɖɩ-taa, ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ.+
10 «Ɛjaɖɛ nɖɩ iwoki mʋʋ yɔ ɖɩfɛyɩ ɛzɩ Ejipiti ɛjaɖɛ nɖɩ ɖɩ-taa ɩlɩnaa yɔ, ɖenɖe iɖuwaɣ mi-ɖomaɣ nɛ ɩmɩzɩɣ-kɛ lɩm nɛ mɩ-naataŋ* ɛzɩ ɖozi hatʋ kaɖaɣ taa yɔ.
11 Ɛlɛ ɛjaɖɛ nɖɩ ɩtɛzɩɣ se ɩsʋʋ nɛ ɩmʋ yɔ, ɖɩkɛ pʋŋ ɛjaɖɛ nɛ fɛɛŋ ɛjaɖɛ.+ Tɛʋ lɩm ɖɩ-tɛtʋ ñɔʋ;+
12 ɖɩkɛ ɛjaɖɛ nɖɩ ñɛ-Ɛsɔ Yehowa cɔŋnɩ ɖɩ-yɔɔ yɔ. Ñɛ-Ɛsɔ Yehowa ɛsa wɛ ɖɩ-yɔɔ tam, kpaɣnɩ pɩnaɣ ɖɩbazɩyɛ nɛ piwolo pɩnaɣ ɖɩdɛnɖɛ.
13 «Nɛ ye ɩɖɔŋ paɣtʋ ndʋ manɖʋʋ-mɩ sɔnɔ yɔ tɩ-yɔɔ camɩyɛ nɛ ɩsɔɔlɩ mɩ-Ɛsɔ Yehowa nɛ ɩsɛɛ-ɩ nɛ mɩ-laŋɩyɛ kpeekpe nɛ mɩ-kalɩzaɣ* kpeekpe yɔ,+
14 ma ɖɔɖɔ mankaɣ haʋ tɛʋ mɩ-tɛtʋ kɩ-alɩwaatʋ yɔɔ, kajalaɣ tɛŋ* nɛ wayɩ wayɩ tɛŋ;* nɛ ɩkaɣ kpeɣluu mɩ-tɔɔnaɣ pee nɛ mɩ-vɛɛ kɩfalʋʋ nɛ mi-num.+
15 Nɛ mankaɣ haʋ mɩ-kpɩna ñɩtʋ mɩ-hayɩm taa, nɛ ɩkaɣ tɔɔʋ nɛ ɩhaɣ.+
16 Ɩkpa mɩ-tɩ nɛ itaayele nɛ nabʋyʋ peɣzi mɩ-laŋɩyɛ nɛ ɩɖɛɛ nɛ ɩsɛɛ ɛsɔnaa lalaa nɛ iluŋ pɛ-tɛɛ.+
17 Pɩtɩkɛ mbʋ yɔ, Yehowa kɔʋ-mɩ nɛ pana siŋŋ nɛ ɛɖɩɣ ɛsɔdaa se tɛʋ ɛtaanɩɩ,+ nɛ tɛtʋ ɛɛlʋlʋʋ tɩ-tɔɔnaɣ nɛ ɩkaɣ ɖɩm lɛɛ lɛɛ ɛjaɖɛ kɩbanɖɛ nɖɩ Yehowa cɛlɩɣ-mɩ yɔ ɖɩ-taa.+
18 «Pɩwɛɛ se ɩma mɔn-tɔm tʋnɛ mɩ-laŋɩyɛ yɔɔ nɛ mɩ-kalɩzaɣ* yɔɔ nɛ ɩhɔkɩ-tʋ mi-nesi yɔɔ nɛ ɩtɔzʋʋ tɩ-yɔɔ, nɛ pɩwɛɛ se tɩwɛɛ mi-kiɖe taa* ɛzɩ ñʋʋ kitemuu yɔ.+
19 Ɩwɩlɩ-tʋ mi-piya: yɔɔdɩ tɩ-tɔm alɩwaatʋ ndʋ ŋcakɩ ña-ɖɩɣa taa yɔ, alɩwaatʋ ndʋ ŋɖɔŋ nʋmɔʋ taa yɔ, alɩwaatʋ ndʋ ŋhɩnɩɣ yɔ nɛ alɩwaatʋ ndʋ ŋkʋyʋʋ yɔ.+
20 Ma-tʋ ña-ɖɩɣa pɔɔyɩŋ* yɔɔ nɛ ñɔ-nɔnɔsɩ yɔɔ,
21 nɛ pɩsa nɛ mɩ nɛ mɩ-pɩyalaa ɩcaɣ wezuu nɛ pileɖi+ ɛjaɖɛ nɖɩ Yehowa ɖuwaa se ɛcɛlɩɣ mɩ-cɔzɔnaa yɔ ɖɩ-taa,+ nɛ ɩcaɣ ɖɩ-taa alɩwaatʋ ndʋ payɩ ɛsɔdaa wɛ tɛtʋ ñʋʋ yɔɔ yɔ.
22 «Ye ɩɖɔkɩ paɣtʋ ndʋ mɛncɛlɩɣ-mɩ yɔ kpam nɛ ɩɖɔ tɩ-yɔɔ nɛ ɩsɔɔlɩ mɩ-Ɛsɔ Yehowa,+ ɩɖɔ ɛ-nʋmɔŋ tɩŋa taa nɛ ɩñɔɔnɩ-ɩ yɔ,+
23 ɖɩnɛ ɛlɛ Yehowa kaɣ ɖɔɔnʋʋ ajɛɛ ana a-kpeekpe mɩ-ɛsɩndaa,+ nɛ ɩkaɣ mʋʋ ajɛɛ wena akɩlɩ-mɩ paɣlʋʋ nɛ akɩlɩ-mɩ ɖɔʋ yɔ a-tɛtʋ.+
24 Lona wena a-taa payɩ ɩfɛyɩɣ mɩ-naataŋ yɔ apɩsɩɣ mɩ-pʋyʋ.+ Mɩ-kamaɣ kaɣ wɛʋ kpaɣnɩ kañɩmbusuu nɛ pɩɖɛɛ nɛ pɩkpa Libaŋ; kpaɣnɩ Pɔɔ, Efraatɩ pɔɔ nɛ pɩɖɛɛ pɩtalɩ wɩsɩ ɖɩɖʋyɛ taa teŋgu.*+
25 Nɔɔyʋ ɛɛkaɣ-mɩ kaɖɩnʋʋ.+ Mɩ-Ɛsɔ Yehowa kaɣ labʋ nɛ mɩ-yɔɔ lɛ, tɛtʋ ndʋ tɩ-yɔɔ payɩ ɩɖɔŋ yɔ, tɩ-taa ɛyaa se-mɩ sɔɔndʋ nɛ peseli,+ ɛzɩ ɛlabʋ-mɩ tamaɣ yɔ.
26 «Ɩna, sɔnɔ mansɩɣ mɩ-ɛsɩndaa wazaɣ nɛ nɔɔ kɩdɛkɛdaɣ lɔʋ:+
27 ye ɩñaŋ mɩ-Ɛsɔ Yehowa paɣtʋ ndʋ manɖʋʋ-mɩ sɔnɔ yɔ, pɩkɛɣnɩ-mɩ wazaɣ,+
28 ɛlɛ ye ɩɩñaŋ mɩ-Ɛsɔ Yehowa paɣtʋ nɛ iyele nʋmɔʋ ŋgʋ manɖʋʋ-mɩ paɣtʋ sɔnɔ se ɩtɩŋ yɔ nɛ ɩtɩŋ ɛsɔnaa mba ɩɩsɩŋ yɔ yɔ, pɩkɛɣnɩ-mɩ nɔɔ kɩdɛkɛdaɣ lɔʋ.+
29 «Ñɛ-Ɛsɔ Yehowa wokini-ŋ ɛjaɖɛ nɖɩ ŋkaɣ mʋʋ yɔ ɖɩ-taa lɛ, pɩwɛɛ se ŋwazɩ ɛyaa* Gerizim Pʋʋ yɔɔ nɛ ŋlɔ ɛyaa yɔɔ nɔɔ kɩdɛkɛdaɣ Ebaalɩ Pʋʋ yɔɔ.+
30 Pʋŋ ɛnɩ ɩwɛ Yɔɔrdaŋ hɔɔlʋʋ lɛɛkʋ yɔɔ wɩsɩ ɖɩɖʋyɛ taa kiŋ, Kanaŋ ñɩma mba pɛwɛ Araba yɔ pɛ-ɛjaɖɛ taa, Gilgaalɩ ɛsɩndaa, Mooree tɩŋ sɔsɔŋ cɔlɔ.+
31 Mbʋ pʋyɔɔ yɔ iɖiɣni Yɔɔrdaŋ tɛzʋʋ se ɩsʋʋ nɛ ɩmʋ ɛjaɖɛ nɖɩ mɩ-Ɛsɔ Yehowa cɛlɩɣ-mɩ yɔ.+ Ɩmʋʋ-ɖɩ nɛ ɩwɛɛ ɖɩ-taa lɛ,
32 pɩwɛɛ se ɩkpa mɩ-tɩ nɛ ɩɖɔ paɣtʋ nɛ tɔm hʋʋ paɣtʋ ndʋ manɖʋʋ mɩ-ɛsɩndaa sɔnɔ yɔ tɩ-tɩŋa tɩ-yɔɔ.+
Pɩ-tɛɛ tɔm
^ Yaa «ɖɩzɩ-wɛ pɩkɔɔ nɛ pɩtalɩ sɔnɔ.»
^ Piye piye, «po-ɖomaɣ.»
^ Pʋ-tɔbʋʋ se naataŋ palakɩnɩ tʋmɩyɛ nɛ pɔbɔɖɛ naɖɩyɛ cɔʋ nɛ pamɩzɩɣnɩ lɩm, yaa naataŋ pɛhɛɣnɩ lɩm lɔɔŋ nɛ patʋlʋʋnɩ lɔɔŋ ɛnɩ.
^ Cɔnɩ Tɔm pee sɔsɔna tɔbʋʋ lɩzʋʋ.
^ Kajalaɣ tɛŋ paɣzaɣ Aloma fenaɣ hɛkʋ taa mbʋ yɔ. Cɔnɩ Tɔm kɩsɔzɩtʋ B15.
^ Wayɩ wayɩ tɛŋ paɣzaɣ Ðomaɣ fenaɣ hɛkʋ taa mbʋ yɔ. Cɔnɩ Tɔm kɩsɔzɩtʋ B15.
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «mɩ-ɛsa hɛkʋ taa.»
^ Yaa «ña-ɖɩɣa taa ɖasɩ nzɩ sɩ-yɔɔ pɔɔyɩŋ wɛɛ yɔ.»
^ Pʋ-tɔbʋʋ se Teŋgu Sɔsɔʋ, Mediiteraanee.
^ Yaa «se ŋcɛlɩ wazaɣ.»
