Wayɩ Wayɩ Paɣtʋ 33:1-29
33 Tɔm tʋnɛ Ɛsɔ toovenim tʋ tɛ ɛyʋ Moyizi yɔɔdaa nɛ ɛwazɩnɩ Izrayɛɛlɩ mba pʋcɔ nɛ ɛsɩ.+
2 Ɛyɔɔdaa se:
«Yehowa lɩnɩ Sinayii nɛ ɛkɔɔ,+Ɛñandɩ pɔ-yɔɔ nɛ Seyiri.
Ɛñandɩ samtʋ taa nɛ Paraanɩ pʋŋ egeetiye taa,+Kiɖeɖema kudokiŋ kudokiŋ* kaawɛ ɛ-cɔlɔ,+E-you laɖaa kaawɛ ɛ-nɩwaŋ yɔɔ.+
3 Ɛɛsɔɔlɩ ɛ-ɛyaa samaɣ;+Pɛ-ɛyaa kiɖeɖema tɩŋa wɛ ñe-nesi taa.+
Paacaɣ ña-nɩŋgbanzɩ tɛɛ;+Pewelisaɣ ñɔ-tɔm.+
4 (Moyizi ɖʋ-ɖʋ paɣtʋ,+Tɩkɛnɩ Yakɔɔb samaɣ ñɩm.)+
5 Ɛpɩsɩ* wiyaʋ Yesurun*+ taa,Alɩwaatʋ ndʋ samaɣ ñʋndɩnaa kpeɣlaa yɔ,+Pa nɛ Izrayɛɛlɩ cejewe tɩŋa.+
6 Rubɛɛnɩ ɛwɛɛ wezuu nɛ ɛtaasɩ,+Nɛ tɛtɛ nɛ ɛ-ɛyaa ɩtaapasɩ.»+
7 Tɔm tʋnɛ ɛyɔɔdaa nɛ ɛwazɩnɩ Yuuda:+
«Oo Yehowa, welisi Yuuda nɔɔ,+Nɛ ŋpɩsɩnɩ-ɩ ɛ-samaɣ cɔlɔ.
E-nesi kandɩyɩ* mbʋ pɩkɛ ɛ-pʋyʋ yɔ pɩ-yɔɔ,Tɛtɛ nɛ ŋsɩnɩ-ɩ nɛ eyooni e-koyindinaa.»+
8 Ɛyɔɔdɩ Leevi tɔm se:+
«Ɛyʋ weyi ɛwɛ-ŋ* siɣsiɣ yɔ,+ ɛnʋ tɩnɩ ñɛ-tɛ Tuumiim nɛ Uriim,+Weyi ŋtakɩ-ɩ Masaa yɔ.+
Ŋlʋbɩnɩ-ɩ Meriba lɩm cɔlɔ,+
9 Ɛyʋ weyi eheyi ɛ-caa nɛ e-ɖoo se: “Man-paa fɛyɩnɩ-mɩ” yɔ.
Halɩ e-koobiya maɣmaɣ, ɛtɩsɩm-wɛ,+Nɛ ekizi ɛ-maɣmaɣ ɛ-pɩyalaa.
Mbʋ pʋyɔɔ yɔ pɔɖɔkɩ ñɔ-tɔm,Nɛ pɔɖɔkɩ ñɛ-ɛgbɛyɛ.+
10 Yele nɛ pawɩlɩ Yakɔɔb ñɔ-tɔm hʋʋ paɣtʋ+Nɛ pawɩlɩ Izrayɛɛlɩ ña-Paɣtʋ.+
Yele nɛ palaa ŋgee tɩlaaɖɩ nɛ kɩ-sɔzɩŋ kɛdɩnɩ-ŋ,*+Yele nɛ palaa kɩlaʋ kpeekpe ña-altaaru yɔɔ.+
11 Oo Yehowa, wazɩ e-ɖoŋ,Nɩɩ leleŋ e-nesi tɛɛ tʋmɩyɛ yɔɔ.
Pɛlɩ mba pakaɖɩɣnɩ-ɩ yɔ pa-nɩŋgbanzɩ,*Nɛ mba papaɖɩɣ-ɩ yɔ pataapɩzɩ nɛ patasɩ kʋyʋʋ.»
12 Ɛyɔɔdɩ Bɛnjamɛɛ tɔm se:+
«Tɛtɛ nɛ weyi Yehowa sɔɔlaa yɔ, ɛcaɣ pɛɛyɛ taa ɛ-cɔlɔ;Alɩwaatʋ ndʋ ɛkandɩyɩɣ ɛ-yɔɔ evemiye kpeekpe yɔ,Ɛkaɣ caɣʋ ɛ-hazasɩ hɛkʋ taa.»
13 Ɛyɔɔdɩ Yosɛɛfʋ tɔm se:+
«Yehowa ɛwazɩ ɛ-ɛjaɖɛ,+Ɛwazɩ-ɩ nɛ ɛsɔdaa wondu kɩbandʋ,Ɛwazɩ-ɩ nɛ ɖoluu nɛ hila taa lɩm,+
14 Ɛwazɩ-ɩ nɛ wondu kɩbandʋ ndʋ wɩsɩ haɣ yɔNɛ wondu kɩbandʋ ndʋ pɩlʋlʋʋ paa fenaɣ ŋga yɔ,+
15 Ɛwazɩ-ɩ nɛ caanaʋ taa pʋŋ* yɔɔ wondu ndʋ tɩkɩlɩ ɖeu yɔ+Nɛ piyisi nzɩ sɩwɛ tam yɔ si-wondu kɩbandʋ,
16 Ɛwazɩ-ɩ nɛ tɛtʋ yɔɔ wondu kɩbandʋ nɛ mbʋ pisu tɩ-yɔɔ yɔ,+Nɛ ɛwazɩ-ɩ nɛ Weyi ɛwɛ sɔɔ cɔkɔyɛ taa yɔ+ e-lootiye.
Pɩtɩŋa mbʋ yɔ, pitii Yosɛɛfʋ ñʋʋ taa,Pitii weyi palɩzɩ-ɩ nɛ kɩjaʋ e-koobiya hɛkʋ taa yɔ ɛ-ñʋdaka taa.+
17 Ɛ-samtʋ wɛ ɛzɩ nɔ abalɩñɩnʋ weyi pacalɩɣ lʋlʋʋ yɔ ɛ-samtʋ yɔ,Ɛ-hɩŋ kɛ tɛyɛ nɔ abalɩñɩnʋ hɩŋ.
Hɩŋ ɛnɩ ɛkaɣ tuzunuu* samasɩNɛ ɛɖɛnɩ sɩ-tɩŋa ɖooo tɛtʋ kamasɩ yɔɔ.
Hɩŋ ɛnɩ ɩkɛ Efrayim tɛ ɛyaa kudokiŋ hiŋ sakɩyɛ,+Nɛ Manaasee tɛ ɛyaa kudokiŋ.»
18 Ɛyɔɔdɩ Zebulɔɔnɩ tɔm se:+
«Oo Zebulɔɔnɩ, mɛyɩ alɩwaatʋ ndʋ ŋlɩɣ yɔ,Nɛ ña Isakaarɩ, mɛyɩ ñe-kizinzikiŋ tɛɛ.+
19 Pakaɣ yaʋ ɛyaa samasɩ nɛ sɩkpa pʋʋ taa.
Peeɖe pakaɣ laʋ siɣsiɣ wɛtʋ kɩlaŋ.
Mbʋ pʋyɔɔ yɔ teŋgunaa ñɩm sakɩyɛ taa pakaɣ cozuu*Nɛ ñɩm mbʋ pɩmɛlɩ kañɩŋa taa yɔ pɩ-taa pakaɣ cozuu.»
20 Ɛyɔɔdɩ Gaadɩ tɔm se:+
«Pawazɩ weyi ɛwalɩsɩɣ Gaadɩ kamasɩ yɔ.+
Elosi ɛ-tɩ peeɖe ɛzɩ mʋʋzʋʋ yɔ,Ɛñɔɔzɩ ɛ-tɩ se ɛcɩyɩ hamʋʋ, ɛɛɛ, se ɛcɩyɩ ñʋʋ.
21 Ɛkaɣ lɩzʋʋ ɛ-tɩ kajalaɣ hɔɔlʋʋ,+Mbʋ pʋyɔɔ yɔ peeɖe pasɩ paɣtʋ ɖʋyʋ ɖeɖe.+
Samaɣ ñʋndɩnaa kaɣ kpeɣluu.
Yehowa siɣsiɣ wɛtʋ yɔɔ ɛkaɣ ɖɔm,Nɛ ɛɖɔ ɛ-tɔm hʋʋ paɣtʋ ndʋ titukuuni Izrayɛɛlɩ yɔ tɩ-yɔɔ.»
22 Ɛyɔɔdɩ Daanɩ tɔm se:+
«Daanɩ kɛ mʋʋzʋʋ pɩɣa.+
Basaanɩ ɛkaɣ kʋyɩnʋʋ nɛ ɛmaa.»+
23 Ɛyɔɔdɩ Naftalii tɔm se:+
«Naftalii ñɩɣzɩ lootiyeNɛ Yehowa wazaɣ su ɛ-taa.
Mʋ wɩsɩ ɖɩɖʋyɛ nɛ ŋmʋ ɖɔɖɔ hadɛ kiŋ.»
24 Ɛyɔɔdɩ Asɛɛrɩ tɔm se:+
«Paha pɩyalaa sakɩyɛ Asɛɛrɩ nɛ pawazɩnɩ-ɩ.
E-koobiya ɩlabɩ-ɩ lootiye,Nɛ tɛtɛ nɛ elii* ɛ-naataŋ num taa.
25 Ñɔ-nɔnɔɔ kɩkaɖɩŋ kɛ ñɩɣtʋ nɛ ñɩɣyʋʋ kɩsɛɛmʋʋ,+Ŋkaɣ wɛʋ pɛɛyɛ taa ñe-wezuu kɩyakɩŋ kpeekpe.*
26 Nɔɔyʋ fɛyɩ ɛzɩ Yesurun+ tɛ Ɛsɔ toovenim tʋ yɔ,+Weyi ɛɖɔŋ ɛsɔdaa se ɛsɩnɩ-ŋ yɔ,Weyi ɛɖɔŋ mɩndʋ yɔɔ ɛ-samtʋ taa yɔ.+
27 Ɛsɔ kɛ ɖɩjɔzɩyɛ kpaɣnɩ ɖooo caanaʋ taa,+Ɛ-tamtam nesi wɛ ñɛ-tɛɛ.+
Ɛkaɣ ɖɔɔnʋʋ koyindu ñɛ-ɛsɩndaa,+Nɛ ɛkaɣ yɔɔdʋʋ se: “Ðɩzɩ-wɛ caɣ caɣ!”+
28 Izrayɛɛlɩ kaɣ wɛʋ pɛɛyɛ taa,Nɛ Yakɔɔb lɔkɔ kaɣ wɛʋ ki-ɖekeTɔɔnaɣ pee nɛ vɛɛ kɩfalʋʋ ɛjaɖɛ naɖɩyɛ taa,+Nɖɩ ɖoluu kaɣ tibinuu ɖɩ-ɛsɔdaa yɔ.+
29 Oo Izrayɛɛlɩ, ŋkɛ koboyaɣ tʋ!+
Awɛ ɛzɩ ña yɔ,+Samaɣ ŋga Yehowa yakɩ ka-ñʋʋ yɔ,+Ɛnʋ weyi ɛkɛ ña-kpayʋʋ ŋgʋ kɩkandɩyɩɣ ñɔ-yɔɔ yɔ+Nɛ ña-laɣɖɛ sɔsɔɖɛ yɔ?
Ño-koyindinaa kaɣ seluu nɛ poluzi pa-tɩ ñɛ-ɛsɩndaa,+Nɛ ŋkaɣ fɛyʋʋ pe-siɣye taa.»*
Pɩ-tɛɛ tɔm
^ Yaa «Kiɖeɖema kudokiŋ hiŋ sakɩyɛ.»
^ Pʋ-tɔbʋʋ se «Ɛyʋ siɣsiɣ tʋ,» pɩkɛ hɩɖɛ kɩsɛsɛyɛ nɖɩ paya Izrayɛɛlɩ se paɖʋnɩ-ɩ hɩɖɛ yɔ.
^ Yaa «Ɛsɔ pɩsɩ.»
^ Yaa «lʋbɩ.»
^ Mayaɣ kanɛ ka-taa, ɖenɖe payɩ «ŋ» nɛ «ñɛ» pɛwɛɛ yɔ, Ɛsɔ tɔm pɔyɔɔdʋʋ.
^ Piye piye, «kɛdɩnɩ ñɔ-mɔɔŋ.»
^ Yaa «pa-tɩnzɩ.»
^ Pɩpɩzɩɣ pɩkɛ, «wɩsɩ ɖɩlɩyɛ taa pʋŋ.»
^ Yaa «yɔkɩnʋʋ.»
^ Piye piye, «ñɩm sakɩyɛ pakaɣ mʋzʋʋ.»
^ Yaa «ɛkɔ.»
^ Piye piye, «Ño-ɖoŋ kaɣ wɛʋ ɛzɩ ña-kɩyakɩŋ yɔ.»
^ Pɩpɩzɩɣ pɩkɛ, «po-lona kʋkʋya yɔɔ.»
