Yɔɔb 15:1-35
15 Temaanɩ tʋ Eliifaazɩ+ cosi nɛ ɛyɔɔdɩ se:
2 «Ɛzɩ lɔŋsɩnɖʋ kaɣ cosuu nɛ falaa tɔm na?*
Yaa ɛkaɣ e-lotu haɣzʋʋ nɛ wɩsɩ ɖɩlɩyɛ taa helim na?
3 Ye pakalɩ ɛyʋ nɛ tɔm pee yem yɔ, pɩɩwazɩɣ pʋyʋ;Nɛ tɔm yɔɔdʋʋ ɖeke fɛyɩ wazaɣ nakɛyɛ.
4 Mbʋ pʋyɔɔ yɔ ŋlakɩ nɛ Ɛsɔ sɔɔndʋ seu ɛɛtasɩɣ wɛnʋʋ ɖoŋ nɩɩyɩ,Nɛ ŋlakɩ nɛ Ɛsɔ yɔɔ maɣzʋʋ pasɩɣ.
5 Mbʋ pʋyɔɔ yɔ ña-kɩwɛɛkɩm heyiɣni-ŋ tɔm ndʋ ŋyɔɔdʋʋ yɔ,*Nɛ ŋɖʋ* se ŋyɔɔdʋʋ ajitu yɔɔdaɣ.
6 Ñɔ-nɔɔ maɣmaɣ kʋʋnɩ ñɔ-tɔm, pɩtɩkɛ ma;Ño-ndomee maɣmaɣ lɩzɩɣnɩ aseɣɖe nɛ akʋʋ ñɔ-tɔm.+
7 Ñɛkɛnɩ ɛyʋ kajalaɣ tʋ weyi palʋlaa yɔ?
Yaa palʋlɩ-ŋ pʋcɔ nɛ piyisi wɛɣ?
8 Ŋwelisiɣ Ɛsɔ mɛsaɣ tɛɛ tɔm na?
Yaa ŋmaɣzɩɣ se ñe-ɖeke ŋwɛnɩnɩ lɔŋsɩnɖɛ na?
9 Ɛbɛ ŋsɩma nɛ ɖɩɩsɩŋ-pʋ?+
Nɛ ɛbɛ taa ŋnɩɣ nɛ ɖa ɖaanɩɣ pɩ-taa?
10 Ñʋʋ nɛ panzɩ tɩnaa nɛ akpadɩyaa wɛ ɖɛ-hɛkʋ taa,+Abalaa mba pakɩlɩ ña-caa pɩŋŋ yɔ.
11 Ɛzɩ laŋɩyɛ hɛzʋʋ mbʋ pɩlɩnɩ Ɛsɔ cɔlɔ yɔ,Yaa tɔm ndʋ peheyi-ŋ nɛ nɔɔ kɩbaŋa yɔ tɩtɩmaɣ-ŋ?
12 Ɛbɛ yɔɔ ña-laŋɩyɛ ɛɛsɩɣ-ŋ pɩ-cɔlɔ,Nɛ ɛbɛ yɔɔ ñɛ-ɛsa ñɩlɩsɩɣnɩ pana?
13 Mbʋ pʋyɔɔ yɔ ŋkɔ pana nɛ Ɛsɔ maɣmaɣ,Nɛ ŋyele nɛ tɔm tʋnɛ tɩ-ɖɔndɩ lɩɩnɩ ñɔ-nɔɔ taa.
14 Ɛyʋ kɛ we nɛ ɛwɛɣ kele kele,Yaa ɛyʋ weyi halʋ lʋlaa yɔ ɛkɛ we nɛ ɛwɛɣ siɣsiɣ?+
15 Na! Ɛɛtaɣ liu e-kiɖeɖema,Nɛ halɩ ɛsɔdaa maɣmaɣ fɛyɩ kele kele ɛ-ɛsɩndaa.+
16 Nɛ pɩcandɩnɩ ɛyʋ weyi ɛcaɣ kʋzɔɔtʋ nɛ ɛkɛ kɩdɛkɛdʋ yɔ,+Ɛyʋ weyi ɛñɔʋ mbʋ pɩfɛyɩ siɣsiɣ yɔ ɛzɩ pɔñɔɔʋ lɩm yɔ!
17 Mankaɣ-ŋ heyuu; welisini-m!
Mankaɣ kɛdʋʋ mbʋ manawa yɔ,
18 Ndʋ lɔŋsɩnɖaa nɩ pa-caanaa cɔlɔ nɛ pɛkɛdɩ yɔ,+Ndʋ patɩmɛsɩ-tʋ yɔ.
19 Pe-ɖeke paacɛlɩ ɛjaɖɛ,Nɛ ɛgɔm nɔɔyʋ tɩtɩŋnɩ pɛ-hɛkʋ taa.
20 Kañatʋ tʋ nɩɣ siziŋ siŋŋ ɛ-kɩyakɩŋ kpeekpe taa,Pɩnzɩ nzɩ pɔñɔɔzaa nɛ pasɩɩ nazɩyʋ yɔ si-kpeekpe sɩ-taa.
21 Ɛ-nɩŋgbaaŋ nɩɣ mbʋ pɩcaɣ sɔɔndʋ yɔ pɩ-taŋ;+Lazɩyaa kɔŋ ɛ-wayɩ laŋhɛzɩyɛ alɩwaatʋ taa.
22 Eetisiɣ se ɛkaɣ lɩʋ cɩkpɛndʋʋ nesi tɛɛ;+Laɣɖɛ ɖaŋnɩ-ɩ.
23 Eyotuu nɛ ɛñɩnɩɣ tɔɔnaɣ,* le kɛwɛɛ?
Ɛsɩm camɩyɛ se cɩkpɛndʋʋ kɩyakʋ ñɔtɩ kpam.
24 Kʋñɔŋ nɛ siziŋ paɖʋʋ-ɩ sɔɔndʋ;Iwiziɣ-i ɛzɩ wiyaʋ weyi ɛñɔɔzɩ ɛ-tɩ se ɛpaɣzɩ you yɔ.
25 Mbʋ pʋyɔɔ yɔ ɛkpazɩ e-nesi se ɛkʋyɩ Ɛsɔ maɣmaɣ yɔɔNɛ ɛñakɩ pana se ɛkaɖɩnɩ* Ðoŋ Tɩŋa Tʋ;
26 Ɛɖɔkɩ kpayʋʋ ŋgʋ kɩkpɩndaa nɛ kɩwɛɛ ɖoŋ yɔNɛ ewoki Ɛsɔ wayɩ lɛɛ lɛɛ nɛ ñʋʋ taa ɖoŋ;
27 Ɛ-ɛsɩndaa ɖʋ num yem,Num pɔ ɛ-tɩnaɣ taa yem;
28 Ɛcaɣ tɛtʋ ndʋ pakaɣ-tʋ yɔkʋʋ yɔ tɩ-taa,Ɛcaɣ ɖɩsɩ nzɩ sɩ-taa nɔɔyʋ ɛɛkaɣ caɣʋ yɔ sɩ-taa,Nzɩ sɩkaɣ pɩsʋʋ pɛɛ huwa yɔ.
29 Ɛɛkaɣ pɩsʋʋ ñɩm tʋ, ɛ-ñɩm ɛɛkaɣ huuu,Nɛ mbʋ mbʋ ɛwɛna yɔ pɩɩkaɣ suu ɖɔɖɔ tɛtʋ yɔɔ.
30 Ɛɛkaɣ lɩʋ cɩkpɛndʋʋ nesi tɛɛ;Miŋ nzʋlʋmɩyɛ kaɣ yebu nɛ e-piliŋa wɩlɩ,*Ɛsɔ hosuu* helim nɛ ɛ-nɔɔ taa lɛ, ɛɛtasɩɣ wɛʋ.+
31 Pɩfɛyɩ se epeɣzi ɛ-tɩ nɛ ɛtaa liu mbʋ pɩfɛyɩ wazaɣ yɔ,Mbʋ pʋyɔɔ yɔ mbʋ pɩfɛyɩ wazaɣ yɔ, mbʋ kaɣnɩ kɛʋ ɛ-kɩhɛyʋʋ;
32 Pɩkaɣ labʋ mbʋ pʋcɔ nɛ ɛ-kɩyakʋ talɩ,Nɛ e-pilinzi ɩɩkaɣ hɛtʋ lɩʋ wiɖiyi kpa.+
33 Ɛkaɣ wɛʋ ɛzɩ viiñi tɩʋ ŋgʋ kɩlakɩ nɛ ki-pee wena atɩsɛta yɔ atɔʋ yɔ,Nɛ ɛzɩ oliivi tɩʋ ŋgʋ kɩlakɩ nɛ kɩ-hɛtʋ tɔʋ yɔ.
34 Mbʋ pʋyɔɔ yɔ ɛyaa mba paañaŋ Ɛsɔ yɔ* pɛ-ɛgbɛyɛ ɛɛlʋlʋʋ pʋyʋ,+Nɛ miŋ kaɣ ñaɣʋ mba pamʋʋ kʋjɔŋ se pomuli lalaa yɔ pe-kizinzikiŋ.
35 Pahakɩ kʋñɔŋ hoɣa nɛ palʋlʋʋ kɩdɛkɛdɩm,Nɛ po-lotu lʋlʋʋ cɛtɩm.»
Pɩ-tɛɛ tɔm
^ Yaa «nɛ sɩmtʋ ndʋ tɩkɛ helim yem yɔ.»
^ Yaa «ña-kɩwɛɛkɩm wɩlɩɣnɩ ñɔ-nɔɔ tɔm.»
^ Yaa «ŋlɩzɩ.»
^ Piye piye, «kpɔnɔ.»
^ Yaa «ɛwa.»
^ Pʋ-tɔbʋʋ se lidaʋ nakʋyʋ fɛyɩ se ɛkaɣ tasʋʋ ɛ-tɩ hiɣu.
^ Piye piye, «Ehosuu.»
^ Yaa «tisuu yebiyaa.»