Yɔɔb 21:1-34
21 Yɔɔb cosi nɛ ɛyɔɔdɩ se:
2 «Iwelisi tɔm ndʋ mɔyɔɔdʋʋ yɔ camɩyɛ;Iyele nɛ pɩkɛnɩ-m laŋɩyɛ hɛzʋʋ mbʋ pɩlɩnɩ mɩ-cɔlɔ yɔ.
3 Ɩwɛɛ suuɖu alɩwaatʋ ndʋ mɔyɔɔdʋʋ yɔ;Mɛntɛŋ yɔɔdʋʋ lɛ, ɩpɩzɩɣ nɛ iwoŋi-m.+
4 Ɛzɩ ɛyʋ mewiɣna?
Ye pɩɩkɛ mbʋ yɔ, mantaayele wɛʋ* suuɖu na?
5 Ɩcɔnɩ-m nɛ pɩɖɩɣzɩ-mɩ;Ihuuzi mi-nesi mɩ-nɔsɩ yɔɔ.
6 Mamaɣzɩɣ pɩ-yɔɔ lɛ, pɩcɛyɩɣ-m,Nɛ mon-tomnaɣ kpeekpe seliɣ.
7 Ɛbɛ yɔɔ ɛyaa kɩdɛkɛdaa cakɩ wezuu,+Pakpadɩyɩɣ, nɛ papɩsɩɣ ñɩm* tɩnaa?+
8 Pe-piya wɛ pɔ-cɔlɔ tam,Nɛ panaɣ pa-lʋlʋʋ taa mba.
9 Pa-ɖɩsɩ wɛ pɛɛyɛ taa, sɔɔndʋ ɛɛkpaɣ-wɛ,+Nɛ Ɛsɔ ɛɛhɔŋ pa-nɩŋgbaaŋ nɛ ɛ-ɖaʋ.
10 Pa-naŋ abalɩñɩŋ ɩɩkpaɣ nɛ pɩtɩlʋlɩ;Pa-naŋ halɩñɩŋ lʋlʋʋ nɛ ɩɩhɔlɩsʋʋ.
11 Pa-pɩyalaa seɣ awayɩ ɛzɩ heŋ ewiɖe yɔ,Nɛ pe-piya mɛyɩɣ.
12 Peteɣ hendu nɛ pamakɩ nesi tɛɛ suye* nɛ cɩmʋʋNɛ pɛmɛyɩɣ alɩwaatʋ ndʋ panɩɣ hɩlaɣ taŋ yɔ.+
13 Panɩɣ leleŋ pe-wezuu caɣʋ kɩyakɩŋ kpeekpeNɛ petiki Pɩlaʋ* taa laŋhɛzɩyɛ taa.*
14 Ɛlɛ peheyiɣ Ɛsɔ toovenim tʋ se: “Yebi-ɖʋ!
Ðɩtɩtɩɩsɔɔlʋʋ se ɖɩtɩlɩ ña-nʋmɔŋ.+
15 Anɩ yɔ Ðoŋ Tɩŋa Tʋ nɛ pɩpɔzʋʋ se ɖɩsɛɛ-ɩ?+
Ye ɖɩsɩmɩ-ɩ yɔ pɩwazɩɣ-ɖʋ we?”+
16 Ɛlɛ manawa se pɛfɛyɩnɩ ɖoŋ pa-maɣmaɣ pa-ñɩm yɔɔ.+
Kañatʋ tɩnaa lɩmaɣza* posini-m.+
17 Tam ɛzɩma kañatʋ tɩnaa kanɖʋ ɖɩŋ?+
Tam ɛzɩma asɛyʋʋ talɩɣ-wɛ?
Tam ɛzɩma Ɛsɔ ɖɩzɩɣ-wɛ ɛ-pana taa?
18 Wiɖiyi papɩsɩɣ ɛzɩ lɔtʋ ndʋ helim kpakɩɣ yɔ?
Nɛ papɩsɩɣ ɛzɩ hutu ndʋ helim sɔsɔm kpakɩɣ yɔ?
19 Ɛsɔ kaɣ tɔsʋʋ ɛyʋ nɩŋgbaŋʋʋ hɔm nɛ ɛsɩɩ ɛ-pɩyalaa.
Ɛlɛ Ɛsɔ ɛhɛyɩ-ɩ pi-lone taa nɛ ɛtɩlɩ-pʋ.+
20 Tɛtɛ nɛ ɛna asɛyʋʋ ŋgʋ kɩtalɩɣ-ɩ yɔ nɛ ɛ-ɛsa,Nɛ ɛ-maɣmaɣ ɛñɔɔ Ðoŋ Tɩŋa Tʋ pana.+
21 Mbʋ pʋyɔɔ yɔ ye papasɩ e-fenasɩ yɔ,*+Mbʋ pɩkaɣ talʋʋ ɛ-ɖɩɣa ɛ-ɖɛʋ wayɩ yɔ pɩnaɣ-ɩ nɛ we?
22 Ɛzɩ nɔɔyʋ pɩzɩɣ nɛ ɛwɩlɩ sɩmtʋ* Ɛsɔ,+Ŋgʋ ɛnʋ hʋʋnɩ tɔm mba pɛwɛ lona sɔsɔna taa yɔ?+
23 Ɛyʋ nɔɔyʋ sɩkɩ, ɛ nɛ e-ɖoŋ tɩŋa+Alɩwaatʋ ndʋ ɛɛnɩɣzɩɣ natʋyʋ kaaʋ nɛ ɛhɛzɩ yem yɔ,+
24 Alɩwaatʋ ndʋ ɛ-tala ɖʋ numNɛ ɛ-mɔɔ wɛ ɖoŋ yɔ.*
25 Ɛlɛ ɛyʋ lɛlʋ ñasɩkɩ siziŋ sɔsɔŋ taa,*Wiɖiyi ɛtɩɖɩŋ pʋyʋ kɩbanʋ nɔɔyʋ.
26 Pa-naalɛ pakaɣ hɩnʋʋ puuyuu taa,+Nɛ sonzoowa kaɣ pa-naalɛ pɔ-yɔɔ huuzuu.+
27 Ɩna! Mansɩm ndʋ ɖeyi ɖeyi ɩmaɣzɩɣ yɔNɛ ɖʋtʋ ndʋ ɩlakɩ se ɩlabɩ-m kɩdɛkɛdɩm* yɔ.+
28 Mbʋ pʋyɔɔ yɔ ɩtɔŋ se: “Le weyi ɛ-hɩɖɛ sɛwa yɔ ɛ-ɖɩɣa wɛɛ,Nɛ le kizinziku ŋgʋ kɩ-tɛɛ kañatʋ tʋ caɣaa yɔ kɩwɛɛ?”+
29 Ɩtɩpɔzɩ tɔm nʋmɔɖɔnaa yaa we?
Ɩtɩtazɩ mbʋ mbʋ panawa yɔ* pɩ-taa camɩyɛ,
30 Nɛ ɩna se pɩfɛɣ ɛyʋ kɩdɛkɛdʋ asɛyʋʋ kɩyakʋ wiyeNɛ ehikiɣ ñʋʋ yabʋ pana kɩyakʋ wiye yaa we?
31 Apɩzɩɣ nɛ eheyi-i kaɣlaa se ɛ-nʋmɔʋ tɩtʋʋzɩ,Nɛ akaɣ-ɩ hɛyʋʋ mbʋ ɛlaba yɔ pi-lone taa?
32 Powokini-i pɩlaŋ yɔɔ lɛ,Feŋiyu nɔɔyʋ kaɣ feŋuu ɛ-pɩlaʋ yɔɔ.
33 Fɛɛʋ* taa tambaɣ kaɣ-ɩ kɛdɩnʋʋ,+Nɛ ɛyaa kpeekpe tɩŋɩɣ ɛ-wayɩ,*+Ɛzɩ ɛyaa mba pɛɖɛ-ɩ nɔɔ nɛ pɛfɛyɩ kalʋʋ yɔ.
34 Ye mbʋ, ɛbɛ yɔɔ ɩkpakɩɣ tɔm ndʋ tɩɩwazɩɣ pʋyʋ yɔ nɛ ɩhɛzɩɣnɩ ma-laŋɩyɛ?+
Cɛtɩm ɖeke wɛnɩ mɩ-tɔm cosuu taa!»
Pɩ-tɛɛ tɔm
^ Piye piye, «men-fezuu taayele wɛʋ.»
^ Yaa «ɖoŋ.»
^ Pɩkɛ suye cikpeɖe nɖɩ pɔɖɔkʋʋ nesi tɛɛ nɛ pamakɩ yɔ.
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «tuda,» pʋ-tɔbʋʋ se pasɩkɩ nɔɔ kʋɖʋmaɣ nɛ paanɩɣ wɩzasɩ.
^ Yaa «lɔŋ tasʋʋ; ɖʋtʋ.»
^ Yaa «pɛsɛtɩ e-fenasɩ nabʋlɛ yɔ.»
^ Yaa «nabʋyʋ.»
^ Piye piye, «ɛ-mɔɔ taa num nɛ pɩ-lɛŋ yɔ.»
^ Yaa «ñasɩkɩ, ɛ-kalɩzaɣ nɛ ñaŋ.»
^ Pɩpɩzɩɣ pɩkɛ, «puuyaɣ lakasɩ.»
^ Piye piye, «Ɩtɩtazɩ pa-yʋsasɩ.»
^ Yaa «Lemeɣa.»
^ Piye piye, «Nɛ ɛkaɣ hɔm ɛyaa kpeekpe ɛ-wayɩ.»
