Yɔɔb 24:1-25
24 «Ɛbɛ yɔɔ Ðoŋ Tɩŋa Tʋ ɛɛɖʋʋ alɩwaatʋ?+
Ɛbɛ yɔɔ mba pasɩmɩ-ɩ yɔ paanaɣ ɛ-kɩyakʋ?*
2 Ɛyaa lɛɣzɩɣ kamasɩ lona;+Pekpiki kpɩna nɛ powokini pa-maɣmaɣ pa-kpɩna ñɩtʋ ɖɩdɔɔyɛ taa.
3 Pɔhɔŋ piya nzɩ sɩfɛyɩ caa yɔ sɩ-kpaŋaɣ nɛ pɛɖɛɣnaNɛ pamʋʋ lelu nɔ abalɩñɩnʋ se ɛhɛyɩ ɛ-kɩmɩyɛ lɛ paapɩsɩnɩ-ɩ.+
4 Pɔɖɔɔnʋʋ kʋñɔndɩnaa nʋmɔʋ taa;Nɛ pɩwɛɛ se tɛtʋ yɔɔ ɛyaa mba pɛfɛyɩnɩ ɖoŋ nɩɩyɩ yɔ pɛmɛlɩ-wɛ.+
5 Kʋñɔndɩnaa ñɩnɩɣ tɔɔnaɣ ɛzɩ kañɩmbusuu taa tɛyɛ kpaŋasɩ+ yɔ;Pañɩnɩɣ pe-piya tɔɔnaɣ kañɩmbusuu taa.
6 Ɛyʋ lɛlʋ hayɩm taa pɩwɛɛ se pakʋ tɔɔnaɣ*Nɛ kañatʋ tʋ viiñi hayɩm taa pɩwɛɛ se pacazɩ.
7 Pahɩnɩɣ ɖoo taa ndaakpeɖe, paasuu wondu;+Pɛfɛyɩnɩ pɩsaʋ se pohu nikaɣ taa.
8 Tɛʋ cɔtɩ-wɛ pʋŋ taa;Pamalɩɣnɩ kaaŋ mbʋ pʋyɔɔ yɔ pɛfɛyɩnɩ ɖɩjɔzɩyɛ.
9 Pɩɣa ŋga kɛfɛyɩ caa yɔ, pakpaɣ-kɛ hɩɖɛ yɔɔ nɛ ɖoŋ nɛ pɛɖɛna;+Nɛ pamʋʋ kʋñɔndɩnaa tokonaa se pɛhɛyɩ pa-kɩmɩyɛ lɛ paapɩsɩnɩ-wɛ,+
10 Piyeba nɛ paba ɖɔŋ ndaakpeɖe, paasuu wondu,Nɛ ñɔɔsɩ wɩɣ-wɛ, alɩwaatʋ ndʋ pasɩɣlɩ tɔɔnaɣ pee hɔɔ yɔ.
11 Palakɩ tʋmɩyɛ ɖoŋ ñɩnɖɛ wɩsɩ kaalaŋa taa piyisi yɔɔ kamaŋ taa;*Pɛfɛyɩɣ viiñi pee, ɛlɛ lɔkɔtʋ ɖɛɣ-wɛ.+
12 Mba pawɩzɩ sɩbʋ yɔ pɔmɔlʋʋ tɛtʋ taa;Mba pamʋ heŋ sɩm yɔɔ sɩm yɔɔ yɔ,* pamakɩ kubusi se pasɩnɩ-wɛ;+Ɛlɛ Ɛsɔ ñaacɔŋnɩ-pʋ se pɩtɩmʋna.*
13 Nabɛyɛ kaɖɩɣnɩ ñalɩmɩyɛ;+Paaɖiɣziɣni ɖɩ-nʋmɔŋ,Nɛ paatɩŋɩɣ ɖɩ-nʋmɔŋ.
14 Ɛyaa kʋyʋ kʋyʋʋ tɛbɩyɛ tɛɛ;Ɛkʋʋ weyi ɛfɛyɩnɩ ɖoŋ nɩɩyɩ yɔ nɛ kʋñɔndʋ,+Nɛ ɖoo taa lɛ ɛmɩlɩɣ.
15 Abalʋ acɛyɛ laɖʋ ɛsɩyɛ ɖaŋɩɣ hadɛ lɛdʋʋ,+Ɛyɔɔdʋʋ se: “Nɔɔyʋ ɛɛkaɣ-m naʋ!”+
Nɛ ehuuzuu ɛ-ɛsɩndaa.
16 Cɩkpɛndʋʋ taa lɛ, pɔyɔkʋʋ nɛ pasʋʋ ɖɩsɩ taa;*Wɩsɩ taa lɛ, paɖɩkɩ pa-tɩ pa-ɖɩsɩ taa.
Paasɩŋ ñalɩmɩyɛ.+
17 Mbʋ pʋyɔɔ yɔ pɛ-ɛsɩndaa lɛ, tanaŋ wɛ ɖɔɖɔ ɛzɩ cɩkpɛndʋʋ sɔsɔʋ yɔ;Cɩkpɛndʋʋ sɔsɔʋ taa sɔɔndʋ malɩnɩ-wɛ.
18 Ɛlɛ lɩm kpaɣ-wɛ lɛɛ lɛɛ nɛ pɩɖɛna.*
Pakaɣ lɔʋ nɔɔ kɩdɛkɛdaɣ po-kotoŋa yɔɔ.+
Paakaɣ pɩsʋʋ pe-viiñi hayɩm taa.
19 Ɛzɩ wɩlɩŋ nɛ soŋaɣ kpakʋʋ ɖɔmbɛɛ wena ayɔlaa yɔ nɛ pɩɖɛɣna yɔ,Mbʋ ɖɔɖɔ Pɩlaʋ* ɖɛɣnɩ kɩdɛkɛdɩm laɖaa!+
20 E-ɖoo* kaɣ ɛ-yɔɔ sɔʋ; sonzooye kaɣ-ɩ tɔɔʋ nɛ ɖɩ-taa la leleŋ.
Paakaɣ tasʋʋ ɛ-yɔɔ tɔzʋʋ.+
Nɛ mbʋ pɩfɛyɩ siɣsiɣ yɔ pakaɣ-pʋ pɛlʋʋ ɛzɩ tɩʋ yɔ.
21 Emuluu kaalʋlaɣ,
Nɛ ɛwɩlɩɣ ñaŋ lelu.
22 Ɛsɔ kaɣ* labɩnʋʋ e-ɖoŋ tʋmɩyɛ nɛ ɛɖɩzɩ ɖoŋ tɩnaa;Paa pakʋyaa yɔ, pɛfɛyɩnɩ lidaʋ se pɛwɛɣ wezuu.
23 Ɛsɔ yeki-wɛ* se pataa pa-tɩ liu nɛ pɛwɛɛ pɛɛyɛ taa,+Ɛlɛ ɛ-ɛsa wɛ mbʋ payɩ palakɩ yɔ pɩ-yɔɔ.*+
24 Pakpazɩ-wɛ alɩwaatʋ pazɩ, pʋwayɩ lɛ patɩtasɩ wɛʋ.+
Poluzi-wɛ+ nɛ pekpeɣli-wɛ ɛzɩ ɛyaa lalaa yɔ;Pɛcɛbɩ-wɛ ɛzɩ hayɩm taa tɔɔnaɣ yɔ.
25 Lɛɛlɛɛyɔ apɩzɩɣ nɛ ɛwɩlɩ se mɛnkɛ cɛtɩyʋYaa ɛyɔɔdɩ se mɔn-tɔm tɩkɛ toovenim?»
Pɩ-tɛɛ tɔm
^ Pʋ-tɔbʋʋ se ɛ-tɔm hʋʋ kɩyakʋ.
^ Pɩpɩzɩɣ pɩkɛ, «Hayɩm taa pɩwɛɛ se pakʋ kpɩna tɔɔnaɣ.»
^ Pɩpɩzɩɣ pɩkɛ, «Palakɩ num piyisi yɔɔ kamaŋ taa.»
^ Yaa «Mba pamʋ heŋ yɔ pa-kalɩzasɩ.»
^ Pɩpɩzɩɣ pɩkɛ, «Ɛsɔ ɛɛkʋʋ nɔɔyʋ tɔm.»
^ Piye piye, «patʋlʋʋ ɖɩsɩ pɔŋ.»
^ Piye piye, «Ɛɖɛɣ lɛɛ lɛɛ lɩm yɔɔ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «Lotu.»
^ Piye piye, «Ɛkaɣ.»
^ Piye piye, «Eyeki-wɛ.»
^ Piye piye, «wɛ pa-nʋmɔŋ yɔɔ.»
