Yɔɔb 32:1-22
32 Ðɩnɛ ɛlɛ abalaa mba pa-naadozo peyele Yɔɔb cosuu, mbʋ pʋyɔɔ yɔ ɛ-taa kaatɛma se ɛwɛ siɣsiɣ.*+
2 Ɛlɛ Buuzi tʋ+ Barakɛɛlɩ pɩyalʋ Eliihu, weyi ɛlɩnɩ Raam hɔʋ taa yɔ, ɛ-taa wɩɩ siŋŋ. Ɛ-taa wɩnɩ Yɔɔb siŋŋ, mbʋ pʋyɔɔ yɔ ɛlɛ ñakaɣ pana se ɛwɩlɩ se ɛnʋ* kɛnɩ siɣsiɣ tʋ, pɩtɩkɛ Ɛsɔ.+
3 Ɛ-taa wɩnɩ Yɔɔb taabalaa mba pa-naadozo ɖɔɖɔ siŋŋ, mbʋ pʋyɔɔ yɔ patɩna ndʋ pocosi yɔ, ɛlɛ pɔyɔɔdaa se Ɛsɔ kɛ kañatʋ tʋ.+
4 Eliihu kaawɛnɩ tɔm se ɛyɔɔdʋʋ, ɛlɛ ɛɖaŋ se Yɔɔb ɛtɛ ɛ-ñɩndʋ nɛ pʋcɔ, mbʋ pʋyɔɔ yɔ paakɩlɩ-ɩ pɩnzɩ.+
5 Eliihu nawa se abalaa mba pa-naadozo pataawɛɛnɩ natʋyʋ se pocosi lɛ, ɛ-pana kpa.
6 Nɛ Buuzi tʋ Barakɛɛlɩ pɩyalʋ Eliihu yɔɔdɩ se:
«Ma lɛ, mɛnkɛ evebu*Nɛ mɩ lɛ, mɩ-pɩnzɩ ɖɔwa.+
Pʋyɔɔ mɔnɖɔkɩ man-tɩ nɛ ñamtʋ,+Nɛ mantɩkatɩ se meheyi-mɩ ndʋ mansɩma yɔ.
7 Mamaɣzaɣ se: “Sɔsɔtʋ* ɛyɔɔdɩ,Pɩnzɩ sakɩyɛ ɩyɔɔdɩ lɔŋsɩnɖɛ tɔm.”
8 Ɛlɛ fezuu ŋgʋ kɩwɛ ɛyaa taa yɔ,Helim mbʋ Ðoŋ Tɩŋa Tʋ hosuu yɔ, mbʋ haɣnɩ-wɛ tɔm taa nɩʋ lɛɣtʋ.+
9 Pɩnzɩ* ɖeke iiyeki se ɛyʋ ɛkɛ lɔŋsɩnɖʋ,Nɛ pɩtɩkɛ akpadɩyaa ɖeke nɩɣnɩ mbʋ pɩtʋʋzaa yɔ pɩ-taa.+
10 Pʋyɔɔ mɔntɔŋ se: “Welisini-m,Nɛ ma ɖɔɖɔ meheyi-ŋ ndʋ mansɩma yɔ.”
11 Ɩna! Maaɖaŋaa se ɩyɔɔdɩ;Maawɛɛ nɛ mewelisiɣ mɩ-lɩmaɣza+Alɩwaatʋ ndʋ ɩñɩnaɣ ndʋ ɩɩyɔɔdɩ yɔ.+
12 Mewelisini-mɩ camɩyɛ,Ɛlɛ mɩ-taa nɔɔyʋ tɩpɩzɩ nɛ ɛwɩlɩ se Yɔɔb tɔm sɩba*Nɛ nɔɔyʋ tɩpɩzɩ ɖɔɖɔ nɛ ecosi ɛ-tɔm yɔɔ.
13 Pʋyɔɔ lɛ, ɩtaayɔɔdɩ se: “Ðɩlɩ lɔŋsɩnɖɛ yɔɔ;Ɛsɔ wɩlɩna se ɛ-tɔm sɩba, pɩtɩkɛ ɛyʋ.”
14 Ɛtɩyɔɔdɩ tɔm se ɛkaɖɩnɩ-m,Pʋyɔɔ lɛ, maakaɣ-ɩ cosuu nɛ mɩ-tɔm.
15 Pɩɖɩɣzɩ-wɛ yem, patɩtasɩ wɛnʋʋ natʋyʋ se pocosi;Patɩtasɩ wɛnʋʋ natʋyʋ se pɔyɔɔdɩ.
16 Manɖaŋaa, ɛlɛ peyebi yɔɔdʋʋ;Pasɩŋ peeɖe yem, paatasɩɣ natʋyʋ cosuu.
17 Pʋyɔɔ lɛ, ma ɖɔɖɔ mankaɣ cosuu;Ma ɖɔɖɔ mankaɣ yɔɔdʋʋ ndʋ mansɩma yɔ,
18 Mbʋ pʋyɔɔ yɔ tɔm su man-taa;Fezuu ŋgʋ kɩwɛ man-taa yɔ kiseɣtiɣ-m.
19 Mo-lotu taa wɛ ɛzɩ vɛɛ ŋgʋ kɩ-yɔɔ posulaa nɛ kɩɩnaɣ ɖenɖe kɩlɩɩna yɔ,Pɩwɛ ɛzɩ tɔnɛ kokola* kɩfana wena acaɣ yaʋ yɔ.+
20 Mɔyɔɔdʋʋ nɛ mɔ-yɔɔ hɛɛ!
Monkuluu mɔ-nɔɔ nɛ moncosi.
21 Maakaɣ nɔɔyʋ yɔɔ tɩnʋʋ;+Nɛ maakaɣ ɖɔɖɔ peɣzuu ɛyʋ nɔɔyʋ,*
22 Mbʋ pʋyɔɔ yɔ maasɩŋ ɛyaa peɣzuu;Ye menpeɣzi nɔɔyʋ yɔ, ma-Mayʋ kaɣ-m ɖɩzʋʋ kpɛdɛyɛ.
Pɩ-tɛɛ tɔm
^ Yaa «mbʋ pʋyɔɔ yɔ ɛɛwɛ siɣsiɣ ɛ-maɣmaɣ ɛ-ɛsɩndaa.»
^ Yaa «ɛ-kalɩzaɣ.»
^ Piye piye, «man-kɩyakɩŋ wɛ ññɩɩ.»
^ Piye piye, «Kɩyakɩŋ.»
^ Yaa «Kɩyakɩŋ sakɩyɛ.»
^ Yaa «nɛ ɛkalɩ Yɔɔb.»
^ Yaa «tɔnɛ kokola wena a-taa paɖʋʋ vɛɛ yɔ.»
^ Yaa «maakaɣ ɖɔɖɔ nɔɔyʋ yaʋ samtʋ hɩɖɛ.»