Yɔɔb 39:1-30
39 «Ŋsɩm alɩwaatʋ ndʋ pʋʋ taa pʋŋ lʋlʋʋ piya yɔ?+
Ŋtɛm naʋ namɩŋ ɖiɣni lʋlʋʋ piya na?+
2 Ŋkalɩɣ fenasɩ ɛzɩma piya wɛɣ po-lotu taa yɔ?
Ŋsɩm alɩwaatʋ ndʋ palʋlʋʋ piya yɔ?
3 Paalʋlʋʋ pe-piya lɛ poluŋuu,Nɛ pa-lʋlʋʋ wɩzasɩ sɩɣ tɩnaɣ.
4 Pe-piya kpaɣ ɖoŋ nɛ sɩpaɣlɩɣ ñɩtʋ taa;Sɩlɩɣ sɩɖɛɣ nɛ sɩɩpɩsɩɣ pɔ-cɔlɔ.
5 Ayebi tɛyɛ kpaŋaɣ nɛ kɛwɛɛ ka-tɩ yɔɔ?+
Nɛ ahɛɖɩ tɛyɛ kpaŋaɣ nimee?
6 Malaba nɛ kañɩmbusuu kɛdɛɛŋa pɩsɩ ka-ɖɩɣaNɛ ɖɔm tɛtʋ pɩsɩ ka-ɖɩjaɣyɛ.
7 Keniŋ tɛtʋ taa pisidi siduu mbʋ yɔ;Kaanɩɣ ɖiyiyu kubusi.
8 Kɛyɛlɩɣ piyisi taa nɛ kañɩnɩɣ ñɩtʋ ɖɩdɔɔyɛ,Kañɩnɩɣ paa ñɩtʋ lɛŋ ñɩndʋ ndʋ.
9 Ɛzɩ tɛyɛ nɔ abalɩñɩnʋ tisiɣ nɛ ɛlabɩ-ŋ tʋmɩyɛ na?+
Ɛkaɣ ɖou ña-kalakʋ* taa?
10 Ŋkaɣ ɖɩʋ tɛyɛ nɔ abalɩñɩnʋ nimiye se ɛwɛɛ hayɩm taa habɩyɛ* yɔɔ?
Yaa ɛkaɣ-ŋ tɩŋʋʋ se ɛhayɩ fɛɛʋ taa?
11 Ŋkaɣ taʋ liu e-ɖoŋ sɔsɔŋNɛ ŋyebi-i nɛ ɛla ña-tʋmɩyɛ ɖoŋ ñɩnɖɛ na?
12 Ŋkaɣ-ɩ taʋ liu se ɛkɔŋnɩ-ŋ ñɔ-tɔɔnaɣ ŋga ŋkʋma yɔ ɖɩɣa na?*
Nɛ ɛkaɣ-kɛ kpeɣluu ñɔ-tɔɔnaɣ ɖɩmaɖɛ na?
13 Taataa makɩ e-keŋ nɛ taa leleŋ,Ɛlɛ papɩzɩɣ nɛ pakpaɣ e-keŋ nɛ ɛ-hʋndʋNɛ pamaɣzɩnɩ alɩŋgbayʋ keŋ nɛ kɩ-hʋndʋ na?+
14 Mbʋ pʋyɔɔ yɔ eyeki ɛ-yala tataa,Nɛ eyeki nɛ pisoŋuu-yɛ puuyuu taa.
15 Ɛsɔʋ se nɩŋgbaŋaɣ nakɛyɛ pɩzɩɣ nɛ kɔyɔkɩ-yɛYaa tɛtɛgbɩnɛ naɖɩyɛ pɩzɩɣ nɛ ɖɩfɛyɩ-yɛ.
16 Ɛwɩlɩɣ e-piya* ñaŋ ɛzɩ pɩtɩkɛ ɛnʋ tɩnɩ-sɩ yɔ;+Sɔɔndʋ ɛɛkpaɣ-ɩ se ɛ-pana ñaɣʋ kaapɩsɩ falaa.
17 Mbʋ pʋyɔɔ yɔ Ɛsɔ tɩha-ɩ lɔŋsɩnɖɛ*Nɛ ɛtɩha-ɩ ɖɔɖɔ lɛɣtʋ.
18 Ɛlɛ alɩwaatʋ ndʋ ɛkʋyʋʋ nɛ ɛma e-keŋ yɔ,Ewoŋuu kpaŋnʋ nɛ ɛ-yɔɔ caɣyʋ.
19 Ñahaɣnɩ kpaŋnʋ e-ɖoŋ na?+
Ñaɖʋʋnɩ kpɛm e-pondone yɔɔ nɛ piciɣdiɣ?
20 Ŋpɩzɩɣ ŋla nɛ ɛmaa ɛzɩ nakaʋ yɔ?
Efeziɣ ɖoŋ lɛ, pɩcaɣ sɔɔndʋ.+
21 Ɛmakɩ ɛ-acaa nɛ tɛtʋ fɛɛʋ taa nɛ ɛmɛyɩɣnɩ e-ɖoŋ;+Eseɣ nɛ ɛɖɛɣ you taa.*+
22 Ewoŋuu sɔɔndʋ, nɛ sɔɔndʋ ɛɛkpaɣ-ɩ nɛ nabʋyʋ.+
Ɛɛpɩsɩɣ kiŋgiɖe laɣɖɛ ɛsɩndaa.
23 Kɔɔka wiɣ ɛ-yɔɔ,Kɩgbɛzɛŋ ñɩlɩsɩɣ.
24 Piselitiɣ-i nɛ eseliɣ, eseɣ nɛ ɛɖɛɣnɩ ɛsɩndaa,*Ɛnɩɣ nɔndɔʋ taŋ lɛ, pɩɩsaŋ se ɛcaɣ ɖiɣ ɖiɣ.*
25 Pahʋlʋʋ nɔndɔʋ lɛ, ɛtɔŋ se: “Ahaaŋ!”
Ɛnɩɣ you sɔŋ ɖooo poliŋ taaNɛ ɛnɩɣ sɔɔjanaa ñʋndɩnaa kubusi nɛ you kubuka.+
26 Ɛzɩ ñɛ-lɛɣtʋ yekina nɛ makɩyaɣ kʋyʋʋ,Nɛ koposuu ke-keŋ nɛ hadɛ kiŋ na?
27 Yaa ñaɖʋʋnɩ paɣtʋ nɛ kpeluu* kʋyʋʋ ɛsɔdaa+Nɛ kɩɖʋʋ kɩ-ɖandʋ ɖooo hayo,+
28 Nɛ kiɖou kaaʋ sɔsɔʋ yɔɔ,Nɛ kɩcakɩ kɩ-ɖɩjaɣyɛ ɖoŋ ñɩnɖɛ taa ɛwaɣ ñʋʋ taa?*
29 Peeɖe kɩwɛɣ nɛ kɩñɩnɩɣ tɔɔnaɣ;+Kɩ-ɛsa naɣ ɖooo poliŋ.
30 Ki-piya ñɔʋ calɩm;Nɛ ɖenɖe mba pakʋ-wɛ yɔ pɛwɛɛ yɔ, peeɖe kɩwɛɣ.»+
Pɩ-tɛɛ tɔm
^ Yaa «ño-pulone.»
^ Habɩyɛ nɖɩ pɛhɛɣ hayɩm taa nɛ poɖuu ɖɩ-yɔɔ tɔɔnaɣ yɔ ɖɩ-tɔm pɔyɔɔdʋʋ cɩnɛ.
^ Piye piye, «ño-ɖomaɣ na?»
^ Piye piye, «ɛ-pɩyalaa.»
^ Piye piye, «Ɛsɔ yeba nɛ ɛsɔɔ lɔŋsɩnɖɛ yɔɔ.»
^ Piye piye, «Ɛlɩɣ se ɛkatɩ you wondu.»
^ Piye piye, «eliki tɛtʋ.»
^ Pɩpɩzɩɣ pɩkɛ, «Eetisiɣ se ɛnɩ nɔndɔʋ taŋ.»
^ Yaa «keziye.»
^ Piye piye, «ɛwaɣ keɖe yɔɔ.»
