Yɔɔb 4:1-21
4 Ðɩnɛ ɛlɛ Temaanɩ tʋ Eliifaazɩ+ cosi se:
2 «Ye nɔɔyʋ ɛcaɣ se ɛyɔɔdɩnɩ-ŋ, pɩkaɣ-ŋ nɩʋ nɛ welisuu na?
Mbʋ pʋyɔɔ yɔ apɩzɩɣ nɛ ekizi yɔɔdʋʋ?
3 Pɩkɛ toovenim se ŋŋwɩlɩ tɔm ɛyaa sakɩyɛ,Nɛ ŋkpazaɣ ɖoŋ nesi nzɩ sɩyɔba yɔ.
4 Ñɔ-tɔm pee kʋsaɣ mba payɩ pituulaɣ-wɛ yɔ,Nɛ ŋkpazaɣ ɖoŋ mba pa-nʋmbɔla yɔba yɔ.
5 Ɛlɛ lɛɛlɛɛyɔ lɛ, pɩtalɩ-ŋ nɛ pɩɖɛ-ŋ;*Pitukuni-ŋ nɛ ŋwɛɛ sɔɔndʋ taa.
6 Ŋseɣ Ɛsɔ sɔɔndʋ seu mbʋ yɔ, pɩɩhaɣ-ŋ abalɩtʋ na?
Ña-cɩŋgɩlɩm wɛtʋ+ ɛɛhaɣ-ŋ lidaʋ na?
7 Mentendi-ŋ tɔzɩ: Wiɖiyi ɛyʋ weyi ɛtɩɖɔɔ wɛɛ naayɛ yɔ ɛtɛm tɛŋɩlʋʋ nɛ ŋna?
Wiɖiyi pɛtɛm ɖɩzʋʋ ɛyʋ siɣsiɣ tʋ nɛ ŋna?
8 Mbʋ manawa yɔ lɛ se mba pahayɩɣ kɩdɛkɛdɩm*Nɛ mba poɖuu kʋñɔŋ yɔ pʋyʋ kʋɖʋm ɛnʋ pakaɣ kʋm.
9 Ɛsɔ feziɣ pɔ-yɔɔ lɛ pasɩkɩ,Nɛ ɛ-pana kpaɣ lɛ, pɛtɛŋɩlɩɣ.
10 Mʋʋzʋʋ mʋdʋʋ, nɛ mʋʋzʋʋ pɩɣa* ñɩzɩɣ,Ɛlɛ halɩ pɛpɛlɩ mʋʋzɩŋ ɖoŋ ñɩŋ* kela.
11 Ye mʋʋzʋʋ ɛɛnaɣ nabʋyʋ se kɩkpa nɛ kɩtɔɔ yɔ kɩsɩkɩ,Nɛ mʋʋzʋʋ piya mɩzɩ ɖama.
12 Pɔkɔnɩ-m tɔm natʋyʋ mɛsaɣ tɛɛ,Pɛwɛɛtɩ-tʋ nɛ ma-nɩŋgbaŋʋʋ nɩɩ.
13 Ðoo taa, alɩwaatʋ ndʋ ɖom cukaŋ ñɩmbʋ kpakɩɣ ɛyaa yɔ,Mana natʋ natʋyʋ nɛ tisidi ma-lɩmaɣza,
14 Nɛ menseli pɩfɛyɩ yɔɔdʋʋ,Nɛ sɔɔndʋ su mɔ-mɔɔ kpeekpe taa.
15 Nɛ fezuu nakʋyʋ kɔɔ nɛ kɩɖɛɛ mɛ-ɛsɩndaa;Nɛ mon-tomnaɣ yɔɔ hʋndʋ kʋyɩ nɛ tɩsɩŋ.
16 Pʋwayɩ lɛ kɩsɩŋ ɖiɣ ɖiɣ,Ɛlɛ mantɩpɩzɩ nɛ menɖiɣzini kɩ-wɛtʋ.
Nabʋyʋ kaawɛ mɛ-ɛsɩndaa;Pisu ɖiɣ ɖiɣ nɛ manɩɩ nɔɔ nakɛyɛ se:
17 “Ɛyʋ pɩzɩɣ nɛ ɛwɛɛ siɣsiɣ nɛ pɩkɩlɩ Ɛsɔ?
Ɛyʋ pɩzɩɣ nɛ ɛwɛɛ kele kele nɛ pɩkɩlɩ ɛ-Mayʋ na?”
18 Na! Ɛɛtaɣ ɛ-lɩmɖʋyaa liu,Nɛ ɛnaɣ kɩwɛɛkɩm e-tiyiyaa yɔɔ.
19 Nɛ pɩcandɩnɩ mba pɛwɛ cʋʋ ɖɩsɩ taa yɔ,Mba pe-tigiɖe wɛ mʋzʋʋ taa yɔ,+Mba pɔtɔyɩtʋʋ-wɛ kɛlɛʋ yem ɛzɩ pɔtɔyɩtʋʋ fiidiviu yɔ!
20 Pɔtɔyɩtʋʋ-wɛ caɣ caɣ kpaɣnɩ tanaŋ tɛɛ nɛ piwolo ɖanaɣ;Paɖɩŋ kpaagbaa ɖɩm nɛ nɔɔyʋ ɛɛnaɣ.
21 Pɛfɛyɩ ɛzɩ kizinziku ŋgʋ palɩzɩ ki-nimiye yɔ?
Pasɩkɩ paawɛɣnɩ lɔŋsɩnɖɛ.
Pɩ-tɛɛ tɔm
^ Piye piye, «ŋhoo.»
^ Yaa «mba paɖʋʋ pa-taa se palakɩ kɩdɛkɛdɩm.»
^ Mʋʋzʋʋ ŋgʋ kɩ nɛ ki-ɖoŋ nɛ kɩtɩkpadɩyɩ yɔ kɩ-tɔm pɔyɔɔdʋʋ.
^ Yaa «Mʋʋzɩŋ weyi ɩ nɛ ɩ-ɖoŋ nɛ ɩwɛnɩ kpɛm i-pondona yɔɔ yɔ.»
