Yɔɔb 5:1-27
5 «Mentendi-ŋ, ma kubuka nɛ ŋyaa! Nɔɔyʋ wɛɛ se ecosuu-ŋ?
Kiɖeɖema taa a-yɔɔ ŋkaɣ pɩsɩnʋʋ?
2 Mbʋ pʋyɔɔ yɔ ɛyʋ caɣnʋʋ kaɣ kʋʋ kɩmɛlɛŋ,Nɛ ɛsɩsɛmɩyɛ kaɣ kʋʋ ɛyʋ weyi ɛfɛyɩ lɛɣtʋ yɔ.
3 Mana kɩmɛlɛŋ kɩkaŋaɣ hosi,Ɛlɛ tuda lɛ, pɔlɔ nɔɔ kɩdɛkɛdaɣ kɩ-ɖɩjaɣyɛ yɔɔ.
4 Pɛɛyɛ posini kɩ-pɩyalaa,Nɛ panaŋ-wɛ tɛtʋ nɔnɔɔ taa+ nɛ nɔɔyʋ tɩya pa-ñʋʋ.
5 Weyi ñɔɔsɩ wɩɣ-ɩ yɔ, ɛtɔkɩ mbʋ kɩmɛlɛŋ kʋma yɔ,Ɛkpakɩɣ-pʋ paa pɩɩwɛ sɔɔ taa yɔ,
Nɛ kpaca kpa kɩ nɛ kɩ-pɩyalaa pa-ñɩm.
6 Mbʋ pʋyɔɔ yɔ mbʋ pɩlakɩ ɛyʋ kɩdɛkɛdɩm yɔ, pɩɩñɔʋnɩ puuyuu taa,
Nɛ kʋñɔŋ ɛɛlɩɣnɩ tɛtɛɛ.
7 Mbʋ pʋyɔɔ yɔ ɛzɩma mamacɩsɩ iiyeki kʋyʋʋ ɛsɔdaa yɔ,
Mbʋ ɖɔɖɔ palʋlɩ ɛyʋ se ɛla kʋñɔŋ.
8 Ɛlɛ ye maawɛnɩ ño-lone taa yɔ, Ɛsɔ yɔɔ maapɩsɩnaa,
Nɛ Ɛsɔ nesi tɛɛ maaɖʋzɩ mɔn-tɔm,
9 Ɛnʋ weyi ɛlakɩ wondu sɔsɔtʋ ndʋ paapɩzɩɣ nɛ patazɩ tɩ-taa yɔ,
Piti lakasɩ nzɩ sɩfɛyɩ kalʋʋ yɔ.
10 Ɛhaɣ tɛtʋ tɛʋ
Nɛ etiyiɣni lɩm hayɩm taa.
11 Ɛkʋsʋʋ ɛjam nɛ ɛkpazɩɣ-ɩ ɖooo ɛsɔdaa,
Nɛ ɛkʋsʋʋ weyi pitibi-i yɔɔɔ yɔ nɛ ɛkpazɩɣ-ɩ ñʋʋ yabʋ ɖeɖe.
12 Ɛwɛɛkɩɣ ajitu tɩnaa ɖʋtʋ,
Nɛ pe-nesi tɛɛ tʋma ɖʋʋ lɩm.
13 Ɛkpaɣ lɔŋsɩnɖaa pa-maɣmaɣ pa-ajitu taa,+Nɛ lɛɣtʋ tɩnaa ɖʋtʋ wɛɛkɩɣ.
14 Pakatɩɣ cɩkpɛndʋʋ wɩsɩ taa,Patakɩɣ wɩsɩ kaalaŋa taa ɛzɩ ɖoo yuna yɔ.
15 Ɛyakɩ ñʋʋ laɣɖɛ nɖɩ ɖɩwɛ pɔ-nɔɔ taa yɔ ɖi-nesi tɛɛ,Ɛyakɩ kʋñɔndʋ ñʋʋ ɖoŋ tʋ nesi tɛɛ,
16 Piyeba nɛ ɛjam wɛɛnɩ lidaʋ,Ɛlɛ posuli weyi ɛfɛyɩ siɣsiɣ yɔ ɛ-nɔɔ.
17 Na! Koboyaɣ tʋ lɛ weyi Ɛsɔ kalɩɣ-ɩ yɔ;Pʋyɔɔ lɛ, taakizi lɔŋ weyi Ðoŋ Tɩŋa Tʋ sɩɣzɩɣ-ŋ yɔ!
18 Mbʋ pʋyɔɔ yɔ ɛlakɩ nɛ ɛyʋ nɩɣ siziŋ, ɛlɛ ɛhɔkʋʋ heŋ taa;Ɛpɛlɩɣ, ɛlɛ ɛ-maɣmaɣ e-nesi ɛwaɣna.
19 Ɛkaɣ-ŋ lɩzʋʋ asɛyɩŋ 6 taa,Halɩ 7 ñɩŋgʋ ɛɛkaɣ-ŋ kɔnʋʋ kaɖɛ naɖɩyɛ.
20 Ɛkaɣ-ŋ holuu sɩm nesi tɛɛ ñɔɔsɩ alɩwaatʋ taa,Nɛ ɛkaɣ-ŋ holuu laɣɖɛ ɖoŋ tɛɛ you alɩwaatʋ taa.
21 Ɛkaɣ ñɔ-yɔɔ kandɩyʋʋ nɛ nzʋlʋmɩyɛ ɛgbazɩyɛ eehikiɣ-ŋ,+Nɛ ŋŋkaɣ seu asɛyʋʋ alɩwaatʋ ndʋ kɩtalɩɣ yɔ.
22 Ŋkaɣ woŋuu ɖɩzʋʋ nɛ ŋkaɣ woŋuu ñɔɔsɩ,Nɛ ŋŋkaɣ seu tɛtɛgbɩna.
23 Mbʋ pʋyɔɔ yɔ hayɩm taa pɛɛ ɩɩkaɣ-ŋ kɩdɛkɛdɩm nabʋyʋ labʋ,*Nɛ ña nɛ hayɩm taa tɛtɛgbɩna ɩkaɣ wɛʋ laŋhɛzɩyɛ taa.
24 Ŋkaɣ naʋ se ñe-kizinziku wɛ pɛɛyɛ taa,*Nɛ ŋcɔŋnɩ camɩyɛ ña-kpɩna ñɩtʋ ɖɩdɔɔyɛ lɛ, ŋnaɣ se pɩtɩŋa pɩwɛ pi-ɖeɖe.
25 Ŋkaɣ wɛnʋʋ piya sakɩyɛ,Nɛ ña-lʋlʋʋ taa mba kaɣ ɖɔʋ ɛzɩ tɛtʋ yɔɔ ñɩtʋ yɔ.
26 Ŋkaɣ tibu pɩlaʋ taa nɛ ño-ɖoŋ,Ɛzɩ tɔɔnaɣ pee wena pakʋm alɩwaatʋ yɔɔ yɔ a-hɔɔ yɔ.
27 Na! Ðɩtazɩ tɔm ndʋ tɩ-taa, nɛ mbʋ pɩkɛwa.
Welisi nɛ ŋtisi tɩ-yɔɔ.»
Pɩ-tɛɛ tɔm
^ Yaa «Mbʋ pʋyɔɔ yɔ ña nɛ hayɩm taa pɛɛ ɩkaɣ ɛgbɛyɛ ɖʋʋ (ɩkaɣ ɖama nɩnʋʋ).»
^ Piye piye, «kɛ laŋhɛzɩyɛ.»
