Yowɛɛlɩ 2:1-32
2 «Ɩyaa nɔndɔʋ Siyɔŋ taa!+
Ɩma you kubuka man-pʋʋ kiɖeɖeu yɔɔ.
Ɛjaɖɛ taa* mba kpeekpe iseli,Mbʋ pʋyɔɔ yɔ Yehowa kɩyakʋ ɖiɣni kɔm!+ Kɩñɔtaa!
2 Pɩkɛ cɩkpɛndʋʋ kɩyakʋ nɛ kɩyakʋ ŋgʋ pɩkaɣ yuu kpimm yɔ,+Pɩkɛ mɩndʋ nɛ cɩkpɛndʋʋ sɔsɔʋ kpimm kɩyakʋ,+Ɛzɩ tɛbɩyɛ tɛɛ ñalɩmɩyɛ kpaʋ pʋŋ yɔɔ yɔ.
Samaɣ nakɛyɛ wɛɛ, kɔɖɔwa nɛ kɛwɛɛ ɖoŋ;+Samaɣ nakɛyɛ taawɛɛ mbʋ wiɖiyi kpa,Nɛ nakɛyɛ ɛɛkaɣ wɛʋ mbʋ wiɖiyi kaaʋKpaɖɩŋ weyi payɩ ɩwɛnɩ ɛsɩndaa yɔ ɩ-taa.
3 Mbʋ pɩwɛnɩ kɛ-ɛsɩndaa yɔ, pɩtɩŋa pɩmʋʋ miŋ,Nɛ mbʋ pɩwɛnɩ ka-wayɩ yɔ, miŋ nzʋlʋmɩyɛ ñakɩ pɩtɩŋa.+
Ɛjaɖɛ nɖɩ ɖɩwɛnɩ kɛ-ɛsɩndaa yɔ, ɖɩwɛ ɛzɩ Edɛɛnɩ kaɖaɣ+ yɔ,Ɛlɛ ka-wayɩ lɛ, njɛyɛ nɛ kañɩmbusuu wɛna,Nɛ nabʋyʋ ɛɛpɩzɩɣ nɛ pɩtʋlɩ.
4 Kɛ-wɛtʋ wɛ ɛzɩ kpaŋnaŋ wɛtʋ yɔ,Nɛ keseɣ ɛzɩ you kpaŋnaŋ+ yɔ.
5 Kamaɣ pʋŋ ñʋŋ taa nɛ panɩɣ ka-taŋ ɛzɩ you kɛɛkɛɛnaa yɔ,+Panɩɣ ka-taŋ ɛzɩ miŋ sɔsɔŋ ñakʋʋ ñɩtʋ kɩwɩtʋ nɛ tɩhɔʋ yɔ.
Kɛwɛ ɛzɩ samaɣ ɖoŋ ñɩŋga ŋga ka-taa ɛyaa ñɔɔzɩ pa-tɩ nɛ pasɩŋ po-lona taa se pala you yɔ.+
6 Kɔ-yɔɔ lɛ, ɛyaa kaɣ seluu.
Sɔɔndʋ kaɣ wɛʋ ɛyaa tɩŋa ɛsɩndaa.
7 Kowoki koyindu wayɩ ɛzɩ you laɖaa yɔ,Kakpaɣ koloŋa ɛzɩ sɔɔjanaa yɔ,Paa weyi lɛ, ɛ-ɛsa wɛ ɛ-nʋmɔʋ taa,Nɛ paalɩɣ pa-nʋmɔŋ taa.
8 Paatuzuu ɖama pa-nʋmɔʋ taa;Paa weyi* lɛ, ɛtɩŋɩɣ ɛ-nʋmɔʋ.
Ye tɔʋ ñɩma* ɩmʋ nabɛyɛ nɛ pɔtɔlɩ yɔ,Lalaa iikitiɣni pa-wayɩ.
9 Pasʋʋ tɛtʋ taa lɛɛ lɛɛ, peseɣ koloŋa yɔɔ.
Pakpaɣ ɖɩsɩ yɔɔ, pasʋʋnɩ mondoɖebɔŋ ɛzɩ mɩlʋ yɔ.
10 Ɛjaɖɛ seliɣ nɛ ɛsɔdaa ñamsɩɣ pɛ-ɛsɩndaa.
Wɩsɩ nɛ fenaɣ poyu cɩkpɛndʋʋ,+Nɛ tɩɩnzɩ lesi sɩ-ñalɩmɩyɛ.
11 Yehowa kaɣ yebu nɛ ɛ-nɔɔ tili e-you laɖaa+ ɛsɩndaa, mbʋ pʋyɔɔ yɔ pɔɖɔ sakɩyɛ.+
Weyi ɛɖɔŋ Ɛsɔ tɔm yɔɔ yɔ, ɛkɛ ɖoŋ tʋ;Mbʋ pʋyɔɔ yɔ Yehowa kɩyakʋ kɛ sɔsɔʋ nɛ kɩcaɣ sɔɔndʋ.+
Apɩzɩɣ nɛ ɛsɩŋ kɩ-ɛsɩndaa?»+
12 Yehowa yɔɔdʋʋ se: «Ɛlɛ pɩtɩcaɣtɩ wayɩ, ɩpɩsɩ mɔn-cɔlɔ nɛ mɩ-laŋɩyɛ pilim,+Ɩhɔkɩ nɔɔ+ nɛ iwii nɛ ipeendi.
13 Ɩcɩyɩ mɩ-laŋa,+ pɩtaakɛnɩ mi-tokonaa,+Nɛ ɩpɩsɩ mɩ-Ɛsɔ Yehowa cɔlɔ,Mbʋ pʋyɔɔ yɔ ɛnɩɣ ɛyaa wɩzasɩ nɛ ɛnaɣ pʋtɔdɩyɛ, ɛɛkɔʋ pana lɛɛ lɛɛ,+ nɛ ɛ-sɔɔlɩm siɣsiɣ ñɩmbʋ ɖɔ pɩdɩɩfɛyɩ,+Ðɩnɛ ɛlɛ, ɛkaɣ ɛ-lɩmaɣza lɛɣzʋʋ nɛ ɛɛkɔŋnɩ asɛyʋʋ.*
14 Asɩma? Pɩtɩla ɛkaɣ ɖaɣnʋʋ maɣzʋʋ nɛ ɛlɛɣzɩ ɛ-lɩmaɣza*+Nɛ ɛkaɣ-mɩ wazʋʋ,Nɛ ɩlaa tɔɔnaɣ pee kɩlaʋ nɛ ilizi kilizaɣ mɩ-Ɛsɔ Yehowa.
15 Ɩyaa nɔndɔʋ Siyɔŋ taa!
Isusi nɔɔ hɔkʋʋ; ɩyaa ɛyaa se pɔkɔɔ ŋgee kigbeɣluu.+
16 Ikpeɣli ɛyaa; iyele nɛ samaɣ wɛɛ kele kele.+
Ikpeɣli akpadɩyaa;* ikpeɣli piya nɛ hɩla yɔɔ piya.+
Walʋ ɛlɩɩnɩ pɩ-taa kuduyuu tɛɛ, nɛ asɛyʋ lɩɩnɩ e-kuduyuu kʋsʋsʋʋ tɛɛ.
17 Cɔjɔnaa mba pɛkɛ Yehowa tʋmlaɖaa yɔ pewiiKʋjɔŋ nɛ altaaru+ pɛ-hɛkʋ taa nɛ pɔyɔɔdɩ se:
“Owu Yehowa, na ña-samaɣ pʋtɔdɩyɛ;Taayele nɛ ña-ñɩm pɩsɩ woŋa pʋyʋ,Taayele nɛ ajɛɛ tɔɔ kewiyitu pɔ-yɔɔ.
Taayele nɛ ɛyaa yɔɔdɩ se: ‘Le pɛ-Ɛsɔ wɛɛ?’”+
18 Ðɩnɛ ɛlɛ Yehowa kaɣ wɛʋ kpekpeka ɛ-ɛjaɖɛ yɔɔNɛ ɛna ɛ-samaɣ pʋtɔdɩyɛ.+
19 Yehowa kaɣ cosuu ɛ-samaɣ se:
“Mentiyiɣni-mɩ tɔɔnaɣ nɛ vɛɛ kɩfalʋʋ nɛ num,Nɛ ɩkaɣ tɔɔʋ nɛ ɩhaɣ;+Maakaɣ tasʋʋ yebu nɛ paɖʋ-mɩ fɛyɛ ajɛɛ hɛkʋ taa.+
20 Mankaɣ ɖɔɔnʋʋ hayo kiŋ tʋ nɛ eposini-mɩ;Mankaɣ-ɩ mɩzʋʋ kañɩmbusuu ŋgʋ kɩwɩlaa nɛ nɔɔyʋ fɛyɩ kɩ-taa yɔ kɩ-taa,Ɛkaɣ kɛzʋʋ ɛ-ɛsa nɛ wɩsɩ ɖɩlɩyɛ taa teŋgu* yɔɔ kiŋNɛ ɛkaɣ siɣye haʋ nɛ wɩsɩ ɖɩɖʋyɛ taa teŋgu* yɔɔ kiŋ.
E-tomnaɣ sɔŋ kaɣ kpaʋ,E-tomnaɣ lɩɣ sɔŋ kɩdɛkɛdɩŋ weyi yɔ, ɩkaɣ wɛʋ nɛ ɩkpaɣ;+Mbʋ pʋyɔɔ yɔ Ɛsɔ kaɣ labʋ lakasɩ sɔsɔsɩ.”
21 Hayɩ ɛjaɖɛ, sɔɔndʋ ɛtaakpa-ŋ.
Ña-taa ɛla leleŋ nɛ ŋmɛyɩ, mbʋ pʋyɔɔ yɔ Yehowa kaɣ labʋ lakasɩ sɔsɔsɩ.
22 Ñɩtʋ taa kpɩna, sɔɔndʋ ɛtaakpa-mɩ,Mbʋ pʋyɔɔ yɔ ñɩtʋ kaɣ nɛɣdʋʋ ñɩtʋ ɖɩdɔɔyɛ taa lakʋ taa,+Nɛ tɩŋ kaɣ pee lʋlʋʋ;+Fiigi tɩʋ nɛ viiñi tɩʋ pakaɣ pee lʋlʋʋ cɔdɔlɔɔɔ.+
23 Mɩ Siyɔŋ pɩyalaa, mɩ-Ɛsɔ Yehowa yɔɔ lɛ, mɩ-taa ɛla leleŋ nɛ ɩmɛyɩ;+Mbʋ pʋyɔɔ yɔ ɛkaɣ-mɩ haʋ kajalaɣ tɛŋ* ɛzɩ pɩpɔzʋʋ ɖeyi ɖeyi yɔ,Nɛ ɛkaɣ tisuu tɛʋ sɔsɔʋ mɩ-yɔɔ,Ɛkaɣ-mɩ haʋ kajalaɣ tɛŋ nɛ wayɩ wayɩ tɛŋ* ɛzɩ ɖooo lɛ yɔ.+
24 Tɔɔnaɣ pee kɩbana kaɣ suu tɔɔnasɩ ɖɩmaɖɛ yem,Vɛɛ kɩfalʋʋ kaɣ wadʋʋ tɩŋ pee ɖɩñazɩyɛ nɛ num kaɣ wadʋʋ num ɖɩlaɖɛ.+
25 Nɛ mankaɣ-mɩ hɛyʋʋPɩnzɩ nzɩ sɩ-taa nakaŋ, kudoloŋ nɛ nakaŋ weyi ɩfɛyɩ keŋ yɔ ɩtɔɔ mɩ-tɔɔnaɣ yɔ sɩ-yɔɔ, nzɩ sɩ-taa nakaŋ weyi ɩwɛ hiluu yɔ ɩtɔɔ pɩtɩŋa yɔ,Mo-yoyaa samaɣ sɔsɔɔ ŋga maatiyi mɩ-hɛkʋ taa yɔ.+
26 Pɩtʋʋ fɛyɩ se ɩkaɣ tɔɔʋ nɛ ɩhaɣ,+Nɛ ɩkaɣ mɩ-Ɛsɔ Yehowa hɩɖɛ sam,+Ɛnʋ weyi ɛlabɩ piti lakasɩ mɩ-yɔɔ yɔ;Paakaɣ tasʋʋ man-samaɣ fɛyɛ ɖʋʋ wiɖiyi kaaʋ.+
27 Nɛ ɩkaɣ naʋ se mɛwɛ Izrayɛɛlɩ hɛkʋ taa,+Nɛ ɩkaɣ naʋ se mɛkɛnɩ mɩ-Ɛsɔ Yehowa,+ nɛ ma-wayɩ lɛ, nɔɔyʋ fɛyɩ!
Paakaɣ tasʋʋ man-samaɣ fɛyɛ ɖʋʋ wiɖiyi kaaʋ.
28 Pʋwayɩ lɛ, mankaɣ pɩyʋʋ men-fezuu+ tomnasɩ ndɩ ndɩ yɔɔ,Nɛ mɩ-pɩyalaa nɛ mɩ-pɛlaa pakaɣ yɔɔdʋʋ natʋ tɔm,Mɩ-akpadɩyaa kaɣ ɖozuu ɖoza,Nɛ mi-evebiya kaɣ naʋ natʋ.+
29 Nɛ halɩ kɩyakɩŋ ɛnɩ ɩ-taa,Mankaɣ pɩyʋʋ men-fezuu mo-yomaa abalɩñɩma nɛ mo-yomaa halɩñɩma yɔɔ.
30 Nɛ mankaɣ labʋ piti lakasɩ ɛsɔdaa nɛ tɛtʋ yɔɔ:
Calɩm, miŋ nɛ ñɔsɩ tulutulu kaɣ wɛʋ.+
31 Wɩsɩ kaɣ pɩsʋʋ cɩkpɛndʋʋ nɛ fenaɣ kaɣ pɩsʋʋ calɩm+Pʋcɔ nɛ Yehowa kɩyakʋ sɔsɔʋ ŋgʋ kɩcaɣ sɔɔndʋ yɔ kɩtalɩ.+
32 Nɛ weyi ɛyaɣ Yehowa hɩɖɛ yɔ, pakaɣ ɛ-ñʋʋ yabʋ;+Mbʋ pʋyɔɔ yɔ, ɛzɩ Yehowa yɔɔdʋʋ yɔ, nabɛyɛ kaɣ tʋlʋʋ+ Siyɔŋ Pʋʋ yɔɔ nɛ Yeruzalɛm taa,Mba Yehowa ya-wɛ nɛ pakaɣ hiɣu ñʋʋ yabʋ yɔ.»
Pɩ-tɛɛ tɔm
^ Yaa «Tɛtʋ yɔɔ.»
^ Piye piye, «abalʋ weyi.»
^ Yaa «you wondu ndʋ pɔtɔʋ yɔ.»
^ Yaa «ɛkaɣ kpiɖuu asɛyʋʋ yɔɔ.»
^ Yaa «nɛ ekpiɖi.»
^ Yaa «ɛzʋtʋyaa.»
^ Pʋ-tɔbʋʋ se Teŋgu Kɩsɩbʋʋ.
^ Pʋ-tɔbʋʋ se Mediiteraanee Teŋgu.
^ Wayɩ wayɩ tɛŋ paɣzaɣ Ðomaɣ fenaɣ hɛkʋ taa mbʋ yɔ. Cɔnɩ Tɔm kɩsɔzɩtʋ B15.
^ Kajalaɣ tɛŋ paɣzaɣ Aloma fenaɣ hɛkʋ taa mbʋ yɔ. Cɔnɩ Tɔm kɩsɔzɩtʋ B15.
