Aduwa 1:1-33
1 Izrayɛɛlɩ wiyaʋ+ Salomɔɔ, Daviid pɩyalʋ+ aduwa:+
2 Pama-yɛ se pɛkpɛlɩkɩnɩ ɛyʋ lɔŋ*+ nɛ pafalɩsɩnɩ-ɩ;Pama-yɛ se pɩsa nɛ ɛnɩɩ tɔm cukaŋ ñɩndʋ taa;
3 Se pafalɩsɩnɩ ɛyʋ+ nɛ ɛwɛɛnɩ lɛɣtʋ,Siɣsiɣ wɛtʋ,+ ɛkpaɣ lɩmaɣza kɩbana*+ nɛ ɛla mbʋ pɩtʋʋzaa yɔ;
4 Pama-yɛ se pawɩlɩnɩ lɛɣtʋ+ weyi ɛfɛyɩnɩ lɛɣtʋ yɔ;Se pahanɩ evebu sɩmtʋ nɛ lɛɣtʋ ndʋ tɩsɩɣnɩ-ɩ se ɛmaɣzɩ ɛ-ñʋʋ taa camɩyɛ yɔ.+
5 Lɔŋsɩnɖʋ welisiɣ nɛ ɛsɔzʋʋ ɛ-sɩmtʋ yɔɔ;+Weyi ɛwɛnɩ tɔm taa nɩʋ lɛɣtʋ yɔ, pakaɣ-ɩ wɩlʋʋ nʋmɔʋ kɩbaŋʋ*+
6 Se ɛnɩɩ aduwa nɛ tɔm ndʋ tɩ-taa nɩʋ wɛ kaɖɛ yɔ tɩ-tɔbʋʋ,Nɛ ɛnɩɩ lɔŋsɩnɖaa tɔm tɔbʋʋ nɛ pe-ɖimɖimɖanaa tɔbʋʋ.+
7 Yehowa sɔɔndʋ seu kɛnɩ sɩmtʋ ɖɩbazɩyɛ.+
Kɩmɛlɛmɩŋ ɖeke niŋni lɔŋsɩnɖɛ nɛ lɔŋ sɩɣzʋʋ.+
8 Man-pɩyalʋ, welisi lɔŋ weyi ña-caa sɩɣzɩɣ-ŋ yɔ,+Nɛ taalɔ tɔm ndʋ ño-ɖoo wɩlɩɣ-ŋ yɔ.*+
9 Tɩwɛ ɛzɩ awiya hulaɣ* kɩbaŋa yɔ ña-ñʋʋ taa+Nɛ tɩwɛɛ ɖɔɖɔ ɛzɩ lɩtʋ kɩbandʋ yɔ ñe-liu tɛɛ.+
10 Man-pɩyalʋ, ye kɩwɛɛkɩm laɖaa ɩñɩnɩɣ se pepeɣzi-ŋ yɔ, taatisi.+
11 Ye peheyi-ŋ se: «Kɔɔ nɛ ɖɩɖɛɛ.
Ðiwolo ɖɩpabɩ ɛyaa nɛ ɖɩkʋ-wɛ.
Ðɩkaɣ mɛlʋʋ nɛ ɖɩɖaŋ mba patɩɖɔɔ wɛɛ naayɛ yɔ nɛ ɖɩlabɩ-wɛ kɩdɛkɛdɩm ɖulum.
12 Ðɩkaɣ-wɛ libu nɛ pɛ-ɛsa ɛzɩ Pɩlaʋ* lakʋʋ yɔ,Ðiliki-wɛ pilim ɛzɩ mba petiki pɔʋ taa yɔ.
13 Ðɩkaɣ mʋʋ po-wondu ndʋ tɩmʋ ñɩm yɔ tɩ-tɩŋa;Ðɩkaɣ haɣzʋʋ ɖa-ɖɩsɩ nɛ ñɩm mbʋ ɖɩlazaa yɔ.
14 Kpɛndɩ ɖɔ-yɔɔ,*Nɛ ɖɩkaɣ tayʋʋ mbʋ ɖɩmɩlaa yɔ kɩmaŋ.»*
15 Man-pɩyalʋ, taatɩŋ pa-wayɩ.
Ña-nɩŋgbanzɩ ɩtaaɖʋ pa-nʋmɔʋ taa,+
16 Mbʋ pʋyɔɔ yɔ pa-nɩŋgbanzɩ seɣ se siwolo nɛ sɩla kɩdɛkɛdɩm;Pekpedesiɣ se pɛkpɛdɩ calɩm.+
17 Ye poposi piyuu sumaɣ ɛsɩndaa yɔ, pɩkɛ falaa.
18 Pʋyɔɔ ɛyaa mba, papabɩɣ lalaa se pakʋ-wɛ;Pɛmɛlɩɣ se palɩzɩ ɛyaa lalaa weziŋ.*
19 Mba patɩŋɩɣnɩ nʋmɔʋ kɩdɛkɛdʋʋ yɔɔ nɛ pañɩnɩɣ kɛzɛɣa yɔ pɔ-ɖɔnɛ lɛ,Nɛ ŋga kaɣnɩ lɩzʋʋ mba pehikiɣ-kɛ yɔ pe-weziŋ.*+
20 Lɔŋsɩnɖɛ siŋŋ+ makɩ kubusi ɖoŋ habɩyɛ yɔɔ.+
Ðɩwɛɛ nɛ ɖikou kpem samaɣ kadasɩ taa.+
21 Ðɩmakɩ kubusi habɛɛ wena a-yɔɔ ɛyaa ɖɔwa yɔ a-kɔnanaa taa.
Ðɩyɔɔdʋʋ tɛtʋ nɔnɔsɩ taa se:+
22 «Mba mɩ ɩfɛyɩnɩ lɛɣtʋ yɔ, ɩsɔɔlʋʋ kɩɩsɩŋɩyɩtʋ nɛ pɩkɔɔ nɛ pɩsɩɩnɩ ɖooye?
Ɛyaa woŋiyaa mɩ, ɩsɔɔlʋʋ lalaa woŋuu nɛ pɩkɔɔ nɛ pɩsɩɩnɩ ɖooye?
Nɛ kɩmɛlɛmɩŋ mɩ, ɩpaɖɩɣ sɩmtʋ nɛ pɩkɔɔ nɛ pɩsɩɩnɩ ɖooye?+
23 Ɩmʋ mɔ-lɔŋ sɩɣzʋʋ.*+
Ðɩnɛ ɛlɛ mankaɣ pɩyʋʋ men-fezuu mɩ-yɔɔ;Mankaɣ yebu nɛ ɩtɩlɩ mɔn-tɔm.+
24 Mbʋ pʋyɔɔ yɔ mamabɩ kubuka, ɛlɛ ikizi welisuu,Monposi me-nesi, ɛlɛ mɩ-taa nɔɔyʋ tikemni-m,+
25 Ɩɩwɛɛ nɛ iniŋ lɔŋ weyi mantasaɣ-mɩ yɔNɛ iikizaa ɖɔɖɔ se mantaakalɩ-mɩ,
26 Ma ɖɔɖɔ mankaɣ-mɩ woŋuu alɩwaatʋ ndʋ asɛyʋʋ talɩɣ-mɩ yɔMankaɣ-mɩ woŋuu alɩwaatʋ ndʋ mbʋ iseɣ sɔɔndʋ yɔ pɩtalɩɣ-mɩ yɔ,+
27 Alɩwaatʋ ndʋ mbʋ iseɣ sɔɔndʋ yɔ pɩtalɩɣ-mɩ ɛzɩ tɛʋ ŋgʋ kɩnɩɣnɩ helim sɔsɔm yɔ,Alɩwaatʋ ndʋ asɛyʋʋ talɩɣ-mɩ ɛzɩ helim sɔsɔm yɔ,Alɩwaatʋ ndʋ kʋñɔŋ nɛ kaɖɛ talɩɣ-mɩ yɔ.
28 Alɩwaatʋ ndʋ tɩ-taa, pɛwɛɣ-m yaʋ yɔɔ, ɛlɛ maakaɣ-wɛ cosuu;Pakaɣ-m ñɩnʋʋ kpem, ɛlɛ paakaɣ-m naʋ,+
29 Mbʋ pʋyɔɔ yɔ papaɖɩ sɩmtʋ,+Nɛ patɩlɩzɩ se peseɣ Yehowa sɔɔndʋ.+
30 Pekizi mɔ-lɔŋ tasʋʋ;Patɩña lɔŋ weyi payɩ mansɩɣzɩ-wɛ yɔ.
31 Pʋyɔɔ lɛ, pakaɣ hiɣu pɔ-ɖɔnɛ kɛzɛɣa,*+Nɛ pa-maɣmaɣ pɔ-lɔŋ tasʋʋ* kaɣ-wɛ wizuu.
32 Mbʋ pʋyɔɔ yɔ mba pɛfɛyɩnɩ lɛɣtʋ yɔ pa-kaañamtʋ kaɣnɩ-wɛ kʋʋ,Kɩmɛlɛmɩŋ paa fɛyɩnɩ nabʋyʋ, nɛ mbʋ kaɣnɩ-wɛ ɖɩzʋʋ.
33 Ɛlɛ weyi ewelisiɣni-m yɔ, ɛkaɣ caɣʋ pɛɛyɛ taa+Nɛ sɔɔndʋ ɛɛkaɣ-ɩ kpaʋ nɛ asɛyʋʋ.»+
Pɩ-tɛɛ tɔm
^ Piye piye, «se ɛyʋ ɛtɩlɩ lɔŋ nɛ lɔŋ sɩɣzʋʋ.»
^ Yaa «ɛla mbʋ pɩwɛ siɣsiɣ yɔ.»
^ Yaa «ɛkaɣ hiɣu lɔŋ tasʋʋ kɩbam.»
^ Yaa «taalɔ ño-ɖoo paɣtʋ.»
^ Yaa «hulaɣ ŋga palʋ-kɛ nɛ hɛtʋ yɔ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «ɖɩkaɣ kaʋ huyuu (liidiye pataka) kʋɖʋmʋʋ.»
^ Yaa «Ðɩkpɛndɩ nɛ ɖɩtɔ piye.»
^ Yaa «kalɩzasɩ.»
^ Yaa «pa-kalɩzasɩ.»
^ Yaa «Ɩpɩsɩ alɩwaatʋ ndʋ mɔhɔŋ mɩ-nɩŋgbaŋʋʋ yɔ.»
^ Piye piye, «pakaɣ tɔɔʋ pee wena pa-nʋmɔʋ lʋlʋʋ yɔ.»
^ Yaa «Nɛ mbʋ pa-maɣmaɣ pɛkpɛyaa yɔ; Nɛ pa-maɣmaɣ pa-tamasɩ.»
