Aduwa 11:1-31
11 Yehowa paɖɩɣ mulum* kɩmaɣzɩŋ,Ɛlɛ yuŋ kɩmaɣzʋʋ ŋgʋ kɩwɛ siɣsiɣ yɔ,* kɩhaɣ-ɩ taa leleŋ.+
2 Tɩ kpazʋʋ kɔŋ lɛ, fɛyɛ kaɣnɩ tɩŋʋʋ pʋwayɩ,+Ɛlɛ lɔŋsɩnɖɛ wɛ mba poluzuu pa-tɩ yɔ* pɔ-cɔlɔ.+
3 Ɛyaa siɣsiɣ tɩnaa cɩŋgɩlɩm wɛtʋ ɖiyiɣni-wɛ,+Ɛlɛ agutaaku tɩnaa tɛ pɩ-tɛɛ nɛ pɩ-yɔɔ lakasɩ kaɣnɩ-wɛ ɖɩzʋʋ.+
4 Ñɩm ɛɛkaɣ wazʋʋ pʋyʋ pana kɩyakʋ wiye,+Ɛlɛ siɣsiɣ wɛtʋ kaɣnɩ ɛyʋ holuu nɛ sɩm taa.+
5 Ɛyʋ weyi ɛfɛyɩnɩ kɩwɛɛkɩtʋ natʋyʋ yɔ, e-siɣsiɣ wɛtʋ lakɩna nɛ ɛ-nʋmɔʋ tʋʋzʋʋ,Ɛlɛ kañatʋ tʋ kaɣ tɔlʋʋ ɛ-kañatʋ lakasɩ yɔɔ.+
6 Ɛyaa siɣsiɣ tɩnaa siɣsiɣ wɛtʋ kaɣnɩ-wɛ holuu,+Ɛlɛ agutaaku tɩnaa kaɣ tɔlʋʋ mbʋ pe-liu wɛɛ yɔ pɩ-kpaca taa.+
7 Kañatʋ tʋ sɩkɩ lɛ, e-lidaʋ ɖʋʋ lɩm;Nɛ mbʋ ɛtaɣaɣ liu se ɛlakɩnɩ e-ɖoŋ tʋmɩyɛ nɛ ehiɣ yɔ, pɩɖʋʋ lɩm ɖɔɖɔ.+
8 Poholuu ɛyʋ siɣsiɣ tʋ kʋñɔŋ taa,Nɛ kañatʋ tʋ lɛɣzɩɣ e-lone taa.+
9 Weyi ɛɛñaŋ Ɛsɔ yɔ,* ɛtɩŋɩɣnɩ ɛ-yɔɔdaɣ yɔɔ nɛ ɛɖʋzʋʋ e-koobu,Ɛlɛ sɩmtʋ holuuni ɛyaa siɣsiɣ tɩnaa.+
10 Ɛyaa siɣsiɣ tɩnaa kɩbandʋ labʋ yeki nɛ tɛtʋ wɛɣ laŋhʋlʋmɩyɛ taa,Nɛ kañatʋ tɩnaa sɩkɩ lɛ, ɛyaa makɩ taa leleŋ kubusi.+
11 Ɛyaa siɣsiɣ tɩnaa wazasɩ yɔɔ lɛ, tɛtʋ pɩsɩɣ tɛtʋ sɔsɔtʋ,+Ɛlɛ kañatʋ tɩnaa yɔkʋʋ-tʋ nɛ pɔ-nɔsɩ.+
12 Ɛyʋ weyi ɛ-ñʋʋ taa fɛyɩ yɔ,* eniŋ e-koobu,*Ɛlɛ ɛyʋ weyi ɛwɛnɩ lɛɣtʋ siŋŋ yɔ, esuŋ tamɩyɛ.+
13 Kɔlɔmɔtʋ tʋ yɛlɩɣnɩ mɛsaɣ tɛɛ tɔm,+Ɛlɛ ɛyʋ weyi papɩzɩɣ nɛ pataa-ɩ liu yɔ,* eekuluu mɛsaɣ tɛɛ tɔm yɔɔ.*
14 Ye paawɩlɩɣ samaɣ nʋmɔʋ camɩyɛ yɔ,* kɔtɔkɩ kʋñɔŋ,Ɛlɛ ɖenɖe lɔŋ tasɩyaa sakɩyɛ wɛɛ yɔ, peeɖe pɩɖɔŋ camɩyɛ.*+
15 Weyi eɖuki* se ɛhɛyɩɣ kɩmɩyɛ nɖɩ ɛgɔm tɔwaa yɔ, paa pɩɩla ɛzɩma pɩkaɣ-ɩ kɔnʋʋ kaɖɛ,+Ɛlɛ weyi ekiziɣ se ɛɛhaɣ lɛlʋ nesi nɛ pɩwɩlɩ se ɛɛlakɩ-ɩ tamaɣ yɔ, ɛwɛɣ pɛɛyɛ taa.
16 Halʋ kɩbanʋ* hikiɣ samtʋ,+Ɛlɛ abalaa kañatʋ tɩnaa mʋʋnɩ ɖoŋ lalaa ñɩm.
17 Ɛyʋ weyi ɛlakɩ camɩyɛ lakasɩ yɔ,* ɛ-maɣmaɣ pɩwazɩɣ,*+Ɛlɛ kañatʋ tʋ kɔŋnɩ ɛ-tɩ kʋñɔŋ.*+
18 Ɛyʋ kɩdɛkɛdʋ mʋʋ kɩhɛyʋʋ ŋgʋ kɩɩwazɩɣ-ɩ yɔ,+Ɛlɛ ɛyʋ weyi eɖuu siɣsiɣ wɛtʋ yɔ, ɛmʋʋ kɩhɛyʋʋ siŋŋ.+
19 Weyi ɛlʋkɩ siɣsiɣ wɛtʋ yɔɔ siŋŋ yɔ, ɛwɛ wezuu nʋmɔʋ taa,+Ɛlɛ weyi eseɣ kɩdɛkɛdɩm wayɩ yɔ, ɛwɛ sɩm nʋmɔʋ taa.
20 Yehowa paɖɩɣ mba pa-laŋa taa wɛ nabʋlɛ yɔ,+Ɛlɛ mba kɩwɛɛkɩtʋ natʋyʋ fɛyɩ pɔ-ɖɔnɛ taa yɔ, peyeki nɛ ɛ-taa lakɩ leleŋ.+
21 Ña-taa ɛtɛmnɩ tɔm tʋnɛ: Paakaɣ yebu ɛyʋ kɩdɛkɛdʋ nɛ patɩhɔ ɛ-nɩŋgbaŋʋʋ,+Ɛlɛ ɛyaa siɣsiɣ tɩnaa piya kaɣ pɩ-taa lɩʋ.
22 Halʋ weyi eɖewa, ɛlɛ ekizi se ɛɛlakɩnɩ ɛ-ñʋʋ taa maɣzɩm tʋmɩyɛ camɩyɛ yɔ,Ɛwɛ ɛzɩ sika kokooye afa mɔɔʋ tɛɛ yɔ.
23 Mbʋ ɛyaa siɣsiɣ tɩnaa liu wɛɛ yɔ, pɩkɔŋnɩ kɩbandʋ,+Ɛlɛ mbʋ kañatʋ tɩnaa ɖaŋaa yɔ, pɩkɔŋnɩ pana.
24 Nɔɔyʋ lakɩ kʋjɔʋ kpem,* nɛ mbʋ ɛwɛna yɔ pɩtɛzɩɣ ɖɔʋ kɩɖɔʋ;+Ɛlɛ ɛyʋ lɛlʋ kiziɣ haʋ mbʋ pɩɩwɛɛ se ɛha yɔ nɛ ɛpɩsɩɣ kʋñɔndʋ.+
25 Weyi ɛsɔɔlɩ* kʋjɔʋ labʋ yɔ, pɩkaɣ-ɩ ɖɔmnʋʋ camɩyɛ,*+Nɛ weyi ɛhaɣ lalaa lɩm nɛ ɛkʋʋnɩ pɔ-lɔkɔtʋ yɔ,* pakaɣ ɛ-lɔkɔtʋ kʋʋ ɖɔɖɔ.+
26 Samaɣ kaɣ lɔʋ nɔɔ kɩdɛkɛdaɣ weyi ɛpɛŋ ɛyaa tɔɔnaɣ pee yɔ ɛ-yɔɔ,Ɛlɛ kakaɣ wazʋʋ weyi ɛpɛdɩɣ-yɛ yɔ.
27 Weyi ɛñɩnɩɣ kpem se ɛla kɩbandʋ yɔ, ɛ-tɔm kaɣ kɛdɩnʋʋ Ɛsɔ,*+Ɛlɛ weyi ɛñɩnɩɣ se ɛla kɩdɛkɛdɩm yɔ, paa pɩɩlabɩ ɛzɩma yɔ, kɩdɛkɛdɩm mbʋ pɩkaɣ pɩsɩnʋʋ ɛ-yɔɔ.+
28 Weyi ɛtaɣ liu ɛ-ñɩm yɔ ɛkaɣ tɔlʋʋ,+Ɛlɛ ɛyaa siɣsiɣ tɩnaa kaɣ nɛɣdʋʋ ɛzɩ tɩŋ hatʋ yɔ.+
29 Weyi ɛkɔŋnɩ asɛyʋʋ ɛ-ɖɩɣa taa mba yɔɔ yɔ,* helim kaɣnɩ pɩsʋʋ ɛ-ñɩm,+Nɛ kɩmɛlɛŋ kaɣ kɛʋ lɔŋsɩnɖʋ lɩmɖʋyʋ.
30 Ɛyʋ siɣsiɣ tʋ lʋlʋʋ wezuu tɩʋ,+Nɛ weyi ɛwakɩ kalɩzasɩ* yɔ, ɛkɛ lɔŋsɩnɖʋ.+
31 Ye pɛhɛyɩɣ tɛtʋ yɔɔ ɛyʋ siɣsiɣ tʋ ɛ-kɩhɛyʋʋ yɔ,Paacazɩɣ yɔɔdʋʋ kañatʋ tʋ nɛ kɩwɛɛkɩm laɖʋ pɔ-tɔm!+
Pɩ-tɛɛ tɔm
^ Yaa «Ɛlɛ pɩyɛ nɖɩ ɖɩwɛ pilim yɔ.» Pɩkɛ pɩyɛ nɖɩ pamaɣzɩɣnɩ wondu yuŋ yɔ.
^ Yaa «mɩlɩm.»
^ Yaa «mba pasɩm po-ɖoŋ kamaɣ yɔ.»
^ Yaa «Tisuu yebiyu.»
^ Piye piye, «weyi ɛfɛyɩnɩ laŋɩyɛ yɔ.»
^ Yaa «ɛpɛŋ e-koobu tɛtɛ.»
^ Piye piye, «weyi ɛwɛ siɣsiɣ ɛ-maɣzɩm taa yɔ.»
^ Piye piye, «ehuuzuu tɔm yɔɔ.»
^ Yaa «Ye paatasɩɣ samaɣ lɔŋ kɩbaŋ yɔ.»
^ Yaa «peeɖe ñʋʋ yabʋ wɛɛ.»
^ Yaa «ɛlakɩ tamaɣ.»
^ Yaa «Halʋ weyi ɛ-tɔm kɛdɩnɩ ɛyaa yɔ.»
^ Yaa «weyi ɛwɛnɩ sɔɔlɩm siɣsiɣ ñɩmbʋ yɔ.»
^ Yaa «ɛlakɩ kɩbandʋ ɛ-kalɩzaɣ.»
^ Yaa «ɖʋʋ ɛ-tɩ fɛyɛ.»
^ Piye piye, «Nɔɔyʋ mɩzɩɣ.»
^ Piye piye, «weyi ɛmɩzɩɣ lalaa lɩm faaa yɔ.»
^ Piye piye, «pakaɣ yebu nɛ ɛɖʋ num.»
^ Yaa «Kalɩzaɣ ŋga kɔsɔɔlɩ.»
^ Yaa «ɛyaa.»
^ Yaa «Weyi ɛɖʋʋ fɛyɛ ɛ-ɖɩɣa taa mba yɔ.»
^ Cɔnɩ Tɔm pee sɔsɔna tɔbʋʋ lɩzʋʋ.
