Aduwa 15:1-33
15 Tɔm ndʋ pocosuuni nɔɔ kɩbaŋa* yɔ tɩhɛzɩɣ pana,+Ɛlɛ tɔm ñasʋʋ* kulusuu pana.+
2 Lɔŋsɩnɖʋ nzʋlʋmɩyɛ lakɩnɩ sɩmtʋ tʋmɩyɛ camɩyɛ,+Ɛlɛ tulaɣ nɔɔ hutuu kɩmɛlɛndʋ.
3 Yehowa ɛsa wɛ paa le,Anaɣ ɛyaa kɩdɛkɛdaa nɛ ɛyaa kɩbama.+
4 Tɔm ndʋ pɔyɔɔdʋʋnɩ nɔɔ kɩbaŋa yɔ tɩkɛnɩ* wezuu tɩʋ,+Ɛlɛ cɛtɩm tɔm yeki nɛ ɛyʋ lesiɣ lidaʋ.*
5 Kɩmɛlɛŋ niŋ kɩ-caa lɔŋ sɩɣzʋʋ,+Ɛlɛ lɔŋsɩnɖʋ mʋʋ nɩŋgbaŋʋʋ hɔmtʋ.*+
6 Ñɩm sakɩyɛ wɛ ɛyʋ siɣsiɣ tʋ ɖɩɣa taa,Ɛlɛ mbʋ kañatʋ tʋ hikiɣ* yɔ pɩkɔŋnɩ-ɩ kʋñɔŋ.+
7 Lɔŋsɩnɖʋ ndomee mɩzɩɣ sɩmtʋ,+Ɛlɛ kɩmɛlɛŋ laŋɩyɛ ñaalakɩ mbʋ.+
8 Yehowa paɖɩɣ kañatʋ tɩnaa kɩlaʋ,+Ɛlɛ ɛyaa siɣsiɣ tɩnaa adɩma kɛdɩɣnɩ-ɩ.+
9 Yehowa paɖɩɣ kañatʋ tʋ ɖɔnɛ,+Ɛlɛ ɛsɔɔlɩ weyi ɛñɩnɩɣ siɣsiɣ wɛtʋ yɔ.+
10 Weyi eyeki nʋmɔʋ kɩbaŋʋ yɔ, nɩŋgbaŋʋʋ hɔmtʋ fɛyɩ ɖeu* ɛ-ɛsɩndaa;+Ŋgʋ weyi ɛtɩsɔɔlɩ se pakalɩ-ɩ yɔ, ɛkaɣ sɩbʋ.+
11 Pɩlaʋ* nɛ ɖɩzʋʋ lone* wɛ Yehowa ɛsɩndaa kaɣlaa.+
Ye mbʋ, paacazɩɣ yɔɔdʋʋ ɛyaa laŋa tɔm kɩyɔɔdʋʋ!+
12 Ɛyaa woŋiyu tɩsɔɔlɩ weyi ɛhɔŋ ɛ-nɩŋgbaŋʋʋ yɔ,*+Ɛɛpɔzʋʋ lɔŋ tasʋʋ lɔŋsɩnɖaa.+
13 Weyi ɛ-laŋɩyɛ taa hʋlʋmaa yɔ* ɛ-ɛsɩndaa wɛɣ leleŋ,Ɛlɛ laŋɩyɛ taa wɩzasɩ yeki nɛ pitiki ɛyʋ yɔɔɔ.*+
14 Laŋɩyɛ nɖɩ ɖɩwɛnɩ tɔm taa nɩʋ lɛɣtʋ yɔ ɖɩñɩnɩɣ sɩmtʋ,+Ɛlɛ kɩmɛlɛmɩŋ nɔsɩ calɩɣ sɩ-tɩ nɛ kɩmɛlɛndʋ.*+
15 Weyi ɛlakɩ kʋñɔŋ yɔ ɛ-kɩyakɩŋ kpeekpe kɛ kɩdɛkɛdɩŋ,+Ɛlɛ weyi ɛwɛ laŋhʋlʋmɩyɛ taa yɔ,* ɛwɛ kazandʋ taa tam.+
16 Pɩwɛ weewee se ɛyʋ ɛwɛɛnɩ wondu pazɩ ɛlɛ eseɣ Yehowa sɔɔndʋ+Nɛ pɩkɩlɩ se ɛwɛɛnɩ ñɩm sakɩyɛ ɛlɛ ɛwɛɛ nɩɣzɛ taa.*+
17 Pɩwɛ weewee se ɛyʋ ɛtɔɔ ɖozi hatʋ ɖenɖe sɔɔlɩm wɛɛ yɔ+Nɛ pɩkɩlɩ se ɛyʋ ɛtɔɔ nɔ num ñɩnʋ* ɖenɖe paɖɩyɛ wɛɛ yɔ.+
18 Weyi ɛkɔʋ pana lɛɛ lɛɛ yɔ, eseɣtiɣ you;+Ɛlɛ weyi ɛwɛ nikaɣ nɛ pana kɔʋ yɔ, ɛhɛzɩɣ you.+
19 Sɔɔ su feendu tʋ nʋmɔʋ taa,*+Ɛlɛ ɛyʋ siɣsiɣ tʋ nʋmɔʋ wɛ ɛzɩ nʋmɔʋ ŋgʋ pɔyɔlɩsɩ pɩtɩŋa kɩ-taa yɔ,+
20 Pɩɣa ŋga kɛwɛnɩ lɔŋsɩnɖɛ yɔ keyeki nɛ ka-caa taa lakɩ leleŋ,+Ɛlɛ kɩmɛlɛŋ niŋ ki-ɖoo.+
21 Kɩmɛlɛndʋ wɛ tulaɣ* leleŋ,+Ɛlɛ weyi ɛwɛnɩ lɛɣtʋ yɔ, ɛkaŋ ɛsa nɛ ɛ-nʋmɔʋ cuɖuɖu nɛ ɛɖɔŋ.+
22 Tamasɩ* ɖʋʋ lɩm ɖenɖe ɛyʋ ɛɛpɔzʋʋ lɔŋ tasʋʋ yɔ,*Ɛlɛ pɩtɩŋa pɩɖɔŋ camɩyɛ ɖenɖe lɔŋ tasɩyaa sakɩyɛ wɛɛ yɔ.+
23 Ɛyʋ taa lakɩ leleŋ alɩwaatʋ ndʋ ecosuu tɔm camɩyɛ yɔ,*+Tɔm ndʋ pɔyɔɔdɩ alɩwaatʋ kɩbandʋ yɔɔ yɔ, tɩwɛ ɖeu mbʋ suwe!+
24 Weyi ɛwɛnɩ lɛɣtʋ yɔ ɛwɛ wezuu nʋmɔʋ ŋgʋ kɩkpaɣ kpaʋ yɔɔ yɔ kɩ-taa,+Nɛ kiposuu-i nɛ nʋmɔʋ ŋgʋ kitiki Pɩlaʋ* taa yɔ.+
25 Yehowa kaɣ yɔkʋʋ tɩ kpazɩyʋ ɖɩɣa,+Ɛlɛ ɛkaɣ kandɩyʋʋ lelu tɛtʋ kamasɩ yɔɔ.+
26 Yehowa paɖɩɣ tamasɩ kɩdɛkɛdɩsɩ nzɩ kañatʋ tʋ taŋ yɔ,+Ɛlɛ tɔm ndʋ tɩwɛ ɖeu yɔ tɩwɛ kele kele ɛ-ɛsɩndaa.+
27 Weyi emuluu nɛ ehikiɣ kɛzɛɣa yɔ, ɛkɔŋnɩ asɛyʋʋ ɛ-ɖɩɣa yɔɔ;*+Ɛlɛ weyi ekiziɣ mʋʋ kʋjɔʋ se emuli yɔ ɛkaɣ wɛʋ wezuu.+
28 Ɛyʋ siɣsiɣ tʋ laŋɩyɛ maɣzɩɣ camɩyɛ pʋcɔ nɛ ɖicosi tɔm yɔɔ,*+Ɛlɛ kañatʋ tʋ nɔɔ hutuu tɔm kɩdɛkɛdɩtʋ yem.
29 Yehowa posini kañatʋ tʋ siŋŋ,Ɛlɛ ewelisiɣ ɛyʋ siɣsiɣ tʋ adɩma.+
30 Ye ɛyʋ ɛyaɣ lɛlʋ ɛsɩyɛ nɛ taa leleŋ yɔ, piyeki* nɛ laŋɩyɛ nɩɣ leleŋ;Tɔm kɩbandʋ nɩʋ kpazɩɣ mɔɔ ɖoŋ.*+
31 Weyi ɛmʋʋ* nɩŋgbaŋʋʋ hɔmtʋ ndʋ tɩhaɣ wezuu yɔ,Ɛwɛɣnɩ ɖɩjaɣyɛ lɔŋsɩnɖaa hɛkʋ taa.+
32 Weyi ekiziɣ se pataasɩɣzɩ-ɩ lɔŋ yɔ, ɛpaɖɩɣ e-wezuu,*+Ɛlɛ weyi pakalɩɣ-ɩ nɛ ewelisiɣ yɔ ehikiɣ tɔm taa nɩʋ lɛɣtʋ.*+
33 Yehowa sɔɔndʋ seu kɛ falɩsʋʋ mbʋ pɩhaɣ lɔŋsɩnɖɛ yɔ,+Pʋcɔ nɛ samtʋ kɔɔ lɛ, tɩ luzuu calɩɣnɩ kɔm.+
Pɩ-tɛɛ tɔm
^ Yaa «pocosuuni sɔɔlɩm.»
^ Yaa «tɔm ndʋ tɩɖʋʋ wɩzasɩ yɔ.»
^ Yaa «Nzʋlʋmɩyɛ nɖɩ ɖɩwaɣ ɛyʋ yɔ ɖɩkɛnɩ.»
^ Piye piye, «cɛtɩm tɔm tɔyɩtʋʋ fezuu.»
^ Yaa «Ɛlɛ pakalɩɣ lɔŋsɩnɖʋ lɛ, ewelisiɣ.»
^ Yaa «kʋŋ.»
^ Yaa «nɩŋgbaŋʋʋ hɔmtʋ wɛ ɖoŋ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «nɛ Abadɔɔnɩ.»
^ Yaa «weyi ɛkalɩɣ-ɩ yɔ.»
^ Yaa «ɛ-taa wɛ leleŋ yɔ.»
^ Yaa «wɩzasɩ tɔyɩtʋʋ fezuu.»
^ Yaa «nɔsɩ seɣ kɩmɛlɛndʋ wayɩ.»
^ Yaa «weyi ɛ-laŋɩyɛ wɛ ɖeu yɔ.»
^ Yaa «ɛlɛ ɛ-lɩmaɣza taa sidi.»
^ Piye piye, «nɔ weyi pacalɩ-ɩ pulone taa yɔ.»
^ Yaa «Feendu tʋ nʋmɔʋ wɛ ɛzɩ sɔɔ koloŋa yɔ.»
^ Piye piye, «weyi ɛfɛyɩnɩ laŋɩyɛ yɔ.»
^ Yaa «ɛyʋ eeheyiɣ lɛlʋ ɛ-taa tɔm yɔ.»
^ Yaa «Kaɖʋsɩ.»
^ Piye piye, «lakɩ leleŋ nɛ tɔm ndʋ ɛ-nɔɔ cosuu yɔ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «ɛɖʋʋ fɛyɛ ɛ-ɖɩɣa.»
^ Yaa «maɣzɩɣ camɩyɛ se ɖɩtɩlɩ ndʋ ɖicosi yɔ; maɣzɩɣ nɛ pʋcɔ nɛ ɖɩyɔɔdɩ.»
^ Piye piye, «Ɛsa wena añɩlɩsɩɣ yɔ, ayeki.»
^ Piye piye, «yeki nɛ mɔɔ ɖʋʋ num.»
^ Yaa «ewelisiɣ.»
^ Yaa «ɛ-kalɩzaɣ.»
^ Piye piye, «ehikiɣ laŋɩyɛ.»
