Aduwa 28:1-28
28 Kañatʋ tɩnaa seɣ, ŋgʋ nɔɔyʋ ɛɛɖɔɔnʋʋ-wɛ,Ɛlɛ ɛzɩ mʋʋzʋʋ yɔ,* ɛyaa siɣsiɣ tɩnaa laŋa ɩɩtɔʋ.+
2 Ye tɛtʋ natʋyʋ taa ɛyaa ɩmaɣnɩ paɣtʋ yɔɔ kɔyɔ, pɛlɛɣzɩɣ ɖiyiyaa* ɖoŋ ɖoŋ,+Ɛlɛ ɛyʋ weyi ɛwɛnɩ lɛɣtʋ nɛ sɩmtʋ yɔ e-ɖoŋ taa lɛ, ɖiyiyu kaɣ leɖuu.+
3 Kʋñɔndʋ weyi emuluu ɛjam yɔ,+Ɛwɛ ɛzɩ tɛʋ ŋgʋ kɩkpakɩɣ tɔɔnaɣ tɩŋa nɛ kɩɖɛɣna yɔ.
4 Mba pamaɣnɩ paɣtʋ yɔɔ yɔ pasaŋ kañatʋ tʋ,Ɛlɛ mba pɔɖɔŋ paɣtʋ yɔɔ yɔ paba taa wɩɣnɩ-wɛ.+
5 Ɛyaa kɩdɛkɛdaa ɩɩpɩzɩɣ nɛ panɩɩ siɣsiɣ wɛtʋ tɔbʋʋ,Ɛlɛ mba pañɩnɩɣ Yehowa yɔ, papɩzɩɣ nɛ panɩɩ pɩtɩŋa pʋ-tɔbʋʋ.+
6 Kʋñɔndʋ weyi ɛɖɔŋ ɛ-cɩŋgɩlɩm wɛtʋ taa yɔ,Ɛwɛ ɖeu nɛ pɩkɩlɩ ñɩm tʋ weyi ɛ-nʋmɔŋ kɛ pɩ-tɛɛ nɛ pɩ-yɔɔ nʋmɔŋ yɔ.+
7 Pɩɣa ŋga kɛwɛnɩ tɔm taa nɩʋ lɛɣtʋ yɔ kañaŋ paɣtʋ,Ɛlɛ weyi ɛɖʋʋ taabalɩyɛ nɛ hiliŋ tɩnaa yɔ ɛɖʋʋ ɛ-caa fɛyɛ.+
8 Weyi ɛkɩndɩɣ lalaa nɛ ɛpɔzʋʋ-wɛ kɛzɛsɩ sɔsɔsɩ nɛ ɛ-ñɩm hukuu yɔ,+Eɖiɣni ɛ-ñɩm mbʋ kpeɣluu weyi ɛnaɣ kʋñɔndʋ pʋtɔdɩyɛ yɔ.+
9 Weyi ekiziɣ se ɛɛñaŋ paɣtʋ yɔ,Halɩ ɛ-adɩma caɣ kiniŋ.+
10 Weyi etolisuu ɛyʋ siɣsiɣ tʋ nɛ ɛlɛ kpaɣ nʋmɔʋ kɩdɛkɛdʋʋ yɔ, ɛkaɣ tɔlʋʋ pɔʋ ŋgʋ ɛ-maɣmaɣ ehuyaa yɔ kɩ-taa;+Ɛlɛ weyi ɛfɛyɩnɩ kɩwɛɛkɩtʋ natʋyʋ yɔ, pakaɣ-ɩ hɛyʋʋ.+
11 Ñɩm tʋ maɣzɩɣ se ɛkɛ lɔŋsɩnɖʋ,+Ɛlɛ kʋñɔndʋ weyi ɛwɛnɩ lɛɣtʋ yɔ ɛpɩzɩɣ nɛ ɛtɩlɩ weyi ñɩm tʋ kɛnaa keekee yɔ.+
12 Ɛyaa siɣsiɣ tɩnaa wakɩ lɛ, pɩkɛɣnɩ samtʋ sɔsɔtʋ;Ɛlɛ alɩwaatʋ ndʋ kañatʋ tɩnaa paɣzɩɣ kewiyitu tɔɔʋ lɛ, samaɣ seɣ nɛ kɛmɛlɩɣ.+
13 Weyi ehuuzuu ɛ-kɩwɛɛkɩm yɔɔ yɔ, pɩɩkaɣ-ɩ ɖenuu,+Ɛlɛ weyi ekuluu ɛ-kɩwɛɛkɩm yɔɔ nɛ eyeki pɩ-labʋ yɔ, pakaɣ ɛ-pʋtɔdɩyɛ naʋ.+
14 Koboyaɣ tʋ lɛ weyi ɛcakɩnɩ ɛ-ɛsa tam yɔ,*Ɛlɛ weyi eyeki nɛ ɛ-laŋɩyɛ sʋʋ kpɩzɩŋ yɔ ɛkaɣ tɔlʋʋ asɛyʋʋ taa.+
15 Ðiyiyu kañatʋ tʋ weyi ɛtɔkɩ kewiyitu samaɣ ŋga kɛfɛyɩnɩ ɖoŋ nɩɩyɩ yɔ kɔ-yɔɔ yɔ,Ɛwɛ ɛzɩ mʋʋzʋʋ ŋgʋ kɩmʋdʋʋ yɔ, nɛ kpemtɔɔyaɣ ŋga kaɖʋʋ kpɩnɛ naɖɩyɛ wayɩ yɔ.+
16 Ðiyiyu weyi ɛfɛyɩnɩ lɛɣtʋ yɔ, ɛɖɛlɛsɩɣ niye e-ɖoŋ tʋmɩyɛ labɩnʋʋ taa;+Ɛlɛ weyi ɛpaɖɩɣ mulum kɛzɛɣa yɔ, e-wezuu caɣʋ kɩyakɩŋ kaɣ ɖɔʋ.+
17 Weyi ɛlɩzɩɣ lɛlʋ wezuu nɛ ɛɖɔɔ calɩm kpɛdʋʋ wɛɛ yɔ,* ɛkaɣ wɛʋ seu yɔɔ nɛ pɩkɔɔ nɛ pɩtalɩ pɩlaʋ* taa.+
Nɔɔyʋ ɛtaaɖʋ-ɩ nesi.
18 Weyi kɩwɛɛkɩtʋ natʋyʋ fɛyɩ ɛ-ɖɔnɛ taa yɔ, ɛkaɣ hiɣu ñʋʋ yabʋ,+Ɛlɛ weyi ɛ-nʋmɔŋ tɩtʋʋzɩ yɔ, ɛkaɣ tɔlʋʋ tuda.+
19 Ɛyʋ weyi ɛhayɩɣ ɛ-tɛtʋ yɔ, ɛkaɣ wɛnʋʋ tɔɔnaɣ sakɩyɛ,Ɛlɛ weyi ɛɖʋʋ mbʋ pɩɩwazɩɣ pʋyʋ yɔ pɩ-wayɩ yɔ, ɛkaɣ wɛʋ kʋñɔndʋtʋ taa kiya.+
20 Ɛyʋ siɣsiɣ tʋ kaɣ hiɣu wazasɩ sakɩyɛ,+Ɛlɛ weyi ekpedesiɣ se ɛpɩsɩ ñɩm tʋ yɔ, ɛɛkaɣ lɩʋ cɩŋgɩlɩm nɛ ɛtɩɖɔɔ wɛɛ.+
21 Pɩfɛyɩ ɖeu se ɛyʋ ɛla ɛsɩmɩyɛ yɔɔ lakasɩ;+Ɛlɛ kpɔnɔ hɔɔlaɣ yɔɔ lɛ, ɛyʋ pɩzɩɣ nɛ ɛla kɩdɛkɛdɩm.
22 Ɛsɩsɛmɩyɛ* tʋ seliɣ ñɩm yɔɔ,Ɛlɛ ɛɛsɩŋ se kʋñɔndʋtʋ kaɣ-ɩ talʋʋ.
23 Weyi ɛkalɩɣ ɛyʋ nɔɔyʋ yɔ,+ pakaɣ-ɩ ñam pʋwayɩ+Nɛ pɩkɩlɩ weyi epeɣziɣni nɔɔ leleŋ yɔ.
24 Weyi ɛmɩlɩɣ ɛ-caa nɛ e-ɖoo nɛ ɛtɔŋ se: «Pɩtɩwɛɛkɩ pʋyʋ» yɔ,+Ɛkɛ ɛyʋ weyi ɛkɔŋnɩ asɛyʋʋ yɔ ɛ-ɛgbaɣdʋ.+
25 Ɛsa naɣ naɣ tʋ seɣtiɣ* you,Ɛlɛ weyi ɛtaɣ Yehowa liu yɔ, pɩkaɣ-ɩ ɖɔmnʋʋ camɩyɛ.*+
26 Weyi ɛtaɣ ɛ-maɣmaɣ ɛ-laŋɩyɛ liu yɔ, ɛkɛ kɩmɛlɛŋ;+Ɛlɛ weyi ɛɖɔŋnɩ lɔŋsɩnɖɛ yɔ, ɛkaɣ lɩʋ pɩ-taa.+
27 Weyi ɛhaɣ kʋñɔndɩnaa yɔ ɛɛkaɣ tɛɖʋʋ nabʋyʋ,+Ɛlɛ weyi ehuuzuu ɛ-ɛsa se ɛtaana pa-kʋñɔndʋtʋ yɔ, pakaɣ nɔɔ kɩdɛkɛdaɣ lɔʋ ɛ-yɔɔ tam sakɩyɛ.
28 Kañatʋ tɩnaa paɣzɩɣ kewiyitu tɔɔʋ lɛ, ɛyʋ mɛlɩɣ;Ɛlɛ pɛtɛŋɩlɩɣ lɛ, ɛyaa siɣsiɣ tɩnaa hukuu.+
Pɩ-tɛɛ tɔm
^ Mʋʋzʋʋ ŋgʋ kɩ nɛ ki-ɖoŋ nɛ kɩtɩkpadɩyɩ yɔ kɩ-tɔm pɔyɔɔdʋʋ.
^ Yaa «awumbiya.»
^ Yaa «weyi ɛwɛ sɔɔndʋ taa tam yɔ.»
^ Yaa «Weyi ɛkpakɩɣ kalɩzaɣ nakɛyɛ calɩm sʋʋtʋ yɔ.»
^ Yaa «pɔʋ.»
^ Yaa «Ɛsa naɣ naɣ.»
^ Pɩpɩzɩɣ pɩkɛ, «Kalɩzaɣ ŋga kakpazɩɣ ka-tɩ yɔ keseɣtiɣ.»
^ Piye piye, «ɛkaɣ ɖʋʋ num.»
