Aduwa 30:1-33
30 Tɔm kɩcɛyɩtʋ tʋnɛ Yakee pɩyalʋ Aguur heyi Itiyɛɛlɩ, eheyi-tʋ Itiyɛɛlɩ nɛ Ukaalɩ:
2 Mɛnkɛ kɩɩsɩŋɩyʋ nɛ pɩkɩlɩ ɛyaa tɩŋa,+Nɛ mɛnfɛyɩnɩ tɔm taa nɩʋ lɛɣtʋ ndʋ pɩpɔzʋʋ ɛyʋ yɔ.
3 Mantɩkpɛlɩkɩ lɔŋsɩnɖɛ,Nɛ mɛnfɛyɩnɩ Kiɖeɖema Taa Kiɖeɖeu sɩmtʋ.
4 Akpa ɛsɔdaa nɛ ɛpɩsɩ etii?+
Akpeɣli helim ɛ-nandasɩ 2 taa?
Ahɔkɩ lɩm e-toko taa?+
Asɩ* tɛtʋ kamasɩ kpeekpe?+
Payaɣ-ɩ suwe nɛ payaɣ ɛ-pɩyalʋ suwe? Ye ŋsɩma yɔ cosi-m.
5 Ɛsɔ tɔm kpeekpe wɛ kele kele.*+
Ɛkɛ kpayʋʋ mba paɖʋʋ-ɩ kʋyʋʋ yɔ.+
6 Taasɔzɩ tɔm natʋyʋ ɛ-tɔm yɔɔ,+Pɩtɩkɛ mbʋ yɔ, ɛkaɣ hɔm ña-nɩŋgbaŋʋʋ,Nɛ pɩkaɣ wɩlʋʋ se ŋkɛ cɛtɩyʋ.
7 Wondu 2 mɔnpɔzʋʋ-ŋ.
Taapɛmɩ-m tʋ pʋcɔ nɛ mansɩ.
8 Posi-m nɛ pɔbɔtʋ nɛ cɛtɩm tɔm.+
Taaha-m kʋñɔndʋtʋ yaa ñɩm.
Ñɩtɩ ŋyele nɛ mɔntɔɔ tɔɔnaɣ ŋga kamakɩnɩ-m yɔ,+
9 Nɛ pɩtaakɛdɩ nɛ mahaɣ nɛ menkizi-ŋ nɛ mɔyɔɔdɩ se: «Anɩ Yehowa kɛ?»+
Taayele ɖɔɖɔ nɛ manpɩsɩ kʋñɔndʋ nɛ piyele nɛ mamɩlɩ nɛ manɖʋ fɛyɛ* mɛ-Ɛsɔ hɩɖɛ.
10 Taawɛɛkɩ lɩmɖʋyʋ hɩɖɛ ɛ-tʋ cɔlɔ,Pɩtɩkɛ mbʋ yɔ, ɛkaɣ lɔʋ ñɔ-yɔɔ nɔɔ kɩdɛkɛdaɣ nɛ ñɔ-tɔm kaɣ sɩbʋ.+
11 Kpaɖʋʋ nakʋyʋ wɛɛ lɛ, kɩlɔʋ nɔɔ kɩdɛkɛdaɣ kɩ-caa yɔɔNɛ kɩɩwazɩɣ ki-ɖoo.+
12 Kpaɖʋʋ nakʋyʋ wɛɛ lɛ, kɩwɛ kele kele kɩ-maɣmaɣ kɩ-ɛsɩndaa,+Ɛlɛ patɩñalɩ kɩ-yɔɔ kɩ-azuluma.*
13 Kpaɖʋʋ nakʋyʋ wɛɛ lɛ, kɩ-ɛsa kpazɩɣ a-tɩ kpemNɛ kɩ-ɛsa cɔŋnɩnɩ tɩ kpazʋʋ kamaɣ fɛyɩ!+
14 Kpaɖʋʋ nakʋyʋ wɛɛ lɛ, ki-kela wɛ ɛzɩ laɣla yɔNɛ kɩ-tamasɩ wɛ ɛzɩ sɩsɩ nzɩ pakʋʋna yɔ;Kɩpʋʋtʋʋ tɛtʋ yɔɔ ajamaaNɛ ɛyaa hɛkʋ taa kʋñɔndɩnaa.+
15 Azʋʋmnaa* wɛnɩ pɛlaa 2, nɛ paba makɩ kubusi se: «Kɔna! Kɔna!»
Wondu 3 wɛɛ lɛ, tɩɩhakɩ kaaʋ,Nɛ wondu 4 wɛɛ lɛ, tɩɩtɔŋ kpa se: «Pɩmaɣ mbʋ!»
16 —Pɩlaʋ*+ nɛ lotu kaalʋlaɣ,Tɛtʋ ndʋ tɩtɛɖɩɣ lɩm yɔ,Nɛ miŋ weyi ɛɛtɔŋ kaaʋ se: «Pɩmaɣ mbʋ!» yɔ.
17 Ɛsɩyɛ nɖɩ ɖiwoŋuu caja nɛ ɖiniŋ ñamtʋ ndʋ pɩwɛɛ se ɖɩcɛlɩ ɖoyo yɔ,+Fɛɛʋ* taa kaŋgala kaɣ-ɖɩ lom nɛ akpɛzɩ-ɖɩ,Nɛ kpeluu* piya kaɣ-ɖɩ tɔɔʋ.+
18 Wondu 3 wɛɛ lɛ, tɩcɛzɩ mɔn-tɔm taa nɩʋ lɛɣtʋ,*Nɛ wondu 4 wɛɛ lɛ, maanɩɣ tɩ-tɔbʋʋ:
19 Nʋmɔʋ ŋgʋ kpeluu* kpakɩɣ ɛsɔdaa yɔ,Nʋmɔʋ ŋgʋ ɖʋm kpakɩɣ kaaʋ yɔɔ yɔ,Nʋmɔʋ ŋgʋ mɛlɛ kpakɩɣ teŋgu yɔɔ yɔ,Nɛ nʋmɔʋ ŋgʋ abalʋ kpakɩɣ alɩwaatʋ ndʋ ɛwɛɣ pɛlɛ cɔlɔ yɔ.
20 Halʋ acɛyɛ tʋ lakasɩ yɔ:
Ɛtɔkɩ nɛ ɛhɩzɩ ɛ-nɔɔ;Nɛ pʋwayɩ lɛ, ɛtɔ se: «Mantɩla kɩwɛɛkɩm nabʋyʋ.»+
21 Wondu 3 wɛɛ lɛ, tɩlakɩ nɛ tɛtʋ seliɣ,Nɛ wondu 4 wɛɛ lɛ, tɛtʋ ɛɛpɩzɩɣ tɩ-tɔm:
22 Alɩwaatʋ ndʋ yom pɩsɩɣ wiyaʋ yɔ,+Alɩwaatʋ ndʋ tɔɔnaɣ tɔyʋʋnɩ kɩmɛlɛŋ yem yɔ,
23 Alɩwaatʋ ndʋ halʋ weyi papaɖɩ-ɩ* yɔ ɛwalɩɣ yɔ,Nɛ alɩwaatʋ ndʋ lɩmɖʋyʋ halɩñɩnʋ mʋʋ e-ɖoo lone yɔ.+
24 Wondu 4 wɛɛ, nɛ tɩwɛ tɛtʋ yɔɔ wondu ndʋ tɩkɩlɩ kɔzʋʋ yɔ tɩ-taa,Ɛlɛ palɩzɩ-tʋ nɛ tɩ-lɔŋ:*+
25 Kayɩmasɩ kɛ wondu kɩlɩzɩtʋ ndʋ tɩfɛyɩ ɖoŋ yɔ,*Paa mbʋ yɔ, sɩñɔɔzʋʋ sɩ-tɔɔnaɣ kʋmtʋ alɩwaatʋ taa.+
26 Kaaŋ taa kozonzi+ kɛ wondu kɩlɩzɩtʋ ndʋ tɩfɛyɩ ɖoŋ yɔ,*Paa mbʋ yɔ, sɩmaɣ sɩ-ɖɩɣa kaaŋ taa.+
27 Kudoloŋ+ fɛyɩnɩ wiyaʋ,Ɛlɛ kɩ-tɩŋa kɩñɔɔzɩ kɩ-tɩ tindima taa* nɛ kɩɖɛɣ.+
28 Sɔɖɩyɛ+ ñɔʋnɩ wondu nɛ ɖɩ-nɩŋgbanzɩ,Nɛ ɖɩsʋʋ wiyaʋ ɖɩɣa taa.
29 Wondu 3 wɛɛ lɛ, tɩ-ɖɔnɛ wɛ piti,*Nɛ wondu 4 wɛɛ lɛ, tɩwɛ piti* tɩ-ɖɔnɛ taa:
30 Mʋʋzʋʋ, kpɩnɛ nɖɩ ɖɩkɩlɩ kpɩna lɛɛna ɖoŋ yɔ,Kpɩnɛ nɖɩ ɖɩɩpɩsɩɣnɩ wayɩ nɔɔyʋ ɛsɩndaa yɔ;+
31 Ɛgbandʋ haɣ; tuluu;Nɛ wiyaʋ weyi ɛ-sɔɔjanaa wɛ ɛ-cɔlɔ yɔ.
32 Ye ŋlabɩ kɩmɛlɛndʋ nɛ ŋkpazɩ ña-tɩ yɔ,+Yaa ye ŋɖʋ ña-taa se ŋlakɩ mbʋ yɔ,Huuzi ñe-nesi ñɔ-nɔɔ yɔɔ.+
33 Mbʋ pʋyɔɔ yɔ ɛzɩ pamakʋʋ naalɩm nɛ naanum lɩɣ yɔ,Nɛ ɛzɩ pañazʋʋ mɔɔʋ nɛ calɩm lɩɣ yɔ,Mbʋ ɖɔɖɔ pana kulusuu kɔŋnɩ you.+
Pɩ-tɛɛ tɔm
^ Piye piye, «Akpazɩ.»
^ Ebree tɔm piye nɖɩ pɛɖɛzɩ cɩnɛ se «kele kele» yɔ, ɖɩwɩlɩɣ ɛzɩma poyolusuu ñɩɣtʋ se tɩwɛɛ kele kele yɔ.
^ Yaa «nɛ mankaɖɩnɩ.»
^ Piye piye, «kɩ-pɩndʋ.»
^ Yaa «Kʋsʋʋsʋyɩŋ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «keziye.»
^ Yaa «Lemeɣa.»
^ Yaa «tɩwɛ-m piti kpem.»
^ Yaa «keziye.»
^ Yaa «patɩsɔɔlɩ-ɩ.»
^ Yaa «Ɛlɛ tɩwɛ lɔŋ pɩdɩɩfɛyɩ.»
^ Piye piye, «kɛ samaɣ ŋga kɛfɛyɩ ɖoŋ yɔ.»
^ Piye piye, «kɛ samaɣ ŋga kɛfɛyɩ ɖoŋ yɔ.»
^ Yaa «kɩtayɩ kɩ-tɩ tindima tindima.»
^ Yaa «tɩ-ɖɔnɛ ɖewa.»
^ Yaa «tiɖe.»
