Ebree mba 6:1-20
6 Lɛɛlɛɛyɔ, ɖɩcɛzɩ Krɩstʋ yɔɔ kajalaɣ wɩlɩtʋ;+ pʋyɔɔ lɛ iyele nɛ ɖɩlʋ nɛ ɖɩɖɛɛnɩ ɛsɩndaa nɛ ɖɩpɩɩ,+ ɖɩtaaɖaɣnɩ tigiɖe naɖɩyɛ sɩʋ, pʋ-tɔbʋʋ se tʋma kɩsɩba yɔɔ kpiɖuu nɛ Ɛsɔ yɔɔ tisuu,
2 lɩm mɩyɩsʋʋ ndɩ ndɩ wɩlɩtʋ nɛ ɛyaa yɔɔ nesi tɩnʋʋ,+ sɩɖaa femtu+ nɛ tamtam tɔm hʋʋ.
3 Nɛ mbʋ ɖɩkaɣ labʋ, ye toovenim taa Ɛsɔ etisaa yɔ.
4 Piyele nɛ ɛyaa mba ñalɩmɩyɛ kaatɛm pɔ-yɔɔ ñandʋʋ+ nɛ paɖɩŋ ɛsɔdaa kʋjɔʋ* nɛ pehiɣ fezuu kiɖeɖeu
5 nɛ paɖɩŋ Ɛsɔ tɔm kɩbandʋ nɛ ɛjaɖɛ kɩfaɖɛ nɖɩ ɖɩwɛnɩ ɛsɩndaa yɔ* ɖi-ɖoŋ
6 ɛlɛ pɔtɔlɩ yɔ,+ pɩɩtasɩɣ sam se paɖaɣnɩ-wɛ pɩsʋʋ kɩfama nɛ pekpiɖi; mbʋ pʋyɔɔ yɔ pa-maɣmaɣ paɖaɣnɩ kam Ɛsɔ Pɩyalʋ sizika yɔɔ nɛ paɖʋ-ɩ fɛyɛ ɛyaa ɛsɩndaa.+
7 Mbʋ pʋyɔɔ yɔ, tɛtʋ hikiɣ wazaɣ ŋga kalɩnɩ Ɛsɔ cɔlɔ yɔ alɩwaatʋ ndʋ tɩñɔʋ tɛʋ ŋgʋ kɩnɩɣ tɩ-yɔɔ ɖoŋ ɖoŋ yɔ kɩ-lɩm nɛ pʋwayɩ lɛ, tɩŋ ñɔʋ tɩ-yɔɔ nɛ ɩwazɩɣ mba pɔ-yɔɔ pahayɩ-tʋ yɔ.
8 Ɛlɛ ye tɩlʋlʋʋ sɔɔ nɛ sɔɔ ñɩtʋ yɔ pɔlɔʋ-tʋ, nɛ piileɖiɣ lɛ pɔlɔʋ tɩ-yɔɔ nɔɔ kɩdɛkɛdaɣ, nɛ pɩtɛŋna se pakaɣ-tʋ sɔbʋ miŋ.
9 Ɛlɛ paa ɖɩyɔɔdʋʋ mbʋ yɔ, ɖa-kʋsɔɔlaa, mɩ lɛ, ɖa-taa tɛma se ɩkaɣ hiɣu mbʋ pɩkɩlɩ ɖeu yɔ, mbʋ pɩkaɣ yebu nɛ ihiɣ ñʋʋ yabʋ yɔ.
10 Mbʋ pʋyɔɔ yɔ Ɛsɔ wɛ siɣsiɣ nɛ pʋyɔɔ lɛ, ɛɛkaɣ sɔʋ mɩ-tʋmɩyɛ nɛ sɔɔlɩm mbʋ ɩwɩlɩ ɛ-hɩɖɛ yɔɔ+ nɛ ɩɖʋ ɛyaa kiɖeɖema lɩm nɛ iɖiɣni-wɛ lɩm ɖʋʋ ɖɔɖɔ yɔ pɩ-yɔɔ.
11 Ɛlɛ ɖe-liu wɛɛ se mɩ-taa paa weyi lɛ, ɛwɛɛnɩ kpekpeka kʋɖʋmaɣ ŋga nɛ piyele nɛ ɛwɛɛnɩ tisuu siŋŋ lidaʋ yɔɔ+ nɛ pɩkɔɔ pɩtalɩ tɩnaɣ yɔɔ+
12 nɛ ɩtaapɩsɩ feendinaa;+ ɛlɛ ɩmaɣzɩɣnɩ ɛyaa mba paawɛnɩ tisuu nɛ suuɖu nɛ piyele nɛ pehiɣ tamasɩ nzɩ paalabɩ-wɛ yɔ.
13 Mbʋ pʋyɔɔ yɔ alɩwaatʋ ndʋ Ɛsɔ labɩ Abraham tamaɣ yɔ, nɔɔyʋ taakɩlɩ-ɩ se ɛpɩzɩ nɛ eɖuuni-i; pʋyɔɔ lɛ, eeɖuuni ɛ-maɣmaɣ ɛ-tɩ+
14 nɛ ɛtɔ se: «Paa pɩɩlabɩ ɛzɩma yɔ mankaɣ-ŋ wazʋʋ, nɛ paa pɩɩlabɩ ɛzɩma yɔ mankaɣ yebu nɛ ŋhuu.»+
15 Nɛ Abraham ɖʋ suuɖu nɛ pɩtɛ lɛ, ehiɣ tamaɣ ŋga paalabɩ-ɩ yɔ.
16 Mbʋ pʋyɔɔ yɔ ɛyaa ɖukini weyi ɛkɩlɩ-wɛ yɔ, nɛ po-ɖuutu yeki se nɔɔyʋ ɛtaatasɩ tɔm hɔm, mbʋ pʋyɔɔ yɔ tɩñɩkɩɣ niye se tɔm ndʋ pɔyɔɔdaa yɔ tɩkɛ toovenim.+
17 Mbʋ ɖɔɖɔ, alɩwaatʋ ndʋ Ɛsɔ kpaɣ lɩmaɣzɩyɛ se ɛtasɩɣ wɩlʋʋ kpayɩ kpayɩ mba pehikiɣ tamaɣ ŋga ɛɛlaba yɔ+ se ɛ-kaɖʋwa* ɛɛlɛɣzɩɣ yɔ lɛ, ɛtɩŋnɩ ɖuutu natʋyʋ yɔɔ nɛ ɛwɩlɩ se tɔm ndʋ tɩkɛ toovenim;
18 ɛlabɩ mbʋ se pɩsa nɛ pɩtɩŋnɩ wondu 2 ndʋ tɩɩlɛɣzɩɣ, ndʋ tɩ-taa Ɛsɔ ɛɛpɩzɩɣ nɛ ɛcɛtɩ yɔ tɩ-yɔɔ lɛ,+ ɖa mba ɖisewa nɛ ɖihiɣ ɖɩjɔzɩyɛ yɔ, ɖɩpɩzɩ nɛ ɖihiɣ ɖoŋ kpazʋʋ siŋŋ nɛ ɖɩɖɔkɩ lidaʋ ŋgʋ pasɩ ɖɛ-ɛsɩndaa yɔ kpam.
19 Ðe-lidaʋ ŋgʋ,+ kɩwɛ ɛzɩ mɛlɛ kolaɣ ŋga kɔɖɔkʋʋ kalɩzaɣ yɔ,* pɩtʋʋ fɛyɩ lidaʋ ŋgʋ kɩ-yɔɔ nɛ kɩkam camɩyɛ, nɛ kiwoki pɩsaʋ kikenduu* wayɩ,+
20 ɖenɖe Yesu+ ɖɛ-ɖʋ nɔɔ nɛ ɛsʋʋ nɛ ɛɖʋ nʋmɔʋ nɛ ɛñɔɔzɩ-ɖʋ kʋ yɔ, ɛnʋ weyi ɛpɩsɩ cɔjɔ kɩlɩm tam tam ɛzɩ Mɛlɩkisedɛɛkɩ yɔ.+
Pɩ-tɛɛ tɔm
^ Yaa «falaa kʋjɔʋ.»
^ Yaa «ɛjaɖɛ yɔɔ ɖʋtʋ ndʋ tɩkɔŋ yɔ; nɛ pɩnzɩ nzɩ sɩkɔŋ yɔ.» Cɔnɩ Tɔm pee sɔsɔna tɔbʋʋ lɩzʋʋ (Ɛjaɖɛ yɔɔ ɖʋtʋ).
^ Yaa «ɛ-lɔŋ tasʋʋ.»
^ Yaa «ŋga kɔɖɔkʋʋ ɖe-weziŋ yɔ.»
^ Pʋ-tɔbʋʋ se pɩsaʋ ŋgʋ kɩtayɩɣ Lone Kiɖeɖeye nɛ Lone Kiɖeɖeye nɖɩ ɖɩkpaɖaa yɔ pɛ-hɛkʋ taa templo taa yɔ.
