Ebree mba 7:1-28
7 Mbʋ pʋyɔɔ yɔ, Mɛlɩkisedɛɛkɩ ɛnʋ, weyi ɛɛkɛ Salɛm wiyaʋ nɛ Ɛsɔ Kɩlɩm cɔjɔ yɔ, ɛɛkatɩ Abraham alɩwaatʋ ndʋ ɛlɛ kaalɩnɩ awiya ɖɩgʋyɛ nɛ ɛpɩsɩɣ yɔ, nɛ ɛwazɩ-ɩ,+
2 nɛ Abraham ha-ɩ pɩtɩŋa pɩ-hɔɔlʋʋ 10 ñɩŋgʋ. Kajalaɣ lɛ, ɛ-hɩɖɛ tɔbʋʋ lɛ «Siɣsiɣ wɛtʋ wiyaʋ,» nɛ ɛkɛ ɖɔɖɔ Salɛm wiyaʋ, pʋ-tɔbʋʋ se, «Laŋhɛzɩyɛ wiyaʋ.»
3 Ɛtaawɛɛnɩ caa, ɖoo, nɛ liɖe, nɛ patɩyɔɔdɩ ɖɔɖɔ ɛ-lʋlʋʋ nɛ ɛ-sɩm tɔm;* pʋyɔɔ lɛ ɛwɛ ɛzɩ Ɛsɔ Pɩyalʋ yɔ, nɛ ɛkɛɣnɩ cɔjɔ tam.*+
4 Ɩna ɛzɩma abalʋ ɛnʋ ɛɛkɛ ɛyʋ sɔsɔ siŋŋ yɔ, ɛnʋ weyi hɔʋ ñʋʋdʋ* Abraham kaaha mbʋ eehiɣ you taa nɛ pɩkɩlɩ ɖeu yɔ pɩ-hɔɔlʋʋ 10 ñɩŋgʋ yɔ.+
5 Toovenim taa lɛ, ɛzɩ Paɣtʋ yɔɔdʋʋ yɔ, Leevi pɩyalaa+ mba pɛcɛlɩ-wɛ cɔjɔtʋ tʋmɩyɛ yɔ, paɖʋ-wɛ paɣtʋ se pamʋ hɔɔlɩŋ 10 ñɩŋ samaɣ cɔlɔ,+ pʋ-tɔbʋʋ se po-koobiya cɔlɔ, paa paba ɩɩkɛ Abraham lʋlʋʋ taa mba yɔ.*
6 Ɛlɛ abalʋ ɛnʋ, weyi ɛtɩlɩɩnɩ pe-liɖe taa yɔ, ɛmʋ Abraham cɔlɔ hɔɔlɩŋ 10 ñɩŋ nɛ ɛwazɩ weyi palabɩ-ɩ tamasɩ yɔ.+
7 Pɩtʋʋ fɛyɩ se sɔsɔ wazɩ cikpelu.
8 Nɛ kajalaɣ hɔɔlʋʋ taa lɛ, mba pasɩkɩ yɔ mba mʋʋnɩ hɔɔlɩŋ 10 ñɩŋ; ɛlɛ hɔɔlʋʋ lɛɛkʋ taa lɛ, weyi palɩzɩ ɛ-yɔɔ aseɣɖe se ɛwɛ wezuu yɔ ɛnʋ mʋʋnɩ hɔɔlɩŋ 10 ñɩŋ.+
9 Nɛ papɩzɩɣ nɛ pɔyɔɔdɩ se halɩ Leevi, weyi ɛmʋʋ hɔɔlɩŋ 10 ñɩŋ yɔ, ɛtɩŋnɩ Abraham yɔɔ nɛ ɛhɛyɩ hɔɔlɩŋ 10 ñɩŋ;
10 mbʋ pʋyɔɔ yɔ ɛɛkpɛndɩ ɛwɛ ɛ-cɔzɔ taa* alɩwaatʋ ndʋ Mɛlɩkisedɛɛkɩ katɩ ɛ-cɔzɔ ɛnʋ yɔ.+
11 Ye mbʋ, ye ɛyʋ ɛɛpɩzaɣ se ɛtɩŋnɩ Leevi cɔjɔtʋ yɔɔ nɛ ɛtalɩ pilim yɔ+ (mbʋ pʋyɔɔ yɔ tɩɩkɛ Paɣtʋ ndʋ paacɛlɩ samaɣ yɔ tɩ-hɔɔlʋʋ nakʋyʋ), ɛbɛ yɔɔ pɩtasɩ cɛyʋʋ se cɔjɔ lɛlʋ ɛkɔɔ, weyi pɔyɔɔdaa se ɛkɛ «cɔjɔ ɛzɩ Mɛlɩkisedɛɛkɩ yɔ»,+ nɛ pɩtɩkɛ «ɛzɩ Aarɔɔnɩ yɔ»?
12 Mbʋ pʋyɔɔ yɔ, ɛzɩma peɖiɣni lɛɣzʋʋ cɔjɔtʋ yɔ, pɩcɛyaa se pɛlɛɣzɩ Paɣtʋ ɖɔɖɔ.+
13 Mbʋ pʋyɔɔ yɔ, ɛyʋ weyi ɛ-yɔɔ pɔyɔɔdɩ tɔm ndʋ yɔ, cejewiye lɛɛɖɛ taa ɛɛlɩnaa, nɖɩ ɖɩ-taa tʋ nɔɔyʋ tɩla tʋmɩyɛ altaaru yɔɔ yɔ.+
14 Mbʋ pʋyɔɔ yɔ, pɩnaɣ kpayɩ kpayɩ se Yuuda cejewiye taa ɖa-Kɩbaɣlʋ lɩnaa,+ ŋgʋ Moyizi taayɔɔdɩ natʋyʋ se cɔjɔnaa lɩɣnɩ cejewiye nɖɩ ɖɩ-taa.
15 Nɛ pɩ-taa tʋ kpayɩ kpayɩ nɛ pɩkɩlɩ, alɩwaatʋ ndʋ cɔjɔ lɛlʋ+ kɔma yɔ, weyi ɛwɛ ɛzɩ Mɛlɩkisedɛɛkɩ yɔ,+
16 weyi ɛpɩsɩ cɔjɔ, ɛlɛ pɩtɩkɛ cejewiye nɖɩ ɖɩ-taa ɛlɩnaa yɔ ɖɩ-yɔɔ yɔɔ ɛpɩsɩ cɔjɔ ɛzɩ paɣtʋ pɔzʋʋ yɔ, ɛlɛ ɛpɩsɩ cɔjɔ mbʋ pʋyɔɔ yɔ ɛwɛnɩ ɖoŋ weyi ɛhaɣ-ɩ wezuu ŋgʋ paapɩzɩɣ nɛ paɖɩzɩ-kʋ yɔ.+
17 Mbʋ pʋyɔɔ yɔ, palɩzɩ ɛ-yɔɔ aseɣɖe ɖɩnɛ: «Ŋkɛ cɔjɔ tam ɛzɩ Mɛlɩkisedɛɛkɩ yɔ.»+
18 Pʋyɔɔ lɛ, pɛkɛzɩ paɣtʋ kɩbɩndʋ kɩjaʋ mbʋ pʋyɔɔ yɔ tɩwɛnɩ ɛjandʋ nɛ tɩɩwazɩɣ pʋyʋ.+
19 Mbʋ pʋyɔɔ yɔ Paɣtʋ tiyele se nabʋyʋ ɛtalɩ pilim;+ ɛlɛ lidaʋ ŋgʋ pɔkɔnaa nɛ kɩkɩlɩ ɖeu yɔ,+ kʋkʋ ñalabɩ mbʋ, nɛ kɩ-yɔɔ ɖɩtɩŋɩɣna nɛ ɖɩñɔtʋʋnɩ Ɛsɔ.+
20 Pɩtasɩ lɛ, ɖuutu natʋyʋ yɔɔ pɩtɩŋnaa nɛ cɔjɔ ɛnʋ ɛlɩɩ
21 (mbʋ pʋyɔɔ yɔ toovenim taa lɛ, ɛyaa pɩsɩ cɔjɔnaa nɛ pɩtɩtɩŋnɩ ɖuutu natʋyʋ yɔɔ, ɛlɛ ɛnɛ yɔ ɛpɩsɩ cɔjɔ pɩtɩŋnɩ ɖuutu natʋyʋ yɔɔ, nɛ Weyi eɖuu ɖuutu ndʋ yɔ ɛyɔɔdɩ ɛ-tɔm se: «Yehowa* ɖuwaa nɛ ɛɛkaɣ lɛɣzʋʋ ɛ-lɩmaɣza:* “Ŋkɛ cɔjɔ tam”»),+
22 pʋyɔɔ lɛ, Yesu pɩsɩ mbʋ pɩñɩkɩɣ niye se ɛgbɛyɛ naɖɩyɛ wɛɛ nɛ ɖɩkɩlɩ ɖeu yɔ.+
23 Pɩtasɩ lɛ, pɩɩpɔzaa se ɛyaa sakɩyɛ ɩpɩsɩ cɔjɔnaa nɛ pɛlɛɣzɩɣ ɖama,+ mbʋ pʋyɔɔ yɔ sɩm taahaɣ-wɛ nʋmɔʋ se pala cɔjɔtʋ tʋmɩyɛ tam,
24 ɛlɛ ɛwɛ wezuu tam; pʋyɔɔ lɛ,+ nɔɔyʋ ɛɛkaɣ-ɩ lɛɣzʋʋ ɛ-cɔjɔtʋ tʋmɩyɛ taa.
25 Pʋyɔɔ lɛ, ɛpɩzɩɣ ɖɔɖɔ nɛ ɛya mba patɩŋɩɣnɩ ɛ-yɔɔ nɛ pɔñɔtʋʋnɩ Ɛsɔ yɔ pa-ñʋʋ kiya, mbʋ pʋyɔɔ yɔ ɛwɛ wezuu tam se etendi pɔ-yɔɔ.+
26 Mbʋ pʋyɔɔ yɔ cɔjɔ kɩlɩm ɛnʋ pɩmʋnɩ-ɖʋ se ɖɩwɛɛna, weyi ɛwɛ siɣsiɣ, ɛfɛyɩnɩ kɩwɛɛkɩtʋ natʋyʋ, ɛfɛyɩnɩ azuluma,+ eposini kɩwɛɛkɩm laɖaa, nɛ pakpazɩ-ɩ ɖooo ɛsɔdaa yɔ.+
27 Pɩtɩcɛyɩ se ɛlaa kɩlaŋ paa kɩyakʋ ŋgʋ,+ kajalaɣ lɛ ɛ-maɣmaɣ ɛ-kɩwɛɛkɩm yɔɔ, nɛ pʋwayɩ lɛ samaɣ ñɩmbʋ yɔɔ,+ ɛzɩ cɔjɔnaa kɩlɩmwaa mba paalabʋ yɔ, mbʋ pʋyɔɔ yɔ ɛlabɩ mbʋ tam kʋɖʋm nɛ pɩkpaɣ pɩɖɛɛ alɩwaatʋ ndʋ ɛla ɛ-maɣmaɣ ɛ-tɩ yɔ.+
28 Mbʋ pʋyɔɔ yɔ, ɛyaa mba pɛwɛnɩ ɛjandʋ yɔ, mba Paɣtʋ lɩzɩɣ se pɛkɛ cɔjɔnaa kɩlɩmwaa;+ ɛlɛ ɖuutu+ ndʋ poɖuu Paɣtʋ wayɩ yɔ, Pɩyalʋ nɔɔyʋ tɩlɩzaa, weyi peyeba nɛ ɛtalɩ pilim+ tam tam yɔ.
Pɩ-tɛɛ tɔm
^ Piye piye, «Ɛfɛyɩnɩ ɖɔɖɔ kɩyakɩŋ ɖɩbazɩyɛ nɛ e-wezuu fɛyɩnɩ tɩnaɣ.»
^ Yaa «cɔjɔ alɩwaatʋ tɩŋa.»
^ Yaa «hɔʋ caja.»
^ Piye piye, «paa paba ɩɩlɩnɩ Abraham tɩnaɣ taa yɔ.»
^ Yaa «ɛɛkpɛndɩ ɛkɛ ɛ-cɔzɔ lʋlʋʋ taa tʋ weyi ɛkaɣaɣ kɔm yɔ.»
^ Cɔnɩ Tɔm kɩsɔzɩtʋ A5.
^ Yaa «ɛɛkaɣ kpiɖuu.»
