Filiipi mba 2:1-30
2 Ye mbʋ, ye ɩkpazɩɣ ɖama ɖoŋ Krɩstʋ taa yɔ, ye ɩhɛzɩɣ ɖama laŋa nɛ sɔɔlɩm yɔ, ye fezuu taa taabalɩyɛ naɖɩyɛ ɛwɛ mɩ-hɛkʋ taa yɔ, ye ɩsɔɔlʋʋ ɖama nɛ sɔɔlɩm sɔsɔm nɛ ɩnaɣ ɖama pʋtɔdɩyɛ yɔ,
2 ɩwɛɛnɩ maɣzɩm kʋɖʋmʋm nɛ sɔɔlɩm kʋɖʋmʋm, nɛ ɩla nɔɔ kʋɖʋmaɣ siŋŋ,* nɛ ɩwɛɛnɩ lɩmaɣza kʋɖʋma,+ nɛ piyele nɛ taa leleŋ su man-taa.
3 Ɩtaala nabʋyʋ nɛ nɔɔhɔnɖɛ+ yaa tɩ kpazʋʋ lɩmaɣza,+ ɛlɛ iluzi mɩ-tɩ nɛ ɩkpaɣ lalaa se pakɩlɩ-mɩ;+
4 nɛ ɩtaañɩnɩɣ mɩ-maɣmaɣ mɩ-kɛzɛsɩ ɖeke,+ ɛlɛ ɩñɩnɩɣ ɖɔɖɔ lalaa kɛzɛsɩ.+
5 Ɩwɛɛnɩ maɣzɩm pʋnɛ, mbʋ Krɩstʋ Yesu ɖɔɖɔ kaawɛna yɔ,+
6 ɛnʋ weyi paa ɛɛwɛ ɛzɩ Ɛsɔ yɔ,*+ pɩtɩkpa ɛ-ñʋʋ taa kaaʋ se ɛlʋ nɛ ɛ nɛ Ɛsɔ pɛwɛɛ kɩmaŋ yɔ.+
7 Aayɩ, ɛlɛ eyebi mbʋ payɩ ɛɛwɛna yɔ* nɛ ɛkpaɣ yom wɛtʋ+ nɛ ɛpɩsɩ ɛyʋ.*+
8 Pɩtasɩ lɛ, alɩwaatʋ ndʋ ɛkɔm ɛzɩ ɛyʋ yɔ,* eluzi ɛ-tɩ nɛ ɛña nɛ halɩ pɩtalɩ sɩm taa;+ ɛɛɛ sɩm taa, nazɩm sizika* yɔɔ.+
9 Pʋyɔɔ ɖeyi ɖeyi Ɛsɔ kpazɩ-ɩ lone sɔsɔɖɛ taa+ nɛ ɛha-ɩ hɩɖɛ nɖɩ ɖɩkɩlɩ hɩla tɩŋa payɩ yɔ faaa;+
10 se pɩsa nɛ Yesu hɩɖɛ taa lɛ, paa nʋmbɔɖɛ nɖɩ lɛ, ɖiluŋ—mba pɛwɛ ɛsɔdaa nɛ mba pɛwɛ tɛtʋ yɔɔ nɛ mba pɛwɛ tɛtɛɛ yɔ pa-nʋmbɔla+—
11 nɛ paa nzʋlʋmɩyɛ nɖɩ lɛ, ɖɩyɔɔdɩ kaɣlaa se Yesu Krɩstʋ kɛnɩ Kɩbaɣlʋ+ nɛ piyele nɛ pasa Caa Ɛsɔ.
12 Pʋyɔɔ lɛ, man-kʋsɔɔlaa, ɩñaŋaɣ paa ɛzɩmtaa alɩwaatʋ ndʋ maawɛ mɩ-cɔlɔ yɔ, nɛ paa mɛnfɛyɩ mɩ-cɔlɔ lɛɛlɛɛyɔ yɔ, ɩñaŋnɩ laŋɩyɛ pilim nɛ pɩkɩlɩ. Mbʋ ɖɔɖɔ pɩwɛɛ se iwolo pɩ-yɔɔ nɛ ɩla mɩ-maɣmaɣ mɩ-ñʋʋ yabʋ tʋmɩyɛ nɛ sɔɔndʋ nɛ seluu.
13 Mbʋ pʋyɔɔ yɔ Ɛsɔ kɛnɩ weyi ɛhaɣ-mɩ ɖoŋ ɛzɩ pɩkɛdʋʋnɩ-ɩ yɔ, se ɩsɔɔlɩ nɛ ɩtɛ ɩwɛɛnɩ ɖoŋ nɛ ɩla mbʋ payɩ ɛsɔɔlaa yɔ.
14 Ɩwɛɛ pɩtɩŋa pɩ-labʋ yɔɔ, ɛlɛ amida+ nɛ tɔm hɔm+ ɛtaawɛɛ pɩ-taa,
15 se pɩsa nɛ ɩkɛ ɛyaa mba pɛfɛyɩnɩ kɩwɛɛkɩtʋ natʋyʋ nɛ pɛwɛ kele kele yɔ, Ɛsɔ piya+ nzɩ sɩfɛyɩnɩ azuluma kpaɖʋʋ kɩdɛkɛdʋʋ ŋgʋ kɩtɩtʋʋzɩ yɔ kɩ-taa yɔ,+ ŋgʋ kɩ-taa ɩwɛɛ nɛ ɩñandɩɣ ɛjaɖɛ yɔɔ ɛzɩ mintʋsʋŋ yɔ;+
16 nɛ ɩɖɔkɩ wezuu tɔm kpam.+ Piyeki nɛ mɛwɛɛnɩ mbʋ pɩ-yɔɔ manpɩzɩɣ nɛ mɛmɛyɩ Krɩstʋ kɩyakʋ wiye yɔ, mbʋ pʋyɔɔ yɔ mantise yem falaa nɛ mantɩla tʋmɩyɛ nɛ kpekpeka yem falaa.
17 Ɛlɛ paa pɛwɛɛ nɛ papɩyɩɣ-m ɛzɩ kilizaɣ yɔ+ kɩlaʋ yɔɔ+ nɛ tʋmɩyɛ kiɖeɖeye* yɔɔ, kɩlaʋ nɛ tʋmɩyɛ kiɖeɖeye nɖɩ ɖɩ-cɔlɔ mi-tisuu ɖiyi-mɩ nɛ piwona yɔ, man-taa wɛ leleŋ nɛ ma nɛ mɩ-tɩŋa ɖɩmɛyɩɣ.
18 Mbʋ ɖɔɖɔ pɩwɛɛ se mɩ ɖɔɖɔ mɩ-taa ɛla leleŋ nɛ ɩkpɛndɩ mɔ-yɔɔ nɛ ɖɩmɛyɩ.
19 Nɛ mantaɣ liu se ye Kɩbaɣlʋ Yesu ɛsɔɔlaa yɔ, pɩkazɩ pazɩ lɛ, mentiyiɣ Timootee+ mɩ-cɔlɔ, se manɩɩ mɩ-yɔɔ tɔm nɛ mankpa ɖoŋ.
20 Mbʋ pʋyɔɔ yɔ mɛnfɛyɩnɩ nɔɔyʋ se ɛwɛnɩ wɛtʋ kɩbandʋ ɛzɩ ɛnʋ yɔ, weyi ɛkaɣ cɔnʋʋ mɩ-kɩcɛyɩm ɖeɖe siŋŋ yɔ.
21 Mbʋ pʋyɔɔ yɔ lalaa ñɩnɩɣ pa-maɣmaɣ pɛ-kɛzɛsɩ pa-tɩŋa, pɩtɩkɛ Yesu Krɩstʋ ñɩnzɩ.
22 Ɛlɛ ɩna ɛzɩma ɛwɩlaa se ɛmʋnaa yɔ, ɛzɩ pɩɣa+ nɛ ka-caa yɔ, ɛlabɩ tʋmɩyɛ mɔn-cɔlɔ ɛzɩ yom yɔ se tɔm kɩbandʋ ɛɖɛɛnɩ ɛsɩndaa.
23 Pʋyɔɔ lɛ, mantaɣ liu se ɛnʋ mankaɣ tiyuu, mañɩtɩɣ nɛ mana mbʋ pɩtɛŋnɩ-m yɔ lɛ.
24 Toovenim taa lɛ, man-taa tɛma se ye Kɩbaɣlʋ ɛsɔɔlaa yɔ, pɩkazɩ pazɩ lɛ, ma-maɣmaɣ ɖɔɖɔ mankaɣ kɔm.+
25 Ɛlɛ lɛɛlɛɛyɔ lɛ, mamaɣzɩɣ se pɩcɛyaa se mentiyi mon-koobu Epafrodiiti mɩ-cɔlɔ, ɛnʋ weyi ma nɛ ɩ ɖɩlakɩ tʋmɩyɛ nɛ ɛkɛ Krɩstʋ sɔɔja ɛzɩ ma yɔ, mɩ-maɣmaɣ mɩ-lɩmɖʋyʋ weyi itiyaa se ɛcɔnɩ man-kɩcɛyɩm ɖeɖe yɔ;+
26 mbʋ pʋyɔɔ yɔ e-liu wɛɛ pɩŋŋ se ɛna mɩ-tɩŋa, nɛ ɛwɛ laŋwɛɛkɩyɛ taa mbʋ pʋyɔɔ yɔ ɩnɩwa se pɩwɩ-ɩ.
27 Toovenim taa lɛ, pɩwɩ-ɩ nɛ ecoɖi sɩm; ɛlɛ Ɛsɔ na ɛ-pʋtɔdɩyɛ. Toovenim taa lɛ, pɩtɩkɛ e-ɖeke ɛ-pʋtɔdɩyɛ ɛnawa, ɛlɛ ɛna man-pʋtɔdɩyɛ ɖɔɖɔ, se man-kʋñɔmɩŋ ɩtaatɩnɩ ɖama yɔɔ.
28 Pʋyɔɔ lɛ, mentiyiɣ-i kpɛdɛyɛ, se pɩsa nɛ ɩna-ɩ nɛ mɩ-taa ɖaɣnɩ labʋ leleŋ nɛ ma ɖɔɖɔ mantaakɩlɩ nɩɣzʋʋ.
29 Ye mbʋ, ɩmʋ-ɩ camɩyɛ Kɩbaɣlʋ taa ɛzɩ ɩtɩɩlakʋʋ yɔ nɛ taa leleŋ tɩŋa, nɛ iwolo pɩ-yɔɔ nɛ ɩsɔɔlʋʋ ɛyaa mba pɛwɛ ɛzɩ ɛnʋ yɔ;+
30 mbʋ pʋyɔɔ yɔ ecoɖi sɩm Krɩstʋ tʋmɩyɛ yɔɔ,* ɛɖʋ e-wezuu* kaɖɛ taa se pɩsa nɛ ɛlɛɣzɩ mi-lone taa alɩwaatʋ ndʋ mɩ-maɣmaɣ ɩtaawɛɛ mɔn-cɔlɔ se ɩsɩnɩ-m yɔ.+
Pɩ-tɛɛ tɔm
^ Yaa «nɛ ɩkpɛndɩ kalɩzaɣ taa.»
^ Piye piye, «ɛɛwɛ Ɛsɔ wɛtʋ taa yɔ.»
^ Yaa «ɛlɛ ɛhɔzɩ pɩtɩŋa.»
^ Piye piye, «nɛ ɛwɛɛ ɛzɩ ɛyaa yɔ.»
^ Piye piye, «alɩwaatʋ ndʋ pana-ɩ ɛyʋ wɛtʋ taa yɔ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «nɛ samaɣ tʋmɩyɛ.»
^ Pɩpɩzɩɣ pɩkɛ, «ecoɖi sɩm Kɩbaɣlʋ tʋmɩyɛ yɔɔ.»
^ Yaa «ɛ-kalɩzaɣ.»
