Galaatii mba 1:1-24
1 Ma Pɔɔlɩ, pɩtɩkɛ ɛyaa cɔlɔ pɩlɩnaa nɛ mɛnkɛ apostoloo, nɛ pɩtɩtɩŋnɩ ɛyʋ nɔɔyʋ yɔɔ ɖɔɖɔ, ɛlɛ pɩtɩŋnɩ Yesu Krɩstʋ+ nɛ Caa Ɛsɔ,+ weyi efezi Krɩstʋ nɛ sɩɖaa taa yɔ pɔ-yɔɔ,
2 ma nɛ koobiya mba payɩ pɛwɛ mɔn-cɔlɔ yɔ, ɖetiyiɣnini takayaɣ kanɛ Galaatii agbaa:
3 Tɛtɛ nɛ ɩwɛɛnɩ lootiye nɛ laŋhɛzɩyɛ nɖɩ ɖɩlɩnɩ ɖa-Caa Ɛsɔ nɛ Kɩbaɣlʋ Yesu Krɩstʋ pɔ-cɔlɔ yɔ.
4 Ɛcɛlɩ ɛ-tɩ ɖa-kɩwɛɛkɩm yɔɔ+ se eholi-ɖʋ ɛjaɖɛ kɩdɛkɛdɩyɛ* ɖɩnɛ ɖi-nesi tɛɛ,+ ɛzɩ ɖɛ-Ɛsɔ nɛ ɖa-Caa sɔɔlʋʋ yɔ,+
5 ɛnʋ weyi pɩwɛɛ se pasamɩ-ɩ tam yɔ. Amɛn.
6 Pɩlakɩ-m piti se Weyi ɛtɩŋnɩ Krɩstʋ lootiye yɔɔ nɛ ɛyaa-mɩ yɔ, iɖiɣni-i haʋ siɣye* lɛɛ lɛɛ nɛ ɩpɩsɩɣnɩ tɔm kɩbandʋ lɛɛtʋ yɔɔ.+
7 Pɩtɩkɛ se tɔm kɩbandʋ lɛɛtʋ natʋyʋ wɛɛ; ɛlɛ nabɛyɛ wɛɛ nɛ peliɣtiɣ-mɩ+ nɛ pañɩnɩɣ se papɩsɩ tɔm kɩbandʋ ndʋ tɩyɔɔdʋʋ Krɩstʋ tɔm yɔ tuluŋa.
8 Ɛlɛ paa ɖa, yaa Ɛsɔ tiyiyu nɔɔyʋ ɛlɩnɩ ɛsɔdaa nɛ esusuu-mɩ tɔm natʋyʋ se tɩkɛ tɔm kɩbandʋ, ɛlɛ tɩwɛ ndɩ nɛ tɔm kɩbandʋ ndʋ ɖiisusi-mɩ yɔ, pɩwɛɛ se pɔlɔ ɛ-yɔɔ nɔɔ kɩdɛkɛdaɣ.
9 Ɛzɩ ɖɩyɔɔdʋʋ nɛ pɩɖɛɛ yɔ, mantasɩɣ yɔɔdʋʋ lɛɛlɛɛyɔ se: Ye nɔɔyʋ esusuu-mɩ tɔm natʋyʋ se tɩkɛ tɔm kɩbandʋ, ɛlɛ tɩwɛ ndɩ nɛ tɔm ndʋ tɩ-yɔɔ itisaa yɔ yɔ, pɩwɛɛ se pɔlɔ ɛ-yɔɔ nɔɔ kɩdɛkɛdaɣ.
10 Toovenim taa lɛ, ɛyaa yaa Ɛsɔ mañɩnɩɣ lɛɛlɛɛyɔ se mɔn-tɔm ɛkɛdɩna? Yaa mañɩnɩɣ se ɛyaa ɩsɔɔlɩ mɔn-tɔm? Ye halɩ nɛ sɔnɔ ɛyaa mañɩnɩɣ se pɔsɔɔlɩ mɔn-tɔm yɔ, mantaakɛ Krɩstʋ yom.
11 Mbʋ pʋyɔɔ yɔ koobiya, mɔnsɔɔlaa se ɩtɩlɩ se tɔm kɩbandʋ ndʋ monsusi-mɩ yɔ, tɩtɩlɩɩnɩ ɛyaa cɔlɔ;+
12 mbʋ pʋyɔɔ yɔ pɩtɩkɛ ɛyʋ nɔɔyʋ cɔlɔ mamʋ-tʋ, nɛ patɩwɩlɩ-m tʋ kɩwɩlʋ, ɛlɛ natʋ natʋyʋ yɔɔ Yesu Krɩstʋ tɩŋnaa nɛ ɛwɩlɩ-m tʋ.
13 Toovenim taa lɛ, ɩnɩ ɖɔnɛ nɖɩ mɔnɖɔŋaɣ ɖooo lɔŋ Yuuda mba Ɛsɔ sɛtʋ taa yɔ ɖɩ-tɔm,+ se manazaɣ Ɛsɔ ɛgbɛyɛ kadadayaɣ nɛ mañɩnaɣ se manɖɩzɩ-ɖɩ;+
14 nɛ mowokaɣni ɛsɩndaa siŋŋ Yuuda mba Ɛsɔ sɛtʋ taa nɛ pɩkɩlɩ man-ɖaɣʋnaa sakɩyɛ mɛ-ɛjaɖɛ taa, mbʋ pʋyɔɔ yɔ maawɛ kpekpeka siŋŋ man-caanaa sɔnzɩ taa.+
15 Ɛlɛ Ɛsɔ weyi ɛlɩzɩ-m mon-ɖoo lotu taa nɛ ɛtɩŋnɩ e-lootiye yɔɔ nɛ ɛya-m yɔ,+ alɩwaatʋ ndʋ ɛmaɣzaa se pɩwɛ ɖeu se
16 ɛtɩŋnɩ mɔ-yɔɔ nɛ ɛlɩzɩ ɛ-Pɩyalʋ nɛ ɛwɩlɩ, se pɩsa nɛ monsusi ajɛɛ ɛ-yɔɔ tɔm kɩbandʋ lɛ,+ mantɩpɔzɩ ɛyʋ nɔɔyʋ* lɔŋ tasʋʋ kpaagbaa;
17 nɛ mantɩkpa ɖɔɖɔ Yeruzalɛm, mba paakɛ apostoloowaa pʋcɔ nɛ pɩtalɩɣnɩ-m yɔ pɔ-cɔlɔ, ɛlɛ mowobi Arabii; nɛ pʋwayɩ lɛ, manpɩsɩ Damaasɩ.+
18 Nɛ pɩnzɩ 3 wayɩ lɛ, mankpa Yeruzalɛm+ se mana Sefaasɩ,*+ nɛ mancaɣ ɛ-cɔlɔ kɩyakɩŋ hiu nɛ kagbanzɩ.
19 Ɛlɛ mantaana apostoloowaa lalaa taa nɔɔyʋ nɛ pɩtasɩnɩ Kɩbaɣlʋ neu Yakubu.+
20 Lɛɛlɛɛyɔ, tɔm ndʋ menɖiɣni-mɩ maʋ yɔ tɩ-hɔɔlʋʋ taa lɛ, Ɛsɔ kɛ aseɣɖe tʋ se maacɛtɩɣ.
21 Pʋwayɩ lɛ, mowolo Siirii nɛ Siliisii ageeta taa.+
22 Ɛlɛ Krɩstʋ tɔmkpɛlɩkɩyaa mba paawɛ Yuudee agbaa taa yɔ, patɩnatɩ mɛ-ɛsɩndaa nɛ pana.
23 Panɩɣaɣ kɩnɩʋ yem se: «Abalʋ weyi ɛnazaɣ-ɖʋ ɖooo lɛ yɔ,+ lɛɛlɛɛyɔ eɖiɣni susuu tisuu mbʋ ɛñɩnaɣ ɖooo lɔŋ se ɛɖɩzɩ yɔ, pɩ-yɔɔ tɔm kɩbandʋ.»+
24 Nɛ mɔ-yɔɔ lɛ, papaɣzɩ Ɛsɔ sam.
Pɩ-tɛɛ tɔm
^ Yaa «eholi-ɖʋ ɛjaɖɛ yɔɔ ɖʋtʋ kɩdɛkɛdɩtʋ; eholi-ɖʋ pɩnzɩ kɩdɛkɛdɩsɩ.» Cɔnɩ Tɔm pee sɔsɔna tɔbʋʋ lɩzʋʋ (Ɛjaɖɛ yɔɔ ɖʋtʋ).
^ Yaa «iɖiɣni-i posinuu.»
^ Piye piye, «mantɩpɔzɩ tomnaɣ nɛ calɩm.»
^ Ɛnʋ payaɣ ɖɔɖɔ se Pɩyɛɛrɩ.
