Galaatii mba 4:1-31
4 Lɛɛlɛɛyɔ lɛ, mɔyɔɔdʋʋ se weyi pakaɣ-ɩ cɛlʋʋ ɛ-caa ñɩm yɔ, alɩwaatʋ ndʋ ɛkpɛndɩ ɛkɛ pɩɣa ɛjam yɔ, tʋkaɣ nakɛyɛ fɛyɩ ɛ nɛ yom pɛ-hɛkʋ taa, paa ɛnʋ ɛkɛnɩ wondu tɩŋa kɩbaɣlʋ yɔ;
2 ɛlɛ ɛwɛɣ ɛ-yɔɔ kandɩyaa nɛ ɖɩɣa yɔɔ cɔnɩyaa pɛ-tɛɛ pɩkɔɔ nɛ pɩtalɩ kɩyakʋ ŋgʋ ɛ-caa kaatɛm ɖʋʋ yɔ.
3 Mbʋ ɖɔɖɔ, ɖɩɩkɛ piya lɛ, ɖa ɖɔɖɔ ɖɩɩwɛ ɛjaɖɛ yɔɔ nʋmɔŋ nɛ ɖɩ-maɣzɩm* yomiye taa.+
4 Ɛlɛ alɩwaatʋ ndʋ paɖʋwa yɔ tɩtɛma lɛ, Ɛsɔ tiyi ɛ-Pɩyalʋ, weyi halʋ nɔɔyʋ lʋlɩ-ɩ+ nɛ ɛwɛɛ paɣtʋ tɛɛ yɔ,+
5 se ɛya mba pɛwɛ paɣtʋ tɛɛ yɔ nɛ eholi-wɛ,+ se pɩsa nɛ Ɛsɔ mʋ-ɖʋ ɛzɩ ɛ-pɩyalaa yɔ.+
6 Nɛ ɩkɛ pɩyalaa, pʋyɔɔ Ɛsɔ tiyi ɛ-Pɩyalʋ fezuu+ ɖa-laŋa taa,+ nɛ kɩmakɩ kubusi se: «Aba,* Caa!»+
7 Ye mbʋ, ŋtɩtasɩ kɛʋ yom ɛlɛ pɩyalʋ; nɛ ye ŋkɛ pɩyalʋ yɔ, ɖɩnɛ ɛlɛ Ɛsɔ yɔɔ lɛ, ŋkɛ ɖɔɖɔ weyi pɛcɛlɩɣ-ɩ ñɩm yɔ.+
8 Ɛlɛ ɩtaatɩɩsɩmtɩ Ɛsɔ lɛ, ɩɩkɛ mba patɩkɛ ɛsɔnaa toovenim taa yɔ, po-yomaa.
9 Ɛlɛ lɛɛlɛɛyɔ ɩkpɛlɩkʋʋ nɛ ɩtɩlɩ Ɛsɔ yɔ, yaa Ɛsɔ tɩlʋʋ-mɩ yɔ, pɩlabɩ ɛzɩma nɛ ɩtasɩɣ pɩsʋʋ ɛjaɖɛ yɔɔ* wondu ndʋ tɩwɛnɩ ɛjandʋ+ nɛ tɩtɩlɩɩ pʋyʋ yɔ tɩ-cɔlɔ nɛ ɩñɩnɩɣ se ɩtasɩ pɩsʋʋ ti-yomaa?+
10 Ɩkpakɩɣ kɩyakɩŋ nɛ fenasɩ+ nɛ wɛɛ nɛ pɩnzɩ ɛzɩ mbʋ pɩwɛ ŋgee yɔ.
11 Sɔɔndʋ kpaɣ-m se pɩtaala se mañaɣ pana yem falaa mɩ-yɔɔ.
12 Koobiya, mentendiɣ-mɩ, ɩwɛɛ ɛzɩ mɛwɛʋ yɔ, mbʋ pʋyɔɔ yɔ ma ɖɔɖɔ maawɛ ɛzɩ ɩwɛʋ yɔ.+ Ɩtɩlabɩ-m kɩdɛkɛdɩm nabʋyʋ.
13 Ɛlɛ ɩnawa se kʋdɔŋ nakʋyʋ yɔɔ maahiɣ waɖɛ kajalaɣ ɖeɖe nɛ monsusi-mɩ tɔm kɩbandʋ.
14 Nɛ paa mon-tomnaɣ taa wɛtʋ ɛɛkɛ-mɩ takɩm yɔ, itinimi-m yaa mantɩlɩɩ-mɩ sɔŋ;* ɛlɛ ɩmʋ-m ɛzɩ Ɛsɔ tiyiyu yɔ, ɛzɩ Krɩstʋ Yesu yɔ.
15 Koboyaɣ ŋga ka-taa ɩɩwɛɛ yɔ, le kɛwɛɛ? Mbʋ pʋyɔɔ yɔ malɩzɩɣ mɩ-yɔɔ aseɣɖe se ye pɩɩsaŋaɣ yɔ, ɩɩkpɛzɩ mɩ-ɛsa nɛ ɩcɛlɩ-m.+
16 Ye mbʋ, manpɩsɩ mi-koyindu mbʋ pʋyɔɔ yɔ meheyiɣ-mɩ toovenim na?
17 Pañakɩ pana siŋŋ se pɔhɔm-mɩ nɛ ɩpɩsɩnɩ pɔ-yɔɔ, ɛlɛ pɩtɩkɛ lɩmaɣza kɩbana yɔɔ; pañɩnɩɣ se pala nɛ iposini-m nɛ ɩsɔɔlɩ siŋŋ se ɩtɩŋ-wɛ.
18 Ɛlɛ pɩwɛ ɖeu paa ɛzɩmtaa se nɔɔyʋ ɛhɔm-mɩ nɛ kpekpeka lɩmaɣza kɩbana yɔɔ, nɛ pɩtaakɛ alɩwaatʋ ndʋ mɛwɛɣ mɩ-cɔlɔ yɔ ti-ɖeke,
19 men-piya ajamaa;+ mɛwɛɛ nɛ mantasɩɣ nɩʋ lʋlʋʋ wɩzasɩ mɩ-yɔɔ. Nɛ mɛwɛɣ nɛ manɩɣ-sɩ nɛ pɩkɔɔ nɛ pɩsɩɩnɩ alɩwaatʋ ndʋ ɩwɛɣnɩ Krɩstʋ wɛtʋ yɔ.
20 Maasɔɔlaa se mɛwɛɛ mɩ-cɔlɔ lɛɛlɛɛyɔ nɛ mɛlɛɣzɩ nɔɔ ŋga mɔyɔɔdɩnɩ-mɩ yɔ, mbʋ pʋyɔɔ yɔ mɩ-yɔɔ lɛ, pisidi-m yem.
21 Mɩ mba ɩsɔɔlaa se ɩwɛɛ paɣtʋ tɛɛ yɔ, iheyi-m nɛ manɩɩ: Ɩɩnɩɣ tɔm ndʋ Paɣtʋ yɔɔdʋʋ yɔ?
22 Kɩɖaʋ nakʋyʋ yɔ: Pamawa se Abraham kaawɛnɩ abalɩbiya 2, lɩmɖʋyʋ halɩñɩnʋ lʋlɩ-ɩ kʋɖʋmaɣ+ nɛ halʋ weyi ɛwɛ ɛ-tɩ yɔɔ yɔ ɛlɛ ñalʋlɩ-ɩ lɛɛka;+
23 ɛlɛ ŋga lɩmɖʋyʋ halɩñɩnʋ lʋlaa yɔ, palʋlɩ-kɛ ɖeyi ɖeyi ɛzɩ palʋlʋʋ piya lɛɛsɩ yɔ;*+ nɛ lɛɛka ŋga halʋ weyi ɛwɛ ɛ-tɩ yɔɔ yɔ ɛlʋlaa yɔ, Ɛsɔ labɩnɩ tamaɣ nɛ palʋlɩ-kɛ.+
24 Wɛtʋ tʋnɛ, tɩɩkɛ tɔm ndʋ tɩwɩlɩɣ nabʋyʋ yɔ; mbʋ pʋyɔɔ yɔ halaa mba, paasɩŋnɩ agbaa 2, paɖʋ kʋɖʋmɖɩyɛ Sinayii Pʋʋ yɔɔ,+ ɖɩlʋlʋʋ yomiye taa piya nɛ nɖɩ lɛ Agaarɩ.
25 Nɛ Agaarɩ sɩŋnɩ Sinayii,+ Arabii pʋʋ nakʋyʋ, nɛ ɛsɩŋnɩ Yeruzalɛm ŋgʋ kɩwɛ lɛɛlɛɛyɔ yɔ, mbʋ pʋyɔɔ yɔ ɛ nɛ e-piya pɛwɛ yomiye taa.
26 Ɛlɛ ɛsɔdaa Yeruzalɛm wɛ kɩ-tɩ yɔɔ, nɛ ŋgʋ lɛ ɖo-ɖoo.
27 Mbʋ pʋyɔɔ yɔ pamawa se: «Ña-taa ɛla leleŋ, ña weyi ŋkɛ halʋ kaalʋlaɣ nɛ ŋtɩlʋlɩ wiɖiyi yɔ; ma kubusi nɛ ŋmɛyɩ, ña halʋ weyi ɛtɩnɩɩ lʋlʋʋ wɩzasɩ yɔ; mbʋ pʋyɔɔ yɔ halʋ weyi peyebi-i yɔ, e-piya ɖɔwa nɛ pɩkpaɖɩ halʋ weyi ɛwɛnɩ walʋ yɔ ɛ-ñɩnzɩ.»+
28 Lɛɛlɛɛyɔ koobiya, ɩkɛ tamaɣ ŋga Ɛsɔ laba yɔ ke-piya ɛzɩ Izaakɩ yɔ.+
29 Ɛlɛ ɛzɩ pɩɣa ŋga paalʋlɩ-kɛ ɛzɩ palʋlʋʋ piya lɛɛsɩ yɔ* kaapaɣzʋʋ nazʋʋ ŋga pɩtɩŋnɩ fezuu yɔɔ nɛ palʋlɩ-kɛ yɔ,+ mbʋ ɖɔɖɔ pɩwɛ lɛɛlɛɛyɔ.+
30 Ɛlɛ suwe mayaɣ yɔɔdʋʋ? «Ðɔɔnɩ lɩmɖʋyʋ halɩñɩnʋ nɛ ɛ-pɩyalʋ, mbʋ pʋyɔɔ yɔ lɩmɖʋyʋ halɩñɩnʋ pɩyalʋ nɛ halʋ weyi ɛwɛ ɛ-tɩ yɔɔ yɔ ɛ-pɩyalʋ paakaɣ kaʋ ña-ñɩm.»+
31 Pʋyɔɔ lɛ koobiya, ɖɩtɩkɛ lɩmɖʋyʋ halɩñɩnʋ piya, ɛlɛ ɖɩkɛ halʋ weyi ɛwɛ ɛ-tɩ yɔɔ yɔ e-piya.
Pɩ-tɛɛ tɔm
^ Yaa «ɛjaɖɛ yɔɔ kajalaɣ wondu.»
^ Pɩkɛ Ebree yaa Arameya kʋnʋŋ taa tɔm piye, nɛ ɖɩ-tɔbʋʋ lɛ se «Hayɩ Caa!»
^ Yaa «pɩsʋʋ kajalaɣ.»
^ Yaa «yaa ɩtɩtɔ mɔ-yɔɔ ndaatʋ.»
^ Piye piye, «palʋlɩ-kɛ tomnaɣ taa.»
^ Piye piye, «paalʋlɩ-kɛ tomnaɣ taa yɔ.»
