Izaayii 14:1-32
14 Mbʋ pʋyɔɔ yɔ Yehowa kaɣ naʋ Yakɔɔb pʋtɔdɩyɛ,+ nɛ ɛkaɣ ɖaɣnʋʋ lɩzʋʋ Izrayɛɛlɩ.+ Ɛkaɣ-wɛ sɩʋ* pɛ-ɛjaɖɛ taa,+ nɛ agɔma kaɣ kpɛndʋʋ pɔ-yɔɔ nɛ pɔñɔɔnɩ Yakɔɔb ɖɩɣa.+
2 Nɛ ɛyaa samasɩ kaɣ-wɛ kpaɣʋ nɛ powoni-wɛ pa-maɣmaɣ po-lone taa, nɛ Izrayɛɛlɩ ɖɩɣa kaɣ-wɛ pɩsʋʋ ka-lɩmɖʋyaa abalɩñɩma nɛ halɩñɩma+ Yehowa ɛjaɖɛ taa; nɛ mba paakpa Izrayɛɛlɩ mba nɛ papɩsɩ-wɛ yomaa yɔ, Izrayɛɛlɩ mba kaɣ-wɛ kpaʋ nɛ papɩsɩ-wɛ po-yomaa. Nɛ Izrayɛɛlɩ mba kaɣ luzuu pɛ-tɛɛ mba pakpaɣaɣ Izrayɛɛlɩ mba nɛ ɖoŋ se pala tʋma yɔ.*
3 Kɩyakʋ ŋgʋ Yehowa yeki nɛ ŋhɛzɩnɩ ña-wɩzasɩ nɛ ña-kʋñɔŋ nɛ yomiye sɔsɔɖɛ nɖɩ ɖɩ-taa peyeba nɛ ŋwɛɛ yɔ,+
4 ŋkaɣ tuuu eduuye ɖɩnɛ* Babilɔɔnɩ wiyaʋ yɔɔ:
«Weyi ɛkpaɣaɣ lalaa nɛ ɖoŋ se pala tʋma yɔ,* ɛ-tɔm tɛma!
Ɛyaa nazʋʋ sɩ tɩnaɣ!+
5 Yehowa pɛlɩ kañatʋ tɩnaa ɖaʋ,Mba pɔtɔkɩ kewiyitu yɔ pa-ɖaʋ,+
6 Weyi ɛmakaɣ samasɩ kaahɛzaɣ nɛ pana sɔsɔna yɔ,+Weyi eluzaɣ ajɛɛ nɛ pana nɛ ɛnazɩɣ-yɛ kaahɛzaɣ yɔ.+
7 Tɛtʋ kpeekpe hɛzɩ lɛɛlɛɛyɔ, nabʋyʋ ɛɛtasɩɣ-tʋ cɛyʋʋ.
Ɛyaa makɩ taa leleŋ kubusi.+
8 Halɩ jenevriyee tɩŋ mɛyɩɣ amɛya ñɔ-yɔɔ,Pɩkpɛndɩnɩ Libaŋ sɛɛdrɩ tɩŋ.
Pɔyɔɔdʋʋ se: “Kpaɣnɩ alɩwaatʋ ndʋ ŋtɔlaa yɔ,Tɩŋ sɛtɩyʋ nɔɔyʋ ɛɛkɔŋ ɖa-wayɩ.”
9 Halɩ piseɣtiɣ Pɩlaʋ* tɛtɛɛSe kɩkatɩ-ŋ alɩwaatʋ ndʋ ŋkɔŋ yɔ.
Ñɔ-yɔɔ lɛ, kifeziɣ mba pasɩba nɛ patɩtasɩ wɛnʋʋ ɖoŋ yɔ,Tɛtʋ yɔɔ ñʋndɩnaa mba pɛkɛ nazɩyaa yɔ* pa-tɩŋa.
Kiyeki nɛ ajɛɛ awiya kpeekpe kʋyʋʋ a-kewiyisi kpelisi yɔɔ.
10 Pa-tɩŋa pɔyɔɔdʋʋ nɛ peheyiɣ-ŋ se:
“Ña ɖɔɖɔ ŋpɩsɩ ɛjam ɛzɩ ɖa yɔ?
Ŋpɩsɩ ɛzɩ ɖa yɔ?
11 Petisi ɖooo Pɩlaʋ* taa ña-cajayɛ,Ña-cɩmʋʋ wondu ndʋ tɩ-yɔɔ wɛ nimasɩ yɔ ti-wiu taŋ.+
Sonzoowa pɔ ñɛ-tɛɛ ɛzɩ kaɖʋ yɔ,Nɛ sonzoowa kɛnɩ ñɔ-yɔɔ kuhuuzuu.”
12 Ŋlɩnɩ ɛsɔdaa nɛ ŋtɔlɩ mbʋ suwe,Oo ña weyi ŋñɩlɩsɩɣ yɔ, tɛbɩyɛ pɩyalʋ!
Pɛsɛtɩ-ŋ nɛ pɛpɛɖɩ tataa mbʋ suwe,Ña weyi ŋwabɩ ajɛɛ yɔ!+
13 Ŋyɔɔdɩ ña-laŋɩyɛ taa se: “Mankaɣ kpaʋ ɛsɔdaa.+
Mankaɣ kpazʋʋ men-kewiyaɣ kpelaɣ Ɛsɔ tɛ tɩɩnzɩ ñʋʋ yɔɔ,+Nɛ mankaɣ caɣʋ kediɣzaɣ pʋʋ yɔɔ,Hayo kiŋ ageeta wena akpaɖɩ posuu yɔ a-taa.+
14 Mankaɣ kpaʋ ɖooo ɛsɔmɩndʋ ñʋʋ yɔɔ;Mankaɣ man-tɩ pɩsʋʋ ɛzɩ Kɩlɩm yɔ.”
15 Ɛlɛ, pakaɣ-ŋ tisuu Pɩlaʋ* taa,Ðooo pɔʋ cukaŋ taa.
16 Mba panaɣ-ŋ yɔ pakaɣ-ŋ cɔnʋʋ cuɖuɖu;Pakaɣ-ŋ wiluu camɩyɛ nɛ pɔyɔɔdɩ se:
“Abalʋ ɛnɛ ɛñamsaɣnɩ tɛtʋ na,Weyi ɛlaba nɛ kewiyisi seli yɔ?+
17 Weyi eyeba nɛ kedeŋa wɛɛ ɛzɩ kañɩmbusuu yɔNɛ ɛyɔkɩ kɛ-tɛtʋ ndɩ ndɩ yɔ,+Weyi ekizaa se eeyeki ɛ-salaka tɩnaa nɛ pekpe pɛ-tɛ yɔ?”+
18 Ajɛɛ awiya lɛɛna tɩŋa,Ɛɛɛ, a-tɩŋa payɩ, ahɩnɩ samtʋ taa,Paa weyi lɛ ɛ-maɣmaɣ ɛ-pɩlaʋ* taa.
19 Ɛlɛ ña lɛ, pɔlɔ-ŋ nɛ ŋfɛyɩnɩ pɩlaʋ,Ɛzɩ ɛyazɩyɛ* nɖɩ papaɖɩɣ-ɖɩ yɔ,Mba pakʋ-wɛ nɛ laɣɖɛ yɔ,Mba petiki pɛɛ pɔŋ taa yɔ, pohuuzi ñɔ-yɔɔ,Ɛzɩ sɩɖʋ weyi pɛfɛyɩ e-tomnaɣ yɔ.
20 Ŋŋkaɣ kpɛndʋʋ pɔ-yɔɔ pɩlaʋ taa,Mbʋ pʋyɔɔ yɔ ŋɖɩzɩ ña-maɣmaɣ ñɛ-ɛjaɖɛ,Ŋkʋ ña-maɣmaɣ ña-samaɣ.
Paakaɣ tasʋʋ ɛyaa kɩdɛkɛdaa lʋlʋʋ taa mba hɩɖɛ yaʋ kpa.
21 Ɩñɔɔzɩ lone nɖɩ ɖɩ-taa pɩpɔzʋʋ se pakʋ ɛ-pɩyalaa yɔWɛɛ wena pɔ-cɔzɔnaa ɖɔwa yɔ a-yɔɔ,Nɛ pataakɔɔ pakʋyɩ nɛ pamʋ kedeŋaNɛ peyele nɛ pɛ-tɛtʋ ndɩ ndɩ su ɛjaɖɛ taa.»
22 «Mankaɣ kʋyʋʋ pɔ-yɔɔ,»+ yoyaa tɛ Yehowa yɔɔdʋʋna.
«Nɛ mankaɣ hɩzʋʋ hɩɖɛ, mba pɩkazaa yɔ, lʋlʋʋ taa mba nɛ liɖe taa piya Babilɔɔnɩ taa,»+ Yehowa yɔɔdʋʋna.
23 «Mankaɣ labʋ nɛ kɩpɩsɩ samɩyɛsamanaa lone nɛ fɛɛŋ egeetiye, nɛ mankaɣ-kʋ hazʋʋ nɛ ɖɩzʋʋ pɩzaʋ,»+ yoyaa tɛ Yehowa yɔɔdʋʋna.
24 Yoyaa tɛ Yehowa ɖuwaa se:
«Ɛzɩ manɖʋʋ yɔ, mbʋ pɩkaɣ labʋ,Nɛ ɛzɩ mankpaɣʋ lɩmaɣzɩyɛ yɔ, mbʋ kaɣnɩ labʋ.
25 Mankaɣ tɔyɩtʋʋ Asiirii tʋ mɛ-ɛjaɖɛ taa,Nɛ mankaɣ-ɩ fɛyʋʋ man-pʋŋ yɔɔ.+
Mankaɣ kʋsʋʋ ɛ-sʋʋtʋ ɖaʋ pɔ-yɔɔ,Nɛ mankaɣ kʋsʋʋ ɛ-sʋʋtʋ pa-hazasɩ yɔɔ.»+
26 Lɩmaɣza anɛ ɛkpaɣaa* pɩlɩɩnɩ tɛtʋ kpeekpe yɔɔ,Nɛ nesi sɩnɛ esezaa se ɛhɔ ajɛɛ kpeekpe nɩŋgbaaŋ.*
27 Mbʋ pʋyɔɔ yɔ yoyaa tɛ Yehowa kpaɣ lɩmaɣza,Nɛ apɩzɩɣ nɛ eyele se ataala?+
Esezi e-nesi,Nɛ apɩzɩɣ nɛ ɛpɩsɩnɩ-sɩ?+
28 Pɩnaɣ ŋga Wiyaʋ Ahaazɩ sɩba yɔ,+ pɔyɔɔdɩ tɔm tʋnɛ:
29 «Filistii, ña-taa tʋ nɔɔyʋ ɛtaamɛyɩ amɛya,Se weyi ɛmakaɣ-ŋ yɔ pɛpɛlɩ ɛ-ɖaʋ.
Mbʋ pʋyɔɔ yɔ ɖʋm sɔtʋ tʋ+ kaɣ lɩnʋʋ ɖʋm liɖe taa,+Nɛ ɛ-lʋlʋʋ taa tʋ kaɣ kɛʋ ɖʋm weyi ɛkʋyʋʋ ɛsɔdaa nɛ ɛwɛ patʋ yɔ.*
30 Alɩwaatʋ ndʋ ajamaa kajalaɣ piya tɔkɩNɛ kʋñɔndɩnaa hɩnɩ pɛɛyɛ taa yɔ,Mankaɣ labʋ nɛ ñɔɔsɩ kʋ ñe-liɖe nɛ ɖɩsɩ,Nɛ mbʋ pɩkazɩ-ŋ yɔ, pakaɣ-pʋ kʋʋ.+
31 Oo nɔnɔɔ, wii wɔɔɔ! Oo tɛtʋ, ma kubusi!
Oo Filistii, ña-tɩŋa ña-laŋɩyɛ kaɣ lɩʋ!
Mbʋ pʋyɔɔ yɔ ñɔsɩ nasɩyɩ lɩnɩ hayo kiŋ nɛ sɩkɔŋ,Nɛ ɛ-sɔɔjanaa taa nabɛyɛ ɩɩkaɣ caɣʋ nɛ wayɩ.»
32 Ɛzɩma pakaɣ cosuu mba ɛjaɖɛ tiyiɣ yɔ?
Se Yehowa sɩ Siyɔŋ tigiɖe,+Nɛ ɛ-samaɣ taa ajamaa kaɣ hiɣu ɖɩjɔzɩyɛ kɩ-taa.
Pɩ-tɛɛ tɔm
^ Yaa «Ɛkaɣ-wɛ haʋ hɛzɩyɛ.»
^ Yaa «kaɣ luzuu pɛ-tɛɛ tʋma yɔɔ cɔnɩyaa mba pɔcɔŋnaɣ Izrayɛɛlɩ mba yɔɔ yɔ.»
^ Yaa «ŋkaɣ hoŋuu nɛ ŋyɔɔdɩ tɔm tʋnɛ.»
^ Yaa «Tʋmɩyɛ yɔɔ cɔnɩyʋ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «Tɛtʋ yɔɔ tuliŋ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «ɛ-ɖɩɣa.»
^ Yaa «piliŋa.»
^ Piye piye, «Lɔŋ ɛnɛ ɛtasaa.»
^ Yaa «nesi sɩnɛ pɔñɔɔzaa se pamabɩnɩ ajɛɛ kpeekpe.»
^ Yaa «ɖʋm sɔtʋ tʋ weyi eseɣ lɛɛ lɛɛ yɔ.»
