Izaayii 17:1-14
17 Tɔm ndʋ pɔyɔɔdɩ Damaasɩ+ yɔɔ yɔ:
«Na! Damaasɩ ɛɛtasɩɣ kɛʋ tɛtʋ,Nɛ kɩkaɣ pɩsʋʋ njɛyɛ tambaɣ huuye.+
2 Ɛyaa ɩɩkaɣ tasʋʋ wɛʋ Arowɛɛrɩ+ tɛtʋ ndɩ ndɩ taa;Tɩkaɣ pɩsʋʋ lona wena a-taa kpɩna hɩnɩɣ yɔNɛ nɔɔyʋ ɛɛkaɣ-yɛ ɖʋʋ sɔɔndʋ.
3 Tɛtʋ ɖoŋ ñɩndʋ ndɩ ndɩ kaɣ mʋʋʋ Efrayim taa,+Nɛ kewiyaɣ kaɣ mʋʋʋ Damaasɩ taa;+Nɛ mba pɩkazɩɣ Siirii taa yɔPakaɣ wɛʋ ɛzɩ Izrayɛɛlɩ mba* samtʋ yɔ,» yoyaa tɛ Yehowa yɔɔdʋʋna.
4 «Kɩyakʋ ŋgʋ ki-wiye lɛ, Yakɔɔb samtʋ kaɣ pasʋʋ,Nɛ e-tomnaɣ ŋga kɛwɛ alaafɩya yɔ,* kakaɣ tɛm ɖanzɩ.
5 Pɩkaɣ wɛʋ ɛzɩ alɩwaatʋ ndʋ tɔɔnaɣ kʋnɖʋ ɖiɣni kʋm tɔɔnaɣ pee wena awɛ hayɩm taa yɔNɛ e-nesi kʋŋ lɔyɩŋ yɔ,Ɛzɩ alɩwaatʋ ndʋ nɔɔyʋ cazɩɣ tɔɔnaɣ pee Refayim Fɛɛʋ*+ taa yɔ.
6 Mbʋ pacazɩɣ yɔ pi-ɖeke pɩkaɣnɩ kazʋʋ,Ɛzɩ alɩwaatʋ ndʋ pañamsɩɣ oliivi tɩʋ yɔ:
Oliivi pee 2 yaa 3 wena apɩwa yɔ, a-ɖeke akazɩɣnɩ piliŋa ŋga kakɩlɩ kʋyʋʋ yɔ kɔ-yɔɔ,Pee 4 yaa 5 ɖeke kazɩɣnɩ ki-pilinzi nzɩ sɩlʋlʋʋ pee yɔ sɩ-yɔɔ,»+ Izrayɛɛlɩ tɛ Ɛsɔ Yehowa yɔɔdʋʋna.
7 Kɩyakʋ ŋgʋ ki-wiye lɛ, ɛyʋ kaɣ kpazʋʋ ɛ-ɛsa nɛ ɛ-Laɖʋ yɔɔ nɛ ɛ-ɛsa kaɣ cɔnʋʋ Izrayɛɛlɩ tɛ Kiɖeɖeu cuɖuɖu.
8 Ɛɛkaɣ taʋ liu altaarunaa,+ mba pɛkɛ e-nesi tɛɛ tʋma yɔ;+ nɛ mbʋ e-niwee laba yɔ ɛɛkaɣ-pʋ cɔnʋʋ cuɖuɖu, paa pɩtɩɩkɛ sizikasɩ kiɖeɖesi* yaa wondu ndʋ tɩ-yɔɔ pasɩɣ ŋgee tɩlaaɖɩ yɔ.
9 Kɩyakʋ ŋgʋ ki-wiye lɛ, ɛ-tɛtʋ ɖoŋ ñɩndʋ ndɩ ndɩ kaɣ pɩsʋʋ ɛzɩ lone nɖɩ peyebi-ɖɩ laʋ tɛɛ yɔ,+Ɛzɩ piliŋa ŋga peyebi-kɛ Izrayɛɛlɩ mba ɛsɩndaa yɔ;Pɩkaɣ pɩsʋʋ kañɩmbusuu.
10 Mbʋ pʋyɔɔ yɔ ŋsɔ Ɛsɔ weyi ɛyakɩ ña-ñʋʋ yɔ ɛ-yɔɔ;+Ŋtɩtɔzɩ ño-ɖoŋ Kaaʋ+ yɔɔ.
Pʋyɔɔ ŋlakɩ kaɖasɩ nzɩ sɩwɛ kajʋka yɔ*Nɛ ŋsɔʋ sɩ-taa ɛgɔm* piliŋa.
11 Evemiye taa lɛ, ŋcɔzʋʋ koloŋa camɩyɛ ña-kaɖaɣ,Tanaŋ tɛɛ lɛ, ŋlakɩ nɛ ño-ɖomaɣ ñɔ,Ɛlɛ kʋdɔŋ nɛ siziŋ weyi ɛɛwaɣ yɔ ɩ-kɩyakʋ wiye lɛ, kʋmtʋ kaɣ mʋʋʋ.+
12 Iwelisi! Ɛyaa samasɩ sakɩyɛ wɛɛ nɛ sɩkɔdɔyʋʋ,Sɩ-kɔkɔɖɛ wɛ ɛzɩ teŋgunaa kɔkɔɖɛ yɔ!
Ajɛɛ wɛɛ nɛ amakɩ kubusi,Panɩɣ a-taŋ ɛzɩ lɩm ɖoŋ ñɩmbʋ kɔkɔɖɛ yɔ!
13 Ajɛɛ kaɣ labʋ kɔkɔɖɛ ɛzɩ lɩm sakɩyɛ kɔkɔɖɛ yɔ.
Ɛkaɣ-yɛ kalʋʋ, nɛ akaɣ seu nɛ aɖɛɛ ɖooo poliŋ,Akaɣ seu ɛzɩ helim kpakʋʋ pʋŋ taa lɔtʋ yɔ,Ɛzɩ sɔɔ ñɩyʋʋ ŋgʋ helim sɔsɔm cɔzʋʋ yɔ.
14 Ðanaɣ yɔɔ lɛ, sɔɔndʋ wɛɛ.
Pʋcɔ nɛ tɛʋ fe tanaŋ tɛɛ lɛ, patɩtasɩ wɛʋ.
Mba pamɩlɩɣ ɖa-ñɩm yɔ pe-ɖeɖe lɛ,Nɛ mba palazɩɣ ɖa-ñɩm yɔ, mbʋ pɩtɛŋnɩ-wɛ.
Pɩ-tɛɛ tɔm
^ Piye piye, «Izrayɛɛlɩ pɩyalaa.»
^ Piye piye, «e-tomnaɣ taa num.»
^ Yaa «Kɛdɛɛŋa.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «nzɩ sɩwɛ cɔnʋʋ yɔ.»
^ Yaa «agbaaɣdaa ɛsɔ.»
