Izaayii 18:1-7
-
Tɔm ndʋ pɔyɔɔdɩ Etiyoopii yɔɔ yɔ (1-7)
18 Pɩtɔɔ ɛjaɖɛ nɖɩ ɖɩ-taa nakaŋ makɩ i-keŋ nɛ panɩɣ ɩ-taŋ yɔ,Ɛjaɖɛ nɖɩ ɖɩwɛ Etiyoopii+ pɔsɩ egeetiye taa yɔ!
2 Ɛjaɖɛ nɖɩ, ɖɩtɩŋɩɣnɩ teŋgu yɔɔ nɛ ɖitiyiɣni ɛyaa,Papiruusi mɛlɛnaa taa; ɖiheyiɣ-wɛ se:
«Iwolo, mɩ ɛyaa waka tɩnaa mba petiyaa yɔ,Iwolo ɛjaɖɛ nɖɩ ɖɩ-taa mba ɖaɣlaa nɛ po-tomnaɣ yɔɔ wɛɛ lɛzɛ lɛzɛ yɔ* ɖɩ-cɔlɔ,Iwolo samaɣ ŋga peseɣ-kɛ sɔɔndʋ paa le yɔ, kɔ-cɔlɔ,+Iwolo ɛjaɖɛ ɖoŋ ñɩnɖɛ nɖɩ ɖɩwakɩ ajɛɛ lɛɛna yɔ* ɖɩ-cɔlɔ,Nɖɩ pɔsɩ kpaɣ ɖɩ-tɛtʋ yɔ.»
3 Mɩ, ɛjaɖɛ taa mba kpeekpe nɛ mɩ mba ɩwɛ tɛtʋ yɔɔ yɔ,Mbʋ ɩnaɣ yɔ, pɩkaɣ wɛʋ ɛzɩ yʋsaɣ* ŋga pakpazɩ pʋŋ yɔɔ yɔ,Nɛ ɩkaɣ nɩʋ nabʋyʋ taŋ ɛzɩ pahʋlʋʋ nɔndɔʋ yɔ.
4 Mbʋ pʋyɔɔ yɔ, tɔm tʋnɛ Yehowa heyi-m:
«Mankaɣ caɣʋ men-ɖeɖe ɖiɣ ɖiɣ nɛ mɔncɔnɩ mo-lone nɖɩ ɖɩkam camɩyɛ yɔ,*Ɛzɩ soŋaɣ sɔsɔɔ lakʋʋ wɩsɩ taa yɔ,Ɛzɩ ɖoluu mɩndʋ wɛʋ kʋmtʋ alɩwaatʋ soŋaɣ taa yɔ.
5 Mbʋ pʋyɔɔ yɔ, pʋcɔ nɛ pɩtalɩ kʋmtʋ,Alɩwaatʋ ndʋ hɛtʋ kpaɣʋ ɖɛɣ nɛ hɛɖʋʋ pɩsɩ viiñi piye nɖɩ ɖiɖiɣni pɩʋ yɔ lɛ,Pakaɣ kpaɣʋ loozonaa nɛ pɛsɛtɩ pilinzi nzɩ sɩhɔwa yɔNɛ pakaɣ sɛtʋʋ loyisi nɛ palɩzɩ-sɩ.
6 Pakaɣ-wɛ ɖʋʋ pʋŋ taa sumasɩ nzɩ sɩtɔkɩ nandʋ yɔNɛ tɛtʋ yɔɔ kpɩna.
Sumasɩ nzɩ sɩtɔkɩ nandʋ yɔ, sɩkaɣ-wɛ tɔɔʋ soŋaɣ alɩwaatʋ kpeekpe;Nɛ tɛtʋ yɔɔ kpɩna kpeekpe kaɣ-wɛ tɔɔʋ kʋmtʋ alɩwaatʋ kpeekpe.
7 Alɩwaatʋ ndʋ tɩ-taa lɛ, pakaɣ kɔnʋʋ kʋjɔʋ nakʋyʋ yoyaa tɛ Yehowa,Kɩlɩɣnɩ ɛjaɖɛ nɖɩ ɖɩ-taa mba ɖaɣlaa nɛ po-tomnaɣ yɔɔ wɛɛ lɛzɛ lɛzɛ yɔ* ɖɩ-cɔlɔ,Kɩlɩɣnɩ samaɣ ŋga peseɣ-kɛ sɔɔndʋ paa le yɔ, kɔ-cɔlɔ,Kɩlɩɣnɩ ɛjaɖɛ ɖoŋ ñɩnɖɛ nɖɩ ɖɩwakɩ ajɛɛ lɛɛna yɔ* ɖɩ-cɔlɔ,Nɖɩ pɔsɩ kpaɣ ɖɩ-tɛtʋ yɔNɛ powoni-kʋ lone nɖɩ payaɣ-ɖɩ nɛ yoyaa tɛ Yehowa hɩɖɛ yɔ ɖɩ-taa: Siyɔŋ Pʋʋ taa.»+
Pɩ-tɛɛ tɔm
^ Piye piye, «ɛjaɖɛ nɖɩ pawalɩsɩ-ɖɩ nɛ pakayɩ ɖɩ-yɔɔ nɛ pɩlɩɩ camɩyɛ yɔ.»
^ Yaa «ɛjaɖɛ nɖɩ ɖɩwɛnɩ ɖoŋ sɔsɔŋ nɛ ɖɩfɛyɩɣ yɔ.»
^ Yaa «yʋsaɣ sizika.»
^ Pɩpɩzɩɣ pɩkɛ, «nɛ mɛwɛɛ mo-lone nɖɩ ɖɩkam camɩyɛ yɔ ɖɩ-taa nɛ mɔncɔŋna.»
^ Piye piye, «ɛjaɖɛ nɖɩ pawalɩsɩ-ɖɩ nɛ pakayɩ ɖɩ-yɔɔ nɛ pɩlɩɩ camɩyɛ yɔ.»
^ Yaa «ɛjaɖɛ nɖɩ ɖɩwɛnɩ ɖoŋ sɔsɔŋ nɛ ɖɩfɛyɩɣ yɔ.»
