Izaayii 21:1-17
21 Tɔm ndʋ pɔyɔɔdɩ teŋgu kañɩmbusuu* yɔɔ yɔ:+
Asɛyʋʋ ɖiɣni kɔm ɛzɩ helim sɔsɔm mbʋ pɩhazɩɣ hadɛ kiŋ hɔɔlʋʋ taa yɔ,Kɩlɩɣnɩ kañɩmbusuu taa, ɛjaɖɛ nɖɩ ɖɩcaɣ sɔɔndʋ yɔ ɖɩ-cɔlɔ.+
2 Pawɩlɩ-m natʋ natʋyʋ, tɩwɛ sɔɔndʋ:
Agutaaku tʋ ɖiɣni labʋ agutaaku lakasɩ,Nɛ ɖɩzɩyʋ ɖiɣni ɖɩzʋʋ.
Oo Elam, kpa! Oo Medii, wolo nɛ ŋñɛyɩ tɛtʋ!+
Mankaɣ yebu nɛ mɔla wena kiyeba* nɛ awɛɛ yɔ a-tɩŋa asɩɩ tɩnaɣ.+
3 Pʋyɔɔ mɛwɛ wɩzasɩ sɔsɔsɩ taa.*+
Wɩzasɩ ɖɔkɩ-m,Ɛzɩ wɩzasɩ nzɩ sɩɖɔkʋʋ halʋ weyi eɖiɣni lʋlʋʋ yɔ.
Mɛwɛ laŋwɛɛkɩyɛ taa siŋŋ nɛ pʋyɔɔ lɛ, maapɩzɩɣ se manɩɩ;Ma-ñʋʋ taa sidi siŋŋ nɛ pʋyɔɔ lɛ, maapɩzɩɣ se mana.
4 Ma-laŋɩyɛ seliɣ; sɔɔndʋ kpaɣ-m nɛ menseliɣ.
Hadɛ lɛdʋʋ mbʋ maaɖaŋ siŋŋ yɔ, piyeki nɛ menseliɣ.
5 Ɩsɩɩ taabɩlɩ nɛ ɩñɔɔzɩ kpelisi!
Ɩtɔɔ nɛ ɩñɔɔ!+
Mɩ awumbiya, ɩkʋyɩ; ɩtaa num kpayʋʋ!
6 Mbʋ pʋyɔɔ yɔ tɔm tʋnɛ Yehowa heyi-m:
«Wolo, sɩɩ feŋiyu nɔɔyʋ nɛ ŋyele nɛ ɛkɛdɩ mbʋ ɛnaɣ yɔ.»
7 Nɛ ɛna you kɛɛkɛɛ nakʋyʋ, ŋgʋ kpaŋnaŋ 2 hɔŋ yɔ,You kɛɛkɛɛ nakʋyʋ, ŋgʋ kpaŋasɩ hɔŋ yɔ,You kɛɛkɛɛ nakʋyʋ, ŋgʋ aɖaaɖaanaa hɔŋ yɔ.
Ɛcɔnɩ camɩyɛ, nɛ ɛka ɛ-lɩmaɣza pɩ-yɔɔ siŋŋ.
8 Nɛ ɛma kubuka ɛzɩ mʋʋzʋʋ yɔ se:
«Oo Yehowa, mansɩŋɩɣ feŋuu tilimiye yɔɔ paa ɛzɩmtaa wɩsɩ taa,Nɛ mansɩŋɩɣ men-ɖifeŋiye taa paa ɖoo wena.+
9 Ɩna mbʋ piɖiɣni kɔm yɔ:
Ɛyaa wɛ you kɛɛkɛɛ nakʋyʋ taa; kpaŋnaŋ 2 hɔŋnɩ-kʋ!»+
Nɛ ɛyɔɔdɩ ɖoŋ nɛ ɛtɔ se:
«Kɩtɔlaa! Babilɔɔnɩ tɔlaa!+
Ɛyɔkɩ kɩ-ɛsɔnaa sɩʋ kpelisi kpeekpe nɛ ɛpɛɖɩ tataa!»+
10 Oo, man-samaɣ ŋga pamabɩ-kɛ ɛzɩ pamakʋʋ tɔɔnaɣ yɔ,Mɔn-tɔɔnaɣ ɖɩmaɖɛ taa pee,*+Mɛnkɛdɩ-mɩ tɔm ndʋ manɩ yoyaa tɛ Yehowa, Izrayɛɛlɩ tɛ Ɛsɔ cɔlɔ yɔ.
11 Tɔm ndʋ pɔyɔɔdɩ Duuma* yɔɔ yɔ:
Nɔɔyʋ wɛɛ nɛ ɛyaɣ-m nɛ Seyiri+ nɛ ɛpɔzʋʋ-m se:
«Feŋiyu, nɛ ɖoo yɔ?
Feŋiyu, nɛ ɖoo yɔ?»
12 Feŋiyu cosi se:
«Tanaŋ ɖiɣni kɔm, nɛ ɖoo ɖɔɖɔ.
Ye ɩcaɣ pɔzʋʋ yɔ, ɩpɔzɩ.
Ɩɖaɣnɩ kɔm!»
13 Tɔm ndʋ pɔyɔɔdɩ kañɩmbusuu kɛdɛɛŋa yɔɔ yɔ:
Oo Dedaanɩ+ nʋmɔɖɔnaa canɖaʋ,Laʋ tɛɛ, kañɩmbusuu kɛdɛɛŋa taa ɩkaɣ ɖou ɖoo taa.
14 Ɩkɔnɩ lɩm nɛ ɩkatɩnɩ weyi lɔkɔtʋ ɖɛ-ɩ yɔ,Mɩ Teema+ ɛjaɖɛ taa mba,Nɛ ɩkɔnɩ tɔɔnaɣ* weyi eɖiɣni seu yɔ.
15 Mbʋ pʋyɔɔ yɔ pese laɣla, pese laɣɖɛ nɖɩ pɛkpɛ-ɖɩ yɔ,Pese tɔʋ ŋgʋ pɔhɔm-kʋ yɔ, nɛ you ŋgʋ kɩsa miŋ yɔ.
16 Mbʋ pʋyɔɔ yɔ tɔm tʋnɛ Yehowa heyi-m: «Pɩnaɣ kʋɖʋmaɣ taa, ɛzɩ abaa laɖʋ kalʋʋ pɩnzɩ yɔ,* Kedaarɩ+ samtʋ kpeekpe kaɣ sɩʋ tɩnaɣ.
17 Kedaarɩ you laɖaa taa tɔŋ tɔyaa mba pɩkazɩɣ yɔ pakaɣ wɛʋ pazɩ yem, mbʋ pʋyɔɔ yɔ Izrayɛɛlɩ tɛ Ɛsɔ Yehowa yɔɔdɩna.»
Pɩ-tɛɛ tɔm
^ Pʋtɔma yɔ, pɩkɛɣnɩ caanaʋ taa Babilɔɔnɩya egeetiye.
^ Pʋtɔma Babilɔɔnɩ tɔm pɔyɔɔdʋʋ.
^ Piye piye, «wɩzasɩ su man-tɩnaɣ taa.»
^ Piye piye, «pɩyalʋ.»
^ Pʋ-tɔbʋʋ se «Tamɩyɛ.»
^ Piye piye, «kpɔnɔ.»
^ Yaa «Pɩnaɣ kʋɖʋmaɣ taa, ŋga pakalɩ-kɛ camɩyɛ ɛzɩ abaa laɖʋ lakʋʋ yɔ»; pʋ-tɔbʋʋ se pɩnaɣ kʋɖʋmaɣ taa ɖeyi ɖeyi.
