Izaayii 22:1-25
22 Tɔm ndʋ pɔyɔɔdɩ Natʋ Fɛɛʋ* yɔɔ yɔ:+
Ɛbɛ lakɩ-ŋ nɛ ñɛ-ɛyaa kpeekpe kpa ɖamɩŋ ñʋŋ taa?
2 Piisidi ña-taa yem yem,Kɔkɔɖɛ tɛtʋ, tɛtʋ ndʋ tɩɩwɛ amɛya taa yɔ.
Ñɛ-ɛyaa mba pakʋwa yɔ, pɩtɩkɛ laɣɖɛ pakʋnɩ-wɛ;Nɛ pɩtɩkɛ ɖɔɖɔ you taa pasɩba.+
3 Ña-ñʋndɩnaa kañatʋ tɩnaa tɩŋa kpɛndaa nɛ pese.+
Pakpa-wɛ yomaa ɛlɛ patɩlabɩnɩ tʋmɩyɛ tɔʋ.
Mba payɩ pehiɣ-wɛ yɔ, pakpa-wɛ yomaa;+Paa paasewa nɛ pɛɖɛɛ poliŋ yɔ.
4 Pʋyɔɔ mɔyɔɔdaa se: «Ɩɖɛnɩ mɩ-ɛsa mɔ-yɔɔ,Nɛ mankaɣ wiu siŋŋ;+Ɩtaañɩnɩ se ɩhɛzɩ ma-laŋɩyɛMan-samaɣ pɛlɛ* ɖɩzʋʋ yɔɔ.+
5 Mbʋ pʋyɔɔ yɔ pɩkɛ siduu nɛ ɖɩzʋʋ nɛ sɔɔndʋ sɔsɔtʋ kɩyakʋ,+Pɩlɩnɩ Kɩbaɣlʋ Kɩlɩm, yoyaa tɛ Yehowa cɔlɔ,Natʋ Fɛɛʋ taa.
Peɖiɣni koloŋa yɔkʋʋ+Nɛ pamakɩ kubuka nɛ pʋʋ yɔɔ kiŋ.
6 Elam mba+ kpakɩɣ kɔɔkaNɛ pasaɣ you kɛɛkɛɛnaa nɛ pacakɩ kpaŋnaŋ yɔɔ,Nɛ Kiir+ kuluu kpayʋʋ yɔɔ.*
7 Ñɛ-fɛɛŋ* weyi ɩkɩlɩ ɖeu yɔ,You kɛɛkɛɛnaa kaɣ suu ɩ-taa,Nɛ kpaŋnaŋ* kaɣ sɩŋʋʋ i-lona taa nɔnɔɔ taa,
8 Nɛ pakaɣ kʋsʋʋ Yuuda yɔɔ pɩsaʋ kikenduu.*
«Kɩyakʋ ŋgʋ ki-wiye, ɩkaɣ cɔnʋʋ Laʋ Ðɩɣa+ taa you wondu ɖɩzɩyɛ taa kiŋ,
9 nɛ ɩkaɣ naʋ Daviid Tɛtʋ koloŋa yɔɔ pɔŋ sakɩyɛ.+ Nɛ ɩkaɣ ketuu lɩm nɛ ikpeɣli-pʋ hadɛ lɩŋgamʋʋ taa.+
10 Ɩkaɣ kalʋʋ Yeruzalɛm ɖɩsɩ, nɛ ɩkaɣ yɔkʋʋ ɖɩsɩ se ɩkpazɩnɩ koloŋa ɖoŋ.
11 Nɛ ɩkaɣ labʋ lone naɖɩyɛ kolonzi nzɩ sɩ-naalɛ sɩ-hɛkʋ taa nɛ ɩɖʋ lɩŋgamʋʋ kɩbɩnʋʋ lɩm ɖɩ-taa, ɛlɛ ɩɩkaɣ cɔnʋʋ pɩ-Mayʋ Sɔsɔ, nɛ ɩɩkaɣ naʋ Weyi ɛlabɩ-pʋ ɖooo lɔŋ yɔ.
12 Kɩyakʋ ŋgʋ ki-wiye Kɩbaɣlʋ Kɩlɩm, yoyaa tɛ Yehowa,Kaɣ yaʋ ɛyaa se pewii nɛ pacaɣ kʋñɔwiye,+Pahʋ pa-ñʋŋ nɛ posuu fɔlɔtɔnaa.
13 Ɛlɛ paa mbʋ yɔ, pɛwɛ kazandʋ nɛ amɛya yɔɔ,Pɛwɛ naŋ kʋʋ yɔɔ nɛ heŋ kʋʋ yɔɔ,Pɛwɛ nandʋ tɔɔʋ yɔɔ nɛ vɛɛ ñɔʋ yɔɔ.+
“Ðɩtɔɔ nɛ ɖɩñɔɔ, mbʋ pʋyɔɔ yɔ cee ɖɩkaɣ sɩbʋ.”»+
14 Ðɩnɛ ɛlɛ yoyaa tɛ Yehowa lɩɩ mɔ-yɔɔ nɛ ɛyɔɔdɩ ma-nɩŋgbaŋʋʋ taa se: «“Paakaɣ-mɩ kpeɣu mɩ-kɩwɛɛkɩm pʋnɛ* pɩkɔɔ pɩtalɩ alɩwaatʋ ndʋ ɩsɩba yɔ.”+ Kɩbaɣlʋ Kɩlɩm, yoyaa tɛ Yehowa yɔɔdʋʋna.»
15 Tɔm tʋnɛ Kɩbaɣlʋ Kɩlɩm, yoyaa tɛ Yehowa yɔɔdʋʋ: «Wolo wondu yɔɔ cɔnɩyʋ ɛnɛ ɛ-tɛ, Sebɩna,+ weyi ɛkɛ ɖɩɣa* yɔɔ cɔnɩyʋ yɔ ɛ-tɛ, nɛ ŋheyi-i se:
16 “Ɛbɛ ŋwɛnɩ cɩnɛ, nɛ anɩ ŋwɛnɩ cɩnɛ, nɛ ŋhuyi ña-tɩ pɩlaʋ cɩnɛ?” Ɛwɛɛ nɛ ehuyuu ɛ-pɩlaʋ lone kʋkʋyɩyɛ yɔɔ; ɛwɛɛ nɛ ehuyuu ɛ-tɩ ɖɩhɛzɩyɛ lone* kaaʋ sɔsɔʋ taa.
17 “Na! Oo abalʋ ña, Yehowa kaɣ-ŋ yaɣʋ nɛ tɛtʋ ɖoŋ nɛ ɛɖɔkɩ-ŋ cɩŋ cɩŋ.
18 Pɩtʋʋ fɛyɩ se ɛkaɣ-ŋ kpiyuu nɛ pɩcɛyɩ camɩyɛ nɛ ɛlɔ-ŋ ɛzɩ pombo yɔ ɛjaɖɛ wamm ñɩnɖɛ naɖɩyɛ taa. Peeɖe ŋkaɣ sɩbʋ, nɛ peeɖe ña-samtʋ kɛɛkɛɛnaa kaɣ wɛʋ, pɩkaɣ kɛʋ fɛyɛ ña-ñʋʋdʋ ɖɩɣa.
19 Nɛ mankaɣ mʋʋ lone nɖɩ ŋwɛna yɔ nɛ mɔnɖɔɔnɩ-ŋ ña-tʋmɩyɛ taa.
20 «“Kɩyakʋ ŋgʋ ki-wiye lɛ, mankaɣ yaʋ ma-lɩmɖʋyʋ Eliyaakim,+ weyi ɛkɛ Hilikiya pɩyalʋ yɔ,
21 nɛ mankaɣ-ɩ suu ño-toko kɩɖaɣlʋʋ nɛ mɔhɔkɩ-ɩ ña-kɩtamʋʋ nɛ pɩcɛyɩ camɩyɛ,+ nɛ mankaɣ ɖʋzʋʋ ño-ɖoŋ* e-nesi tɛɛ. Nɛ ɛkaɣ kɛʋ Yeruzalɛm taa mba nɛ Yuuda ɖɩɣa caa.
22 Nɛ mankaɣ sɩʋ Daviid ɖɩɣa ñɩmɩyɛ+ ɛ-hazaɣ yɔɔ. Ɛkaɣ tʋlʋʋ nɛ nɔɔyʋ ɛɛkaɣ ɖɩɣʋ; nɛ ɛkaɣ ɖɩɣʋ nɛ nɔɔyʋ ɛɛkaɣ tʋlʋʋ.
23 Mankaɣ-ɩ kam lone ɖoŋ ñɩnɖɛ taa ɛzɩ kaŋgamaɣ yɔ, nɛ ɛkaɣ pɩsʋʋ ɛzɩ samtʋ kewiyaɣ kpelaɣ yɔ ɛ-caa ɖɩɣa.
24 Nɛ pakaɣ puzuu ɛ-yɔɔ ɛ-caa ɖɩɣa samtʋ* kpeekpe, lʋlʋʋ taa mba nɛ liɖe taa piya,* ñanzɩ cikpesi tɩŋa, ñanzɩ kulam ñɩnzɩ, pɩkpɛndɩnɩ ŋgbaŋ tɩŋa.
25 «“Kɩyakʋ ŋgʋ ki-wiye lɛ,” yoyaa tɛ Yehowa yɔɔdʋʋna, “kaŋgamaɣ ŋga pakam lone ɖoŋ ñɩnɖɛ taa yɔ pakaɣ-kɛ kpɛzʋʋ,+ nɛ pakaɣ-kɛ sɛtʋʋ nɛ kɔtɔlɩ, nɛ sʋʋtʋ ndʋ paapuzi kɔ-yɔɔ yɔ tɩkaɣ tɔlʋʋ nɛ tɩwɛɛkɩ, mbʋ pʋyɔɔ yɔ Yehowa maɣmaɣ yɔɔdɩna.”»
Pɩ-tɛɛ tɔm
^ Paa pɩɩla ɛzɩma pɩkɛɣnɩ Yeruzalɛm.
^ Pɔyɔɔdɩ ɛjaɖɛ tɔm ɛzɩ ɛyʋ yɔ, pʋtɔma yɔ palabɩ mbʋ se palɩzɩ pʋtɔdɩyɛ naʋ yaa lalaa siziŋ nɩʋ nɛ pawɩlɩ.
^ Yaa «ñɔɔzʋʋ kpayʋʋ.»
^ Yaa «Ñɛ-kɛdɛɛnzɩ.»
^ Yaa «kpaŋnaŋ yɔɔ caɣyaa.»
^ Yaa «Nɛ pakaɣ kʋsʋʋ mbʋ pɩkandɩyɩɣ Yuuda yɔɔ yɔ.»
^ Yaa «Paakaɣ tɩŋnʋʋ kɩwɛɛkɩm yɔɔ huuzuu kɩlaʋ yɔɔ nɛ pohuuzi mɩ-kɩwɛɛkɩm pʋnɛ pɩ-yɔɔ.»
^ Yaa «awiya ɖɩɣa.»
^ Piye piye, «ɖɩjaɣyɛ.»
^ Yaa «ñe-kewiyitu.»
^ Piye piye, «yuŋ.»
^ Yaa «nɛ pilinzi.»
