Izaayii 26:1-21
26 Kɩyakʋ ŋgʋ ki-wiye lɛ, pakaɣ teu hendu tʋnɛ+ Yuuda ɛjaɖɛ taa:+
«Ðɩwɛnɩ tɛtʋ ɖoŋ ñɩndʋ natʋyʋ.+
Ɛ-ñʋʋ yabʋ wɛ ɛzɩ ti-kolonzi nɛ tɩ-kamaŋ yɔ.+
2 Ɩtʋlɩ nɔnɔsɩ+ se pɩsa nɛ ɛjaɖɛ siɣsiɣ ñɩnɖɛ sʋʋ,Ɛjaɖɛ nɖɩ ɖɩwɛɛ nɛ ɖɩɖɔkʋʋ ɖi-siɣsiɣ wɛtʋ yɔ.
3 Ŋkaɣ kandɩyʋʋ mba pamalɩɣnɩ-ŋ nɛ pɛtɛŋ pa-taa yɔ* pɔ-yɔɔ;Ŋkaɣ-wɛ haʋ laŋhɛzɩyɛ nɖɩ ɖɩwɛɣ tam yɔ,+Mbʋ pʋyɔɔ yɔ ña pataɣ liu.+
4 Ɩtaa Yehowa liu tam,+Mbʋ pʋyɔɔ yɔ Yah* Yehowa kɛ tamtam Kaaʋ.+
5 Mbʋ pʋyɔɔ yɔ etisi mba pɛwɛ hayo yɔ, tɛtʋ ndʋ tɩkʋyɩ ɛsɔdaa yɔ.
Etisiɣ-tʋ,Etisiɣ-tʋ tataa;Ɛlɔʋ-tʋ mʋzʋʋ taa.
6 Nɩŋgbaŋaɣ kaɣ-tʋ fɛyʋʋ,Mba pɛwɛ kʋñɔŋ taa yɔ pa-nɩŋgbanzɩ kaɣ-tʋ fɛyʋʋ, ajamaa naataŋ kaɣ-tʋ fɛyʋʋ.»
7 Ɛyʋ siɣsiɣ tʋ nʋmɔʋ tʋʋzaa.*
Ɛzɩma ŋtʋʋzaa yɔ pʋyɔɔ lɛ,Ŋkaɣ yebu nɛ ɛyʋ siɣsiɣ tʋ nʋmɔʋ wɛɛ layɩɩ.
8 Oo Yehowa, ɖɩtɩŋɩɣ ñɔ-tɔm hʋʋ nʋmɔʋNɛ ɖɩtaɣ-ŋ liu.
Ña-hɩɖɛ mʋ ñɩm ɖɛ-ɛsɩndaa* nɛ ɖe-liu wɛ siŋŋ se pɔtɔzʋʋ ɖɩ-yɔɔ.*
9 Ðoo taa lɛ, ma-laŋɩyɛ kpeekpe* liu wɛ-ŋ siŋŋ,Ɛɛɛ, men-fezuu wɛɣ-ŋ ñɩnʋʋ yɔɔ;+Mbʋ pʋyɔɔ yɔ alɩwaatʋ ndʋ ŋhʋʋnɩ tɔm tɛtʋ yɔ,Ɛjaɖɛ taa mba kpɛlɩkɩɣ siɣsiɣ wɛtʋ.+
10 Paa pana kañatʋ tʋ pʋtɔdɩyɛ yɔ,Ɛɛkaɣ kpɛlɩkʋʋ siɣsiɣ wɛtʋ.+
Halɩ siɣsiɣ tɩnaa ɛjaɖɛ taa, ɛkaɣ labʋ kañatʋ lakasɩ,+Nɛ ɛɛkaɣ naʋ Yehowa paɣlɩka.+
11 Oo Yehowa, ŋkpazɩ ñe-nesi, ɛlɛ paanaɣ-sɩ.+
Pakaɣ naʋ kpekpeka ŋga ŋwɛnɩ ña-samaɣ yɔɔ yɔ nɛ fɛyɛ kpa-wɛ.
Ɛɛɛ, ñe-miŋ weyi ɩɖaŋ ño-koyindinaa yɔ, ɩkaɣ-wɛ ñaɣʋ.
12 Oo Yehowa, ŋkaɣ-ɖʋ haʋ laŋhɛzɩyɛ,+Mbʋ pʋyɔɔ yɔ mbʋ payɩ ɖɩlaba yɔÑalabɩnɩ-ɖʋ pʋ.
13 Oo Yehowa ɖɛ-Ɛsɔ, ñʋndɩnaa lalaa tɔɔ kewiyitu ɖɔ-yɔɔ nɛ pɩtasɩnɩ-ŋ,+Ɛlɛ ña-hɩɖɛ ɖeke ɖɩyaɣ.+
14 Pasɩba; paakaɣ tasʋʋ caɣʋ wezuu.
Pasɩba nɛ patɩtasɩ wɛnʋʋ ɖoŋ, paakaɣ tasʋʋ kʋyʋʋ.+
Mbʋ pʋyɔɔ yɔ ŋkɛzɩ ña-lɩmaɣza nɛ pɔ-yɔɔSe ŋɖɩzɩ-wɛ nɛ ŋhɩzɩ pa-hɩla caɣ caɣ.
15 Ŋwalɩsɩ ɛjaɖɛ, Oo Yehowa,Ŋwalɩsɩ ɛjaɖɛ;Ŋsam ña-tɩ.+
Ŋwalɩsɩ ɛjaɖɛ kamasɩ kpeekpe siŋŋ.+
16 Oo Yehowa, kʋñɔŋ alɩwaatʋ taa, papɩsɩnɩ ñɔ-yɔɔ;Patɩŋnɩ wɛɛtʋʋ yɔɔ nɛ pohuti pa-adɩma alɩwaatʋ ndʋ ŋhɔm pa-nɩŋgbaaŋ yɔ.+
17 Ɛzɩ halʋ hoɣa tʋ weyi ɛcaɣ lʋlʋʋ yɔƐnɩɣʋ lʋlʋʋ wɩzasɩ nɛ ɛmakɩ wɩzasɩ kubusi yɔ,Ñɔ-yɔɔ yɔɔ lɛ, mbʋ ɖɔɖɔ ɖɩɩwɛɛ, hayɩ Yehowa.
18 Ðɩɩhaɣ hoɣa, ɖɩɩnɩ lʋlʋʋ wɩzasɩ,Ɛlɛ pɩwɛ ɛzɩ helim ɖɩɩlʋlaa yɔ.
Ðɩtɩkɔnɩ ñʋʋ yabʋ ɛjaɖɛ taa,Nɛ patɩlʋlɩ nɔɔyʋ se ɛcaɣ ɛjaɖɛ taa.
19 «Ña-sɩɖaa kaɣ caɣʋ wezuu.
Mɛ-ɛyaa mba pasɩba yɔ* pakaɣ kʋyʋʋ.+
Ife nɛ ɩma kubusi nɛ taa leleŋ,Mɩ mba ɩwɛ mʋzʋʋ taa yɔ!+
Mbʋ pʋyɔɔ yɔ ño-ɖoluu wɛ ɛzɩ tanaŋ tɛɛ ɖoluu* yɔ,Nɛ tɛtʋ kaɣ yebu nɛ mba pasɩba nɛ patɩtasɩ wɛnʋʋ ɖoŋ yɔ pefe.*
20 Man-samaɣ, wolo, sʋʋ ño-kuduyuŋ pɩ-taa ñɩŋ taa;Nɛ ŋɖɩɣ nɔnɔsɩ ñɔ-yɔɔ.+
Mɛsɩ ña-tɩ alɩwaatʋ pazɩPɩkɔɔ pɩtalɩ alɩwaatʋ ndʋ pana ɖɛwa yɔ.+
21 Mbʋ pʋyɔɔ yɔ ɩna! Yehowa lɩnɩ e-lone taa nɛ ɛkɔŋSe ɛpɔzɩ ɛjaɖɛ taa mba akɔnta pa-kɩdɛkɛdɩm yɔɔ,Nɛ ɛjaɖɛ kaɣ kuluu calɩm mbʋ pɛkpɛdɩ ɖɩ-taa yɔ pɩ-yɔɔNɛ ɖɩɩkaɣ tasʋʋ huuzuu ɛyaa mba pakʋ ɖɩ-taa yɔ pɔ-yɔɔ.»
Pɩ-tɛɛ tɔm
^ Pɩpɩzɩɣ pɩkɛ, «mba pa-lɩmaɣza iiciɣdiɣ yɔ.»
^ Hɩɖɛ «Yehowa» potobiyaa nɛ pɩkɛ «Yah.»
^ Yaa «nʋmɔʋ wɛ layɩɩ.»
^ Yaa «ɖa-kalɩzasɩ ɛsɩndaa.»
^ Pʋ-tɔbʋʋ se pɔtɔzʋʋ Ɛsɔ nɛ ɛ-hɩɖɛ yɔɔ, peyele nɛ patɩlɩ-ɖɩ.
^ Yaa «man-kalɩzaɣ.»
^ Piye piye, «Mɛ-ɛyʋ weyi ɛsɩba yɔ.»
^ Pɩpɩzɩɣ pɩkɛ, «ɛzɩ ñɩtʋ yɔɔ ɖoluu.»
^ Yaa «Nɛ tɛtʋ kaɣ lʋlʋʋ mba pasɩba nɛ patɩtasɩ wɛnʋʋ ɖoŋ yɔ.»
