Izaayii 33:1-24
33 Pɩtɔɔ-ŋ, ña, ɖɩzɩyʋ weyi patɩɖɩzɩ-ŋ yɔ;+
Ña, agutaaku tʋ weyi patɩlabɩ-ŋ agutaaku lakasɩ yɔ!
Ŋtɛŋ ɖɩzʋʋ lɛ, pakaɣ-ŋ ɖɩzʋʋ.+
Ŋtɛŋ labʋ agutaaku lakasɩ lɛ, pakaɣ-ŋ labʋ agutaaku lakasɩ.
2 Hayɩ Yehowa, na ɖa-pʋtɔdɩyɛ.+
Ña ɖɩtaɣ liu.
Pɩsɩ ɖa-nɩŋgbɛɛŋa*+ paa tanaŋ ŋgʋ,Ɛɛɛ, ɖa-ñʋʋ yabʋ, kʋñɔŋ alɩwaatʋ taa.+
3 Kɔkɔɖɛ lakɩ lɛ, samasɩ seɣ.
Alɩwaatʋ ndʋ ŋkʋyʋʋ yɔ, ajɛɛ mɩzɩɣ.+
4 Ɛzɩ kudoloŋ ŋgʋ kɩtɔkɩ pɩdɩɩfɛyɩ yɔ kikpeɣluu yɔ, mbʋ pakaɣ kpeɣluu ñɩm mbʋ ɩmʋwa yɔ,Ɛyaa kaɣ kpedesuu pɩ-yɔɔ ɛzɩ kudoloŋ tindima sakɩyɛ yɔ.
5 Pakaɣ Yehowa kpazʋʋ ɛsɔdaa,Mbʋ pʋyɔɔ yɔ ɛwɛ ɖooo hayo.
Ɛkaɣ yebu nɛ tɔm hʋʋ siɣsiɣ nɛ siɣsiɣ wɛtʋ posu Siyɔŋ taa.
6 Ɛnʋ yekina nɛ ña-alɩwaatʋ kaŋ camɩyɛ;Ñʋʋ yabʋ,+ lɔŋsɩnɖɛ, sɩmtʋ nɛ Yehowa sɔɔndʋ seu+ sakɩyɛ—Ɛ-ñɩm lɛ.
7 Ɩna! Pɛ-ɛyaa mba pɛwɛ abalɩtʋ yɔ pamakɩ kubusi habɩyɛ yɔɔ;Mba petiyiɣ se pañɩnɩ laŋhɛzɩyɛ yɔ pewiɣ siŋŋ.
8 Habɛɛ sɔsɔna yɔɔ wɛ kpɛɖɛ;Nɔɔyʋ ɛɛɖɔŋ nʋmɔŋ taa.
Ɛcɛbɩ* ɛgbɛyɛ;Ɛlɔ tɛtʋ ndɩ ndɩ;Ɛɛkpakɩɣ ɛyʋ nɛ ɛyaɣ pʋyʋ.+
9 Ɛjaɖɛ wɛ kʋñɔwiye taa* nɛ ɖilou.
Fɛyɛ kpa Libaŋ;+ kɩɖazaa.
Sarɔɔnɩ pɩsɩ ɛzɩ kañɩmbusuu yɔ,Nɛ Basaanɩ nɛ Karmɛɛlɩ pekpizi pa-hatʋ nɛ tɩtɔlɩ.+
10 «Lɛɛlɛɛyɔ mankaɣ kʋyʋʋ,» Yehowa yɔɔdʋʋna,«Lɛɛlɛɛyɔ mankaɣ kʋsʋʋ man-tɩ;+Lɛɛlɛɛyɔ mankaɣ wɩlʋʋ man-paɣlɩka.
11 Ɩhakɩ ñɩtʋ ndʋ tɩwɩlaa yɔ ti-hoɣa nɛ ɩlʋlʋʋ tɔɔnaɣ ŋga pakʋma yɔ ka-ɖaŋ.
Mɩ-maɣmaɣ mi-fezuu* kaɣ-mɩ ñaɣʋ ɛzɩ miŋ yɔ.+
12 Nɛ samasɩ kaɣ pɩsʋʋ ɛzɩ akalʋʋ ŋgʋ pañaɣzɩ miŋ yɔ.
Pakaɣ-wɛ miŋ sɔbʋ ɛzɩ sɔɔ wena pɛsɛtaa yɔ.+
13 Mɩ mba ɩwɛ ɖooo poliŋ taa yɔ, iwelisi mbʋ mankaɣ labʋ yɔ!
Mɩ mba ɩwɛ pɩ-cɔlɔ yɔ, ɩtɩlɩ mon-ɖoŋ!
14 Siyɔŋ kɩwɛɛkɩm laɖaa wɛ sɔɔndʋ taa;+Tisuu yebiyaa seliɣ:
“Ða-taa anɩ pɩzɩɣ nɛ ɛcaɣ ɖenɖe miŋ weyi ɛɖɩzɩɣ wondu caɣ caɣ yɔ ɛwɛɛ yɔ?+
Ða-taa anɩ pɩzɩɣ nɛ ɛcaɣ miŋ nzʋlʋma wena aañɩɣzɩɣ yɔ a-cɔlɔ?”
15 Weyi ɛɖɔŋ siɣsiɣ wɛtʋ taa tam yɔ,+Weyi ɛyɔɔdʋʋ tɔm ndʋ tɩtʋʋzaa yɔ,+Weyi ekiziɣ cɛtɩm nɛ mulum kɛzɛɣa yɔ,
Weyi e-nesi kiziɣ mulum kʋjɔʋ nɛ ɛɛmʋʋ-kʋ yɔ,+Weyi ɛɖɩkɩ ɛ-nɩŋgbaŋʋʋ se ɛtaanɩɩ calɩm kpɛdʋʋ tɔm yɔ,Nɛ weyi ehuuzuu ɛ-ɛsa se ɛtaana mbʋ pɩfɛyɩ ɖeu yɔ
16 —Ɛkaɣ wɛʋ lona wena akʋyaa yɔ a-taa;Ɛ-ɖɩjɔzɩyɛ* nɖɩ ɖɩ-taa nabʋyʋ ɛɛtalɩɣ-ɩ yɔ, ɖɩkaɣ wɛʋ ɖɩjɔzɩyɛ lona ɖoŋ ñɩna wena awɛ kaaŋ taa yɔ a-taa;Pakaɣ-ɩ haʋ ɛ-tɔɔnaɣ,*Nɛ ɛɛkaɣ tɛɖʋʋ lɩm kpa.»+
17 Ñɛ-ɛsa kaɣ naʋ wiyaʋ e-keɖeɣa taa;Akaɣ naʋ ɛjaɖɛ naɖɩyɛ ɖooo poliŋ taa.
18 Ŋkaɣ tɔzʋʋ* sɔɔndʋ sɔsɔtʋ ndʋ tɩ-yɔɔ ña-laŋɩyɛ taa:
«Le takayaɣ taa mayʋ wɛɛ?
Le weyi ɛmaɣzaɣ lambuu yɔ ɛwɛɛ?+
Le weyi ɛkalaɣ tilima yɔ ɛwɛɛ?»
19 Ŋŋkaɣ tasʋʋ naʋ samaɣ ŋga kaañaŋ ɛyaa yɔ,Samaɣ ŋga kɔ-yɔɔdaɣ taa wɛ cɩkpɛndʋʋ* siŋŋ nɛ ɛyʋ ɛɛpɩzɩɣ ɛnɩɩ ka-taa yɔ,Ŋga ka-nzʋlʋmɩyɛ matɩɣ nɛ ŋŋpɩzɩɣ nɛ ŋnɩɩ ndʋ kɔyɔɔdʋʋ yɔ.+
20 Na Siyɔŋ, ɖa-kazandʋ ndɩ ndɩ tɛtʋ!+
Ñɛ-ɛsa kaɣ naʋ Yeruzalɛm ɛzɩ lone nɖɩ ɖɩ-taa wɛ ɖiɣ ɖiɣ yɔ,Kizinziku ŋgʋ paakaɣ-kʋ kɛzʋʋ lone yɔ.+
Paakaɣ kpɛzʋʋ kɩ-kaŋgamasɩ kaaʋ,Nɛ paakaɣ cɛbʋ ki-nimee taa naɖɩyɛ.
21 Ɛlɛ Yehowa, Weyi ɛkɛ Sɔsɔ yɔ,Ɛkaɣ-ɖʋ kɛʋ pɔsɩ egeetiye, lɔɔŋ weyi ɩwalaa yɔ i-egeetiye,Mɛlɛnaa mba pasaɣnɩ ŋnaŋ yɔ pe-tindimiye naɖɩyɛ ɛɛkaɣ wobu peeɖeNɛ mɛlɛnaa sɔsaa nabɛyɛ ɩɩkaɣ tɩŋʋʋ peeɖe.
22 Mbʋ pʋyɔɔ yɔ Yehowa kɛnɩ ɖɔ-Tɔm Hʋyʋ,+Yehowa kɛnɩ ɖa-Paɣtʋ Ðʋyʋ,+Yehowa kɛnɩ ɖe-Wiyaʋ;+Ɛnʋ kɛnɩ Weyi ɛkaɣ ɖa-ñʋʋ yabʋ yɔ.+
23 Ñe-nimee kaɣ hɛɖʋʋ;Aapɩzɩɣ nɛ aɖɔkɩ mɛlɛ ɖaʋ sɔsɔʋ nɛ kɩsɩŋ yaa aposi mɛlɛ kɛdɛɛka.
Alɩwaatʋ ndʋ tɩ-taa lɛ, pakaɣ tayʋʋ ñɩm sakɩyɛ mbʋ pamʋwa yɔ;Halɩ kaakalasɩ kaɣ lazʋʋ wondu sakɩyɛ.+
24 Nɛ mba pɛwɛ peeɖe yɔ pa-taa nɔɔyʋ* ɛɛkaɣ yɔɔdʋʋ se: «Pɩwɩɣ-m.»+
Ɛyaa mba pɛwɛ ɛjaɖɛ taa yɔ, pakaɣ-wɛ kpeɣu pa-kɩwɛɛkɩm.+
Pɩ-tɛɛ tɔm
^ Yaa «ɖo-ɖoŋ.»
^ Koyindu tɔm pɔyɔɔdʋʋ.
^ Pɩpɩzɩɣ pɩkɛ, «ɛjaɖɛ wɩlɩɣ.»
^ Yaa «mɩ-lɩmaɣza kɩdɛkɛda.»
^ Yaa «E-lone kʋkʋyɩyɛ.»
^ Piye piye, «ɛ-kpɔnɔ.»
^ Yaa «maɣzʋʋ.»
^ Piye piye, «cukaŋ.»
^ Yaa «Nɛ tɛtʋ taa tʋ nɔɔyʋ.»
