Izaayii 34:1-17
34 Mɩ, ajɛɛ, ɩñɔtɩ mɩ-tɩ nɛ iwelisi,Mɩ, samasɩ, ikemsi.
Tɛtʋ nɛ mbʋ pisu tɩ-yɔɔ yɔ piwelisi,Ɛjaɖɛ nɛ mbʋ payɩ pɩwɛ ɖɩ-taa yɔ.
2 Mbʋ pʋyɔɔ yɔ Yehowa taa wɩɣnɩ ajɛɛ tɩŋa,+Nɛ ɛkɔ pana nɛ pɔ-sɔɔjanaa tɩŋa.+
Ɛkaɣ-wɛ ɖɩzʋʋ;Ɛkaɣ yebu nɛ pakʋ-wɛ siŋŋ.+
3 Pɛ-ɛyaa mba pakʋwa yɔ pakaɣ-wɛ lɔʋ,Nɛ po-tomnasɩ nzɩ sɩɖazaa yɔ sɩ-sɔŋ kaɣ kpaʋ;+Pa-calɩm yɔɔ lɛ, pʋŋ kaɣ yɔlʋʋ.*+
4 Ɛsɔdaa yoyaa tɩŋa kaɣ ɖazʋʋ,Nɛ pakaɣ kpiyuu ɛsɔdaa ɛzɩ takayaɣ kikpiyaɣ yɔ.
Yoyaa kpeekpe kaɣ lou,Ɛzɩ hayʋʋ ŋgʋ kilowa yɔ kɩtɔlʋʋ nɛ viiñi yɔɔ yɔNɛ ɛzɩ fiigi piye nɖɩ ɖilowa yɔ ɖɩtɔlʋʋ nɛ fiigi tɩʋ yɔɔ yɔ.
5 «Mbʋ pʋyɔɔ yɔ ma-laɣɖɛ kaɣ sɩbʋ calɩm ɛsɔdaa.+
Ðɩkaɣ tibu Edom yɔɔ se ɖɩhʋʋnɩ-kʋ tɔm,+Ðɩkaɣ tibu samaɣ ŋga manɖʋwa se manɖɩzɩɣ-kɛ yɔ kɔ-yɔɔ.
6 Yehowa wɛnɩ laɣɖɛ naɖɩyɛ; ɖɩ-yɔɔ kaɣ wɛʋ calɩm cɔɔɔ.
Ðɩ-yɔɔ kaɣ wɛʋ num cɔɔɔ,+Ɛyaŋ* nɛ pʋŋ calɩm,Ɛyaŋ tɩzɩsɩ num.
Mbʋ pʋyɔɔ yɔ Yehowa kaɣ labʋ kɩlaʋ nakʋyʋ Bozɩraa taa,Kʋgʋʋ sɔsɔʋ Edom ɛjaɖɛ taa.+
7 Pa nɛ tɛyɛ naŋ abalɩñɩŋ pakaɣ tibu,Naŋ* abalɩñɩŋ nɛ ɖoŋ tɩnaa.
Pɛ-ɛjaɖɛ kaɣ sɩbʋ calɩm,Nɛ pa-mʋzʋʋ taa kaɣ wɛʋ num cɔɔɔ.»
8 Mbʋ pʋyɔɔ yɔ Yehowa wɛnɩ kɩmɩyɛ kpaʋ kɩyakʋ,+Kɩdɛkɛdɩm mbʋ palabɩ Siyɔŋ yɔ pɩ-kɩhɛyʋʋ pɩnaɣ.+
9 Ki-lemisi* kaɣ pɩsʋʋ aŋwɔ,Nɛ kɩ-mʋzʋʋ pɩsɩ tɩm,Nɛ kɩ-ɛjaɖɛ kaɣ pɩsʋʋ ɛzɩ aŋwɔ ŋgʋ kiɖiɣni mʋʋ miŋ yɔ.
10 Ðoo taa yaa wɩsɩ taa, kɩɩkaɣ ɖɩm;Kɩ-ñɔsɩ kaɣ wɛʋ nɛ sɩkpaɣ tam.
Kpaɣ kpaɖʋʋ nɛ ŋwolo kpaɖʋʋ lɛ, kɩkaɣ kɛʋ njɛyɛ;Nɔɔyʋ ɛɛkaɣ tɩŋʋʋ kɩ-taa pɩkpaɣ pɩɖɛɛ tam.+
11 Kɩkaɣ pɩsʋʋ kpakpalikiyaɣ sɔsɔɔ nɛ samɩyɛsama pa-pʋyʋ,Nɛ kpiziŋ weyi ɩ-nɩŋgbaaŋ ɖaɣlaa yɔ nɛ kaŋgala pakaɣ caɣʋ kɩ-taa.
Ɛkaɣ posuu kɩ-yɔɔ kpɛɖɛ nimaɣ*Nɛ ɖɩzʋʋ pʋlɔŋ nimaɣ.*
12 Paakaɣ yaʋ kɩ-sɔsaa taa nɔɔyʋ se ɛtɔɔ kewiyitu,Nɛ kɩ-awumbiya tɩŋa ɩɩkaɣ tasʋʋ kɛʋ pʋyʋ.
13 Sɔɔ kaɣ ñɔʋ ki-tilima ɖoŋ ñɩna taa,Sɔɔ cɔka nɛ sɔɔ ñɩtʋ kaɣ ñɔʋ ki-lona ɖoŋ ñɩna taa.
Kɩkaɣ pɩsʋʋ tɛyɛ hasɩ ɖɩjaɣyɛ,+Nɛ taataanaa ɖɩzʋyɛ.
14 Kañɩmbusuu taa kpɩna kaɣ katʋʋ kpɩna wena awiɣ ɖoŋ yɔ,Nɛ tɛyɛ pʋnʋ* kaɣ yaʋ ɛ-taabalʋ.
Ɛɛɛ, ɖoo taa sumaɣ* kaɣ caɣʋ peeɖe nɛ kehiɣ peeɖe ka-ɖɩhɛzɩyɛ.
15 Peeɖe ɖʋm weyi eseɣ lɛɛ lɛɛ yɔ ɛkaɣ labʋ ɛ-ɖandʋ nɛ ɛɖʋ yala,Nɛ ɛkaɣ tesuu piya nɛ ekpeɣli-sɩ e-kuzotuu tɛɛ.
Ɛɛɛ, peeɖe kpeliŋ kaɣ kpeɣluu, paa halɩñɩŋgʋ ŋgʋ lɛ kɩ nɛ kɩ-abalɩñɩŋgʋ.
16 Ɩñɩnɩ Yehowa takayaɣ taa nɛ ɩkalɩ-kɛ ɖoŋ:
Kpɩna ana a-taa naɖɩyɛ ɛɛkaɣ lebu;A-taa halɩñɩnɖɛ naɖɩyɛ ɛɛkaɣ wɛʋ se ɖɩfɛyɩnɩ abalɩñɩnɖɛ,Mbʋ pʋyɔɔ yɔ Yehowa nɔɔ ɖʋnɩ paɣtʋ,Nɛ e-fezuu kpeɣlini-yɛ.
17 Ɛnʋ kɛnɩ Weyi ɛtɔ-yɛ piye yɔ,Nɛ e-nesi maɣmaɣ maɣzɩnɩ a-lone.*
Ðɩkaɣ pɩsʋʋ a-pʋyʋ tam.
Akaɣ caɣʋ ɖɩ-taa kpaɖɩŋ kpeekpe taa.
Pɩ-tɛɛ tɔm
^ Yaa «Pa-calɩm kaɣ kpem pʋŋ yɔɔ.»
^ Ɛyaŋ weyi ɩ nɛ i-ɖoŋ nɛ ɩtɩkpadɩyɩ yɔ ɩ-tɔm pɔyɔɔdʋʋ.
^ Naŋ weyi ɩ nɛ i-ɖoŋ nɛ ɩtɩkpadɩyɩ yɔ ɩ-tɔm pɔyɔɔdʋʋ.
^ Paa pɩɩla ɛzɩma yɔ, pɩkɛɣnɩ Edom tɛtʋ sɔsɔtʋ ndʋ payaɣ se Bozɩraa yɔ.
^ Yaa «nimaɣ ŋga pamaɣzɩɣna yɔ.»
^ Piye piye, «ɖɩzʋʋ pɛɛ.»
^ Pɩpɩzɩɣ pɩkɛ, «eleeu weyi ɛnɩɣzɩnɩ pʋnʋ yɔ.»
^ Kɛkɛ sumaɣ ŋga kanɩɣzɩnɩ kpizuu yɔ.
^ Piye piye, «e-nesi maɣmaɣ tayɩnɩ-yɛ ɖɩ nɛ nimaɣ ŋga pamaɣzɩɣna yɔ.»
