Izaayii 36:1-22
36 Wiyaʋ Ezekiyaasɩ pɩnaɣ 14 ñɩŋga taa, Asiirii wiyaʋ Senakeribʋ+ kpa Yuuda tɛtʋ ɖoŋ ñɩndʋ tɩŋa wayɩ nɛ ɛmʋ-tʋ.+
2 Nɛ Asiirii wiyaʋ tiyi Rabɩsakee*+ nɛ sɔɔjanaa sakɩyɛ nɛ palɩɩnɩ Lakisi+ nɛ powolo Wiyaʋ Ezekiyaasɩ cɔlɔ Yeruzalɛm. Patalɩ pasɩŋ hayo kiŋ lɩŋgamʋʋ lɔɔʋ cɔlɔ,+ ŋgʋ kɩwɛ wondu cɔtɩyʋ hayɩm habɩyɛ sɔsɔɖɛ cɔlɔ yɔ.+
3 Nɛ Hilikiya pɩyalʋ Eliyaakim+ weyi ɛɛkɛ ɖɩɣa* yɔɔ cɔnɩyʋ yɔ, nɛ takayaɣ taa mayʋ Sebɩna,+ nɛ Azaafʋ pɩyalʋ Yoowaa weyi ɛkɛ tɔm ndʋ tɩlakɩ yɔ tɩ-mayʋ yɔ, palɩɩ nɛ powolo ɛ-cɔlɔ.
4 Nɛ Rabɩsakee heyi-wɛ se: «Mentendi-mɩ, iheyi Ezekiyaasɩ se: “Tɔm tʋnɛ wiyaʋ sɔsɔ, Asiirii wiyaʋ yɔɔdʋʋ: ‘Ɛbɛ ŋtaɣ liu?+
5 Ŋwɛɛ nɛ ŋyɔɔdʋʋ se: “Mɛwɛnɩ you lɛɣtʋ nɛ ɖoŋ se mala you,” ɛlɛ pɩkɛ falaa tɔm. A-yɔɔ ŋɖʋ ñe-lidaʋ, nɛ ŋkatɩɣ se ŋkaɖɩnɩ-m?+
6 Na! Ŋtaɣ Ejipiti liu, Ejipiti ŋgʋ kɩkɛ kañɩŋgbayaɣ ŋga pɩcamɩ-kɛ yɔ, kañɩŋgbayaɣ ŋga ye ɛyʋ ɛñɩɣ kɔ-yɔɔ yɔ kɔsɔkɩ ɛ-nandaka taa nɛ pɩtʋlɩ yɔ. Mbʋ Ejipiti wiyaʋ Farawɔɔ kɛnɩ mba payɩ pataɣ-ɩ liu yɔ.+
7 Nɛ ye ŋheyi-m se: “Ðɩtaɣ ɖɛ-Ɛsɔ Yehowa liu” yɔ, pɩtɩkɛ e-lona kʋkʋya nɛ ɛ-tɛ altaarunaa Ezekiyaasɩ ɖɩzaa,+ nɛ eheyiɣ Yuuda nɛ Yeruzalɛm se: “Pɩwɛɛ se iluŋ altaaru kʋnɛ kɩ-ɛsɩndaa” yaa we?’”+
8 Lɛɛlɛɛyɔ, mentendi-ŋ, ña nɛ man-kɩbaɣlʋ Asiirii wiyaʋ ɩpɛlɩ ñɩyʋʋ:+ Mankaɣ-ŋ cɛlʋʋ kpaŋnaŋ 2 000, ye ŋpɩzɩɣ se ŋhiɣ ɩ-tɩŋa ɩ-yɔɔ caɣyaa yɔ.
9 Ye mbʋ, ɛzɩma ŋkaɣ pɩzʋʋ nɛ ŋwa paa komina ñʋʋdʋ kʋɖʋm maɣmaɣ, weyi ɛkɛ man-kɩbaɣlʋ lɩmɖʋyaa taa cikpelu yɔ, ŋgʋ Ejipiti ŋtaɣ liu se kɩha-ŋ kɛɛkɛɛnaa nɛ kpaŋnaŋ yɔɔ caɣyaa?
10 Lɛɛlɛɛyɔ, ɛzɩ pɩtɩkɛ Yehowa hanɩ-m nʋmɔʋ nɛ mankpa ɛjaɖɛ ɖɩnɛ ɖɩ-wayɩ se manɖɩzɩ-ɖɩ? Yehowa maɣmaɣ heyi-m se: “Kpa ɛjaɖɛ ɖɩnɛ ɖɩ-wayɩ nɛ ŋɖɩzɩ-ɖɩ.”»
11 Peeɖe Eliyaakim nɛ Sebɩna+ nɛ Yoowaa peheyi Rabɩsakee+ se: «Ðitendi-ŋ, yɔɔdɩnɩ ña-lɩmɖʋyaa Arameya* kʋnʋŋ taa,+ mbʋ pʋyɔɔ yɔ ɖɩnɩɣ-kʋ; taayɔɔdɩnɩ-ɖʋ Yuuda mba kʋnʋŋ taa, pɩtɩkɛ mbʋ yɔ samaɣ ŋga kɛwɛ koloŋa yɔɔ yɔ kanɩɣ.»+
12 Ɛlɛ Rabɩsakee cosi se: «Ɛzɩ mɩ nɛ mɩ-kɩbaɣlʋ mi-ɖeke mɩ-cɔlɔ man-kɩbaɣlʋ tiyi-m se mɔnkɔɔ nɛ mɔyɔɔdɩ tɔm tʋnɛ? Ɛzɩ pɩtɩkɛ ɛyaa mba pacaɣ koloŋa yɔɔ yɔ pɔ-cɔlɔ ɖɔɖɔ, mba pakaɣ tɔɔʋ pa-maɣmaɣ pa-pɩndʋ nɛ pɔñɔɔ pa-maɣmaɣ pa-hɩm ɛzɩ mɩ yɔ?»
13 Nɛ Rabɩsakee sɩŋ nɛ ekoo nɛ ɛyɔɔdʋʋ Yuuda mba kʋnʋŋ taa+ se: «Iwelisi wiyaʋ sɔsɔ, Asiirii wiyaʋ tɔm.+
14 Tɔm tʋnɛ wiyaʋ yɔɔdʋʋ: “Itaayele nɛ Ezekiyaasɩ peɣzi-mɩ, mbʋ pʋyɔɔ yɔ ɛɛpɩzɩɣ nɛ eholi-mɩ.+
15 Nɛ itaayele nɛ Ezekiyaasɩ la nɛ ɩtaa liu Yehowa+ mbʋ pʋyɔɔ yɔ eheyiɣ-mɩ se: ‘Pɩtʋʋ fɛyɩ se Yehowa kaɣ-ɖʋ holuu, nɛ paakaɣ tɛtʋ tʋnɛ ɖʋzʋʋ Asiirii wiyaʋ nesi tɛɛ.’
16 Itaawelisini Ezekiyaasɩ, mbʋ pʋyɔɔ yɔ tɔm tʋnɛ Asiirii wiyaʋ yɔɔdʋʋ: ‘Ma nɛ mɩ ɖɩla laŋhɛzɩyɛ nɛ iyebini-m mɩ-tɩ,* ɖɩnɛ ɛlɛ mɩ-taa paa weyi kaɣ tɔɔʋ ɛ-maɣmaɣ e-viiñi pee nɛ e-fiigi pee nɛ ɛñɔɔ ɛ-maɣmaɣ ɛ-lɔkɔ* taa lɩm,
17 pɩkɔɔ nɛ pɩtalɩ alɩwaatʋ ndʋ mɔnkɔŋ nɛ mankpaɣ-mɩ nɛ mowoni ɛjaɖɛ nɖɩ ɖɩwɛ ɛzɩ mɩ-maɣmaɣ mɩ-ñɩnɖɛ yɔ ɖɩ-taa,+ ɛjaɖɛ nɖɩ ɖɩ-taa wɛ tɔɔnaɣ pee nɛ vɛɛ kɩfalʋʋ yɔ, ɛjaɖɛ nɖɩ ɖɩ-taa wɛ kpɔnɔ nɛ viiñi hayɩm yɔ.
18 Itaayele nɛ Ezekiyaasɩ peɣziɣ-mɩ nɛ eheyiɣ-mɩ se: “Yehowa kaɣ-ɖʋ holuu.” Ɛzɩ ajɛɛ ɛsɔnaa taa nɔɔyʋ holi ɛ-ɛjaɖɛ Asiirii wiyaʋ nesi tɛɛ?+
19 Le Hamatɩ nɛ Arpaadɩ pɛ-ɛsɔnaa wɛɛ?+ Le Sefarɩvayim ɛsɔnaa wɛɛ?+ Ɛzɩ poholi Samaarii me-nesi tɛɛ?+
20 Ajɛɛ ɛsɔnaa kpeekpe taa lɛ, ɛsɔnaa mba holi pɛ-ɛjaɖɛ me-nesi tɛɛ, nɛ pɩwɩlɩɣ se Yehowa ñakaɣ holuu Yeruzalɛm me-nesi tɛɛ?’”»+
21 Ɛlɛ posu ɖiɣ ɖiɣ nɛ paticosi-i tɔm natʋyʋ, mbʋ pʋyɔɔ yɔ wiyaʋ kaaɖʋ-wɛ paɣtʋ tʋnɛ: «Pɩtɩpɔzɩ se icosi-i.»+
22 Ɛlɛ Hilikiya pɩyalʋ Eliyaakim weyi ɛɛkɛ ɖɩɣa* yɔɔ cɔnɩyʋ yɔ, takayaɣ taa mayʋ Sebɩna,+ nɛ Azaafʋ pɩyalʋ Yoowaa weyi ɛkɛ tɔm ndʋ tɩlakɩ yɔ tɩ-mayʋ yɔ papɩsɩ Ezekiyaasɩ cɔlɔ, pacɩyɩ po-tokonaa, nɛ pɛkɛdɩ-ɩ tɔm ndʋ Rabɩsakee yɔɔdaa yɔ.
Pɩ-tɛɛ tɔm
^ Yaa «sʋlʋm cɛɖaa ñʋʋdʋ.»
^ Yaa «awiya ɖɩɣa.»
^ Yaa «Siirii mba.»
^ Piye piye, «Iyele nɛ wazaɣ wɛɛ ɖɛ-hɛkʋ taa nɛ ɩlɩɩ nɛ ɩkɔɔ mɔn-cɔlɔ.»
^ Pʋ-tɔbʋʋ se pɔʋ ŋgʋ pohuyaa nɛ paɖʋʋ lɩm kɩ-taa yɔ.
^ Yaa «awiya ɖɩɣa.»
